ბათუმში ფრიდონ ხალვაშის გამზირი 2023 წლის 21 მაისამდე იქნება გადაკეტილი. ქუჩის ეს მონაკვეთი ბათუმი-ახალციხის ავტომაგისტრალის ნაწილია და ის 3 მაისს ისე გადაკეტეს, რომ საქართველოს საავტომობილო გზების დეპარტამენტს ამის შესახებ ინფორმაცია თავის ოფიციალურ ვებგვერდზე და ფეისბუქზე წინასწარ არ გამოუქვეყნებია.
ინფორმაცია 4 მაისს გამოაქვეყნეს, ოღონდ ძველი თარიღით – 30 აპრილით.
გზების დეპარტამენტში „ბათუმელებს“ უთხრეს, რომ ჰქონდათ ტექნიკური პრობლემა, რის გამოც ინფორმაცია ვერ ატვირთეს: „ხარვეზი დღეს გამოსწორდა“.
საავტომობილო გზების დეპარტამენტის მიერ გამოქვეყნებული ინფორმაციით:
- ფრიდონ ხალვაშის ქუჩაზე მიმდინარე სარეაბილიტაციო სამუშაოების წარმოებისთვის საჭიროა 2023 წლის 2 მაისის 07:00 სთ-დან 21 მაისის 00:00 სთ-მდე გზის კმ1-კმ3 მონაკვეთის სრულად ჩაკეტვა. ხოლო კმ3-კმ5 მონაკვეთზე ერთი სამოძრაო ზოლის [ბათუმიდან ახალციხის მიმართულებით] ჩაკეტვა და ახალციხიდან ბათუმის მიმართულებით მოძრავი მსუბუქი ავტოტრანსპორტის გატარება ცალმხრივად.
„ჩაკეტვის პერიოდში ახალციხიდან ბათუმის მიმართულებით მოძრავი მსუბუქი ავტოტრანსპორტი იმოძრავებს მაჭავარიანის ქუჩის და საერთაშორისო მნიშვნელობის სენაკი-ფოთი (ასაქცევი)-სარფის საავტომობილო გზის გავლით.
ხოლო, ბათუმიდან ახალციხის მიმართულებით მოძრავი მსუბუქი ავტოტრანსპორტი იმოძრავებს საერთაშორისო მნიშვნელობის სენაკი-ფოთი (ასაქცევი)-სარფის საავტომობილო გზის 109-ე კმ-დან ჭოროხისა და ა. შანიძის ქუჩების გავლით და დაუკავშირდება შიდასახელმწიფოებრივი მნიშვნელობის ბათუმი (ანგისა)-ახალციხის საავტომობილო გზას მე-5 კმ-ზე.
აღნიშნული რეჟიმით მოძრაობა განხორციელდეს შსს-ს შესაბამისი რეგიონული ქვედანაყოფების უშუალო ზედამხედველობით და კოორდინაციით“, – აცხადებენ დეპარტამენტში.
ხალვაშის გამზირის რეაბილიტაციაზე ხელშეკრულება შპს „ერ ტე დე“-სთან 19 399 999 ლარზეა გაფორმებული. ფრიდონ ხალვაშის გამზირის რეაბილიტაცია 2023 წლის თებერვლამდე უნდა დასრულებულიყო, თუმცა ხელშეკრულებაში შევიდა ცვლილება და სამუშაოების დასრულების დრო 2023 წლის ივნისამდე გადავადდა.
„ხალვაშის გამზირზე მთლიანად დაიგება ასფალტის საფარი და ავტოტრანსპორტის მოძრაობა ორმხრივად გაიხსნება ივნისის დასაწყისში. პარალელურად, გაგრძელდება ტროტუარების და სხვა სამუშაოები“, – გვითხრეს გზების დეპარტამენტში.
სატენდერო პირობებში თავის დროზე ასევე აღნიშნული იყო, რომ სამუშაოები ჩატარებულიყო ეტაპობრივად, „ჯერ გზის ერთ ნახევარზე, მეორე ნახევარზე ტრანსპორტის მოძრაობის შენარჩუნებით, შემდეგ კი პირიქით [გარდა ხიდური გადასასვლელების მოწყობისა]“.
„21 მაისამდე გზის მთლიანად ჩაკეტვა გადაწყდა ალბათ, იქიდან გამომდინარე, რომ სამუშაოების წარმოების პროცესში გზის ერთ ნახევარზე მოძრაობამ, დიდი ნაკადების გამო, დიდი საცობები შექმნა. ამიტომ, უმჯობესია სახიდე გადასასვლელების და ასფალტის დაგების პერიოდში გზა მთლიანად იყოს გადაკეტილი და შემდეგ ორმხრივად გაიხსნება“, – გვითხრეს საავტომობილო გზების დეპარტამენტის პრესსამსახურში.
4 მაისის მდგომარეობით ფრიდონ ხალვაშის გამზირი მთლიანად გადაკეტილია მეჯინისწყლის ხიდის მიმდებარე მონაკვეთში:
