დიდი ბრიტანეთის პრემიერ-მინისტრმა რიში სუნაკმა Sky News-თან ინტერვიუში განაცხადა, რომ დასავლელი მოკავშირეები ურყევნი არიან თავიანთ გადაწყვეტილებაში, მხარი დაუჭირონ უკრაინას.
„ჩვენ არსად წავალთ“ – ასეთია რიში სუნაკის გზავნილი რუსეთის პრეზიდენტის, ვლადიმერ პუტინისადმი.
ინტერვიუ Sky News-მა G7-ის სამიტზე ჩაწერა, რომელიც იაპონიაში, ჰიროსიმაში მიმდინარეობს დღეს, 19 მაისს.
„რუსეთმა უნდა იცოდეს, რომ ურყევი ვართ უკრაინის მხარდასაჭერად არა მხოლოდ აქ და ახლა, არამედ გრძელვადიან პერსპექტივაში“, – განაცხადა ბრიტანეთის პრემიერმა.
დიდი ბრიტანეთი რუსეთის თავდასხმის პირველივე დღიდან უჭერს მხარს უკრაინას.
გასული კვირის ბოლოს ცნობილი გახდა, რომ დიდი ბრიტანეთი უკრაინას მიაწვდის Storm Shadow-ის რაკეტებს. ეს არის მაღალი სიზუსტის რაკეტა, რომელიც გათვლილია ისეთ მსხვილ შენობა-ნაგებობებზე თავდასხმისთვის, როგორიცაა: პორტის ინფრასტრუქტურა, ბუნკერები, აეროდრომები და ხიდები.
ასევე, ევროპული საბჭოს პრეზიდენტმა ჩარლზ მიშელმა განაცხადა, რომ ჰიროსიმაში G7 ქვეყნების ლიდერები განიხილავენ უკრაინის სამხედრო მხარდაჭერის გაზრდას, მათ შორის, F-16-ის მოიერიშე თვითმფრინავების გადაცემას.
____________
ფოტოზე: რიში სუნაკი და ვოლოდიმირ ზელენსკი.