„განაშენიანების ინტენსივობის მაქსიმალური კოეფიციენტის გაზრდის შესახებ“ – ასე ჰქვია განკარგულებას, რომელიც ბათუმის მერიამ მოამზადა, საკრებულომ კი გუშინ, 30 მარტს დაამტკიცა. ეს განკარგულება ავარიული სახლების პროგრამით გათვალისწინებული შეღავათის მისაღებად მოარგეს კონკრეტულ კომპანიას – შპს „ბათმშენს“.
თუმცა სამშენებლო პროექტი ამ პროგრამის ფარგლებში არ აშენდება. უფრო მეტიც, კომპანია მშენებლობას ფიროსმანის #15-ში, ცარიელ ნაკვეთზე გეგმავს, სადაც არც ავარიული სახლია და არც რაიმე შენობა.
შეღავათი განაშენიანების კოეფიციენტის [k2] 4,6-დან 12,0-მდე გაზრდას ითვალისწინებს. როგორც საკრებულოს სხდომაზე განაცხადეს, მშენებელს, კონკრეტულად შპს „ბათმშენს“, 40 სართულის აშენება სურს.
კომპანია ამბობს, რომ თუ მას კოეფიციენტს გაუზრდიან, სხვა მისამართზე ავარიულ სახლში მცხოვრებ სამ ოჯახს დააკმაყოფილებს.
„ბათმშენი“ მრავალფუნქციური კომპლექსის მშენებლობას ფიროსმანის #15-ში გეგმავს. კომპანია აქ დაგეგმილი პროექტისთვის განაშენიანების ინტენსივობის კოეფიციენტის [კ2] 12.0-მდე გაზრდის სანაცვლოდ მერიას ნამატი ფართობის 10 პროცენტს, 3500 კვ.მეტრს ჰპირდება. თუმცა, ეს კეთილი ნება კი არა, სამშენებლო კოდექსით გათვალისწინებული მოთხოვნაა.
მერია ამ შეთავაზებას დასთანხმდა, დასთანხმდა საკრებულოც.
როგორც მერიის ქალაქმშენებლობისა და ურბანული პოლიტიკის სამსახურის უფროსის მოვალეობის შემსრულებელმა, მამუკა რამიშვილმა განმარტა, ეს უდრის ერთ ხუთსართულიან სახლს, რაც მერიას საშუალებას მისცემს სხვა ავარიული სახლი გამოათავისუფლოს და შემდეგ ეს ფართობი გამოიყენოს.
სამშენებლო კოდექსის თანახმად, როცა k2 კოეფიციენტის გაზრდის სანაცვლოდ კომპანია მერიას ფართობს სთავაზობს, უნდა დაამუშაოს იმ კვარტლის განაშენიანების დეტალური გეგმა, სადაც სამშენებლო ნაკვეთი მდებარეობს. ეს გეგმა მერიასთან ერთად საკრებულომაც უნდა განიხილოს და დაამტკიცოს. სხვა შემთხვევაში კომპანია მშენებლობის ნებართვას ვერ მიიღებს.
ბათუმი, ფიროსმანის #15- სამშენებლო ფართობი 4700 კვ.მეტრია – საჯარო რეესტრის ამონაწერის მიხედვით ეს ნაკვეთი კომპანიას „თიბისი ბანკში“ იპოთეკით აქვს დატვირთული
შპს „ბათმშენი“ დეტალური გეგმის წარდგენას არ აპირებს მიუხედავად იმისა, რომ k2 კოეფიციენტის გაზრდას ითხოვს ფიროსმანის 15-ში დაგეგმილი სამშენებლო პროექტისთვის. სანაცვლოდ კომპანია მერიას სხვა რამეს სთავაზობს – ჰაიდარ აბაშიძის #81-ში „ავარიულ მრავალბინიან სახლში“ მცხოვრებ მოსახლეობას ისე დააკმაყოფილებს, რომ აქ სამშენებლო ნებართვას არ ითხოვს.
მართალია ჯერ არ ითხოვს, თუმცა მომავალში კომპანიას აქ მშენებლობის დაგეგმვას ვერავინ დაუშლის.
საქმე ისაა, რომ სამშენებლო კოდექსში სპეციალურად ბათუმისთვის ბოლოს შესული ცვლილებების შესაბამისად, კოდექსი ავარიული სახლის ჩანაცვლების შემთხვევაში არ ითხოვს დეტალური გეგმის დამუშავებას კოეფიციენტის გაზრდის პირობებშიც კი.
კანონით გაწერილი პროცედურის მიხედვით, ასეთ დროს ბათუმის მერმა წარდგინებით უნდა მიმართოს საკრებულოს, ამ ინიციატივისთვის მერს უნდა ჰქონდეს სათათბირო საბჭოს დადებითი რეკომენდაცია, საკრებულომ კი გადაწყვეტილება უნდა მიიღოს.
საკითხის წარდგენისას სხდომაზე მომხსენებელმა, ბათუმის მერიის ქალაქმშენებლობის და ურბანული დაგეგმვის სამსახურის უფროსის მოვალეობის შემსრულებელმა მამუკა რამიშვილმა თქვა, რომ ჰაიდარ აბაშიძის #81-ში მშენებელი მრავალბინიან საცხოვრებელ სახლში მცხოვრებ მოქალაქეებს დააკმაყოფილებს. იგივე წერია განკარგულების პროექტის განმარტებით ბარათშიც:
განმარტებითი ბარათი
მამუკა რამიშვილის ინფორმაციით, მშენებელმა თავად წარმოადგინა ექსპერტიზის დასკვნებიც, რომლითაც დასტურდება, რომ ჰაიდარ აბაშიძის #81-ში „მრავალბინიანი“ ავარიული სახლი საცხოვრებლად უვარგისია.
საჯარო რეესტრის მონაცემებით, ჰაიდარ აბაშიძის #81-ში რეგისტრირებულ 503 კვ/მეტრზე მხოლოდ სამი ოჯახი ცხოვრობს. ამ მისამართზე შენობა-ნაგებობების საერთო ფართობი კი 91.34 კვ.მეტრია.
ბათუმი, ჰაიდარ აბაშიძის #81 – მერიის ინფორმაციით აქ მრავალბინიანი სახლია, სინამდვილეში კი ეს სამი ბარაკული ტიპის სახლია პატარა, გამწვანებული ეზოებით
ბათუმი, ჰაიდარ აბაშიძის ქუჩა #81
შპს „ბათმშენი“ ჰაიდარ აბაშიძის #81-ში უკვე დარეგისტრირებულია როგორც მომავალი მესაკუთრე, რეგისტრაციის საფუძველი წინარე ნასყიდობის ხელშეკრულებაა. „ბათუმელებისთვის“ უცნობია, რას გულისხმობს ინვესტორსა და ამ ოჯახებს შორის შეთანხმება, თუმცა ვიცით, რომ კომპანია მიიღებს ფიროსმანის ქუჩაზე დაგეგმილი პროექტის რამდენიმე სართულით გაზრდის ნებართვას. პარალელურად კი 500 კვ.მეტრს ქალაქის ასევე სასურველ უბანში, ჰაიდარ აბაშიძის #81- ში.
განმარტებით ბარათში საყურადღებოა კიდევ ერთი საინტერესო დეტალი: მერია წერს, რომ 3500 კვ.მეტრამდე ბინები, რომლებიც კომპანიამ მერიას უნდა გადასცეს, ბაზარზე დაახლოებით 10 მილიონი ლარი ღირს.
