შტორმის შედეგად მიყენებული ზარალი მერიას არ დაუთვლია

ბათუმში ზამთრის განმავლობაში შტორმი რამდენჯერმე განმეორდა. პირველი შტორმის შედეგად მნიშვნელოვნად დაზიანდა ბულვარის მიმდებარე ზოლი. მოიშალა ველობილიკები და კომუნიკაცია. ექვსბალიანი შტორმი ქალაქის სანაპიროზე გუშინაც განმეორდა. 

„შტორმის შედეგად მატერიალური ზარალი ქალაქს არ მიუღია, ანუ სახლების სახურავი არ ამძვრალა, გამწმენდ ნაგებობასთან დანგრეული რაც არის, ის არ მომატებულა, ქუჩა არ დაზიანებულა და ა.შ.  ანუ მერიას რაც ეხება, იქ არაფერი არ მომხდარა. ბულვარი ეკონომიკის სამინისტროსია, თუმცა ზარალს მერია ითვლის კომპეტენციის ფარგლებში“, – აცხადებს ბათუმის მერის მოადგილე დავით ლეკვეიშვილი. 

მერის მოადგილე ამბობს, რომ შტორმის შედეგად მიყენებული ზარალი დღემდე დათვლილი არ არის:  „დაინიშნება ექსპერტიზა და იმის მიხედვით დაითვლება ზუსტი თანხა. გამაგრების დროსაც, ალბათ, რაღაც ნაწილი კიდევ დაზიანდება“.