ხვალ, 22 მაისს, USAID-ის ენერგეტიკული მომავლის უზრუნველყოფის პროგრამა საქართველოში და GREDA საქართველოს ენერგოუსაფრთხოების უპირატესობების, ეკონომიკური ზრდისა და ქართველი ხალხის კეთილდღეობის შესახებ ბათუმელი მოსწავლეებისთვის ორ ლექციას გამართავს.
როგორც ამ ღონისძიების ორგანიზატორები წერენ, „ცნობიერების ამაღლების კამპანიის ფარგლებში დაგეგმილი ლექციები მიზნად ისახავს განახლებადი ენერგიისა და გარემოს დაცვის შესახებ მომავალ თაობებში ცოდნის ამაღლებას. მიზნობრივი ინტერვენციები ახალგაზრდებში მდგრადი გადაწყვეტილებებისა და ქვეყნის ენერგეტიკულ უსაფრთხოებაში მათი წვლილის წასახალისებლად არის მიმართული.
ხოლო, ახალი იდეები და ტექნოლოგიები მათ კრიტიკული აზროვნების განვითარებაში და ენერგეტიკული პრობლემების მოგვარების ახალი გზების პოვნაში დაეხმარება“.
ლექცია ბათუმში გაიმართება ხვალ 13:30 საათზე, ბათუმის ამერიკულ კუთხეში, რომელიც მდებარეობს ლეონიძის #15-ში.
ხვალვე კიდევ ერთი ლექცია გაიმართება ბათუმის ფიზიკისა და მათემატიკის სკოლაში [ფიროსმანის ქ. N5].
23 მაისს კი ლექციები იგეგმება შუახევსა და ხულოში.
პროექტის ორგანიზატორებს მიაჩნიათ, რომ „ახალგაზრდების ჩართულობა მნიშვნელოვანია ქვეყნის მდგრადი მომავლისთვის. ამ ინიციატივის მეშვეობით, USAID ცდილობს შექმნას განახლებადი ენერგიის უფრო მრავალფეროვანი და ინკლუზიური მომავალი და უზრუნველყოს, რომ სუფთა და მდგრადი ენერგიის შესახებ ყველას ზუსტი აღქმა ჰქონდეს“.
