დღეს, 19 მაისს, რუსეთიდან ფრენების საკითხს ბათუმის საკრებულოს სხდომაზე საკრებულოს წევრი „ლელოდან“ ვაჟა დარჩია გამოეხმაურა. შემდეგ კი მან „ოცნების“ ფრაქციის თავმჯდომარეს უთხრა – კრემლთან ფოტო დაგიძველდა და ახალს გადაიღებ მარგარიტა სიმონიანის მიწვევითო:
„აღდგა უკვე ფრენები და შეგიძლიათ გააგრძელოთ, შემდეგი ფოტო მარგარიტა სიმონიანის მოწვევით ჩახვიდეთ და გადაიღოთ.“
„ოცნების“ ფრაქციის გაბრაზებულმა თავმჯდომარემ, თენგიზ აფხაზავამ მას უპასუხა: „მევახშეების პარტიის ნაწილი ხარ. გაიგე?“
როცა ეს პასუხი კოლეგის კრიტიკის საპირწონედ მიიჩნია, ამ დროს თენგიზ აფხაზავას ალბათ არ ახსოვდა, რომ ბანკი ბიძინა ივანიშვილსაც აქვს. თანაც, ივანიშვილის ბანკი გაცილებით მსხვილ ქონებასთან დაკავშირებულ საქმიანობებს აფინანსებს სასესხო ხელშეკრულებებით.
რუსეთიდან ფრენებთან დაკავშირებით სიტყვიერი დაპირისპირების გასანეიტრალებლად, თავისი სიტყვა საკრებულოს თავმჯდომარემაც თქვა. ბევრი ქართველი ცხოვრობს რუსეთის ფედერაციაში და ფრენების აღდგენით პირველ რიგში ისინი იხეირებენო:
„თქვენ იცოდეთ, რომ ამით დიდ შეღავათს ნახავენ ის ოჯახები, რომლებიც ქართველები არიან.“
მილიონი თუ 258 ათასი? – რამდენი ქართველი ცხოვრობს რუსეთში რეალურად
„ქვეყანა ვერ მიიღებს კანდიდატის სტატუსს ბატონო რამაზ და ამაზე ჩვენი პარტნიორები ღიად საუბრობენ“, – უპასუხა მას ვაჟა დარჩიამ.
თენგიზ აფხაზავამ სხდომაზე დაადასტურა, რომ კრემლთან ფოტო ნამდვილად აქვს გადაღებული:
„ჩემი სურათები როცა ნახეთ რამდენი წლის უკან იყო და ეს იყო მსოფლიოს სამეცნიერო ინოვაციური ფორუმი, რომელზეც ვიყავი ჩასული სტუმრად – მეტი არაფერი. და მეორე, იმ ფორუმის ორგანიზატორი იყო იტალიის პრემიერ-მინისტრი, ჩინეთის პრემიერ-მინისტრი და ისრაელის პრემიერ-მინისტრი. ჩაატარეს მოსკოვში და არ წავსულიყავი? – ამიტომ ბიჭო, ასეთ განცხადებებს რომ აკეთებ, ცოტა აზრი ხომ უნდა დაატანო, რომ წითელ ხაზებს არ გადახვიდე იქით. თქვენი ფრაქციის თავმჯდომარეო და ასე შემდეგ, რომ გიყურებ მგონია გაეროს სხდომიდან ხარ ახალი ჩამოსული. მოდიხარ აქ პოლიტიკურ „რაზბორკებს“ არჩევ. ასეთი მაგარი პოლიტიკური ანალიზის გაკეთება თუ შეგიძლია, დადე რა სოციალურ ქსელში და მომხრეები მოიპოვე, ერთპარტიული მევახშეების პარტიის ნაწილი ხარ. გაიგე? – თავს უფლებას ნუ აძლევ ბიჭო შენ… თორემ გაგცემთ საკადრის პასუხს.“
„ზედმეტებში გადადიხართ უკვე ორი სხდომაა ბატონო თენგო და ახლაც ზედმეტებში გადადიხართ, მე მგონი ამას საზოგადოება კარგად ხედავს“, – უპასუხა მას ვაჟა დარჩიამ.
მანამდე კი ვაჟა დარჩიამ რუსეთიდან ფრენებთან დაკავშირებით თავისი პოზიცია ცოტა უფრო ვრცლად ჩამოაყალიბა.
„ეს დრო, რაც წინა სხდომის შემდეგ გავიდა, დატვირთული იყო ისეთი არასასიამოვნო ფაქტებით, რაზეც მოქალაქეები დიდწილად შეწუხდნენ. ეს, რა თქმა უნდა, ეხება, რუსეთის ფედერაციის გადაწყვეტილებას, შემდეგ უკვე ჩვენს დამოკიდებულებას ამ ყველაფრის მიმართ. დამრჩა შთაბეჭდილება, რომ ჩვენს ხელისუფლებას ცენტრალურ დონეზე ძალიან მოეწონა პუტინის გადაწყვეტილება…
რანაირად აპირებთ რუსეთთან აღადგინოთ ფრენები, ისეთ კომპანიებთან, რომლებსაც აფხაზეთი და სამხრეთ ოსეთი ფაქტობრივად აღიარებული ჰქონდათ და ეს მხოლოდ იმის გამო წაშალეს საიტიდან, რომ ჩვენთან ფრენები განეხორციელებინათ. მერე ამით იყავით აღფრთოვანებულები.
მოსახლეობა იძახდეს, რომ რუსეთის წარმომადგენლის შემოსვლა პრობლემაა და ამ დროს სალიბაურში სოფელს აშენებენ, ფრენებს ვამარტივებთ. მარგარიტა სიმონიანი გვეუბნება ქართველები ისე კარგად იქცევიან, რომ მომავალ 9 მაისს ჩვენს აღლუმზეც ჩამოვლენო“.
თენგიზ აფხაზავას კრემლთან გადაღებული ფოტოები სოციალურ ქსელში განთავსებული არ აქვს.
მოსკოვმა 10 მაისს მოხსნა შეზღუდვა საქართველოსთან პირდაპირ ფრენებზე. მოსკოვში ამ გადაწყვეტილებას „ჰუმანიტარული ხასიათის“ უწოდეს.
საქართველოს ხელისუფლება მოსკოვის გადაწყვეტილებას მიესალმება და ამბობს, რომ ეს გაუმარტივებს ცხოვრებას რუსეთში მცხოვრებ „მილიონ ქართველს“. მთავრობაში აგრეთვე აცხადებენ, რომ მხოლოდ არასანქცირებული კომპანიები და ხომალდები შეძლებენ ფრენას. პოლიტიკოსების და მოქალაქეთა ნაწილი ავიამიმოსვლის აღდგენას აპროტესტებს.
დღეს პირველი საპროტესტო აქცია თბილისის საერთაშორისო აეროპორტთან გაიმართა, სადაც პოლიციამ 6 ადამიანი დააკავა. აქციის მონაწილეები აპროტესტებდნენ რუსეთთან პირდაპირი ფრენების აღდგენის შემდეგ პირველი რეისის ჩამოფრენას, რომელიც რუსულმა კომპანიამ, „აზიმუტმა“ შეასრულა.
დღეს, 22 საათიდან კიდევ ერთი საპროტესტო აქცია იგეგმება პარლამენტთან.
___
ფოტო: ვაჟა დარჩია და თენგიზ აფხაზავა.
