საქართველოს საავტომობილო გზების დეპარტამენტის ინფორმაციით, სამტრედია-გრიგოლეთის და გრიგოლეთი-ქობულეთის ჩქაროსნული ავტომაგისტრალის, ჯამში 15 კილომეტრზე მოძრაობა გაიხსნა.
- გაიხსნა სამტრედია-გრიგოლეთის ჩქაროსნული ავტომაგისტრალის 10-კილომეტრიანი მონაკვეთი, რომელიც გადის ლანჩხუთის მუნიციპალიტეტის ტერიტორიაზე, სოფლების – ხაჯალიას და ახალსოფლის ჩრდილოეთით, კვეთს სოფელ სუფსის გარკვეულ ნაწილს და უერთდება სამტრედია-ლანჩხუთი-გრიგოლეთის არსებულ გზას გრიგოლეთთან.
დეპარტამენტის ინფორმაციით, ეს მონაკვეთი არის „4-ზოლიანი ასფალტ–ბეტონის გზა, სადაც აშენდა 2 პარალელური გზაგამტარი და 1 სატრანსპორტო კვანძი. სამუშაოები ევროპის საინვეტიციო ბანკის (EIB) მხარდაჭერით მიმდინარეობდა, რომლის ღირებულებამაც 113 მილიონი ლარი შეადგინა.
- ასევე გაიხსნა გრიგოლეთი-ქობულეთის ჩქაროსნული ავტომაგისტრალის 5-კილომეტრიანი მონაკვეთი, რომელიც ურეკის მიმდებარედ, კაპროვანთან [შეკვეთილში გადასასვლელ ხიდთან] იწყება, გაივლის საკონცერტო დარბაზ „ბლექ სი არენას“ უკან და შეკვეთილში, ქობულეთის შემოვლით გზას უკავშირდება.
ეს 5-კილომეტრიანი მონაკვეთიც არის 4-ზოლიანი მაგისტრალური გზა. „მთლიანობაში გრიგოლეთი-ქობულეთის შემოვლითი გზის სამშენებლო სამუშაოები მოიცავს 14.4 კმ-იანი 4 ზოლიანი ასფალტ–ბეტონის გზის, 22 სახიდე გადასასვლელის, 4 სატრანსპორტო კვანძის, წყალგამტარი მილების და მიწისქვეშა გასასვლელების მშენებლობას. სამუშაოები აქტიურად გრძელდება, რათა 14 კმ-იანი მონაკვეთი ექსპლუატაციაში სრულად 2023 წელს შევიდეს.“ – აცხადებს დეპარტამენტი.
ჩქაროსნული ავტომაგისტრალის ახალგახსნილი მონაკვეთები [მონიშნულია წითელი ხაზით]
მთავარი ფოტო: ახალგახსნილი მაგისტრალი / საავტომობილო გზების დეპარტამენტის ფოტო
ამავე თემაზე:
„დასრულდება ავტობანის მშენებლობა“ – „ოცნების“ შეუსრულებელი საარჩევნო დაპირება
