სამხრეთ აფრიკაში საქართველოს საკონსულოდან მიღებული ინფორმაციის თანახმად, 2 მაისს, ღამის საათებში, გაბონის ტერიტორიულ წყლებში ღუზაზე მდგომი გემიდან გაიტაცეს სამი მეზღვაური, მათ შორის ორი საქართველოს მოქალაქეა.
ინფორმაციას საზღვაო ტრანსპორტის სააგენტო ავრცელებს.
სააგენტოს ცნობით, გემზე დარჩენილ მეზღვაურებს საფრთხე არ ემუქრებათ.
„საზღვაო ტრანსპორტის სააგენტო, საგარეო საქმეთა სამინისტროსთან ერთად, აქტიურად მუშაობს, მათ შორის საკრუინგო და გემთმფლობელ კომპანიებთან ჩვენი მეზღვაურების ტყვეობიდან გამოსახსნელად“ – იუწყება სააგენტო.
სააგენტოს წარმომადგენლები უკვე დაუკავშირდნენ მეზღვაურების ოჯახის წევრებს და მიაწოდეს ინფორმაცია.
„ქართველი მეზღვაურების უსაფრთხოებიდან გამომდინარე, მოგიწოდებთ, თავი შეიკავოთ დეტალებისა და რამე სახის მაიდენტიფიცირებელი ინფორმაციის საინფორმაციო საშუალებებით გავრცელებისგან“ – აღნიშნულია საზღვაო ტრანსპორტის სააგენტოს განცხადებაში.
