ჩაის სეზონი თურქეთში ქართველი მკრეფავების გარეშე – ფასი გავზარდეთ, მაგრამ მაინც აღარ მოდიან

„ჩაის კრეფის სეზონი დაიწყო, მაგრამ ჯერ ვერ ვიწყებთ, მკრეფავებს ველით. დაკრეფის ფასი მოვამატეთ წელს, ქართველები მაინც აღარ მოდიან“, – ამბობს ერჰან ქოსიოღლუ, რომელსაც ჩაის პლანტაცია აქვს რიზეში, დემირისარში და მკრეფავების გამოჩენას ელის.

წინა წლებში თურქეთში თხილისა და ჩაის დასაკრეფად საქართველოს ასეულობით მოქალაქე გადადიოდა თურქეთში სამუშაოდ. წელს, გასული წლის მსგავსად, თურქეთში ჩაიზე სამუშაოდ წამსვლელი ადამიანების რაოდენობა ისევ მკვეთრად შემცირებულია. მუშახელი საქართველოდან ევროკავშირის ქვეყნებში არჩევს დასაქმებას.

ერჰან ქოსიოღლუს თქმით, წელს 1 ტონა ჩაის დაკრეფის საფასური 3 000 ლირამდე გაიზარდა [19 მაისის კურსით ეს 383 ლარია], ამას ემატება კვების ხარჯი დღეში – 500 ლირა [63 ლარი]. გასულ წელს კი, თურქი დამსაქმებლები ტონა ჩაიზე 2000 – 2200 ლირას იხდიდნენ.

„ასევე შესაძლებელია შეთანხმება დღიურ ანაზღაურებაზე – დღეში 750 ლირა [95 ლარი],“ – დასძინა ერჰან ქოსიოღლუმ.

ერჰანი ამბობს, რომ ქართველი მკრეფავების მუშაობა განსაკუთრებით მოსწონს და წელსაც მათ გამოჩენას ელის.

„სამუშაოდ ჩამოდიან უფრო ავღანელები, ასევე სხვა ხალხი, მაგრამ ნელა მუშაობენ… მე ისევ ქართველებთან ერთად მინდა ვიმუშაო,“ – ამბობს ერჰან ქოსიოღლუ.

თურქეთი, რიზე, სოფელი ჩაიელი, ერჰან ქოსიოღლუს ფოტო