Batumelebi

22 აპრილს, ბათუმის პორტის მიმდებარე ტერიტორიაზე ორი ავტომანქანა შეეჯახა ერთმანეთს. ერთი ადამიანი გადაყვანილია საავადმყოფოში მენჯ-ბარძაყის მოტეხილობით.

შს სამინისტროს ინფორმაციით გამოძიება 276-ე მუხლის პირველი ნაწილით მიმდინარეობს – „ავტომობილის ან სხვა მექანიკური ტრანსპორტის მოძრაობის უსაფრთხოების ან ექსპლუატაციის წესის დარღვევა იმის მიერ, ვინც ამ სატრანსპორტო საშუალებას მართავს, რამაც გამოიწვია ჯანმრთელობის ნაკლებად მძიმე დაზიანება, – ისჯება ჯარიმით ან თავისუფლების შეზღუდვით ვადით სამ წლამდე..“

ავტომანქანების მოძრაობა პორტის მიმდებარე ტერიტორიაზე შეფერხებულია.

მეთერთმეტე მასპინძელი ქვეყანა, საქართველოა. შეხვედრა ბათუმის ანბანის კოშკში დღეს საღამოს შედგა. „ქალთა უფლებლებები საქართველოში“ – ამ თემაზე სასაუბროდ ორგანიზაცია „ერთმანეთისთვის“ თავმჯდომარემ სოფიო ბაკურიძემ საქართველოში აკრედიტებული ელჩების ცოლები და ბათუმში მოქმედ ორგანიზაციებში დასაქმებული, ასევე სამოქალაქო სექტორში მოღვაწე ქალები მიიწვია.

სოფიო ბაკურიძე აჭარის მთავრობის თავმჯდომარის ზურაბ პატარაძის მეუღლეა. როგორც თავად გვითხრა, ქალთა უფლებები და შშმ პირებისთვის ადაპტირებული გარემოს შექმნა, ის თემებია, რომლებზეც მას სურს იმუშაოს და ამ მიმართულებით ის მეუღლის მხარდასაჭერად არ აქტიურობს. ეს არის სფეროები, რომლებიც მან, როგორც მოქალაქემ, აირჩია.

დღეს გამართული შეხვედრის პირველი ნაწილი, რეგიონის ტურისტული ინფრასტრუქტურის პრეზენტაციას დაეთმო. სოფიო ბაკურიძე სტუმრებს მოუყვა იმის შესახებ, თუ როგორ ცხოვრობდნენ და რას წერდნენ შემდეგ ბათუმზე ცნობილი ადამიანები სხვადასხვა ქვეყნიდან, რომლებიც სხვადასხვა დროს ბათუმში ცხოვრობდნენ. ტურიზმის დეპარტამენტის წარმომადგენლმა კი აჭარაში ტურისტული ადგილების პრეზენტაცია შესთავზა სტუმრებს.

შეხვედრაზე შშმ პირების უფლებებზე ქობულეთის გამგეობის თანამშრომელმა ნინო ნოღაიდელმა ისაუბრა, ის ქობულეთის გამგეობაში ამ მიმართულებას კურირებს. მან ათი ქვეყნის ელჩების ცოლებს სთხოვა: „გადაეცით თქვენს ქვეყნებში შშმ პირებს, რომ ჩვენს ქვეყანაში არის ადაპტირებული გარემო შშმ პირების დასვენებისთვის“.

შეხვედრაზე გენდერულ საკითხებზე სასაუბროდ აჭარის უმაღლესი საბჭოს წევრი ნინო ჩხეტია მიიწვიეს. ნინო ჩხეტიას თქმით, გენდერული თანასწორობისთვის ზრუნვა მისი ერთ-ერთი მთავარი მიმართულებაა უმაღლეს საბჭოში მუშაობისას. ვიდრე უმაღლეს საბჭოში ასმათ დიასამიძე შევიდოდა ლევან ვარშალომიძის ნაცვლად, ნინო ერთადერთი ქალი დეპუტატი იყო აჭარის უმაღლეს საბჭოში. შეხვედრაზე ნინო ჩხეტიამ სტუმრებს უამბო, რომ მასზე უმაღლეს საბჭოში ხუმრობდნენ, რომ „ერთი ქალია, მაგრამ ათ კაცს უდრის.“

სტუმრები დაინტერესდნენ რა ეტაპზეა ახლა საქართველო გენდერულ საკითხებთან მიმართებაში, რაზეც მათ „გენდერული თანასწორობის ქსელის“ კოორდინატორმა თამილა დოლიძემ უპასუხა, რომ დღეს ბათუმში, ისევე როგორც დანარჩენ საქართველოში, ხელმძღვანელ თანამდებობზე მამაკაცები ქალებს სჭარბობენ:

„მივაღწიეთ იმას, რომ საქართველოს პარლამენტში 15% ქალია და აჭარაში ერთი მინისტრი გვყავს ქალი. ამ სფეროში კიდევ ბევრი გვაქვს გასაკეთებელი“.

სახალხო დამცველის წარმომადგენელი ციალა ქათამიძე დაინტერესდა თუ რა გზა განვლეს ამ მიმართულებით იმ ქვეყნებმა, რომლებსაც ელჩების მეუღლეები წარმოადგენდნენ და რა ეტაპზე არიან ახლა ეს ქვეყნები, როგორც გენდერული თანასწორობის მხრივ, ასევე შშმ პირებისთვის ადაპტირებული გარემოს შესაქმნელად. თუმცა, თავად სტუმრებს ამ თემებზე არ უსაუბრიათ.

„აჭარაზე ბევრი არაფერი ვიცოდით და მართლაც ძალიან კარგი შეხვედრა იყო რეგიონის პოპულარიზაციისთვის. რაც ყველაზე მთავარია, ვისაუბრეთ ქალთა უფლებებზე. საოცარია, რომ ქალები ყველგან, ყველა ქვეყანაში იბრძვიან თავიანთი უფლებებისთვის. ჩვენ უნდა გავაგრძელოთ ეს ბრძოლა!“- განაცხადა ფრანჩესკა კელიმ ამერიკის შეერთებული შტატების ელჩის მეუღლემ შეხვედრის დასრულების შემდეგ.

შეხვედრა ბათუმი „ანბანის კოშკი“ შედგა, შეხვედრაზე ბრაზილიის, საბერძნეთის, იაპონიის, ყაზახეთის, კორეის, თურქეთის, აშშ -ის ელჩების მეუღლეები, ასევე ნატოს ოფისის ხელმძღვანელის მეუღლე და თურქეთის, სომხეთის და ირანის კონსულების მეუღლეები იყვნენ მიწვეული.

ვიზიტის ფარგლებში სტუმრებს აჭარის ღირშესანიშნაობებს დაათვალიერებინებენ, სტუმრებს მიიწვევენ ასევე ქართული ფოლკლორისა და ეთნო-პოპის კონცერტებზე.

ბათუმში, ჭავჭავაძისა და 26 მაისის ქუჩების კვეთასთან არსებულ სკვერში კიდევ ერთი ახალი ველოტერმინალი გაიხსნა. ბათუმველოს ახალი ტერმინალი  ჭავჭავაძის ქუჩის 34 ნომერში მდებარეობს.

ბათუმველოს ინფორმაციით, ეს ადგილი მარკეტინგული კვლევების საფუძველზე შეირჩა, რაც მომსახურების არეალს ზრდის. ბათუმველოს საკუთრებაში აქამდე არსებული 23 ველოტერმინალი, ძირითადად ბათუმის ზღვისპირა ზოლსა და ცენტრალურ ადგილებშია განთავსებული:

გოგებაშვილის ქუჩაზე  (რესტორანი სანაპირო), ანბანის კოშკთან, ნინოშვილის ქუჩა №1 (ბულვარის ცენტრალურ შესასვლელთან), დემეტრე თავდადებულის ქუჩაზე, შერატონთან, უნივერსიტეტთან, საზღვაო აკადემიასთან, რესტორან აჭარულ სახლთან, ახალი ბულვარის დასაწყისში, ახალი ბულვარის ბოლოს, აეროპორტთან, იუსტიციის სახლთან, მაკდონალდსთან, ჯეოსელის ოფისის მოპირდაპირედ (გორგილაძის ქუჩაზე), # 3 სკოლასთან, 6 მაისის პარკთან, მერიასთან, ევროპის მოედანზე, ზ. გამსახურდიას ქუჩაზე, პიაცასთან, ხელოვნებისა, მუსიკის ცენტრთან, ჯავახიშვილის ქუჩაზე და ბოტანიკურ ბაღთან და უკვე ჭავჭავაძის ქუჩის 34 ნომერში.

21 აპრილს კავკასიური მურა დათვის ბელი აჭარიდან თბილისის ზოოპარკში გადაიყვანეს. როგორც „ბათუმელებისთვის“ გახდა ცნობილი, დათვის ბელი ხელვაჩაურის მუნიციპალიტეტის სოფელ ჭარნალში იპოვეს გარემოსდამცველებმა, მას შემდეგ, რაც სოფლიდან გარემოსდაცვითი ზედამხედველობის დეპარტამენტის აჭარის რეგიონულ სამმართველოში ზარი შევიდა. მოქალაქემ სამმართველოს შეატყობინა, რომ სავარაუდოდ, დათვის ბელის ხმა ისმოდა ტყიდან.

ადგილზე გარემოსდაცვითი პატრულირებისა და სწრაფი რეაგირების განყოფილების თანამშრომლები გავიდნენ  და დაახლოებით 2 თვის,  კავკასიური მურა დათვის ბელი იპოვეს, რომელსაც არ აღენიშნებოდა დაზიანება. გარემოსდამცველებმა მურა დათვის ბელი ბათუმიდან თბილისში ჩაიყვანეს და ზოოპარკს მიაბარეს, რადგან, ბელი ჯერ ისევ პატარაა და ველურ ბუნებაში მარტო დაიღუპებოდა.

გარემოსა და ბუნებრივი რესურსების დაცვის სამინისტრო ოუწოდებს მოსახლეობას, არ წამოიყვანონ ველურ ბუნებაში ნაპოვნი დათვის ბელები.

„ადამიანებს მიჩვეული დათვების უკან, ველურ ბუნებაში დაბრუნება, რთული პროცესია, რადგან ტყვეობაში მყოფ ცხოველს ეკარგება საკვების მოპოვების ინსტინქტი, ადამიანის შიში და ბუნებაში გაშვების შემთხვევაში, იგი პოტენციური თავდამსხმელი ხდება“ – აღნიშნულია სამინსიტროს ოფიციალურ ფეისბუქგვერდზე გამოქვეყნებულ ინფორმაციაში.

კავკასიური მურა დათვი წითელ ნუსხაშია და მას კანონი იცავს, თუმცა დათვზე ბრაკონიერობის შემთხვევები მაინც ფიქსირდება. სპეციალისტების თქმით, დათვის ბელი ადამიანთან ისე ვერ მოხვდება, თუ მას დედა არ მოუკლეს.

2012 წლის მონაცემებით, საქართველოში 1643 მურა დათვი ბინადრობს.

__________________________

ამავე თემაზე: 

უკანასკნელი დათვი

„მედინამ“ „ბათუმის სამშობიარო სახლზე“ უარი თქვა.  შპს „ბათუმის სამშობიარო სახლი“, რომელიც ბათუმში, რუსთაველის ქუჩაზე მდებარეობს, შპს „ირის ბორჩაშვილის სახელობის ჯანმრთელობის ცენტრი მედინამ“ თვენახევრის წინ შეისყიდა. შესაბამისი ხელშეკრულება მხარეებს შორის მიმდინარე წლის 2 მარტს გაფორმდა. ამჯერად მხარეები ამ ნასყიდობის ხელშეკრულების გაუქმებას ითხოვენ.

მეწილეების საერთო კრება სამშობიარო სახლში, რეესტრის დოკუმენტების მიხედვით, მიმდინარე წლის 24 თებერვალს ჩატარდა. შპს „ჩარკვიანის სახელობის ბათუმის სამშობიარო სახლის“ 187 მეწილედან კრებას 154 ესწრებოდა. შპს „ბათუმის სამშობიარო სახლის“ 100% წილის გასხვისებას კი მხარი 110-მა პარტნიორმა დაუჭირა.

წილის გასხვისებადე შპს „ბათუმის სამშობიარო სახლის“ მფლობელი სწორედ  შპს „ჩარკვიანის სახელობის ბათუმის სამშობიარო სახლი“ იყო. საჯარო რეესტრში ქონების რეგისტრაციის პროცესი ხარვეზის გამო შეჩერდა, თუმცა, მიმდინარე წლის 14 მარტის ამონაწერის მიხედვით,  შპს „ბათუმის სამშობიარო სახლის“ მესაკუთრე, ანუ ამ კომპანიის 100% წილის მფლობელი უკვე შპს „ირის ბორჩაშვილის სახელობის ჯანმრთელობის ცენტრი მედინა“ იყო.

„ბათუმის სამშობიარო სახლის“ და „ირის ბორჩაშვილის სახელობის ჯანმრთელობის ცენტრი მედინას“ წარმომადგენლებმა: ჯუმბერ უნგიაძემ და ირის ბორჩაშვილმა მიმდინარე წლის 5 აპრილს მიმართეს საჯარო რეესტრს და მათ შორის ადრე გაფორმებული ნასყიდობის ხელშეკრულების გაუქმება მოითხოვეს. შესაბამისად, „ბათუმის სამშობიარო სახლი“ საკუთრებაში უნდა დაუბრუნდეს „ჩარკვიანის სახელობის ბათუმის სამშობიარო სახლს“.

საჯარო რეესტრის მონაცემების მიხედვით: „საჯაროსამართლებრივი შეზღუდვა (აკრძალვა) რეგისტრირებულია შპს „ირის ბორჩაშვილის სახელობის ჯანმრთელობის ცენტრი მედინას“ 100% წილზე შპს „ბათუმის სამშობიარო სახლის“ კაპიტალში. შესაბამისად, შეუძლებელია განხორციელდეს განცხადებით მოთხოვნილი ცვლილებების [„ბათუმის სამშობიარო სახლის“ „ჩარკვიანის სახელობის ბათუმის სამშობიარო სახლისთვის“ საკუთრებაში დაბრუნების] რეგისტრაცია.“

„მარეგისტრირებელი ორგანო მიიჩნევს, რომ დაინტერესებული პირის მიერ წარმოდგენილი დოკუმენტაცია არ აკმაყოფილებს რეგისტრაციის პირობებს,“ – აღნიშნულია რეესტრის განცხადებაში. აქედან გამომდინარე, მხარეებს ამ ეტაპზე უარი ეთქვათ ნასყიდობის ხელშეკრულების გაუქმების რეგისტრაციაზე.

„ბათუმელები“ ჯუმბერ უნგიაძეს ვერ დაუკავშირდა.

დაუდასტურებელი ინფორმაციით, ირის ბორჩაშვილი ბათუმის საერთაშორისო საუნივერსიტეტო ჰოსპიტლის ყიდვას აპირებდა და ამიტომ თქვა უარი „ბათუმის სამშობიარო სახლზე“.

ბათუმის საერთაშორისო საუნივერსიტეტო ჰოსპიტლის დირექტორმა ისმეთ დინდარიმ (მიქელაძე), „ბათუმელებთან“ სატელეფონო საუბარში დაადასტურა, რომ იყო საუბარი ჰოსპიტლის გასხვისებაზე, თუმცა მოლაპარაკებები ირის ბორჩაშვილთან უშედეგოდ დასრულდა და „ჰოსპიტალი ჩვეულებრივ აგრძელებს მუშაობას“.

დღეს, 21 აპრილს, საღამოს, აჭარაში ამინდის გაუარესებაა მოსალოდნელი. გარემოს ეროვნული სააგენტოს აჭარის რეგიონალური ჰიდრომეტეოროლოგიური ობსერვატორიის ინფორმაციით, მოსალოდნელია წვიმა და ქარი:

„ქარის სიჩქარე დროგამოშვებით იქნება 17-22 მეტრამდე. მნიშვნელოვნად დაეცემა ჰაერის ტემპერატურა, სანაპირო რაიონებში იქნება 6 გრადუსამდე – ღამით, დღისით – 7-12 გრადუსი.

ზღვაზე მოსალოდნელია 4-5-ბალიანი შტორმი. 23 აპრილს, დღისით, დროებით გამოიდარებს, მოიმატებს ჰაერის ტემპერატურაც, მაგრამ იმავე  დღის ბოლოს ამინდი ისევ გაუარესდება. 24-25 აპრილს, განსაკუთრებით ღამისა და დილის საათებში, ამინდის მკვეთრი გაუარესებაა მოსალოდნელი. დროგამოშვებით იქნება ძლიერი წვიმა  და ქარი. მაღალმთიან რაიონებში შესაძლოა მოთოვოს კიდეც,“ – უთხრა „ბათუმელებს“ აჭარის რეგიონალური ჰიდრომეტეოროლოგიური ობსერვატორიის სინოპტიკოსმა მარინე ქათამაძემ.

 საქართველოს ფინანსთა სამინისტროს ინფორმაციით, საგამოძიებო სამსახურმა აჭარისა და შიდა ქართლის რეგიონებში, უკანონო სამეწარმეო საქმიანობის ფაქტები გამოავლინა და საქართველოს ექვსი მოქალაქე, სათამაშო აპარატების უკანონოდ განთავსებისა და ფუნქციონირების ფაქტზე, სისხლის სამართლის პასუხისგებაში მისცა.

აჭარის განათლების, კულტურისა და სპორტის მინისტრის მოადგილედ ბადრი ნაკაშიძე დაინიშნა. მან ბოლო  17  წელი რუსეთში იცხოვრა და ლომონოსოვის უნივერსიტეტში ასწავლიდა. ბადრი ნაკაშიძე საქართველოსა და რუსეთის მოქალაქეა. ასლან აბაშიძის ხელისუფლებაში ყოფნის დროს ის იყო უზენაესი საბჭოს წევრი, მუშაობდა პროკურატურაშიც. როგორ და ვისი რეკომენდაციით დაინიშნა ბადრი ნაკაშიძე მინისტრის მოადგილედ და რა აკავშირებს პარლამენტის თავმჯდომარის მამასთან? ამ და სხვა კითხვებზე „ბათუმელებთან“ ბადრი ნაკაშიძემ ისაუბრა.

ბატონო ბადრი, საქართველოში თქვენ თანამდებობაზე დაბრუნდით 17 წლის შემდეგ. თქვენ ერთი პერიოდი იყავით ასლან აბაშიძის გუნდის წევრი და ასევე აბაშიძის რეჟიმის გამო იძულებული გახდით ქვეყანა დაგეტოვებინათ. რატომ წახვედით მაშინ საქართველოდან?

ჩავთვალე, რომ ჩემი შესაძლებლობები იმ თანამდებობაზე, სადაც  ვიყავი, უკვე ამოვწურე, ვეღარ ვხედავდი ინტერესს და წავედი. მქონდა სურვილი ბათუმის უნივერსიტეტში მუშაობის, მაგრამ არ გამოვიდა, ამიტომ ნახევარი წელი ვიყავი უმუშევარი და შემდეგ დავბრუნდი მოსკოვში – იქ, სადაც მქონდა დამთავრებული უნივერსიტეტი, ჯერ მიმიღეს როგორც მასწავლებელი და შემდეგ კათედრის გამგედ დავრჩი.

როგორც ვიცით, თქვენ ცოტა ხნის წინ გინდოდათ ბსუ-ს რექტორობა, შემდეგ პრორექტორობაც, თუმცა სწორედ იმის გამო, რომ ცხოვრობდით და მუშაობდით მოსკოვში, წინააღმდეგობა შეგხვდათ. ეს მართალია?

ჩემთვის უარის მიზეზი არავის აუხსნია, მაგრამ არა მგონია, რომ ეს მოსკოვის ფაქტორთან ყოფილიყო დაკავშირებული, იმიტომ, რომ მოსკოვშიც იმავე საქმიანობას ვეწეოდი, რასაც გავაკეთებდი ბათუმის უნივერსიტეტში. ერთხელ არ მოხერხდა ტექნიკური მიზეზების გამო, რადგან როცა შემომთავაზეს უნივერსიტეტში მუშაობა, საბუთების მიღებამდე რჩებოდა ერთი დღე და მომზადებული არ ვიყავი, საბუთები ჩამოტანილი არ მქონდა, მეორედ კი, თითქმის გადაწყვეტილი იყო ეს საკითხი, შეთანხმებული იყო რექტორთანაც, მაგრამ რატომ გადაიფიქრეს, ამის შესახებ არაფერი უთქვამთ. ამიტომ გავაგრძელე იქ მუშაობა, სადაც ვიყავი.

თუმცა ამჯერად მცდელობა აღმოჩნდა შედეგიანი, რადგან თქვენ უკვე ხართ განათლების მინისტრის მოადგილე. 15-წლიანი რუსეთში ცხოვრების შემდეგ დაინიშნეთ ამ თანამდებობაზე. ვისი რეკომენდაციით მოხდა ეს? 

მართალი გითხრათ, არ მეგონა თუ ასეთი მაღალი სტატუსის თანამდებობას შემომთავაზებდნენ, მაგრამ, როცა შედგა საუბარი ზურაბ პატარაძესთან, მან შემომთავაზა რამდენიმე ვარიანტი.

ანუ ზურაბ პატარაძის რეკომენდაციით დაინიშნეთ?

დიახ, რადგან მთავრობის მეთაური ნიშნავს მინისტრის მოადგილეს. მე და ზურაბ პატარაძე ადრე ვიცნობდით ერთმანეთს, ჯერ კიდევ მაშინ, როცა რუსეთში საქართველოს კონსული იყო და შემდეგ ეს ურთიერთობები აღვადგინეთ.

მე როგორც ვიცით, თქვენ და საქართველოს პარლამენტრის თავმჯდომარის – ირაკლი კობახიძის მამა, გიორგი კობახიძე მეგობრები ხართ. ამ ოჯახის მხარდაჭერა არ გქონიათ ამ თანამდებობაზე დანიშვნის დროს?

მე და გიორგი ვიყავით და ვართ მეგობრები, ჩვენ ერთად ვიყავით საქართველოს პარლამენტში 1991-1995 წლებში, მას შემდეგ ვმეგობრობთ. გიორგის ყოველთვის ჰქონდა სურვილი, რომ დავბრუნებულიყავი სამშობლოში, დანიშვნაში მის წვლილს რაც შეეხება, ჩემთვის უცნობია.

რამდენიმე წლის წინ, თუ არ ვცდები 2010  წელს, თქვენ საქართველოში იყავით მოწვეული საზაფხულო სკოლაში კონსტიტუციონალიზმის და რეგიონალური მოწყობის საკითხებზე ლექციის წასაკითხად, რუსეთის სახელით რატომ იყავით მოწვეული, რუსეთის მოქალაქე ხართ თუ საქართველოს?

დიახ, 2011 წელი იყო. რუსეთის მოქალაქე ვარ – 15 წელი ვცხოვრობდი რუსეთში და ახლაც მაქვს ორმაგი მოქალაქეობა.

რატომ მიიღეთ რუსეთის მოქალაქეობა?

ძნელია იქ მუშაობა, თუ არ გაქვს მოქალაქეობა. სახელმწიფო უნივერსიტეტში ვმუშაობდი და უცხოელების მიღება სამუშაოდ ძალიან რთული პროცესია. ყოველ წელიწადს არის ხელშეკრულება გასაახლებელი, რაც გარკვეულ სირთულეებს უკავშირდება.

თქვენ აგვისტოს ომის პერიოდშიც და შემდეგაც მუშაობდით რუსეთის სახელმწიფო უნივერსიტეტში. როგორც ვიცით, ლომონოსოვის უნივერსიტეტი პუტინის ერთ-ერთი დასაყრდენი იდეოლოგიური ცენტრია, ოკუპანტი ქვეყნის იდეოლოგიურ ცენტრში რომ მუშაობდით, ეს გიქმნით დისკომფორტს თუ არა?

უნივერსიტეტი ცოტა სხვა საზოგადოებაა. მართალია, არ არის დაცლილი ბოლომდე პოლიტიკისგან, მაგრამ არის აკადემიური თავისუფლების პრინციპი, რომელიც დაცულია და ყველას აქვს თავისუფალი აზრის გამოთქმის უფლება. მათ შორის აუდიტორიაშიც სტუდენტებთან.

ამ საზოგადოებაში ახერხებდით იმის თქმას, რომ რუსეთი ოკუპანტია?

ასე საკითხი არ დასმულა, უბრალოდ, იმის მტკიცება, რომ საქართველოს იურისდიქციის ქვეშ არის აფხაზეთი და სამაჩაბლოც, მე არ დამჭირვებია, იმიტომ, რომ ბევრი თანამოაზრე მყავდა. ყველა გაგებით ეკიდება იმას, რომ რუსეთმა თავის დროზე დაუშვა შეცდომა, აღიარა აფხაზეთი და სამხრეთ ოსეთი დამოუკიდებლად, ეს იყო შეცდომა, რაც არ უნდა მომხდარიყო, მაგრამ არის ფაქტი და ანგარიშს უწევს ყველა დანარჩენი საზოგადოება, ვინც არის რუსეთში. მეც ვფიქრობ, რომ რუსეთმა დაუშვა შეცდომა, როცა აღიარა აფხაზეთი და სამხრეთ ოსეთი და ეს იყო რუსეთის სისუსტე.

თქვენ როგორ ფიქრობთ, რუსეთი ოკუპანტია?

მე ვფიქრობ, რომ რუსეთმა დაუშვა შეცდომა, როდესაც დაიწყო ომი და აღიარეს აფხაზეთი და სამხრეთ ოსეთი დამოუკიდებელ სახელმწიფოებად, ეს იყო აშკარა შეცდომა და რუსეთის სისუტე. დარწმუნებული ვარ, ამ საკითხებს დაუბრუნდება საქართველოს ხელისუფლება და საქართველოში იქნება აფხაზეთიც და სამხრეთ ოსეთიც.

 რის გაკეთებას აპირებთ განათლების სამინისტროში, გაქვთ განსხვავებული ხედვა რაიმე საკითხებზე?

ჩემს საკურაციო სფეროში შევიდა სპორტი და ახალგაზრდული საქმიანობა და რესურსების დეპარტამენტი, რომელიც, ძირითადად, დაკავებულია ბიუჯეტის შედგენით და შესრულებით. დღეს მქონდა საუბარი საინტერესო ადამიანებთან და ჰქონდათ წინადადება, რომ მუნიციპალიტეტებში შევქმნათ საჭადრაკო სკოლები. გარდა ამისა, ჩაქვში დავათვალიერეთ სპორტული დარბაზი, სადაც ევროპისა და მსოფლიო ჩემპიონები გამოიზარდნენ, მაგრამ რომ ნახოთ რა მდგომარეობაშია დარბაზი, გაგიკვირდებათ.  დაინგრევა ეს დარბაზი და ახალი სპორტული კომპლექსი აშენდება,  ხელოვნებისა და კულტურის ცენრტთან ერთად. ეს იქნება ადგილი, სადაც შეიძლება ნებისმიერი დონის სპორტული შეჯიბრებები გაიმართება.

კიდევ რა გეგმები გაქვთ?

დიდი სურვილი მაქვს მასიური გახდეს სპორტი ახალგაზრდებისთვის და სპორტი იყოს ტურიზმის ერთ-ერთი მიმართულება აჭარაში. იქმნება სპორტული ტურიზმის ფედერაცია, რომლის თავმჯდომარეც იქნება ზურაბ პატარაძე და იზრუნებს იმაზე, რომ ეს მიმართულება განვითარდეს. ყინულის სასახლის გვერდით არის კიდევ დაგეგმილი სპორტული კომპლექსის მშენებლობა, ამიტომ თუ ცოტა დროს მოგვცემთ და მოგვიანებით კიდევ შემეხმიანებით, უფრო ჩამოყალიბებული ვიქნები გეგმებში.

შსს-ს საინფორმაციო-ანალიტიკური დეპარტამენტის საინფორმაციო ცენტრმა საქართველოში რეგისტრირებული, ასევე, იმპორტირებული და რეექსპორტირებული ავტოსატრანსპორტო საშუალებების შესახებ კვლევა ჩაატარა. კვლევის თანახმად, 2016 წლის მონაცემებით, საქართველოში  კაცების უმრავლესობა, 20% , უპირატესობას Mercedes-Benz-ის მარკას ანიჭებს, ხოლო ქალების უმრავლესობა, 22,4% , –  TOYOTA-ს მარკას.

2016 წლის 7 ფავორიტი მოდელი მსუბუქ ავტომანქანებში გენდერული განაწილების გათვალისწინებით ასე გამოიყურება:

ქალების არჩევანი: NISSAN TIIDA, HONDA FIT, TOYOTA PRIUS, TOYOTA VITZ, NISSAN NOTE, MERCEDES-BENZ C  MERCEDES-BENZ E

კაცების არჩევანი: MERCEDES-BENZ E, OPEL ASTRA, MERCEDES-BENZ C, HONDA FIT, NISSAN TIIDA, TOYOTA PRIUS, SUBARU FORESTER

კვლევის თანახმად, საქართველოში ავტოპარკი ყოველწლიურად იზრდება. 2016 წელს ზრდის მაჩვენებელმა 8% შეადგინა, ხოლო 2014 წელთან შედარებით, ქვეყანაში ავტომობილების რაოდენობა 16,8%-ით გაიზარდა.

ჩაქვში, აღმაშენებლის 80-ში მცხოვრები ნუგზარ გამრეკელიძე ამბობს, რომ ავტობანის გაყვანის შემდეგ ის მის საკუთრებაში არსებულ მიწის ნაკვეთს ვეღარ იყენებს. ქობულეთის შემოვლითი გზის გაყვანის პროცესში მიწა მშენებელ კომპანიას ნუგზარ გამრეკელიძის ფართობში დაუყრია.

„2014 წელს მიდიოდა ეს სამუშაოები. ჩინური კომპანიიდან იყვნენ და მთხოვეს, იქნებ მიწის დაყრის უფლება მოგვცე, იჯარის ხელშეკრულებას გაგიფორმებთო“, – გვიყვება ნუგზარ გამრეკელიძე. – „შევთანხმდით, რომ ისინი მიწის გორაკებისგან ჩემს ნაკვეთს ავტობანის გაყვანის დასრულებამდე გაასუფთავებდნენ, ხოლო მანამდე კომპენსაციის სახით ეზოში ქვის კედელს ჩამომისხამდნენ. ქვის კედელი გამიკეთეს, მაგრამ მიწის გორები დამიტოვეს და ისე წავიდნენ. თხილის და მანდარინის ათობით ნერგიც დაზიანდა“.

მოქალაქის თქმით, სამი თვის წინ სცადა სამუშაოების შემსრულებელ კომპანიასთან შეხვედრა. ამბობს, რომ საავტომობილო გზების დეპარტამენტმა კომპანიას შეახვედრა და მიწისგან გათავისუფლების დაპირებაც მიიღო, თუმცა უშედეგოდ.

ზურაბ სიხარულიძე, საავტომობილო გზების დეპარტამენტის აჭარის საავტომობილო გზების დირექციის დირექტორი: „გუშინ მომმართა ამ მოქალაქემ. მანამდე ჩვენ ინფორმირებული არ ვიყავით პრობლემის შესახებ. უახლოეს დღეებში დავუკავშირდებით კომპანიას, ვინც შემოვლით გზაზე მუშაობდა.“

იპოთეკარები, რომლებიც თავს დაზარალებულად მიიჩნევენ, პრეზიდენტ გიორგი მარგველაშვილს ბათუმის დემოკრატიული ჩართულობის ცენტრთან დახვდნენ. პრეზიდენტი აქ პოლიტიკური პარტიებისა და სამოქალაქო სექტორის წარმომადგენლებს შეხვდა საკონსტიტუციო ცვლილებებთან დაკავშირებით.

იპოთეკარებმა პრეზიდენტს უთხრეს, რომ კანონში შესული ცვლილება და გამოსახლების გადავადება რეალურად არაფერს ცვლის: „ჩვენ მაინც ქუჩაში დავრჩით, გვჭირდება დაპირებული დაბალპროცენტიანი სესხი, რაც მოგვცემს სულის მოთქმის საშუალებას”, – მიმართა პრეზიდენტს ერთ-ერთმა მოქალაქემ.

“კონსტიტუციაში ჩაიწერება, რომ სახელმწიფომ უნდა იზრუნოს ადამიანის სოციალურ პირობებზე, მათ შორის, საცხოვრებლით უზრუნველყოფაზე. იქ ბევრი არაფერი წერია, მაგრამ ეს მაინც არის…”, – უთხრა პრეზიდენტმა მოქალაქეებს.

დემოკრატიული ჩართულობის ცენტრში შესვლამდე პრეზიდენტმა მოქალაქეები ასევე დააიმედა, რომ აჭარის მთავრობის თავმჯდომარე, ზურაბ პატარაძე მიხედავს მათ საკითხს.

პრეზიდენტი გიორგი მარგველაშვილი საკონსტიტუციო ცვლილებებზე პოლიტიკური პარტიებისა და სამოქალაქო საზოგადოების წარმომადგენლებს ესაუბრა. შეხვედრას, რომელიც ბათუმის დემოკრატიული ჩართულობის ცენტრში გაიმართა, „ქართული ოცნებიდან“ არავინ დასწრებია.

პრეზიდენტმა საკონსტიტუციო ცვლილებები მიმოიხილა და ხაზი გაუსვა იმ საფრთხეებს, რაც ცვლილებების დამტკიცებას შესაძლოა მოჰყვეს, მაგალითად, პრეზიდენტის პირდაპირი წესით არჩევის გაუქმებას, ან იმას, რომ მომავალი პრეზიდენტი საერთოდ ვეღარაფერს გადაწყვეტს პრემიერთან შეთანხმების გარეშე. ასევე კონსტიტუციაში ტერმინის „მთავარსარდლის“ გაუქმებას და პრეზიდენტის დატოვებას უშიშროების საბჭოს გარეშე.

„იმედი მქონდა, რომ თქვენ ხაზს გაუსვამდით არჩევნების პროპორციული სისტემის შემოღებას. ეს არის, მგონი, პოზიტიური შედეგი ამ პროცესის,“ – მიმართა პრეზიდენტს ასლან ლორთქიფანიძემ. ის „ქართული ოცნების“ ყოფილი წევრია და პოლიტოლოგის სტატუსით გაეცნო პრეზიდენტს. პროპორციული საარჩევნო სისტემა გულისხმობს საპარლამენტო მანდატების გადანაწილებას მიღებული ხმების შესაბამისად და მაჟორიტარული დეპუტატობის სისტემის გაუქმებას.

გიორგი მარგველაშვილმა თქვა, რომ ეს მართლაც პოზიტიური მხარეა ამ პროცესის, თუმცა პოლიტიკური ნების არსებობის შემთხვევაში, აქამდეც შესაძლებელი იყო იმავეს გაკეთება, მათ შორის 2016 წლის საპარლამენტო არჩევნების დროს. პრეზიდენტი მიიჩნევს, რომ საკონსტიტუციო კომისიამ ბევრ მნიშვნელოვან საკითხს აარიდა თავი, მათ შორის, ტერიტორიულ მოწყობას.

თვითმმართველობისა და აჭარის ავტონომიის შესახებ შეკითხვა პრეზიდენტს პროფესორმა ნოდარ ჩხეიძემ დაუსვა. პრეზიდენტი მიიჩნევს, რომ ხელისუფლება ისევ თავს არიდებს დეცენტრალიზაციის საკითხს:

„რეალურად ჩვენ ისევ თავს ვარიდებთ თვითმმართველობას…. ჩვენ რაც შეიძლება მეტად უნდა გავაძლიეროთ ავტონომიურობა. გასაგებია, რომ შესაძლოა უფრო მეტი შეცდომა დავუშვათ ამ პროცესში, მაგრამ ადამიანებს უნდა მივცეთ შეცდომის დაშვების უფლებაც“, – აღნიშნა პრეზიდენტმა.

მანდატების გადანაწილების წესზე შეკითხვა პრეზიდენტს პეტრე ზამბახიძემ დაუსვა, „ევროპული საქართველოს“ წევრმა. გიორგი მარგველაშვილმა შენიშნა, რომ კითხვა სტუდენტებმაც დაუსვეს და არ მოერიდა გამეორებას, რომ ეს წესი „გაუგებარი ლოგიკითაა“ მიღებული. მანდატების გადანაწილების წესის მიხედვით, არჩევნებში გამარჯვებული პარტია ყველა გაუნაწილებელ მანდატს იღებს ხელში.

„ბატონო პრეზიდენტო, ხომ არ ფიქრობთ, რომ თქვენი ეს კამპანია „კონსტიტუცია ყველასია“ არის დაგვიანებული. ადრეც შეგეძლოთ გეაქტიურათ და უფრო მეტი შედეგისთვის მიგეღწიათ“ – მიმართა პრეზიდენტს „ნაციონალური მოძრაობის“ წევრმა, მირდატ ქამადაძემ. კითხვის პასუხად გიორგი მარგველაშვილმა თქვა, რომ წინა წლებშიც ის მოქალაქეების მაქსიმალური ჩართულობით ცდილობდა პროცესზე პოზიტიური გავლენის მოხდენას.

„ნაციონალური მოძრაობის“ კიდევ ერთმა წევრმა, გია აბულაძემ პრეზიდენტს უთხრა, რომ მოსახლეობა საერთოდ არაა ინფორმირებული საკონსტიტუციო ცვლილებების დეტალებზე: „ჩვენ მოვითხოვეთ, რომ გამოქვეყნებულიყო ტექსტი, რას ცვლიან. ამ ეტაპზე რეგიონში არავინ იცის, რეალურად რა შეიცვლება ქვეყნის მთავარი კანონის კიდევ ერთხელ შეცვლის შემდეგ“.

პრეზიდენტთან შეხვედრა ერთი საათის განმავლობაში გრძელდებოდა.

წელს, აშშ და საქართველო თანამშრომლობის 25 წელს აღნიშნავს. საამისოდ აშშ-ს საელჩო საქართველოში, საიუბილეო ღონისძიებებს ქვეყნის სხვადასხვა ქალაქში გამართავს. საზეიმო აქტივობები ბათუმშიც დაიგეგმა.

ამერიკის დღეები ბათუმში,  24 აპრილს, 12:00 საათზე, ამერიკულ კუთხეში, ამერიკის საელჩოსა  და ადგილობრივი ხელისუფლების წარმომადგენლების მისასალმებელი მიმართვით გაიხსნება.

ამავე დღეს, 15:00 საათზე, ძმები ნობელების სახელობის ბათუმის ტექნოლოგიურ მუზეუმში გაიხსნება ფოტო გამოფენა – „ჯონ სტეინბეკის და რობერტ კაპას მოგზაურობა საქართველოში“.

15:00 – 16:30 საათზე, ბათუმის ამერიკულ კუთხეში მოეწყობა დოკუმენტური ფილმის ჩვენება/დისკუსია „ურბანული დაგეგმარება“ (“Urban Planning”), რომელიც აშშ-ს სახელმწიფო დეპარტამენტის სატელევიზიო პროექტია.

17:00 –18:00 საათზე კი ზაქარია ფალიაშვილის სახელობის მუსიკალურ სკოლაში გაიმართება ფლეშ მობი და  კლასიკური მუსიკის საღამო.

25 აპრილს 11:00-13:30 საათზე, ბათუმის შოთა რუსთაველის სახელობის სახელმწიფო უნივერსიტეტში ამერიკანისტიკის კონფერენცია (American Studies Conference) იმართება.

14:00-15:00 საათზე კი, ამავე ლოკაციაზე ოლიკო ჟღენტის დოკუმენტური ფილმის -„ჯონ სტეინბეკი და რუსული ჟურნალის“ (John Steinbeck and the Russian Journal”) ჩვენება მოეწყობა. კინოჩვენების შემდეგ გაიმართება დისკუსია. ფილმი ამერიკის შეერთებული შტატების სახელმწიფო დეპარტამენტის სატელევიზიო პროექტია.

11:00-12:00 საათზე, ბათუმის ხელოვნების სასწავლო  უნივერსიტეტში ოლიკო ჟღენტის კიდევ ერთი დოკუმენტური ფილმის “ვიხსენებთ ბალანჩინს” (“Balanchine and the Ballet”) ჩვენება მოეწყობა.

16:00 საათზე აჭარის ხელოვნების მუზეუმის გალერეაში მხატვარი ნინო ნიჟარაძის  ნამუშევრები გამოიფინება. გამოფენის სახელწოდებაა  „ეპისტოლიარული გრაფიკა“.

18:00 საათზე კი ბათუმის ბულვარში, საზაფხულო თეატრში ბათუმის ჯაზ ბიგ ბენდის კონცერტი (Jazz Big Band Batumi)გაიმართება.

26 აპრილს ბათუმში ამერიკული ფილმების დღე მოეწყობა – Hollywood comes to Georgia. რომლის ფარგლებშიც  –  ბათუმის ამერიკული კუთხეში მტელი დღის განმავლობაში ნაჩვენები იქნება შემდეგი ფილმები ინგლისურ ენაზე (ქართული სუბტიტრებით):

• 10:30 – ალადინი (Aladdin)
• 12:10 – ბეტმენის დაბრუნება (Batman Returns)
• 14:30 – ნიუზის (Newsies) მიუზიკლი
• 17:00 – სასიკვდილო იარაღი 3 (Lethal Weapon 3)
• 19:10 – პირადი მცველი (The Bodyguard)

27 აპრილს, დემოკრატიული ჩართულობის ცენტრში გაიმართება მრგვალი მაგიდა „სამოქალაქო აქტივობა ამერიკის შეერთებულ შტატებსა და საქართველოში, და მედია კომუნიკაციების“ თემაზე.

19:00 საათზე კი ანბანის კოშკიდან სტარტს აიღებს ბათუმის ტრადიციული ველორბოლა – Critical Mass Batumi.

28 აპრილს, 13:00-16:30 საათამდე, ბათუმის შოთა რუსთაველის სახელობის სახელმწიფო უნივერსიტეტში , საინფორმაციო გამოფენა მოეწყობა, რომლის სტუმრებსაც საშუალება ექნებათ გაიგონ ყველა იმ შესაძლებლობების შესახებ, რომელთაც აშშ-ის საელჩო, აშშ-ის საერთაშორისო განვითარების სააგენტო (USAID) და ათასწლეულის გამოწვევის კორპორაცია (MCC) პარტნიორ ორგანიზაციებთან ერთად სთავაზობს. გამოფენაზე წარმოდგენილი იქნება ინფორმაცია საგანმანათლებლო EducationUSA და საგრანტო პროგრამების შესახებ.

აქვე 16:30-18:00 საათზე მოეწყობა კონცერტი, რომელშიც როკ-ბენდი “Melomaniakk” , ჰიპ-ჰოპ მოცეკვავეთა ჯგუფი “Two Step Crew” და რევაზ ლაღიძის გოგონათა გუნდი მიიღებს მონაწილეობას.

აჭარის უმაღლესი საბჭო აპირებს საქართველოს პარლამენტში წარადგინოს კანონპროექტი, რომელიც სკოლის დირექტორების მოვალეობის შემსრულებლების დანიშვნას ითვალისწინებს აჭარის განათლების სამინისტროს მიერ. აღნიშნულ კანონპროექტზე წინა მოწვევის უმაღლეს საბჭოში „რესპუბლიკელი“ გიორგი მასალკინი მუშაობდა, თუმცა  კანონპროექტმა პარლამენტამდე ვერ მიაღწია.

აჭარის განათლების სამინისტროსგან დირექტორების მოვალეობის შემსრულებლების დანიშვნის თემა ამჯერად „ქართული ოცნების“ წევრმა ლადო მგალობლიშვილმა გააცოცხლა. რატომ უნდა დანიშნოს აჭარის განათლების სამინისტრომ დირექტორების მოვალეობის შემსრულებლები და რატომ არის ეს საკითხი ასეთი პრინციპული უმაღლესი საბჭოსთვის? ამ თემაზე „ბათუმელებს“ უმაღლესი საბჭოს განათლების, მეცნიერების, კულტურისა და სპორტის საკითხთა კომისიის თავმჯდომარე ლაგო მგალობლიშვილი პასუხობს.

ბატონო ლადო, თქვენამდე ამ საკითხზე მსჯელობდნენ წინა მოწვევის უმაღლეს საბჭოშიც, რატომ არის ასეთი მნიშვნელოვანი ის, რომ საჯარო სკოლებში დირექტორების მოვალეობის შემსრულებლები აჭარის განათლების სამინისტრომ დანიშნოს?

ზოგადი განათლების შესახებ კანონი მიღებული იქნა 2005 წელს და თავიდანვე არ ჰქონდა აჭარის განათლების სამინისტროს მოვალეობის შემსრულებლების დანიშვნის უფლება. ამის შემდეგ ეს საკითხი რამდენჯერმე იყო დაყენებული დღის წესრიგში, თუმცა ვერ მოხერხდა მაშინ ამაზე შეთანხმება ცენტრალურ ხელისუფლებასთან.

რატომ ფიქრობთ, რომ ახლა მოხერხდება?

მოხერხდა უკვე, რადგან ამაში აქტიურად იყო ჩართული ჭარის განათლების მინისტრი ინგა შამილიშვილი, სულიკო თებიძე (მინისტრის მოადგილე), მეც ვიყავი ჩართული. თბილისში ვაწარმოეთ მოლაპარაკებები და უკვე საქართველოს განათლების მინისტრისგან, ალექსანდრე ჯეჯელავასგან გვაქვს წერილობითი თანხმობაც.

როდის მიიღეთ წერილობითი თანხმობა?

დაახლოებით 20 დღე ან ერთი თვე იქნება, რაც ეს თანხმობა გვაქვს. მინისტრი მხარს გვიჭერს და ასეთი მხარდაჭერა არც ერთი მინისტრისგან არ გვქონია.

პარლამენტში ვისთან აწარმოებდით მოლაპარაკებებს?

მარიამ ჯაშთან გვქონდა ამაზე არაოფიციალური საუბარი, როცა ბათუმში იმყოფებოდა. ჩვენ გვითხრეს, რომ მთავარი იყო შესაბამის სამინისტროსგან გვქონოდა თანხმობა, რადგან ამას პარლამენტის რეგლამენტი ითვალისწინებს. უკვე წარედგინება პარლამენტს და დარწმუნებული ვართ, რომ საკითხი მხარდაჭერილი იქნება.

რას შეცვლის სკოლაში ის, რომ აჭარის განათლების სამინისტრო დანიშნავს დირექტორის მოვალეობის შემსრულებლებს?

დღეს აჭარაში არის 222 საჯარო სკოლა, აქედან დაახლოებით 140-ში არის მოვალეობის შემსრულებელი დანიშნული. მოვალეობის შემსრულებლის საკითხი როცა დგება, აქ მნიშვნელოვანია ის, რომ ძალიან სწრაფად დაინიშნოს, რადგან არ შეფერხდეს სკოლაში ადმინისტრაციული პროცესი. ამჟამად ეს ცენტრალური სამინისტროსგან ხდება და გარკვეული პროცედურები, დრო სჭირდება, სადღაც 2-3 თვე… სკოლის ადმინისტრაციის სხვა პირებს კი არ აქვთ სკოლის მართვის უფლება.

დირექტორს მოადგილე ხომ ჰყავს, მას არ აქვს სკოლის მართვის უფლება?

დირექტორი თუ სკოლიდან წავიდა, მას შიდა ბრძანებით აქვს განსაზღვრული, ვინ ასრულებს ამ დროს მოვალეობას, მაგრამ არც ერთ პირს არ აქვს საბანკო ანგარიშებზე წვდომა, მათ შორის არც მოადგილეს. ამიტომ, როცა მოვალეობის შემსრულებლის დანიშვნის უფლება აჭარას ექნება, ეს საკითხი მაქსიმუმ ორი-სამი დღის ვადაში გადაწყდება.

შეგიძლიათ დაასახელოთ ერთი ფაქტი მაინც, სადაც მოვალეობის შემსრულებლის დანიშვნა იყო პრობლემა?

მე მგონი შუახევში იყო მსგავსი პრეცედენტი, ზუსტად არ მახსოვს.

მოვალეობის შემსრულებელი რა წესით უნდა დაინიშნოს?

უმარტივესია, შეარჩევს, ვთქვათ, რესურსცენტრი და მაშინვე მოხდება მინისტრთან შეთანხმება და  ის ერთ ან ორ დღეში დანიშნავს.

სკოლის დირექტორს მოეთხოვება საკვალიფიკაციო გამოცდების ჩაბარება, ტრენინგებში მონაწილეობა და ა.შ. მოვალეობის შემსრულებლებლად როცა დაინიშნება პირი, მასაც იგივე კვალიფიკაცია მოეთხოვება თუ არა?

მოვალეობის შემსრულებელს არ სჭირდება გამოცდების ჩაბარება, ის შეიძლება იყოს  სკოლის ნებისმიერი თანამშრომელი. ხულოში, სოფელ ტუნაძეებში ვინ უნდა იყოს მოვალეობის შემსრულებელი, როგორ შეარჩევს საქართველოს განათლების სამინისტრო აჭარის განათლების სამინისტროზე უკეთესად.

ამ ლოგიკით, მაშინ ვერც სხვა რეგიონებში ვერ შეარჩევს საქართველოს განათლების სამინისტრო კადრებს.

სხვა რეგიონებს არ ჰყავს მათი განათლების მინისტრი და ჩვენ გვყავს, ავტონომია ვართ და სამინისტრო გვაქვს. ამიტომ ჯობია ადგილზე გადაწყდეს ასეთი საკითხები.

მოვალეობის შემსრულებელი რა ვადით უნდა იყოს?

ვადა არ არის კანონში გაწერილი.

თუ ვადა არ არის გაწერილი, ეს ხომ შეიცავს იმის რისკებს, რომ მოვალეობის შემსრულებლად ისეთი პირი დარჩეს დიდხანს თანამდებობაზე, ვისაც არ ექნება საკმარისი კვალიფიკაცია?

მოვალეობის შემსრულებელი ვინც არის, ყველგან არის კვალიფიციური ხალხი, მაგრამ ზოგიერთი არის ისეთიც, რომ საერთოდ არ აქვს დირექტორობის ამბიცია და ელოდება არჩეული დირექტორის მისვლას.

სწორედ მაგას გეკითხებით – თუკი ადამიანს არ აქვს დირექტორობის  მოტივაცია და ის მაინც რჩება გარკვეული დროით დირექტორის პოსტზე, ეს არ აისახება სკოლის მენეჯმენტზე ნეგატიურად?

მოვალეობის შემსრულებლის არჩევა ხდება იმის მიხედვით, ვინც იმ კონკრეტულ სკოლაში არის ავტორიტეტული ფიგურა და გააჩნია მენეჯერის უნარ-ჩვევები.

ადგილობრივ დონეზე  მოვალეობის შემსრულებლების დანიშვნა ხომ არ გააჩენს ნეპოტიზმის რისკებს?

ევროპული მმართველობის მთავარი პრინციპია, რომ უფრო ახლოს, ადგილზე უნდა ხდებოდეს გადაწყვეტილებების მიღება და ეს მუშაობს მთელ მსოფლიოში და ჩვენს რეგიონშიც კარგად იმუშავებს.

როდის აპირებთ ამ კანონპროექტის მიღებას?

უმაღლესი საბჭოს მომდევნო სხდომაზე მივიღებთ ალბათ დადგენილებას და შემდეგ წარვუდგენთ პარლამენტს და ეს იქნება პირველი საკანონმდებლო ინიციატივა ჩვენი მოწვევის უმაღლესი საბჭოდან საქართველოს პარლამენტში.

საქართველოს საგარეო საქმეთა სამინისტროს ინფორმაციით, თურქეთში 10 აპრილს მომხდარი ავტოსაგზაო შემთხვევის შედეგად დაშავებული საქართელოს კიდევ ერთი მოქალაქე გარდაიცვალა. ის ავარიის შემდეგ რიზეში, საავადმყოფოში მკურნალობდა.

სამინისტროს ინფორმაციით, მოქალაქე მძიმედ იყო დაშავებული და რეანიმაციულ განყოფილებაში იწვა.

ოფიციალური ინფორმაციით, გარდაცვლილი მოქალაქე უკვე გადმოსვენებულია.

ავტოსაგზაო შემთხვევის დროს დაიღუპა საქართველოს კიდევ ერთი მოქალაქე.

გარდაცვლილები აჭარის რეგიონიდან იყვნენ. აჭარის რეგიონიდან არიან ავარიის დროს დაშავებული მოქალაქეებიც.

ვიდრე სტუდენტები შეკითხვებს დასვამდნენ, პრეზიდენტმა მარგველაშვილმა დაახლოებით ნახევარი საათი ისაუბრა საკონსტიტუციო ცვლილებებზე. კრიტიკულ შეფასებებში პრეზიდენტმა მხოლოდ ორი დადებითი მომენტი გამოყო: არჩევნების პროპორციულ სისტემაზე გადასვლა და სახელმწიფოს სოციალური ვალდებულებების გაწერა ქვეყნის მთავარ კანონში.

პრეზიდენტი გიორგი მარგველაშვილი ბათუმის რუსთაველის სახელმწიფო უნივერსიტეტის სტუდენტებს კამპანიის – #კონსტიტუციაყველასია ფარგლებში დღეს, 20 აპრილს  შეხვდა.

„ფაქტოტრივად ძნელი სათქმელია, ვის სურვილებს, ვის თანხმობას გამოხატავს დოკუმენტი, რომელიც იწყება სიტყვებით – ჩვენ, საქართველოს მოქალაქენი…“ – თქვა პრეზიდენტმა. მისივე თქმით, პრეზიდენტი პირდაპირი წესით უნდა აირჩიოს ხალხმა და მნიშვნელოვანი რისკები ჩნდება დემოკრატიული პროცესისთვის, როცა ქვეყნის უმაღლესი თანამდებობის პირებიდან არც ერთს ხალხი პირდაპირ არ აირჩევს: „სამი უმაღლესი თანამდებობის პირი გვყავს – პრეზიდენტი, პრემიერი და პარლამენტის თავმჯდომარე. ვერცერთ მათგანს პირდაპირი წესით ვერ აირჩევს ამომრჩეველი. ეს კიდევ უფრო დააცილებს ამომრჩეველს ხელისუფლებას,“ – აღნიშნა პრეზიდენტმა.

გიორგი მარგველაშვილი დადებითად აფასებს პროპორციულ სისტემაზე გადასვლას, რაც გულისხმობს იმას, რომ პარლამენტში მოხვდებიან მხოლოდ პოლიტიკური პარტიების წარმომადგენლები მიღებული ხმების რაოდენობის შესაბამისად და არა მაჟორიტარები. „ამავდროულად ცუდია ის, რომ პარტია, რომელიც თუნდაც ერთი პროცენტით მეტი ხმა მიიღო, მიაქვს გაუნაწილებელი მანდატები. კომისიამ უნდა აგვიხსნას ჩვენ, საზოგადოებას, ეს გაურკვეველი ლოგიკა“, – აღნიშნა გიორგი მარგველაშვილმა.

გიორგი მარგველაშვილმა აქცენტი ქვეყნის მთავარსარდალზეც გააკეთა, რომელიც კონსტიტუციის მოქმედი რედაქციით, პრეზიდენტია. საკონსტიტუციო ცვლილების ძალაში შესვლის შემთხვევაში კი, ქვეყანას მთავარსარდალი აღარ ეყოლება. პრეზიდენტის შეფასებით, ეს მიდგომაც საფრთხის შემცველია.

სტუდენტებთან შეხვედრის დროს პრეზიდენტს დაუსვეს კითხვა ევროატლანტიკურ სივრცეში ინტეგრაციაზეც, უნდა იყოს თუ არა ჩანაწერი ამის შესახებ კონსტიტუციაში. „კონსტიტუციაში ევროატლანტიკური სივრცის შესახებ რამის ჩაწერა, არ იქნება ადეკვატური ნაბიჯი,“ – აღნიშნა გიორგი მარგველაშვილმა.

პრეზიდენტმა მხოლოდ ერთი სტუდენტის კითხვას აარიდა თავი. შეკითხვა ბიძინა ივანიშვილთან დაკავშირებული კომპანიების მიერ მიწის შეძენას ეხებოდა. ამავე სტუდენტმა კითხვა დასვა აგრარული მიმართულებით სწავლებაზე. გიორგი მარგველაშვილმა მხოლოდ ამ კითხვას უპასუხა და თქვა, რომ როცა განათლების მინისტრი იყო, აგრარულ და კიდევ სხვა რამდენიმე მიმართულებაზე სახელმწიფოსგან სრულ დაფინანსებაზე მიიღო გადაწყვეტილება.

კიდევ ერთმა სტუდენტმა შეხვედრის ბოლოს პრეზიდენტს უთხრა: „რასაც ვისმენ ახლა, არა მგონია საკონსტიტუციო კომისიამ რამე შეცვალოს. კარგია ეს შეხვედრები, საუბრები, მაგრამ რას შეცვლის ეს, ბატონო პრეზიდენტო?“

პრეზიდენტმა სტუდენტს ვერ უთხრა, რომ ეს შეხვედრები და კამპანია #კონსტიტუციაყველასია გავლენას მოახდენს საკონსტიტუციო კომისიის მუშაობაზე, ან პარლამენტის საბოლოო გადაწყვეტილებაზე. პრეზიდენტმა მოქალაქეების ჩართულობის მნიშვნელობას გაუსვა ხაზი: „თავად ეს შეხვედრებია უკვე დემოკრატიული ფასეულობა. ჩვენ რომ ახლა გვიყურებდნენ ძველი ბერძნები, იტყოდნენ, რომ ეს  შეხვედრაც აგორას მთაზე გამართულ მსჯელობას გავდა…“