მინდია ბერიძეს და რევაზ ქერქაძეს საპროცესო შეთანხმება გაუფორმა პროკურატურამ. ისინი პირველები არიან, ვინც „ბათუმის აქციის საქმეზე“ ბრალი აღიარეს – საპროცესო შეთანხმების მიღების სანაცვლოდ. მინდია ბერიძე ერთი წლით დარჩება პატიმრობაში, რევაზ ქერქაძე – 6 თვით.
პროკურატურამ რამდენიმე დღის წინ „ბათუმის აქციის საქმეზე“ დაკავებულ 17 პირს საპროცესო შეთანხმება და 2-2 წლით პატიმრობა შესთავაზა. მასობრივი ძალადობა, რაშიც ჩვიდმეტივე მათგანს ბრალი ედება, 7-დან 11 წლამდე თავისუფლების აღკვეთას ითვალისწინებს.
დღეს, 23 ივნისს, პროკურატურამ მხოლოდ ორ ბრალდებულთან მიმართებაში 2-წლიანი პატიმრობის ვადა მნიშვნელოვნად შეამცირა და შეთანხმებაც შედგა. სასამართლოში საქმის განხილვა ამ კონკრეტული პირების შეწყდა.
„ეს არის შერჩევითი სამართალი. ერთი და იგივე დანაშაულის და ქმედების გამო არ შეიძლება განსხვავებულად დასაჯო ადამიანები,“ – მიიჩნევს ადვოკატი ზაზა პაპიძე. ის „ბათუმის აქციის საქმეზე“ გოდერძი გორგილაძის ინტერესებს იცავს. ამბობს, რომ პროკურატურა სხვა ადვოკატებთანაც განაგრძობს მოლაპარაკებას, მაგრამ ამ ეტაპზე სხვა ბრალდებულებს პროკურატურა ისევ ორწლიან პატრიმობას სთავაზობს და სამწლიან პირობით მსჯავრს.
„კონსტიტუციის 42-ე მუხლის“ იურისტი, არჩილ ჩოფიკაშვილი ყურადღებას ამახვილებს იმ გარემოებაზე, რომ პროკურატურამ თავდაპირველად ერთი და იგივე პირობა – ორწლიანი პატიმრობა შესთავაზა ყველა ბრალდებულს, რამდენიმე დღეში კი, ზოგიერთმა განსხვავებული შეთავაზება დაიმსახურა:
„უსამართლობაა, როცა ერთი და იგივე მახასიათებლების მქონე ბრალდებულებს განსხვავებულად ექცევი. თუკი რამდენიმე დღის წინ ყველა მათგანს ორი წლით პატიმრობას სთავაზობდა პროკურატურა და დღეს რამდენიმეს მიმართ შეცვალა, გამოდის, რომ განსხვავებული დამოკიდებულება აქვს პროკურატურას. კანონის დარღვევასთან ადგილი არ გვაქვს, პროკურატურას შეუძლია შეამციროს შეთავაზებული პატიმრობის ვადა, მაგრამ უნდა არსებობდეს დასაბუთება. ხშირად ამ დროს პროკურორები ამბობენ, რომ ბრალდებულმა ითანამშრომლა გამოძიებასთან. რაში გამოიხატა ეს თანამშრომლობა, რთული გადასამოწმებელია,“ – ამბობს არჩილ ჩოფიკაშვილი.
„მხარეებს შორის შედგა შეთანხმება, მეტი არაფერი,“ – გვითხრა დავით ჯაფარიძემ. ის მინდია ბერიძის ინტერესებს იცავს, რომელიც ერთ წელიწადში გათავისუფლდება პატიმრობიდან. დავით ჯაფარიძის თქმით, პროკურატურამ მხედველობაში მიიღო მინდია ბერიძის ჯანმრთელობის მდგომარეობა.
„ბათუმის აქციის საქმეზე“ მოწმეების ჩვენებებს ისმენს სასამართლო. 17 ბრალდებულის გარდა კიდევ ორი ბრალდებული არასრულწლოვანია. მათ საქმეს დახურულ სხდომაზე განიხილავს მოსამართლე გიორგი გრატიაშვილი.
მოსამართლე დავით მამისეიშვილი რამდენიმე დღეში დაიწყებს არსებით განხილვას მერაბ ღოღობერიძის და ირაკლი ჩხვირკიას საქმეზე. მათ „ბათუმის აქციის საქმეში“ მასობრივი ძალადობის ორგანიზება ედებათ ბრალად.
