რუსეთის მიერ ოკუპირებული ყირიმის ტერიტორიაზე რკინიგზის აფეთქებამ, რომელიც 18 მაისს მოხდა, შესაძლოა შეაფერხოს შავი ზღვის ფლოტისთვის შეიარაღების, კერძოდ, „კალიბრის“ ტიპის ფრთოსანი რაკეტების მიწოდება – წერს ბრიტანეთის თავდაცვის სამინისტროს დაზვერვა ყოველდღიურ, მოკლე მიმოხილვაში, დღეს, 19 მაისს.
აფეთქება რკინიგზაზე, ოკუპირებულ ყირიმში, სიმფიროპოლის მახლობლად, 18 მაისს მოხდა. ლიანდაგის დაზიანების შედეგად მატარებელი რელსებიდან გადავიდა და გადაკეტა სევასტოპოლისკენ, რუსეთის ფედერაციის შავი ზღვის ფლოტისკენ მიმავალი ერთადერთი სარკინიგზო ხაზი.
ბრიტანული დაზვერვა წერს, რომ რუსეთი შეეცდება სწრაფად შეაკეთოს ხაზი, მაგრამ ეს ინციდენტი შეაფერხებს იარაღის მიწოდებას რუსეთის ფლოტისთვის.
„ნებისმიერი დივერსია ამ მგრძნობიარე ზონაში კიდევ უფრო გააძლიერებს კრემლის შეშფოთებას ყირიმის სხვა საკვანძო ინფრასტრუქტურის დაცვაზე. ნახევარკუნძული ინარჩუნებს სასიცოცხლო ფსიქოლოგიურ და ლოგისტიკურ როლს უკრაინაში რუსეთის ომისთვის“ – წერს ბრიტანული დაზვერვა.
_____________
ფოტო: „რია ნოვოსწი“
