Batumelebi

ბავშვობიდან ლიდერის თვისებით გამოირჩეოდა, სკოლის ასაკიდან არაერთ პროექტში თუ თამაშში მიუღია მონაწილეობა. „ბავშვობაში რამდენჯერმე შემეცვალა აზრი პროფესიასთან დაკავშირებით, თავიდან ბიოლოგობა მინდოდა, შემდეგ დავიწყე ლექსების წერა, ჩანახატებსაც ვაკეთებდი, მსურდა მწერალი გამოვსულიყავი. სკოლის დამთავრების შემდეგ კი სრულიად განსხვავებულ სფეროში მოვხვდი, სამართალმცოდნეობის ფაკულტეტზე ჩავაბარე. დღეს კვალიფიციური იურისტი ვარ. უნივერსიტეტის დამთავრების შემდეგ სხვადასხვა პროფესიით მომიწია მუშაობა. საბოლოოდ კი მოვხვდი ტურისტულ კომპანიაში, სადაც ყველაზე კარგად ვიგრძენი თავი. თავიდან ძალიან მიმიზიდა, შემდეგ შემიყვარდა. სიამოვნებას მანიჭებს სხვადასხვა ტიპის ადამიანებთან ურთიერთობა და მათზე გარკვეულწილად ზრუნვა, საუკეთესო არჩევანის შეთავაზება, დაუღალავი შრომა, რაც საბოლოოდ მათშივე თავისთავად წარმოქმნის კმაყოფილების გრძნობას და შედეგად უფრო მაახლოვებს ამ ადამიანებთან.” – გვიამბობს ირმა.

ტურიზმის სიყვარულმა დიდი როლი იქონია მის ცხოვრებაში, სწორედ ამიტომ, რაღაც ეტაპზე ის თავის დროს მხოლოდ ამ სფეროს უთმობს. თუმცა არ ფიქრობს, რომ სამუდამოდ ასე იქნება. ამბობს, რომ სულ ძიების პროცესშია: „შემოვრჩი ტურიზმს, ამ ეტაპზე ჩემი ყველაზე დიდი საზრუნავია ამ ბიზნესის განვითარება. მაქსიმალურად ვცდილობ გამოვიყენო დრო, მაგრამ ის მაინც არ მყოფნის. ტრამპი წერდა: „დრო ფულზე უფრო ღირებულია, რადგან ფულის გამომუშავება სხვადასხვა გზით ყოველთვის შესაძლებელია, მაგრამ დროის უკან დაბრუნება შეუძლებელი.” მთავარი მაინც ისაა, რომ დროს გაასწრო, სულაც ვერ იგრძნო ის, განსაკუთრებით კი მაშინ, როდესაც შენი საქმე ასე გიყვარს და არ ზოგავ თავს და ყველაფერ ამას სიამოვნებით აკეთებ.

საზღვარგარეთ მომისმენია ადამიანებისგან, რომლებიც მუშაობენ, რომ ისინი თავს უმუშევრებად მიიჩნევენ. ამას იმიტომ ამბობენ, რომ არ აკეთებენ იმ საქმეს, რაც მათ გულითა და სულით სურთ. მუშაობენ მხოლოდ და მხოლოდ ფინანსური სარგებლის გამო. მე თამამად შემიძლია ვთქვა, რომ დღეს მე ვმუშაობ და ვაკეთებ იმას, რაც მიყვარს.”

საკუთარი ტურისტული კომპანია რამდენიმე წლის წინ ირმასაც ჰქონდა: „ამბიციური ვიყავი, მეგონა, რომ ყველაფერი ზუსტად მქონდა გათვლილი და გამომივიდოდა, მაგრამ ცოტა ვიჩქარე, ერთი წელი ვიმუშავე. ახლა ვნანობ კიდეც, მაგრამ მაშინ საკმაო გამოცდილება არ მქონდა. შეცდომებზე არ ვწუხვარ, თუ არ შეცდი, ისე წინ ვერ წახვალ, საკუთარ შეცდომებზე როცა სწავლობ, უფრო ძლიერი ხდები.”
ყველაზე რთული პერიოდი ინგლისს უკავშირდება, როცა ჩვილი ბავშვით უცხო ქვეყანაში დამხმარეს გარეშე აღმოჩნდა: „მე და ჩემს მეუღლეს ენის შემსწავლელი კურსების გავლა გვინდოდა, რამდენიმე თვის დაქორწინებული ვიყავით, რომ წავედით. კოლეჯი დავამთავრე ინგლისში. ისე მოხდა, რომ იქ გამიჩნდა ჩემი პირველი შვილი, მარი. დიდი ბედნიერებაა დედობა, თუმცა როცა არავინ გეხმარება და ხარ მარტო ამდენი პრობლემის წინაშე, რთულია. ჩემი მეუღლე მუშაობდა, მე კი მთელი დღე ბავშვთან მიწევდა ყოფნა მარტოს, ეს, რა თქმა უნდა, რთული იყო. თუმცა საზღვარგარეთ ცხოვრებამ მომცა დიდი გამოცდილება და განსხვავებული ხედვის უნარი.”

ყველაზე ფასეული ირმასთვის ოჯახია. ამბობს, რომ მისი ყველაზე დიდი მხარდამჭერი მეუღლეა: „ჩემი პროფესიული წარმატება გარკვეულწილად მეუღლის დამსახურებაა, ის მე მხარს მიჭერდა, გულშემატკივრობდა. ჩემი მეუღლე დავითი, პროფესიით ეკონომისტია, ახლა თავის ბიზნესს უძღვება. სტუდენტი ვიყავი, როცა გავიცანი, მას შემდეგ დაიწყო ჩვენი ურთიერთობა. ორივეს გადატვირთული გრაფიკი გვაქვს, ამიტომაც ამ მხრივ პრეტენზიები ერთმანეთთან არ გვაქვს. ერთადერთი რასაც ვაკეთებ, ჩემს შვილებს ვეხმარები უცხო ენების მომზადებაში. ცოტა განაწყენებულები არიან ბავშვები, ძირითადად ბებია და ბაბუა ზრუნავს მათზე. ჩემს მეუღლეს დაჰყავს ბავშვები სკოლაში, სპორტზე, ცეკვაზე. მარი 12 წლისაა, საბა – 9 წლის.”

ირმას 12 წლის ქალიშვილს მშობლების მაგალითი ხიბლავს, ის თავის დღიურში ბიზნესგეგმას ადგენს: „რასაც სახლში ვსაუბრობთ და გარჩევის საგანია, ბავშვები საგულდაგულოდ ისმენენ და ცდილობენ თავიანთი ბიზნესიდეების შემუშავებას. მარის ბავშვთა გასართობი ცენტრის გაკეთება სურს, ბიზნესგეგმაში კი ეწერა, რომ პირველ რიგში გამოკითხვას ჩაატარებდა და ასე გაიგებდა, თუ რა სურთ ბავშვებს, რადგანაც ზუსტად ის შეეთავაზებინა შემდგომ მათთვის. ძალიან მახარებს ჩემი შვილის ეს დამოკიდებულება და ასეთი მიდგომა. საბას სურდა არქიტექტორობა, ახლა კი უნდა გახდეს გამომგონებელი, ვკითხე, რა უნდა გამოიგონო-მეთქი? – კალამი, რომელიც თავისით წერსო. ეს სურვილი აქვს, იმიტომ, რომ წერა ეზარება, თუმცა რატომაც არა?! თუ უნდა რაღაცის გაკეთება, გააკეთოს. ყველა დიდ გამოგონებას სიცილით ხვდებოდნენ თავიდან. მე არ დავცინი, უბრალოდ, ვურჩიე ფურცელზე გადაიტანოს თავისი აზრები, შედეგ ისწრაფოს ამ იდეების განხორციელებისკენ. ჩემს შვილებს ვაძლევ თავისუფლებას, მათ უნდა მივცეთ იმის საშუალება, რომ თავად გააკეთონ არჩევანი და განვითარდნენ იმ კუთხით.” – ამბობს ირმა.

რაზე ოცნებობ? – ამ კითხვაზე პასუხის გასაცემად დიდხანს ფიქრი არ სჭირდება. ოცნებობს დიდ სახლზე, ტერასითა და აუზით: „განსაკუთრებით ყურადღებას ვაქცევ ეზოს. ლამაზი ეზო მინდა მქონდეს, ეზოში კი დიდი, ფუმფულა ძაღლი დარბოდეს. ძალიან მიყვარს ძაღლები. სახლში ახლაც გვყავს ინგლისური სეტერი, თუმცა ბინაში რთულია მოვლა და აივანზე უწევს ცხოვრება.” – ამბობს ირმა.

ამ მიმართულებით სწავლებასა და კვლევას ტრადიციულად ემსახურება ფაკულტეტზე მოქმედი საბაკალავრო, სამაგისტრო და სადოქტორო საგანმანათლებლო პროგრამები. ფაკულტეტი ქართულ საგანმანათლებლო სივრცეში ერთ-ერთი ლიდერია ბიომრავალფეროვნების, ეკოლოგიური სისტემების, შავი ზღვის ეკოქიმიური მონიტორინგის, გენეტიკური პოპულაციების კვლევისა და სწავლების თვალსაზრისით.

საბუნებისმეტყველო და ჯანდაცვის  მიმართულებას ირჩევს ადამიანი, რომელსაც ლაბორატორიული კვლევა აინტერესებს, მოგზაურობა ხიბლავს ან ადამიანის ჯანმრთელობის დაცვის სამსახურში ყოფნის სურვილი აქვს.

თითქმის ყველა საბუნებისმეტყველო დარგი ექსპერიმენტულია და აქედან გამომდინარე, საგანმანათლებლო პროგრამების მნიშვნელოვანი წილი პრაქტიკულ კურსებს უკავია. ბიოლოგიისა და ქიმიის სასწავლო კურსების ათვისება ფაკულტეტის სასწავლო ლაბორატორიებში მიმდინარეობს. სტუდენტები უშუალოდ მონაწილეობენ ლაბორატორიულ კვლევაში. სამაგისტრო და სადოქტორო პროგრამების ნაწილი კი უნივერსიტეტის სამეცნიერო კვლევით ინსტიტუტებში და რეგიონში მოქმედ სხვა სამეცნიერო დაწესებულებებში სრულდება, რომლებთანაც ფაკულტეტს გაფორმებული აქვს მემორანდუმები.

გეოგრაფიის, ეკოლოგიისა და ბიოლოგიის სპეციალობების დაუფლება მოგზაურობის გარეშე წარმოუდგენელია, შესაბამისად, საგანმანათლებლო პროგრამები მოიცავს საველე პრაქტიკებსა და ექსპედიციებს. შავი ზღვის პრობლემების შესწავლის მიზნით ტარდება პრაქტიკები შავი ზღვის აკვატორიაში გასვლით.

მედიცინის, სტომატოლოგიისა და ფარმაციის სპეციალობების სტუდენტები დარგობრივ კომპეტენციებსა და უნარ-ჩვევებს საუნივერსიტეტო კლინიკებში იძენენ. ფაკულტეტზე შეიქმნა სამედიცინო განათლებისა და მედიკოსთა პროფესიული განვითარების ცენტრი, სადაც სტუდენტებს საშუალება აქვთ, პრაქტიკული უნარ-ჩვევები მულაჟებისა და სიმულაციების მეთოდების გამოყენებით ჩამოუყალიბდეთ. ჯანდაცვის მიმართულებით კურსდამთავრებულებს საშუალება აქვთ სწავლა გააგრძელონ ფაკულტეტზე მოქმედ სარეზიდენტო პროგრამებზე სხვადასხვა სპეციალობით.

წარჩინებული და სოციალურად დაუცველი სტუდენტები უზრუნველყოფილნი არიან სხვადასხვა სახის სახელობითი სტიპენდიით.

საინტერესოა ფაკულტეტზე სტუდენტური ცხოვრება. სასწავლო პროცესი წარიმართება სტუდენტებთან მჭიდრო ურთიერთობით. ისინი აქტიურად თანამშრომლობენ სასწავლო და სამეცნიერო კვლევით პროცესებში, მონაწილეობენ სკოლა–სემინარების, საზაფხულო სკოლების, ვორკ-შოპების, სტუდენტური სამეცნიერო კონფერენციების მუშაობაში, გარემოსდაცვით ღონისძიებებში, შემეცნებით, კულტურულ და სოციალურ პროგრამებში. ეწყობა გამოფენები. სტუდენტები მონაწილეობენ ადგილობრივ და საერთაშორისო სამეცნიერო საგრანტო პროექტებში, სტუდენტურ გამოკითხვებში, აფიქსირებენ სურვილებსა და მოლოდინებს.

ფაკულტეტის სტუდენტები და ახალგაზრდა მეცნიერები გაცვლითი პროგრამებით იმყოფებიან საზღვარგარეთის უმაღლეს სასწავლებლებში (ნორვეგიაში, თურქეთის რესპუბლიკაში, საბერძნეთში, გერმანიაში, პორტუგალიაში, უკრაინაში).

სტუდენტები აქტიურად არიან ჩართულნი საუნივერსიტეტო ცხოვრებაში. ფაკულტეტს ჰყავს წარმომადგენლები უნივერსიტეტის სტუდენტურ თვითმმართველობასა და წარმომადგენლობით საბჭოში. სტუდენტები მონაწილეობენ საქველმოქმედო აქციებში. ეწყობა ექსკურსიები და დებატები. დაინერგა საზღვარგარეთის უნივერსიტეტების პროფილურ საზაფხულო სკოლებში სტუდენტების მონაწილეობა.

როგორც ჯანდაცვის, ასევე საბუნებისმეტყველო მიმართულების  სპეციალობათა   კურსდამთავრებულები დასაქმებულები არიან:

სამეცნიერო-კვლევით ლაბორატორიებში, ბოტანიკურ ბაღებში, აკვარიუმში, დელფინარიუმში, ზოოპარკში, ბუნების დაცვის ორგანიზაციებში, ნაკრძალებში, ეროვნულ პარკებში, დაცულ ტერიტორიებში, წარმოება-დაწესებულებების ეკოლოგიური უსაფრთხოების უზრუნველყოფის სამსახურებში, ეკოლოგიური მონიტორინგის სამსახურებში,  სამედიცინო კლინიკებში, აფთიაქებში, ფარმაცევტულ კომპანიებში, პროფილაქტიკური მედიცინის მიმართულებით, საბაჟო-საკარანტინო სამსახურებში, საზოგადოებრივი ჯანდაცვის სფეროში.

ჩვენი ფაკულტეტის კურსდამთავრებულთა კომპეტენციები აღიარებულია უცხოეთშიც. ისინი პროფილის შესაბამისად დასაქმებული არიან უკრაინაში, გერმანიაში, საბერძნეთში, რუსეთში, თურქეთში, გაერთიანებულ ემირატებში.

„ჩემ თავს მუსიკოსს ვერ ვუწოდებ, მუსიკოსი ბევრად მეტია, ის რაღაც ახალს ქმნის, მე კი ჯერ ისეთი არაფერი შემიქმნია. ქავერ შემსრულებელი ვარ, სიმღერის პროცესი დიდ სიამოვნებას მანიჭებს, ალტერნატიული როკი მომწონს, ბევრს ვერ წარმოვუდგენივარ როკშემსრულებლად, ალბათ ჩემი გარეგნობის გამო, თუმცა ეს ისაა, რისი შესრულებაც ყველაზე მეტად მსიამოვნებს. თავად “ბითლზების” ფანი ვარ, ჩემთვის მათი მუსიკა ყველაფერია. მეუბნებიან, რომ კონკურსებში უნდა მივიღო მონაწილეობა, მაგრამ მე ვფიქრობ, რომ ამისთვის ჯერ მზად არ ვარ, ჯერ გავლენების ქვეშ ვარ, ერთადერთი ხმის ტემბრი მომწონს ჩემი, სხვა ყველაფერში დახვეწა მჭირდება, მუსიკას ინდივიდუალიზმი უყვარს.” – ამბობს მარიამ ქიქავა.

დიდი ხანია ეძებს პასუხს კითხვაზე, “ვინ ვარ?” ფიქრობს, რომ ბევრნაირი მარიამი არსებობს, ამბობს, რომ საკუთარი თავის ძიების პროცესშია. საკუთარი გრძნობების გამოხატვა არ უყვარს, ამის გამო ბევრი მეგობარი არ ჰყავს, უფრო მეტს ფიქრობს, ვიდრე ლაპარაობს: „იმათ რომ ჰკითხოთ ჩემზე, ვისაც არ ვიცნობ ახლოს, გეტყვიან: მარიამი ერთი უჟმური გოგოაო. ამაყი ვარ და საკუთარი თავიც ძალიან მიყვარს, იმისთვის, რომ განვვითარდე მუდმივად სიახლეებს ვეძებ, ყველა აქტივობაში ვერთვები, რომლის შესახებაც ვგებულობ, ყველაფრიდან მაქსიმალურის მიღება მინდა.” – ამბობს მარიამი.

ექვსი წლის იყო, როცა მხატვრულ ტანვარჯიშში აჭარის ჩემპიონის ტიტული მოიპოვა: „თერთმეტი წელი დავდიოდი მხატვრულ ტანვარჯიშში, თუმცა მერე უარის თქმა მომიწია. სპორტს რომ გაყვე, სხვა არაფერი აღარ უნდა აკეთო, დიდი დრო და ენერგია სჭირდება. ფრენბურთზე მაინც დავდივარ. სკოლის პერიოდში მუსიკაზეც დავდიოდი, საფორტეპიანო სკოლა დავამთავრე, ამას გარდა – ცეკვაზეც. ბათუმში იყო პერიოდი, როცა ყველა მხარზე გიტარაგადაკიდებული დადიოდა, მეც მომინდა, პრაქტიკულია გიტარა, შეგიძლია კონკურსებზეც წაიღო.”

მის ცხოვრებას მაინც ორ ეტაპად ჰყოფს, სკოლამდელი და სკოლის შემდეგ: „სკოლის პერიოდში ჩაკეტილი ვიყავი, რამეში რომ მიმეღო მონაწილეობა, უნდა გებიძგა, ჩემი ჩაკეტილობის მიზეზი სათვალე იყო, სათვალის გამო არ უნდა მერბინა, ხეზე არ უნდა ავსულიყავი, იყო ქილიკიც… დედა მეუბნებოდა, რომ ამაზე არ უნდა მედარდა. რა თქმა უნდა, ახლა არ ვფიქრობ, რომ სათვალე მაუშნოებს, პირიქით.
უნივერსიტეტში ჩაბარების შემდეგ მივხვდი, რომ ცვლილებები მჭირდებოდა, ავდექი და თმები შევიჭერი ბიჭურად. მერე ვცდილობდი ხასიათის ცვლილებასაც, მგონი გამომივიდა.” – გვიყვება მარიამი.

მარიამი წყნეთში არსებულ ბაქსვუდის საზაფხულო სკოლაში ლიდერად მუშაობს, მანამდე ფრანგულის ოლიმპიადაში გაიმარჯვა და ლონდონში წავიდა, სადაც ოცნება აისრულა – “სტოუნჰენჯი” ნახა: „ფრანგული სკოლა მაქვს დამთავრებული, ოლიმპიადაში გამარჯვების შემდეგ გამარჯვებულები წყნეთში, ბაქსვუდის საზაფხულო სკოლაში წაგვიყვანეს. 150 ბავშვიდან ათი შეგვარჩიეს, სამი კი, ლონდონში გაგვიშვეს. საოცარი ისტორიები გადაგვხდა, სტოუნჰენჯში გადავწყვიტეთ წასვლა, ავტობუსის ბილეთი ავიღეთ და წავედით, აღმოჩნდა, რომ იქამდე მისასვლელად თანხის დამატება იყო საჭირო, ჩვენ ვიფიქრეთ ახლოს იქნება, ფეხითაც გავალთო, მაგისტრალზე მივდიოდით ფეხით, გზას კი დასასრული არ ჰქონდა. სამი საათის შემდეგ ბენზინგასამართ სადგურს მივადექით, სადაც გვითხრეს, ფეხით სად მიდიხართ. ოთხი საათის გზააო, ავტოსტოპით გაგვიჩერეს მანქანა, ჩვენ გვეშინოდა, ავტოსტოპზე იმდენი საშინელი ფილმი გვქონდა ნანახი. პოლონელი ბიჭი იყო მძღოლი, მიგვიყვანა, დაგველოდა, ჩვენთან ერთად პირველად მოინახულა სტოუნჰენჯი, მერე უკან წამოგვიყვანა.”

მარიამის მომავალი გეგმები სპეციალური საჭიროების მქონე ბავშვებს უკავშირდება, მომავალი ფსიქოლოგი ფიქრობს, რომ ამ მხრივ ბევრი პრობლემა დღემდე აქტუალურია: „უკვე ვმუშაობ ამ მხრივ, საქველმოქმედო კონცერტებში ვმონაწილეობ, უნივერსიტეტში ფსიქოლოგიის კლუბის ხელმძღვანელი ვარ, 21 მარტს დაუნის სინდრომით დაავადებულთა საერთაშორისო დღეა, ვაპირებთ ამ ბავშვებს ვესტუმროთ და მათთან ერთად აღვნიშნოთ ეს დღე. სამწუხაროდ, ნაკლები სპეციალისტი გვყავს ამ სფეროში. მინდა ღრმად შევისწავლო ამ ბავშვების პრობლემები. გაცვლით პროგრამაში ვმონაწილეობ, სწავლის საზღვარგარეთ გაგრძელებაზე ვფიქრობ, საბუთები უკვე შევიტანე, ამ მხრივ უფრო დიდი გეგმები მაქვს, სარეაბილიტაციო სკოლის დაარსებაც მინდა.”

ფაკულტეტის მიზანია ტურისტული მომსახურების საერთაშორისო სტანდარტების დამკვიდრების ხელშეწყობა და ტურიზმის დარგისათვის მაღალკვალიფიციური, შესაბამისი კომპეტენციების მქონე სპეციალისტების მომზადება.

შემუშავდა და დაინერგა თანამედროვე მოთხოვნების შესაბამისი „ტურიზმის“ საბაკალავრო და „სასტუმრო საქმისწარმოების“ პროფესიული პროგრამები, სწავლება დაიწყო თანამედროვე მეთოდების გამოყენებით, თანამედროვე ტექნიკით აღჭურვილ აუდიტორიებში.

ტურიზმის ფაკულტეტი ინტენსიურად მუშაობს უცხოეთის უმაღლეს სასწავლებლებთან თანამშრომლობის გაფართოებისათვის. ფაკულტეტი აქტიურად თანამშრომლობს და გაცვლით პროგრამებს ახორციელებს შვერინის (გერმანია), ტელემარკის (ნორვეგია) და ებერსვალდის (გერმანია) უნივერსიტეტებთან, ჰამბურგის ევროპის ბიზნესკოლეჯთან (გერმანია).

გაცვლითი პროგრამებით შესაძლებელი გახდა სწავლების ხარისხის ამაღლება, მაღალკვალიფიციური სპეციალისტების მომზადება. საგანმანათლებლო პროგრამები მთლიანად შეესაბამება საერთაშორისო სტანდარტებს.

მჭიდრო თანამშრომლობა გვაქვს გერმანიისა და ამერიკის შეერთებული შტატების უნივერსიტეტებთან.  მოწვეული გვყავს და ფაკულტეტზე პედაგოგიურ საქმიანობას ეწევიან ტურიზმის უცხოელი ექსპერტები.

სერიოზული პრეტენზია გვაქვს ვიყოთ პირველები. ჩვენი მიზანია სტუდენტებს მივცეთ ტრანსფერული ცოდნა, რათა შეძლონ საზღვარგარეთის ქვეყნებში თავიანთი სპეციალობით დასაქმება.

აქ ყველა პირობაა იმისათვის, რომ მომზადდეს კონკურენტუნარიანი სპეციალისტები. კერძოდ, გამოიყენება თანამედროვე მენეჯმენტის სისტემა. ტურიზმის ფაკულტეტმა სასტუმროს მენეჯმენტის მაღალხარისხოვნად სწავლებისათვის შეიძინა სასტუმროს მართვის პროგრამა „Opera“. ამ სისტემით სარგებლობენ სასტუმროების ისეთი ცნობილი ბრენდები, როგორებიცაა: „Sheraton“, „Radisson“, „Hilton“ და სხვა.

ვასწავლით რესტორნის მენეჯმენტის პროგრამულ სისტემას „Micros“. ფაკულტეტზე მოქმედებს ტურისტული სააგენტო „UNItour“ -ი, სტუდენტებს ადგილზე შეუძლიათ დაეუფლონ ტუროპერეიტინგს.

მიუხედავად იმისა, რომ ტურიზმის ფაკულტეტი არსებობის მხოლოდ სამ წელს ითვლის,  ის ერთიანი ეროვნული გამოცდების განაცხადში ერთ-ერთი ყველაზე მოთხოვნადი ფაკულტეტია საქართველოში.

ტურიზმის ფაკულტეტი წარმატებით ახორციელებს მნიშვნელოვან პროგრამებს და პროექტებს:

ტურიზმის ფაკულტეტის 43-მა სტუდენტმა სასწავლო და საწარმოო პრაქტიკა გაიარა მიუნხენის, ბერლინის და კუნძულ უზედომის 5-ვარსკვლავიან სასტუმროებში.

ტურიზმის ფაკულტეტის 9 პროფესორ-მასწავლებელმა სტაჟირება გაიარა ბერლინისა და ნორვეგიის უნივერსიტეტებში.

ტურიზმის ფაკულტეტის 27 სტუდენტი სხვადასხვა გაცვლითი პროგრამით სწავლობდა ნორვეგიის, გერმანიის, პოლონეთისა და თურქეთის უნივერსიტეტებში.

 ტურიზმის ფაკულტეტის ორგანიზებით, ყოველწლიურად იმართება საერთაშორისო სამეცნიერო-პრაქტიკული კონფერენცია „ტურიზმი: ეკონომიკა და ბიზნესი~, რომელშიც მონაწილეობას იღებენ 20-ზე მეტი ქვეყნის უნივერსიტეტების პროფესორ-მასწავლებლები და ტურიზმის ინდუსტრიის წარმომადგენლები.

ტურიზმის ფაკულტეტის წარმატებულ სტუდენტებს საშუალება აქვთ სამთვიანი ანაზღაურებადი პრაქტიკა გაიარონ გერმანიის ტურიზმის ინდუსტრიის ორგანიზაციებში.

 ტურიზმის ფაკულტეტის სტუდენტების უმრავლესობა წარმატებით საქმიანობს  ცნობილ საერთაშორისო კომპანიებში.

 ტურიზმის ფაკულტეტის სტუდენტების დიდი ნაწილი ზაფხულში ახლაგახსნილ სასტუმრო „Hilton“ – ში დასაქმდებიან.

გერმანელი პარტნიორების მონაწილეობით, ახალი სასწავლო წლიდან ამოქმედდება ინგლისურენოვანი „ტურიზმისა და მასპინძლობის მენეჯმენტის“ სამაგისტრო პროგრამა, რაც საშუალებას მისცემს სტუდენტებს რამდენიმე სემესტრი უცხოეთში ისწავლონ.

ფაკულტეტი აგრძელებს ინოვაციურ საქმიანობას და მაქსიმალურად ცდილობს უზრუნველყოს სტუდენტებისათვის მიმზიდველი სასწავლო გარემო.

„სტუდენტები ბუნებრივი რესურსების მაქსიმალური ათვისების სახელმწიფო პოლიტიკის წინააღმდეგ“, – ეს „მწვანე მუშტის“ საქმიანობის მოკლე აღწერაა.  სტუდენტები სახელმწიფო გარემოსდაცვით პოლიტიკას აკრიტიკებენ და აქციებით აპროტესტებენ.

„გვინდოდა ალტერნატიული ძალა შეგვექმნა, რომელიც სხვაგვარად მიუდგებოდა გარემოს დაცვის პრობლემებს. „მწვანე მუშტი“ ეს არის სტუდენტური გაერთიანება. მიზანი გარემოსდაცვით პრობლემებზე აქციების მოწყობა, ჩვენი აზრის  დაფიქსირებაა“, – ამბობს სტუდენტური მოძრაობა „მწვანე მუშტის“ წევრი სალომე ჩუხუა.

„მწვანე მუშტმა“ მოახერხა და სტუდენტები არამხოლოდ თბილისში, არამედ საქართველოს სხვა ქალაქებშიც გაააქტიურა.

გარემოსდაცვითი საკითხები ბათუმში სტუდენტური მოძრაობა „ალტერნატივას“ აინტერესებს. მარი ზედგენიძე, ზურა მელიქაძე და გიორგი ბაგრატიონი „ალტერნატივას“ წევრები არიან. ორი კვირის წინ ეს სტუდენტები სოფელ ღურტაში ჩავიდნენ, იქ, სადაც `შუახევი ჰესისთვის“ საჭირო გვირაბი უნდა აშენდეს და სოფლის მოსახლეობის პროტესტს შეუერთდნენ.

„ალტერნატივა“ „მწვანე მუშტისგან“ განსხვავებით სხვადასხვა მიმართულებით მუშაობს, გარემოსდაცვითი თემა სტუდენტური მოძრაობის ერთ-ერთი მიმართულებაა. სტუდენტები ამბობენ, რომ მათ უნივერსიტეტში ძნელია სხვა დაინტერესებული სტუდენტების პოვნა და მათი ჩართვა მწვანე მოძრაობაში.

„5000 კაცში ძალიან ცოტა ადამიანს, ალბათ 30-ს თუ აინტერესებს გარემოს დაცვა, ამიტომ გვიჭირს თბილისთან შედარებით აქტივობების გაკეთება. უნივერსიტეტში მოცლილებს გვეძახიან. ისეთი თემებით ვინტერესდებით, რაც დანარჩენი 4 ათას რაღაცა სტუდენტისთვის არ არის საინტერესო. იშვიათად, რომ ვინმემ შეგაქოს. სხვა რას იტყვის, დიდად არ გვაინტერესებს, მაგრამ გვინდა უფრო მეტი ადამიანი იყოს ჩართული და დაინტერესებული გარემოსდაცვითი საკითხებით“, – ამბობს „ალტერნატივას“ წევრი გიორგი ბაგრატიონი.

„ალტერნატივასგან“ განსხვავებით, სხვადასხვა ჯგუფის გააქტიურება კარგად გამოსდის „მწვანე მუშტს“ თბილისში. ის ბოლო დროს გამართულ თითქმის ყველა აქციაში მონაწილეობს, რომელიც გარემოსდაცვით საკითხებს შეეხება. „მწვანე მუშტი“ იყო ხაიშში, იცავდა ვაკის პარკს, საყდრისის მაღაროს. „მწვანე მუშტის“ წევრები ამბობენ, რომ მათი აქციებით უფრო მეტი ადამიანი იგებს ეკოლოგიური პრობლემების შესახებ.

„როგორ გითხრათ, მართლა სამკვდრო-სასიცოცხლო ბრძოლა არის გამოცხადებული  მწვანე სივრცისთვის და იმისთვის, რომ ადამიანებმა ვიარსებოთ ნორმალურად. იმისთვის, რომ ადამიანებმა ვიცხოვროთ სუფთა, ჯანმრთელ გარემოში, რომ  ყველა ხე არ მოიჭრას ვიღაც კონკრეტული პირის ინტერესების გამო, ან ყველა მდინარეზე არ აშენდეს ჰესი,“ – ამბობს სალომე ჩუხუა.

რა შეცვალა „მწვანე მუშტმა“ არსებობის მოკლე დროში – ორგანიზაციის წევრი ნიკოლოზ წიქარიძე ამბობს, რომ საზოგადოება გააქტიურდა:

„ჩვენ გამოვიტანეთ სააშკარაოზე ის უმწვავესი პრობლემები, რის შესახებაც, სამწუხაროდ, არ ვრცელდებოდა საზოგადოებაში ინფორმაცია და ინტერესიც ნაკლები იყო. დღეს ინტერესი მაღალია – 70-კაციანი აქციიდან, ავიწიეთ 500-კაციან აქციებამდე. ჩვენი თანამშრომლობით ყველა სხვა მოძრაობასთან მცირე, მაგრამ მნიშვნელოვან წარმატებებს ვაღწევთ ბრძოლის ველზე. ნელ-ნელა ივსება ჩვენი რიგები პატიოსანი, პროფესიონალი და უანგარო ადამიანებით. ფრონტის გაშლას ვაპირებთ მთელ საქართველოში. რესურსების არ არსებობის მიუხედავად, ჩავდივართ ყველგან, სადაც პრობლემები იჩენს თავს და ვაფიქსირებთ ჩვენს მოსაზრებას, – მტაცებლური კაპიტალიზმის მთავარი მკვებავი არის ბუნებრივი რესურსების წინგაუხედავი და არამიზნობრივი ათვისება, რასაც სახელმწიფო აკეთებს“.

„მწვანე მუშტმა“ მოძრაობა გასული წლის 20 ივლისს დაიწყო, როდესაც პირველად ჩატარდა აქცია, რომელმაც გააერთიანა ყველა პრობლემა და გამოხატა პროტესტი სახელმწიფოს მიერ მდგრადი განვითარების პრინციპების უგულებელყოფის შედეგად წარმოქმნილი პრობლემების წინააღმდეგ. აქციის სახელწოდება იყო  „არა ბუნებრივი რესურსების მაქსიმალური ათვისების პოლიტიკას.“

„ჩვენი ძირითადი მოთხოვნები შეეხებოდა უფლებადაცვით, გარემოსდაცვით და კულტურული მემკვიდრეობის დაცვით პრობლემას,“ – „მწვანე მუშტის“ წევრი ნიკოლოზ წიქარიძე მწვანე მოძრაობის დაწყებას იხსენებს. – „სხვა მოძრაობები, რომლებიც ასევე 2013 წლის ზაფხულში დაიწყო, არ იყო ორგანიზებული და ვერ აკმაყოფილებდა ახალგაზრდების მოთხოვნებს. ამიტომ მე, ჩემი მეგობრები და თანამებრძოლები შევიკრიბეთ თსუ-ს ერთ-ერთ აუდიტორიაში და გადავწყვიტეთ დაგვეწყო ყველაფრისგან თავისუფალი მოძრაობა, სადაც ჩვენ მეამბოხური ენერგია თავისუფლად დაიწყებდა განვითარებას. გადავწყვიტეთ ყოველგვარი ლიდერებისა და უმრავლესობის ცნებები დაგვევიწყებინა და კონსესუსი ავირჩიეთ გადაწყვეტილების მიღების მომავალ გზად. ჩვენ მოურიდებლად ვკამათობდით და ვკამათობთ ახლაც, რაც იმის საწინდარია, რომ ნელ-ნელა წინ მივდივართ“.

ნიკოლოზ წიქარიძის თქმით, მწვანე მოძრაობამ ძალა გასულ სექტემბერში მოიკრიბა, ახლა კი ეკოლოგიური განათლების გავრცელებას გეგმავს: „ჩვენი მიზანი იქნება საზოგადოების ჩართვა ამ ბრძოლებში, მათი ინფორმირება ყველა დეტალზე და დახმარება მშვიდობიანი, არაძალადობრივი დაუმორჩილებლობისა და პროტესტის ორგანიზებაში. ენთუზიაზმი არ გამოილევა, თუ მოვახერხებთ კარგად ორგანიზებას და პატარ-პატარა გამარჯვებას მივაღწევთ. ენთუზიაზმი არ გამოილევა, თუ გავიაზრებთ, რომ მომავალი ჩვენი და ჩვენი შვილებისაა… ჩვენ უნდა ავირჩიოთ ერთადერთი ჭეშმარიტი გზა მწვანე და ჯანმრთელი მომავლისთვის“.