Batumelebi

„ოცნების“ მთავრობა სახელმწიფო შესყიდვებში ავანსების მოცულობის გადახედვას და ამ საკითხის კანონმდებლობით დარეგულირებას გეგმავს. როგორც ინფრასტრუქტურის სამინისტრო წერს, ამის შესახებ სახელმწიფო პროექტებში მონაწილე კომპანიებთან შეხვედრაზე იმსჯელეს 15 სექტემბერს. BMG ის ინფორმაციით, ამავე შეხვედრაზე ე.წ. თეთრი სიის შესაძლო გაუქმებაზეც იყო საუბარი.

თეთრი სია სახელმწიფო შესყიდვებში მონაწილე კვალიფიციურ მიმწოდებელთა რეესტრია, რომელსაც შესყიდვების სააგენტო ელექტრონულად აწარმოებს და ოფიციალურ ვებგვერდზე ათავსებს. თეთრ სიაში აისახება სახელმწიფო შესყიდვებში მონაწილე იმ მიმწოდებელთა მონაცემები, რომლებიც აკმაყოფილებენ დადგენილ კრიტერიუმებს. მაგალითად: არ აქვთ ვადაგადაცილებები, დოკუმენტაციას სრულად და დროულად წარადგენენ, გრაფიკის მიხედვით აბარებენ წინასწარ გაწერილ ეტაპებს, სამუშაოებს მაღალი ხარისხით ასრულებენ და ასე შემდეგ.

თეთრ სიაში რეგისტრირებული მიმწოდებელი სახელმწიფო შესყიდვებში მონაწილეობისას გამარტივებული პროცედურებით სარგებლობს.

შესყიდვების სააგენტო ელექტრონულად აწარმოებს ასევე „შავ სიას“ და „გაფრთხილებულ მიმწოდებელთა სიას“. „შავ სიაში“ ხვდებიან მიმწოდებლები, რომლებმაც დისკვალიფიკაცია მიიღეს, ხოლო გაფრთხილებულებში – ის კომპანიები, რომლებმაც ვალდებულება არაჯეროვნად შეასრულეს, მაგრამ აქვთ შანსი გამოასწორონ ხარვეზები და შავ სიაში მოხვედრას გადაურჩნენ.

ინფრასტრუქტურის სამინისტროს ინფორმაციით შეხვედრაზე ინფრასტრუქტურული პროექტების განხორციელების პროცესში ერთ-ერთ მთავარ გამოწვევად ხარისხთან დაკავშირებული პრობლემები დაასახელეს.

„ჩვენთვის მთავარი პრინციპი არის ხარისხი და არ ჩავიბარებთ არცერთ უხარისხო პროექტს. მინდა ეს გაითვალისწინოს ბიზნესმა. ჩვენ კი, მაქსიმალურად შევუწყობთ ხელს კომპანიების კიდევ უფრო გაძლიერებას, ზრდას და ამისთვის ყველა შესაბამის ნაბიჯს გადავდგამთ,” – აცხადებს „ოცნების“ ინფრასტრუქტურის მინისტრი.

არამხოლოდ ხარისხი, ვადების გადაცილება და წლობით გაწელილი დაუმთავრებელი პროექტები მთავარი გამოწვევებია შემსყიდველი ორგანიზაციებისთვის, თუმცა შემსრულებელი კომპანიები მაინც ახერხებენ გარკვეული შეღავათების მიღებას. მაგალითად, იღებენ თანხმობას პროექტების განხორციელების თავდაპირველი ვადების მაქსიმალურად გაგრძელებასთან დაკავშირებით, თუმცა სამუშაოებს მაინც ვერ ასრულებენ სატენდერო პირობების შესაბამისად.

არის შემთხვევები, როცა ერთ წელში დასასრულებელი საქმეები წლების განმავლობაში ვერ დასრულდა და საბოლოოდ შემსყიდველს ხელშეკრულების შეწყვეტა მაინც მოუწია იმის გამო, რომ სამუშაოები უხარისხოდ იყო შესრულებული; ასევე, არის შემთხვევები, როცა შემსყიდველს შეწყვეტილი ხელშეკრულების შემდეგ ახალი ტენდერის გამოცხადება იგივე თანხით მოუწია და ასე შემდეგ.

ხშირად არაეფექტურად მუშაობს პირგასამტეხლოს დაკისრების პრაქტიკაც, რადგან შეწყვეტილი ხელშეკრულების შემდეგ ატვირთულ დოკუმენტებში ხშირად შეხვდებით ჩანაწერს, რომლის მიხედვითაც დაკისრებულია პირგასამტეხლო, თუმცა გადახდის დოკუმენტი მიმწოდებელს არ წარუდგენია შემსყიდველისთვის და უწყება იძულებულია დამატებით სასამართლოს მიმართოს ამ თანხის ამოსაღებად. სასამართლო ხშირად ამ ჯარიმებს ანახევრებს კიდეც.

____________

ფოტო: ombudsman.ge

„დღეს ქუჩაში დგომა არის წინააღმდეგობა და ბრძოლა. ეს არის სულიერი, ემოციური, ადამიანური, პიროვნული ბრძოლა ბოროტებასთან, რადგან ამათი უსამართლობა, ამათი ძალმომრეობა, ამათი მხეცობა, ამათი სიცრუე, ტყუილი და მართლა ბოროტება უნდა დასრულდეს“ – ამბობს ირაკლი ლომოური, მწერალი და მთარგმნელი.

ირაკლი ლომოურს „ბათუმელები“ ესაუბრა იმ პროტესტის მნიშვნელობაზე, რომელიც დღეს საქართველოს ქუჩებში მიდის.

• ბატონო ირაკლი, მინდა ასე გკითხოთ, რის წინააღმდეგ დგახართ რუსთაველზე, რა არის თქვენთვის მიუღებელი?

მე ცოტა სხვა კუთხიდან შევხედავდი ამ პრობლემას და ამ ჩვენს უბედურებას. რის წინააღმდეგ კი არ ვდგავარ, არამედ რისთვის, რისი გულისთვის.

ჩვენ ვდგავართ იმისთვის, რომ შევინარჩუნოთ ჩვენი ეროვნება, ჩვენი ქართველობა, ჩვენი ქვეყანა და წავიდეთ დასავლეთისკენ და არა რუსეთში.

ჩემთვის არის ცხადი, რომ მრავალსაუკუნოვანი ჩვენი ორიენტაცია არის ცალსახა. სულხან-საბა ორბელიანიდან მოყოლებული ამას ვაცხადებთ ნათლად, მკაფიოდ, ხმამაღლა და ის, რომ ვიღაცამ მოინდომა ამ ვექტორის შეცვლა, ეს არის კატასტროფაც და ეს არის კოშმარიც.

წარმოუდგენელია, ვერასოდეს დავიჯერებდი, რომ ასეთი რამე შეიძლება მომხდარიყო.

როდესაც სათავეში მოვიდა ივანიშვილი, მაშინ ერთმა ძველმა მეგობარმა მითხრა, რომ ეს არის კატასტროფა, იმიტომ, რომ ეს ჩვენ რუსეთში შეგვათრევსო. რას ლაპარაკობ, ეს ხომ შეუძლებელია, ვერავინ ვეღარსად ვეღარ შეგვათრევს, გამორიცხულია-მეთქი.

მაშინ ვერ წარმოვიდგენდი იმას, რა მდგომარეობაშიც ახლა ვართ. თუმცა საკმაოდ მალე მივხვდი, რომ რაღაც ცუდად იყო საქმე.

მაშინ მხარს ვუჭერდი ცვლილებას და მეგონა, ეს არის ქვეყნის გადარჩენა, იმ ავტორიტარული თუ რეპრესიული რეჟიმისგან-მეთქი. მაშინ, იუსტიციის სახლთან რომ შიმშილობდნენ სტუდენტები, მეც მივედი მათთან, მივუჯექი გვერდით და სამი თუ ოთხი დღე ვიშიმშილე.

მთელი ცხოვრება ასე თუ ისე, მეტ-ნაკლებად ვცდილობდი გამომეხატა ჩემი პოზიცია. არ მიმაჩნია, რომ რაღაც განსაკუთრებული გამიკეთებია, მაგრამ ვცდილობდი.

1978 წლის 14 აპრილს, უშუალო მონაწილეობას ვიღებდი ენის დასაცავ გამოსვლებში და მაშინაც იყვნენ ადამიანები, რომლებიც ამბობდნენ, რომ არა, არ შეიძლება გამოსვლა, რადგან დაიღუპება თაობა, გვესვრიან… მაგრამ უკან ვერ დაგვახევინეს.

• დღეს როგორია თქვენი განწყობა გაერთიანებაზე? ბევრს აქვს განცდა, რომ ეს ერთობა შესაძლოა შედგეს მაგალითად, 4 ოქტომბერს.

რა თქმა უნდა, იღუპება ქვეყანა და გადასარჩენია. ამიტომ გამოვდივართ ქუჩაში და ვცდილობთ, რომ ჩვენი ახლობლები, მეზობლები თუ ნაცნობები, ჩვენთან ერთად წავიყვანოთ რუსთაველზე.

თუ დღეს ქუჩაში არ გავა ხალხი, ეს ქვეყანა განწირულია.

ჩვენ უკვე ლამისაა მივფრინავთ უფსკრულში და რეალურად, ერთადერთი გამოსავალია, რომ ხალხი დაირაზმოს და ქუჩაში გავიდეს.

მე, პირადად, 4 ოქტომბრის გამარჯვებაზე სრულ იმედებს არ ვამყარებ, თუმცა ყველაფერი შეიძლება მოხდეს. იქნებ მართლა გამოვიდეს მთელი ქვეყანა და მაშინ ნამდვილად შეიცვლება ყველაფერი.

• პროტესტის მონაწილეებს აკავებენ, სდევნიან ყველას, ვინც რეჟიმისთვის მიუღებელია. რას იტყვით ადამიანების იმ ნაწილზე, ვინც ისევ სახლში ან რაღაც კომფორტში ყოფნას ამჯობინებს ბრძოლას?

კონფორმისტები ყოველთვის უმრავლესობაში იყვნენ, ალბათ. დარწმუნებული ვარ, შუა საუკუნეებშიც კი, როდესაც ქვეყნის გადარჩენა იმაზე იყო დამოკიდებული, ადამიანები ხელში ხმალს აიღებდნენ თუ იჯდებოდნენ ბუხართან თავის ქოხში, რაღაც ნაწილი, სამწუხაროდ, საკუთარი ტყავის გადარჩენას ირჩევდა. თუმცა, ცხადია, ყოველთვის იყვნენ ისინი, ვინც იბრძოდნენ. და ამან გადაგვარჩინა.

კონფორმისტებს საკუთარი ტყავი, საკუთარი ჯიბე, საკუთარი ქონება, საკუთარი ეგო აინტერესებთ. უკეთეს შემთხვევაში, საკუთარი ოჯახი… ეს ადამიანები გვერდიდან უყურებენ სიტუაციას.

ნაწილი, პირწავარდნილი ქოცი და რეპრესიული რეჟიმის მხარდამჭერია. იმიტომ, რომ მათ არც ზნეობრივი და არც მორალური მუხრუჭი არ გააჩნიათ. ფასეულობები არ გააჩნიათ. მათ შეუძლიათ გაყიდონ ყველა და ყველაფერი.

ჩვენ წარსულში გვქონია მსგავსი რამ. აი, ტყვეთა სყიდვა რომ იყო შუა საუკუნეებში, მაშინ ქართველები ქართველებს ყიდდნენ. ეს უბედურება გამოვლილი გვაქვს და ეს უბედურება დღეს რომ გრძელდება, კიდევ იმის ბრალია, რომ ერი გარყვნა რუსეთის 200-წლიანმა ბატონობამ. ჯერ იმპერიის და მერე კომუნისტური, მოდერნიზებული იმპერიის ბატონობამ ამ ქვეყანაში.

როდესაც განთავისუფლდა ეს ქვეყანა და გამოაცხადა დამოუკიდებლობა, გულუბრყვილოდ მეგონა, რომ მორჩა, გავიმარჯვეთ, გავედით უკვე სამშვიდობოს.

მაგრამ აღმოჩნდა, რომ ერთმა ფულიანმა, მდიდარმა კაცმა, რომელსაც მოსკოვიდან გამოატანეს მილიარდები, სამშობლო გაყიდა. უფრო სწორად, ქვეყანა იყიდა და რუსეთს მიართვა. დავალება შეასრულა…

მაგათ ხომ იდეა-ფიქსი აქვთ, რომ რუსეთი უნდა იყოს მსოფლიო იმპერია, რომელმაც მსოფლიო უნდა „გააბედნიეროს“.

• რუსეთთან რომ არავინ არის ბედნიერი, ამას ვხედავთ ისტორიიდან და რეალობიდანაც.

ეს თქვენ ხედავთ, მე ვხედავ, ჩვენი მეგობრები ხედავენ, მაგრამ ხალხის საკმაოდ დიდი ნაწილი, რომელიც მხოლოდ დღევანდელი დღით, მხოლოდ მატერიალური ფასეულობებით ცხოვრობს, მას არ აინტერესებს არც ქვეყანა, არც სამშობლო, არც ენა, გარდა საკუთარი თავისა და ასეთი ხალხი, სამწუხაროდ, საკმაოდ ბევრია.

• მაშინ როგორ მოხდება საზოგადოების გაერთიანება, თუკი ასეთი ადამიანები უმრავლესობაში არიან?

ამიტომ ვამბობ, რომ ჩვენ სხვა გზა არ გვაქვს. ყველა უნდა გამოვიდეთ ქუჩაში. ოთხშიც, მანამდეც, მერეც, რადგან ერთადერთი გზა, რომ ეს ქვეყანა გადარჩეს, არის თავგანწირვა.

• ეს თავგანწირვა თქვენ როგორ გესმით ბატონო ირაკლი?

ისე მესმის, რომ ბოლომდე უნდა ვიბრძოლოთ, ბოლომდე. თუ საჭიროა, უნდა შევაკვდეთ კიდეც, რადგან სხვა გზა არ დაგვრჩა… ამ რეჟიმის უკან კრემლი რომ არ იდგეს, ზურგს რომ არ უმაგრებდეს, ვერაფერსაც ვერ შეძლებდნენ. მთელი ქვეყანა იყიდეს პრაქტიკულად.

• ამბობთ, რომ რეალურად, ჩვენ რუსეთი გვებრძვის. როგორ ფიქრობთ, რა აშინებს ყველაზე მეტად რუსეთს? რა დაახევინებს უკან?

რადგან ამ თემაზე ჩამოვარდა საუბარი, გეტყვით, რომ ახლა ვთარგმნი და ფეისბუკზე ვაქვეყნებ ცნობილი მეცნიერის, კულტუროლოგის და ფილოსოფოსის, მიხაილ ეპშტეინის ესეებს. ის ყოფილი საბჭოთა მოქალაქეა, შეერთებულ შტატებში 1991 წელს გადავიდა საცხოვრებლად. რუსეთის, როგორც ფენომენის სიღრმისეული, არსებითი, ძალზე საინტერესო და საგულისხმო ანალიზია. ავტორმა უსასყიდლოდ მომცა უფლება, რომ ქართულად ვთარგმნო და გამოვაქვეყნო. მალე ბეჭდურადაც გამოვა (ახლა კაბადონდება). გამოგიგზავნით ესეების ელექტრონულ ვერსიას, და თუ გექნებათ საშუალება, გამოაქვეყნეთ „ბათუმელების“ საიტზე. რაც მეტი ადამიანი წაიკითხავს და დაფიქრდება, მით მეტი შანსია, რომ გვეშველება…

რუსული იმპერიალიზმის წამალი არის უკრაინა. უკრაინამ უნდა დაამარცხოს რუსეთი ბრძოლის ველზე, რადგან რუსეთს უხეში ძალის გარდა სხვა ენა არ ესმის.

მეოთხე წელია უკრაინა ებრძვის ამ მონსტრს, ოქროს ურდოს მემკვიდრეს. რუსეთი, სინამდვილეში, არის ოქროს ურდოს, მონღოლ-თათრული იმპერიის გაგრძელება – ჩინგიზ ხანს ჰქონდა ოცნება, რომ გააერთიანებდა მთელ ევრაზიას ოკეანიდან ოკეანემდე. რუსეთიც მსოფლიოს დაპყრობაზე ოცნებობს, მაგრამ საკუთარ სახლში ელემენტარული წესრიგიც კი ვერ დაუმყარებია…

• უკრაინა ალბათ დაამარცხებს რუსეთს და ის მოიგებს თავის ომს. მაგრამ ეს ხომ იმას არ ნიშნავს, რომ ჩვენ მშვიდად ყოფნის უფლება გვაქვს?!

უკრაინის ბრძოლა დასავლეთის ბრძოლაცაა. უკრაინის ბრძოლა არის მსოფლიოს ბრძოლა, ცივილიზებული სამყაროს ბრძოლა ამ მონსტრის წინააღმდეგ.

რუსეთში ჩამოიშლება პუტინის რეჟიმი და ამას მოჰყვება დიდი არეულობა. მსგავსი რამ რამდენჯერმე იყო რუსეთის ისტორიაში. თუ პუტინმა უკრაინა ვერ შემოიერთა, ეგ ნიშნავს, რომ რუსეთის იმპერია აღარ არსებობს. რუსეთის იმპერია უკრაინის გარეშე, ეს არის ფიქცია.

ჩამოიშლება პუტინის რეჟიმი და აქაც შეიცვლება სიტუაცია, რადგან აქ ვინც არის სათავეში, ისინი პუტინის ხალხია.

• უკრაინის ბრძოლა გასაგებია, მაგრამ საქართველოს რა აქვს გასაკეთებელი ამ პროცესში?

ჩვენი მისიაა, არ შევურიგდეთ რეჟიმს.

ის, რომ ხალხი ამდენი ხანი დგას ქუჩაში და ფეხს არ იცვლის, ყველანაირი რეპრესიების მიუხედავად, ეს არის სწორედ იმის საწინდარი, რომ მსოფლიომ არ ცნო ეს მთავრობა, ეს არჩევნები. ჰოდა, ამას აქვს უდიდესი მნიშვნელობა. თავი უნდა შევაკლათ და არ დავემორჩილოთ.

მსოფლიო უნდა ხედავდეს, რომ თუნდაც 1000 კაცი ყოველდღე გამოდის ქუჩაში უშიშრად და როდესაც რუსეთში შეიცვლება სიტუაცია, მაშინ აქ კობახიძეც და ბიძინაც დამთავრდება, რეჟიმი დამთავრდება.

სინდისის პატიმრები ხომ სწირავენ თავს, ეს არის სწორედ ჩვენი გამარჯვების საწინდარი. მჯერა, რომ რუსეთი ვერ გაგვანადგურებს. ადრე თუ გვიან გავიმარჯვებთ, მაგრამ როდის იქნება ეს, მე არ ვიცი. შეიძლება ოთხში იყოს, შეიძლება რამდენიმე თვის მერე, შეიძლება ხუთი წლის მერე, მაგრამ მთავარია, რომ არ გავჩერდეთ, არ დავიხიოთ უკან, არავითარი კომპრომისი, არავითარი სისუსტე.

ჩაუშესკუს რეჟიმი როგორც ჩამოიშალა, ხომ გახსოვთ? როგორც კი დაიწყო ხალხის დახვრეტა, ვისაც უბრძანა და ვინც გაისროლა, თვითონ მათ ჩამოაგდეს და დახვრიტეს ჩაუშესკუ.

• ფიქრობთ, რომ ივანიშვილი იქამდე მივა, რომ ხალხს ესვრის?

მოსალოდნელია. ამდენი ხანი ვერ გააჩერეს ხალხი ვერც წყლით, ვერც გაზით, ვერც ჯარიმებით, ანუ ფინანსური რეპრესიებით, ვერც ციხეში ჩასმით და, რა თქმა უნდა, მივლენ აქამდეც. იმიტომ, რომ სხვა გზა არ აქვთ. მაგრამ დარწმუნებული ვარ, რომც გვესროლონ, შემდეგ აღარ ეყოფათ იმის რესურსი, რომ ხალხი გააჩერონ. ხალხი აღდგება მათ წინააღმდეგ… შეიძლება დიდი უბედურება მოხდეს. მაგრამ ყველაფერი უცებ შეიცვლება, რეჟიმი უცებ ჩამოიშლება.

ბიძინა აღარ იქნება. კობახიძეებზე და ეგეთ ხელის ბიჭებზე ლაპარაკიც ზედმეტია.

თუმცა ძალიან მინდა, რომ დიდი უბედურების გარეშე გადავრჩეთ.

• რას ფიქრობთ „ოცნების“ ხელისუფლებაზე, ვინ არის ეს ხალხი და რატომ მიდის საკუთარი ქვეყნის წინააღმდეგ?

მათზე ლაპარაკს პრინციპულად არ დავიწყებ, რადგან ამაზე დროის კარგვა, უბრალოდ, არ ღირს. ელემენტარული მოღალატეები არიან და მოღალატეს რა ემუქრება, თვითონ უნდა იცოდნენ. თუ არ იციან, ადრე თუ გვიან გამოცდიან საკუთარ ტყავზე. ხალხის სიძულვილს უკვე გრძნობენ… ყველაზე კარგი იქნება, თუ ობიექტური სასამართლო გაასამართლებს და საკადრისს მიუზღავს.

ვისაც გვესმის საფრთხეების, ვხედავთ, რომ ბოლო ზღვარზე ვართ, ან ჩავიჩეხებით საბოლოოდ უფსკრულში, ან ვიბრძოლებთ, რომ გადავრჩეთ.

თუ ვიდგებით მედგრად, მტკიცედ, მხნედ, ვერ მოგვერევიან. იმიტომ, რომ ჩვენ დასავლეთის ბუნებრივი ნაწილი ვართ, ჩვენი ქრისტიანობა შინაგანად არაა ეგრეთ წოდებული “რუსკოე პრავოსლავიე”. მათი ვითომ ტრადიციების დაცვაც ხომ ტყუილია. „ერპეცე“ ანუ რუსეთის მართლმადიდებელი ეკლესია მოდერნიზებული იმპერიის იდეოლოგიურ-პროპაგანდისტული დეპარტამენტია, რომელიც დამპყრობლურ ომს ამართლებს… სადაა იქ ქრისტიანობა?

ვისაც რუსული „ფასეულობების“ სჯერა, უბრალოდ პრიმიტივია, ვერ აზროვნებს. თუ კრიტიკული აზროვნების უნარი არ აქვს ადამიანს, რა უნდა ელაპარაკო? რა უნდა გააგებინო?

• ბევრი ინერტულობას და გულგრილობას ამ ბრძოლის მიმართ ამართლებს შიშით. ალბათ თქვენც გსმენიათ – „დაშინებული ჰყავთ“, „ეშინიათ“. რა შემთხვევაში შეგვიძლია გავამართლოთ ასეთი შიშები. თქვენ როგორ უყურებთ ამ საკითხს?

ყოველი ადამიანი თვითონ აგებს პასუხს საკუთარი სინდისის, ღვთის და მოყვასის წინაშე. კი ბატონო, იჯდეს სახლში, მაგრამ, მგონია, რომ ახლა შიშზე საუბარი გვიანია, რადგან შეიძლება ყველაფერი დავკარგოთ – ქვეყანა, მომავალი, ჩვენი შვილების და შვილიშვილების მომავალი და მე არ შემიძლია ასეთ ცხოვრებაზე ფიქრი, არ მინდა ასეთი მომავალი.

ბოლო ზღვარზე ვართ, ან ყველაფერი იქნება საშინლად, ყველაფერი დაიღუპება და ყველაფერი დასრულდება, ან გავიმარჯვებთ. სხვა ვარიანტი, სხვა გამოსავალი აღარ არსებობს. მაგრამ ამ ქვეყანას ამდენი საუკუნე იმისთვის არ უბრძოლია, რომ ვიღაც არარაობებმა, ფულზე დახარბებულმა არარაობებმა გააქრონ. ვერ გაგვაქრობენ, გამორიცხულია.

დღეს ქუჩაში დგომა არის ნამდვილი, რეალური წინააღმდეგობა და ბრძოლა. ეს არის სულიერი, ემოციური, ადამიანური, პიროვნული ბრძოლა ბოროტებასთან, რადგან ამათი უსამართლობა, ამათი ძალმომრეობა, ამათი მხეცობა, ამათი სიცრუე, ამათი ტყუილი, ამათი მართლა ბოროტება უნდა დასრულდეს, რადგან რაღაც აპოკალიპტური ბოროტებაა ეს რუსეთი და „რუსული ოცნება“.

პროევროპული აქციების დაწყების შემდეგ საჯარო სექტორიდან “ქართული ოცნების” ხელისუფლებამ 1200-ზე მეტი საჯარო მოხელე გაათავისუფლა და შეცვალა კანონმდებლობა. ამასთან სახელმწიფო რესურსებს ხარჯავს სასამართლო პროცესებზე, სადაც სამსახურიდან “რეორგანიზაციის” საბაბით გათავისუფლებულმა მოხელეებმა სარჩელები შეიტანეს.

საჯარო რეესტრი, საქართველოს პარლამენტი, საგარეო საქმეთა სამინისტრო, თბილისის მერია და იუსტიციის სამინისტრო – ეს იმ უწყებების ხუთეულია, საიდანაც ყველაზე მეტი საჯარო მოსამსახურე გაათავისუფლეს.

„მაგალითად, საჯარო რეესტრიდან დაახლოებით 200 თანამშრომელი გაუშვეს, ამდენივე – პარლამენტიდან; 100-ზე მეტი – საგარეო საქმეთა სამინისტროდან. ეს ის მნიშვნელოვანი უწყებებია, რომელთა თანამშრომლებმაც დეკემბრის დასაწყისში, უწყვეტი პროევროპული პროტესტის დაწყებიდან მალევე, პეტიციებით გამოხატეს ღიად საკუთარი პოზიციები,” – ამბობს კახი სამხარაძე, ყოფილი საჯარო მოხელე, რომელიც წლების განმავლობაში მუშაობდა საქართველოს პრეზიდენტის ადმინისტრაციაში.

მისი თქმით, საჯარო რეესტრმა მათ პროფკავშირს რამდენჯერმე უთხრა უარი რეგისტრაციაზე, ახლა კი ამის გამო სასამართლოში დავობს.

კახი სამხარაძის თქმით, საჯარო სექტორიდან გათავისუფლებულთა ნაწილმა დაიწყო დავა სასამართლოში. საქმეები სხვადასხვა არასამთავრობო ორგანიზაციებმა აიღეს წარმოებაში და ისინი უწევენ საჯარო მოხელეებს სამართლებრივ დაცვას.

“პირადად მე მაქვს 30 საჯარო მოხელის საქმე აღებული და ვიცავ მათ უფლებებს სასამართლოში,” – ამბობს კახი სამხარაძე.

მისივე თქმით, საჯარო სამსახურებიდან გაათავისუფლეს მაღალი კვალიფიკაციის, დიდი გამოცდილების მქონე კადრები, რითაც სახელმწიფოს რიგ უწყებებს გამოაცალეს ინსტიტუციური მეხსიერება.

„მახსოვს, ევროკავშირის ელჩს შევხვდით და მან პირდაპირ გვითხრა: საქართველოს წარმატება ევროინტეგრაციის პროცესში ორი რამის დამსახურება იყოო, ერთი ძლიერი, ჯანსაღი სამოქალაქო საზოგადოების და მეორე – კვალიფიციური საჯარო მოხელეებისო.

წლების განმავლობაში ყალიბდებოდა საჯარო მოხელეების ეს პროფესიული ჯგუფი. სახელმწიფომ, რეალურად კი თითოეულმა ჩვენგანმა, დიდი რესურსი ჩადო ამ ადამიანების განათლებაში, გადამზადებაში. წესით, მათი დაგროვილი ცოდნა სახელმწიფოს უნდა მოხმარებოდა, საერთო კეთილდღეობას. მაგრამ მივიღეთ სრულიად საპირისპირო ამბავი. მივიღეთ სისტემა, სადაც ხმას თუ ამოიღებ ადამიანი, აუცილებლად ხდები მიუღებელი, ხდები დევნის ობიექტი, შენი განსხვავებული აზრის გამო, მიუხედავად იმისა, თუ რა კვალიფიკაცია გაქვს.

როგორი პროფესიონალიც არ უნდა იყო, სისტემა განზე გდებს, [პარტიისგან] შენი განსხვავებული აზრის გამო. და განსხვავებულ აზრში რას ვგულისხმობ? თუ კონსტიტუციას კითხულობ სწორად, პარტიას არ სჭირდები“, – ამბობს კახი სამხარაძე.

• სამართალი, როგორც იარაღი ცუდი ხელისუფლების პირობებში

სანამ საჯარო სამსახურებიდან მოხელეების მასობრივი გათავისუფლება დაიწყებოდა, „ქართულმა ოცნებამ“ ერთპარტიული პარლამენტის საშუალებით, ჯერ კანონმდებლობა შეცვალა. შედეგად კანონით დააკანონეს, რომ საჯარო მოხელეს წართმეოდა საკუთარი უფლებების დაცვის ის მექანიზმები, რაც მანამდე ჰქონდა.

კერძოდ, კანონის შეცვლამდე თუკი საჯარო სამსახურიდან უკანონოდ გაგათავისუფლებდნენ, სასამართლოს მოგების შემთხვევაში, უწყება ვალდებული იყო აღედგინა სამსახურში საჯარო მოხელე და გადაეხადა მისთვის განაცდური. ახლა ეს ყველაფერი მოშლილია.

„სისტემამ შეიტანა ცვლილებები საჯარო სამსახურის შესახებ კანონში, რომელიც პროფკავშირებმა საკონსტიტუციო სასამართლოში გავასაჩივრეთ. ამ ცვლილებებმა საჯარო სამსახურს ფაქტობრივად გამოაცალა ყველაფერი – ინსტიტუციური მეხსიერება. ამასთან, რეორგანიზაციის პროცესი სრულიად არაკონსტიტუციური, ხოლო საშუალო რანგის მენეჯერების რგოლი მთლიანად მოწყვლადი გახდა“, – ამბობს კახი სამხარაძე.

სამსახურიდან გათავისუფლებული საჯარო მოხელეები თვლიან, რომ საკანონმდებლო ცვლილებით ხელისუფლებამ ნიადაგი მოამზადა, რადგან „თავადაც კარგად იცოდნენ, რომ უსამართლოდ უშვებდნენ სამსახურიდან“ და სასამართლოების მოგების შემთხვევაში, სამსახურში აღდგენა და განაცდურის მიღება შეეძლოთ.

„საჯარო მოხელეები და საჯარო მოსამსახურეები ყოველთვის ცდილობდნენ, რომ სამოქალაქო პოზიცია აქტიური ჰქონოდათ, ამას აფიქსირებდნენ კიდეც.

გაგახსენებთ ერთ მაგალითს, როცა პირველად რუსული კანონი გამოიტანეს, პრეცედენტი შეიქმნა – საკონსტიტუციო სასამართლოს აპარატის თანამშრომლები გამოვიდნენ და დააფიქსირეს თავიანთი პოზიცია. მათთვის ეს პროფესიული რისკი იყო.

28 ნოემბრის ცნობილი განცხადების შემდეგ, კი გამოვიდნენ საგარეო საქმეთა სამინისტროს თანამშრომლები, პარლამენტის, სხვადასხვა საჯარო უწყების და დააფიქსირეს თავიანთი პოზიცია ქვეყნის ევროინტეგრაციის მხარდასაჭერად.

ამ ხალხს, რეალურად, ყველაზე მეტად აღელვებს, რაც ხდება ქვეყანაში. იმიტომ იყვნენ საჯარო სამსახურში, რომ სახელმწიფოს ბედი ადარდებდათ,“ – ამბობს კახი სამხარაძე.

მისი თქმით, ახლა წლობით ნაშენები საჯარო სექტორის რღვევის პროცესი აქტიურ ფაზაშია შესული, რაც მტკივნეულია და გრძელ ვადაში ცუდად აისახება ქვეყანაზე, ეს არის ინსტიტუციური მეხსიერების დაკარგვა, რასაც კვალიფიციური, მაღალი პროფესიული ცოდნის და პასუხისმგებლობის მქონე კადრების სამსახურიდან გაშვების გამო ხდება/მოხდა.

მეორეს მხრივ, პროცესი მტკივნეულია საჯარო სექტორში დარჩენილი მოხელეებისთვისაც, რადგან სხვადასხვა მეთოდით ისინი „დაშინდნენ და იძულებული გახდნენ დახუჭონ თვალი ყველა იმ უსამართლობაზე, რაც ქვეყანაში ხდება. მათ შორის კოლეგების გათავისუფლებაზე“.

„სამწუხაროდ დაშინებამ რაღაც დოზით იმუშავა, მაგრამ არა იმ მასშტაბით, რომ სრულიად შეაჩერა თავისუფალი აზრი და კონსტიტუციის სწორად წაკითხვის შესაძლებლობა საჯარო სამსახურში. ბუნებრივია, იქ ისევ დარჩნენ ადამიანები, რომლებიც ღიად გამოხატავენ თავიანთ პოზიციას, მაგრამ მათ აქვთ უაღრესად სტრესული გარემო – შიგნიდან უფრო მძიმედ განიცდიან ვიდრე გარედან.

მე პირადად როცა ვმუშაობდი საჯარო სამსახურში, ერთი სული მქონდა, აი, პირდაპირ გეტყვით, რომ დამთავრებულიყო ეს პროცესი, რადგან შიგნით ყოფნა და იმის ყურება, როგორ უნდა ადამიანს საკუთარი ჯანსაღი პოზიცია გამოხატოს, მაგრამ ვერ ბედავს რაღაც შიშების გამო, უფრო რთულია,“- ჰყვება კახი სამხარაძე.

ავტორიტარულ სახელმწიფოში საჯარო სამსახური ბოროტად გამოიყენება. ამის მაგალითი იყო სრულიად საბჭოთა კავშირში არსებული სისტემა. საქართველოში ბევრმა სფერომ და მათ შორის საჯარო სექტორმაც, ქვეყნის დამოუკიდებლობასთან ერთად დაიწყო ზრდა.

„საჯარო სამსახური არის ზეპარტიული და პარტიის ინტერესი არ უნდა დააყენოს საჯარო სამსახურზე მაღლა.

საჯარო მოხელე ხელფასს იღებს ბიუჯეტიდან, რომელიც ხალხის მიერ გადახდილი გადასახადებით ივსება. ის არ იღებს ხელფასს რომელიმე პარტიიდან,“ – ეს უკვე გათავისუფლებული საჯარო მოხელეების პოზიციებია, რომლებიც „ქართული ოცნების“ ხელისუფლებამ „რეორგანიზაციის“ საბაბით გაუშვა სამსახურებიდან.

კონსტიტუციური სამართლის და საჯარო მმართველობის სპეციალისტი ანა ფირცხალაშვილი განმარტავს, რომ საჯარო მოხელეებმა ბრმად არ უნდა შეასრულონ ბრძანება, რომელსაც ზემდგომისგან მიიღებენ.

„რემონსტრაციის ვალდებულება  აქვს საჯარო მოხელეებს, რაც მოიაზრებს შემდეგს – საჯარო სამსახურში დასაქმებულ ადამიანს აქვს ვალდებულება პირდაპირ ავტომატურად კი არ შეასრულოს მისთვის მიცემული დავალება, არამედ შეადაროს, თუ რამდენად არის ის კანონთან და კონსტიტუციასთან შესაბამისი.

სწორედ ეს გააკეთეს საჯარო მოხელეებმა დეკემბერში.

თუ კონსტიტუცია გეუბნება, რომ სახელმწიფო ევროინტეგრაციის გზაზე უნდა დადგეს, და მერე პოლიტიკური თანამდებობის პირი რომ ამბობს, არა დღეს ასე არა, რითი უნდა იხელმძღვანელოს საჯარო მოხელემ? მან პირველ რიგში კონსტიტუციით უნდა იხელმძღვანელოს. ამიტომ ეს [ევროინტეგრაციის მხარდამჭერი განცხადებების გაკეთება] მათი უფლება კი არ იყო, ეს იყო მათი ვალდებულება – რემონსტრაციის ვალდებულება,“ – ამბობს ანა ფირცხალაშვილი.

მოკლა თუ არა „ქართული ოცნების“ რეპრესიებმა კრიტიკული აზრი საჯარო სექტორში? – კახი სამხარაძე ამბობს, რომ არა და ვერა.

„კრიტიკულად განწყობილი საჯარო მოხელეები, შეიძლება გაჩუმდნენ, რადგან შიში გაჩნდა, მაგრამ ეს კრიტიკული განწყობა არსად არ წასულა. უფრო მეტიც, გაიზარდა მათი რიცხვი. რადგან რეპრესიები ყველას შეეხო მათ, ვინც განსხვავებულ პოზიციაზე იყვნენ და მათაც, ვინც არ იყო განსხვავებულ პოზიციაზე.

მაგალითად, საქართველოს პარლამენტიდან 200 ადამიანი გაუშვეს და როგორც ფიქრობთ, იქიდან ყველა ერთ პოზიციაზე იყო? მათ მიერ გავრცელებულ პეტიციაზე სულ 18 ხელმომწერი იყო.

ნამდვილად შემიძლია გითხრათ, რომ პროტესტი არსად არ წასულა, პირიქით, კრიზისი გაღრმავდა, უბრალოდ ამაზე საუბარი შემცირდა.

ყველაზე რთული და ცუდი ალბათ სისტემისთვის ზუსტად ეს არის, რომ კრიზისზე შეიძლება აღარ საუბრობენ, მაგრამ გულის სიღრმეში, შინაგანად ყველა კრიტიკულადაა განწყობილი. მათ შორის ისინიც კი, ვინც ჩვენს პროცესებზე მოდიან და წარმოადგენენ საჯარო უწყებების ინტერესებს.

მაქვს განცდა, რომ ისინი თავის სათქმელს აუცილებლად იტყვიან. ახლა შეიძლება ბევრი იგროვებს შიგნით, არ ამბობს, არ გამოთქვამს ხმამაღლა, მაგრამ აუცილებლად დადგება მომენტი, როდესაც ისინი ამას ღიად იტყვიან და ყველა გაიგონებს ამ ნათქვამს,“ – ამბობს კახი სამხარაძე.

„ქართულ ოცნებას“ არ აწყობს ევროპა, რადგან ფულს ვეღარ მოიპარავენ, თუ ევროპულ წესრიგს გაიზიარებენ. მაგათ უნდათ, ისე ჭამონ ხალხის ფული, როგორც ეს რუსეთში ხდება – არავინ გააკონტროლოს.

საფრანგეთში იმდენად დიდია წესრიგი, ავტომატურად ყველა წესს და კანონს ემორჩილება. აი, ესაა ჩემთვის ევროპა! აქ არა მარტო ფრანგები, ჩვენ, ქართველი ემიგრანტები, თუ აფრიკის კონტინენტიდან ჩამოსული ხალხი, ავტომატურად ყველა, წესრიგს ემორჩილება,“ – ამბობს ზაზა ბეჟიტაშვილი, რომელიც თბილისში მეხანძრედ 30 წელი მუშაობდა, 2 წლის წინ კი, საფრანგეთში, ემიგრაციაში წავიდა.

როგორ შეიცვლება ცხოვრება, თუ უვიზო მიმოსვლას ევროკავშირი საქართველოსთან შეაჩერებს? – ამ თემაზე მოსაზრების გაზიარება საფრანგეთში მცხოვრებ ქართველ ემიგრანტს ვთხოვეთ.

ზაზა ბეჟიტაშვილი ამბობს, რომ ათასობით სხვა, ევროპაში წასული ემიგრანტების მსგავსად, პირველ რიგში, მისი ამბავიც კარგად აჩვენებს, სად აღმოვჩნდებით, თუ „ქართული ოცნება“ მიტაცებული ძალაუფლებით და კრემლის მხარდაჭერით საქართველოს ევროპისგან იზოლირებას შეძლებს.

ზაზა ბეჟიტაშვილს სამშობლოს დატოვება ჯანმრთელობის პრობლემების გამო მოუხდა – ხარისხიანი ჯანდაცვა მისთვის ხელმიუწვდომელი იყო. 30-წლიანი სამსახურის შემდეგ მეხანძრე პენსიაში გასულა, თუმცა მისი პენსია 500 ლარია.

„ონკოპაციენტი ვიყავი, ყველაფრის გაყიდვა მომიწია, რომ გადავრჩენილიყავი, უსახლკაროდ ვიქეცი. ჩემით დავტოვე სამსახური და პენსიაში გავედი, აქ რომ არ წამოვსულიყავი, ვერ გადავრჩებოდი…

ირაკლი კობახიძეს ვუსმენდი ამას წინათ, არის ევროკავშირის ალტერნატიული ქვეყნებიო: ინდოეთი, ჩინეთი და ირანიო. ინდოეთსა და ირანში რაზე უნდა იმკურნალოს ადამიანმა, ხომ ვერ მეტყვის პრემიერი? ინდოეთში ყოველ წელიწადში რამდენი ადამიანი კვდება ჯანდაცვის სისტემის გაუმართაობით, ეს თუ იცის?!

ევროპაში იმიტომ კი არ გამორბის ხალხი, რომ აქ სეირნობა უნდა ვინმეს? პირველ რიგში, სამკურნალოდ და სიცოცხლის გადასარჩენად ხდება ადამიანი ემიგრანტი. მე პირადად მინიმუმ 50 ათასი ევრო უკვე დამახარჯეს. აქ ერთი თეთრიც არ გადამიხდია მკურნალობაში. სათვალე რომ სათვალეა, ისეც კი დამიფინანსეს. ჩემნაირი რამდენია კიდევ, ვისი სიცოცხლეც გადაარჩინეს ფრანგებმა?

ძირითადად გულის პრობლემები მაწუხებს ახლა და მკურნალობენ, რაც საჭიროა.

დაზღვევა თუ მოგცეს აქაური, გადარჩენილი ხარ: ტრანსპორტირებიდან დაწყებული, რაც მკურნალობას უკავშირდება, ყველაფერი უფასოდ გაქვს კვების ჩათვლით. ბინაა მხოლოდ პრობლემა. მე ცოლიც მახლავს, ჩემი ერთი შვილიც აქ მუშაობს და გაგვაქვს თავი, მეორე შვილი თბილისშია. დროებითი ბინადრობა გვაქვს.

თუ უვიზო გაუქმდება, იზოლაციაში აღმოჩნდება საქართველო და ქართველი ემიგრანტებიც: ზოგს შვილი გვყავს დატოვებული, ზოგს მშობელი, პაპა და ასე შემდეგ. საერთოდ ვეღარ ვნახავთ ერთმანეთს,“ – გვიყვება ემიგრანტი.

ზაზა ბეჟიტაშვილი ყოველდღიურად აკვირდება საქართველოს ამბებს და კახი კალაძის ბანერზე გაკეთებული წარწერების გამო მოქალაქეების დაკავებას ახსენებს. ემიგრანტი ამბობს, მე პირდაპირ საქართველოს დამოუკიდებლობის დაკარგვის საფრთხეს ვხედავო. ყოფილი მეხანძრე-მაშველის თქმით, მეხანძრეებიც გაჰყავს „ქართულ ოცნებას“ იძულებით პარტიის მხარდამჭერ აქციაზე, მაგრამ მისი „ნეიტრალურობა“ 2020 წელს დასრულდა, როცა გავრილოვი საქართველოს პარლამენტის თავმჯდომარის სავარძელში ჩასვეს:

„მე არც ნაციონალი ვიყავი და არც ქოცი – ნეიტრალური მეჭირა…. 2020 წელს, გავრილოვის აქციების დროს, მივხვდი, რომ ესენი პირდაპირ ზურგს შეაქცევდნენ ევროპას, აქედან დაიწყო კამათი, სულ ვამბობდი, ხალხო, რუსეთი ჩვენთვის არასდროს არაფერ კარგს არ გააკეთებს-მეთქი. იქ კომუნისტური წყობა ახსოვს ბევრს, პური კაპიკები ღირდაო…

მერე ხელისუფლებამაც დაიწყო მიტინგები, ჩვენც ბევრი ვართო… მეხანძრეებიც ვიდექით იქ, ვითომ „ოცნების“ მხარდამჭერები.

მოიგონეს, ომი გინდაო? საქართველომ 4 ომი გადავიტანეთ რუსეთის ხელში. რუსეთმა უკრაინაში ომი თუ მოიგო, მერე ჩვენთვის მოიცლის აუცილებლად. სად მშვიდობა და სად – რუსეთი? რუსეთს როდის იყო, რომ მეგობრობა შეეძლო. რუსებს ის უყვართ, რომ მუდმივად მისი გეშინოდეს. ჯარშიც მანდ ვიყავი და ყველაფერი კარგად ვიცი.

რუსეთის ხელში საქართველოს დარჩენა დაღუპვა და ტრაგედიაა. ქართველებს მინდა მივმართო: ეს გინდათ, დამოუკიდებლობის დაკარგვა და ის, რომ ჩვენი ბიჭები მერე საომრად რუსებმა წაიყვანონ, სადაც მოუნდებათ?

შეხედეთ, ჩეჩნები როგორ დაჰყავთ აქეთ-იქით და ნელ-ნელა ხოცავენ. სულ ფეხზე კიდია რუსეთს სხვა ეთნიკური ჯგუფების ამოხოცვა. ჩეჩნებისგან განსხვავებით ქართველებს წინა ხაზზე გაგვიშვებენ – რუსეთი არ გაპატიებს არაფერს.

აქ სოციალებს ვეძახით იმ ადამიანებს, რომლებიც მუდმივად გვეხმარებიან. სულ მეკითხებიან, ეს რა ხდება საქართველოშიო. ვერაფერს ვპასუხობ სირცხვილით. ყველაფერი კარგად იციან, ასე მგონია.

ისეთი თბილი ხალხია ფრანგები, ნამდვილად ამას არ ველოდი: წამალი გინდა, თუ საჭმელი, თუ დაგინახეს, რომ გიჭირს, მაშინვე მორბიან საშველად. ძალიან კარგად გვიყურებენ ქართველებს. ერთადერთი იმას გვსაყვედურობენ, ნუ ჩხუბობთო, არადა ჩვენი ერთმანეთში საუბარი ხშირად ჩხუბი ჰგონიათ.

ან ამ უმუშევრობას რას უშველის „ოცნება“ საქართველოში? 700 და 800 ლარზე რომ მუშაობს ხალხი, იმიტომაც გამორბის აქ და თავშესაფარს ითხოვს,“ – ამბობს ზაზა ბეჟიტაშვილი.

ქართველ ემიგრანტს ვკითხეთ „ოცნების“ ანტიდასავლურ გზავნილებზეც, მაგალითად, „ქალი ქალია, კაცი – კაცია“. ზაზა ბეჟიტაშვილისთვის მკაფიოა, რომ ეს კრემლის მესიჯბოქსია:

„ეს არის აბსოლუტური სისულელე და ამათი მოგონილი ამბავი.

როცა ამბობენ, რომ თითქოს ბავშვებს იცავენ გარყვნილებისგან, სინამდვილეში სწორედ ევროპაშია დაცული ბავშვის უფლებები – ყველაფერი მომართულია იქითკენ, რომ დაცული იყოს ბავშვის უფლებები. გარყვნილებას როგორ ასწავლი ბავშვს, გამორიცხულია,“ – გაკვირვებას ვერ მალავს ზაზა ბეჟიტაშვილი.

ქართველი ემიგრანტი გვიყვება იმაზეც, რომ საფრანგეთშიც აკვირდება საპროტესტო გამოსვლებს:

„აქ ზოგჯერ ძალიან დიდი აქციებია, მაგალითად, უცებ გამოვლენ და მოითხოვენ ხელფასების მომატებას, ან პენსიის მომატებას. მეორე დღეს ეს მოთხოვნა სრულდება. ხელისუფლება უსმენს ხალხს და ესაა საქმე.

საქართველოში კი, ხალხის მოსმენა კი არა, მეშინია სამოქალაქო ომი არ დაიწყოს. მახსოვს, 90-იან წლებში როგორ ხოცავდა ხალხი ერთმანეთს.

გამოსავალი დროებითი მთავრობაა, შემდეგ სამართლიანი არჩევნები. ხალხმა უნდა იგრძნოს თავისი ძალა, სხვა გამოსავალი არაა,“ – აღნიშნა „ბათუმელებთან“ საფრანგეთში მცხოვრებმა ქართველმა ემიგრანტმა.

პროკურატურამ პირადი ცხოვრების საიდუმლოს უკანონო შენახვის და გავრცელების, ასევე 16 წელს მიუღწეველი ოჯახის წევრის მიმართ ჩადენილი გარყვნილი ქმედების ფაქტებზე, ერთი პირი დააკავა.

უწყების ცნობით, „გამოძიებით დადგინდა, რომ ბრალდებული უკანონოდ ინახავდა ყოფილი მეუღლის ინტიმური შინაარსის ფოტო და ვიდეომასალას, რომელსაც მეუღლესთან განქორწინების შემდეგ 15 წლის შვილს, სოციალური ქსელის საშუალებით უგზავნიდა.

ბრალდებული არასრულწლოვან შვილს ასევე სხვა ყოფილი მეუღლის ინტიმური შინაარსის ფოტო და ვიდეომასალას უგზავნიდა და დაზარალებულს სექსუალურ საკითხებზე ესაუბრებოდა, მათ შორის მის მიერ გადაგზავნილ ფოტომასალას იხილავდა“.

დაკავებულს ბრალდება საქართველოს სისხლის სამართლის კოდექსის 157 პრიმა მუხლის პირველი ნაწილით (პირადი ცხოვრების საიდუმლოს უკანონო შენახვა და გავრცელება) და 11 პრიმა 141 მუხლის პირველი ნაწილით (სრულწლოვნის მიერ გარყვნილი ქმედება 16 წელს მიუღწეველი ოჯახის წევრის მიმართ) წარედგინა, რაც 9 წლამდე თავისუფლების აღკვეთას ითვალისწინებს.

200 დღეა, რაც ჭიათურაში მაღაროელები კომპანია „ჯორჯიან მანგანეზის“ მიერ მაღაროელების სამუშაოდან დათხოვნას აპროტესტებენ.

6-მა მაღაროელმა პროტესტის უკიდურეს ფორმასაც მიმართა ზაფხულში და შიმშილობა დაიწყო, 3 მაღაროელს კი პირი ჰქონდა ამოკერილი.

პროტესტის ლიდერთაგან მერაბ სარალიძე, გიორგი ნეფარიძე, აჩიკო ჭუმბურიძე და თენგო გველესიანი 29 აპრილს დააკავეს. სარალიძესა და ნეფარიძეს პროკურატურა ჯგუფური ძალადობის ორგანიზებას ედავება, ხოლო ჭუმბურიძესა და გველესიანს – მასში მონაწილეობას.

14 სექტემბერს მერაბ სარალიძის აუდიომიმართვა გაავრცელა ფეისბუქგვერდმა „მაღაროელმა“, რომლითაც მერაბ სარალიძე ჭიათურელებს სოლიდარობისკენ მოუწოდებს.

„5 თვის განმავლობაში ჩვენ ციხეში ვზივართ და აქ ჩუმად ვართ. გააჩინეს მოლოდინი დაჭერისთანავე, რომ თითქოს ცდილობდნენ და სურვილი იყო, რომ გამოვეშვით.

ეს ემსახურებოდა იმას, რომ ჩუმად ვყოფილიყავით და ასეც მოვიქეცით მთელი ამ ხნის  განმავლობაში. ჩუმად ვართ, ბევრს ვთმობდით და მზად ვიყავით, დაგვეთმო, მიუხედავად იმისა, რომ ეს ჩვენს ღირსებას ეხებოდა.

ვთმობდით, რადგან ნერვიულობენ ოჯახები, შვილები, მშობლები, მეუღლეები და ვთმობდით ამ ყველაფერს ჩვენი ოჯახების გამო, მაგრამ არ უნდა გვქონდეს იმის განცდა, რომ  მაგ ადამიანებს ვინმეს მშობლები ან შვილები შეეცოდებათ.

ამ მოლოდინს აჩენდნენ იმის გამო, რომ უბრალოდ არ დაძაბულიყო სიტუაცია, ქმედითი ნაბიჯები არ გადაედგათ ადამიანებს, რაც მათ შეაწუხებდათ.

თუმცა საკმარისზე მეტია ეს გატარებული 5 თვე აქ და ერთ კვირაში მოაგვარებდნენ, მართლაც რომ ნდობოდათ ჩვენი გამოშვება აქედან.

დაჭერიდან ერთ კვირაში დაიწყეს საპროცესოზე ლაპარაკი და დღესაც ისევ იმავეს ლაპარაკობენ, რასაც 5 თვის წინ ლაპარაკობდნენ. ამ ყველაფერს ლაპარაკობენ იმის გამო, რომ ადამიანებმა ნაბიჯები არ გადადგან, გაწელონ დრო“ – ამბობს მერაბ სარალიძე აუდიო მიმართვაში.

მისი თქმით, თუ „ქართული ოცნება“ არჩევნებს ჩაატარებს, შესაძლოა მათ მიუსაჯონ და აღარ გამოუშვან საპროცესო შეთანხმებით.

„როცა გაინაღდებენ საკუთარ სკამებს, საკუთარ ადგილს, კიდევ უფრო მეტ რეპრესიებს გაატარებენ, დაშინებას დაიწყებენ ხალხის და, საბოლოოდ, ეს ძალიან ცუდად აისახება თითოეულ მაღაროელზე, თითოეულ მშრომელზე და ჭიათურელზე.

თავდაპირველად მაგათი მიზანი ცნობილი იყო, რომ რაც შეიძლება ნაკლები დანახარჯით მიეღოთ დიდი მოგება, ამისთვის მათ უნდოდათ და პირდაპირ თქვეს, რომ არ გვჭირდება მაღაროელი, ღია კარიერული წესით გავაგრძელებთ მუშაობას, „მარგანეცის“ მოპოვებასო, მაგრამ საბოლოოდ, ჩვენს წინააღმდეგობას მოჰყვა ის, რომ ნაწილი გაუშვეს…

გამომდინარე იქიდან, რომ წინ არჩევნები აქვთ, ჯერჯერობით, ცოტა ლმობიერები არიან, ალბათ, თუმცა საბოლოოდ თუ თავისას გაიტანენ, მერე წავა ისევე როგორც ადრე იყო ხოლმე, თუ ვინმე რამეზე ხმას ამოიღებს – „თუ არ გინდათ წადით“, თუ ვინმე რამეზე კიდევ უფრო მეტად ხმას აიმაღლებს, აი, სამაგალითოები ვიქნებით ჩვენ და გამოიშვერენ თითს, – ნახეთ ვინც არ გვემორჩილებოდა, ციხეში ჩავსვით, ასე დაგიჭერთ სულყველასო და შექმნიან პირობებს და გააქცევენ ხალხს აქედან.

არ სჭირდებათ მაგათ დანაშაულის ჩადენა, ვისი მოშორებაც უნდათ, დანაშაულს შეკერავენ და არადამაჯერებელიც რომ იყოს, მნიშვნელობა არ აქვს, იტყვიან, რომ უნდათ ციხეში ჩასვან და ჩასვამენ.

კომპანიის წარმომადგენლები, რომლებიც ამბობენ, არ გადადგათ ნაბიჯები, პროცესებს დააზიანებსო, ეს ადამიანები არ არიან ჩვენი კეთილმოსურნეები. ამით ცდილობენ დრო მოიგონ და ამ სიჩუმით, ამ გაჩერებით ჩვენ ციხეში ვართ და ისინი თავიანთ გასაკეთებელს აკეთებენ.

მეტი აქტიურობაა საჭირო.

მე არავის არაფერს ვთხოვ, ამით ჩემი ცხოვრება არ მთავრდება. საბოლოოდ, ადრე იქნება თუ გვიან, აქედან გამოვალ და წასვლას არ ვაპირებ, ისევ ჭიათურაში ვაპირებ ცხოვრებას და თუ თვლით, ადამიანებო, მშრომელებო, მაღაროელებო, რომ მე გვერდით დგომას ვიმსახურებ, მაშინ არიან მანდ ჩემი მეგობრები, მართალი, მებრძოლი ხალხი, მოუსმინეთ მაგ ხალხს და დამიდექით გვერდით.

სხვანაირად, მე თუ დავზიანდი და დავზარალდი ახლა, ეს მარტო ჩემი დაზარალება არ იქნება, ყველა მაღაროელს ეხება და კიდევ უფრო მეტად შეეხება“ – ამბობს მერაბ სარალიძე.

მისი თქმით, კომპანიის წარმომადგენლებს მაღაროელების სრული რეპრესიები აქვთ ჩაფიქრებული.

„ადამიანები არ სჭირდებათ და ზუსტად ამიტომ ჩაგვსვეს ციხეში.

5 თვის განმავლობაში ვერ მოახერხეს ის, რომ კობერიძეს [ვისზე თავდასხმასაც ედავებიან დაკავებულებს] ხელი მოეწერა იმაზე, რომ პრეტენზია არ ჰქონოდა ჩვენს გამოშვებაზე?!

ჩვენ კობერიძემ კი არ დაგვიჭირა, გვარს არ დავასახელებ, იმ ადამიანის დავალებით მოხდა ეს პროვოკაცია და ამ ადამიანის პატიმრები ვართ, იმ ადამიანის პატიმრები ვართ, რომელიც ამბობს, ესა თუ ის ნაბიჯი არ გადადგათო. ზუსტად ეს დააზიანებს პროცესებს, როცა კომპანიის წარმომადგენელს დაუჯერებთ…

მინდა, გულისტკივილი გამოვთქვა იმ ადამიანების მიმართ, რომლებზეც ვთვლი, რომ მეტ გვერდში დგომას ვიმსახურებდი.

ჩვენ ციხეში ვართ გამოკეტილები, ჩვენი მეგობრები შიმშილობას აგრძელებენ, სიცოცხლეს და ჯანმრთელობას რისკავენ, ამ დროს კი ეს ადამიანები მაღაროში მიდიან.

მესმის, რთულია დღეს ჩვენს ქვეყანაში ცხოვრება და კეთილდღეობისთვის ვიბრძვით ყველა, მაგრამ ერთმანეთს ზურგი არ უნდა ვაქციოთ. საერთო საქმეს თუ ერთად მოვემსახურებით, თითოეული ადამიანის საქმეც გაკეთდება და ჩვენ თუ ერთმანეთს დავშორდებით, ცალ-ცალკე დავდგებით, ძალიან მარტივად გავტყდებით და საბოლოოდ, ყველა დავზარალდებით. ჩვენი ქვეყანა და ჩვენი ქალაქი დაზიანდება.

არ ვიდებ გულში წყენას, მაგრამ მოლოდინი და იმედი მაქვს, სიმართლეს თვალს გაუსწორებთ და ალბათ ხედავთ, კიდევ უარესი იქნება, თუ ისინი ამას გაიტანენ, დააშინებენ ხალხს, მუქარას და შანტაჟს თუ შევეგუებით, ყველა დავზარალდებით და როცა მოესურვებათ, მაშინ მოგვისვრიან.

მინდა, ამ მართალ ხალხს გვერდში დაუდგეთ, რომლებიც ჩემი დაჭერის შემდეგ ქუჩაში დგანან, სიმართლეს საუბრობენ და სამართლიანობას მოითხოვენ. თქვენი გვერდში დგომით ძალიან მალეა შესაძლებელი, ჩვენ, კომპანიის პირადი პატიმრები, ვიყოთ თავისუფლები. ჩვენ გვჭირდება თავისუფლება, გვჭირდება ოჯახებში დაბრუნება…

არ ვიყავი ჩახედული, უცხოა ჩემთვის ციხეც და სასამართლოც და არ მეგონა, ამხელა უსამართლობა თუ ხდებოდა. არავის არ სჭირდება სიმართლის დანახვა. ვიდეომტკიცებულება რომ აჩვენო მოსამართლეს ისეთი, სადაც აშკარაა, რომ დამნაშავე არ ხარ, თვალებს დახუჭავს და არ დაინახავს. უნდა კომპანიას, რომ დაგვტოვოს ციხეში? უნდა და მორჩა.

რა მოთხოვნებიც უნდა დავაყენოთ, ეს უნდა იყოს სამართლიანი. მე ვენდობი იმ ადამიანებს, რომლებიც ჩემთან ერთად იბრძოდნენ და ახლა ჩემი თავისუფლებისთვის იბრძვიან“, – ამბობს მერაბ სარალიძე აუდიომიმართვაში.

მერაბ სარალიძე 5 თვეა დაკავებულია, შუქრუთის მაღაროს დირექტორზე ჯგუფურად, ჯანმრთელობის განზრახ ნაკლებად მძიმე დაზიანების მუხლით.

აჭარის ტურისტული პროდუქტების განვითარების სააგენტო ფესტივალ „განდაგანაზე“ მოწვეულ ჯგუფებსა და შემსრულებლებს ჯამში ჰონორარის სახით 191 ათას 262 ლარს გადაუხდის.

ფესტივალ „განდაგანას“ ორგანიზებასა და ჰონორარებში მთლიანობაში ბიუჯეტიდან 735 ათას 342 ლარი დაიხარჯება.

„ფესტივალის ფარგლებში ორი დღის განმავლობაში, 20 და 21 სექტემბერს, ბათუმში, ევროპის მოედანზე და მის მიმდებარედ [დუმბაძის და მემედ აბაშიძის ქუჩებზე] წარმოდგენილი იქნება აჭარული სოფელი.

სპეციალურად ამ დღისთვის შემუშავებული საკონცერტო მუსიკალური პროგრამით წარმოდგენილი იქნება ადგილობრივი და მოწვეული ფოლკლორული ანსამბლების ქორეოგრაფიული ნომრები, მათ შორის საქართველოში ცნობილი პოპულარული ქართული ნაციონალური ბალეტი, სიმღერისა და ცეკვის სახელმწიფო აკადემიური ანსამბლი, რომელიც წარმოადგენს ტრადიციულ და ე.წ მოდერნ ბალეტს“ – წერს სააგენტო.

შესყიდვების სააგენტოში გადაგზავნილი ინვოისების მიხედვით ბიუჯეტიდან ჰონორარებს მიიღებენ:

ზვიად ბოლქვაძე – 40 000 ლარი

ჯგუფი „ურსა“ – 30 000 ლარი

ანსამბლი „აფხაზეთი“ – 22 000 ლარი

ჯგუფი „გორდელა“ – 17 000 ლარი

„ქართული ხმები“ – 16 162 ლარი

ჯგუფი „ბანი“ – 15 000 ლარი

ჯგუფი „იბერია” – 15 000 ლარი

ჯგუფი „გოგლაურა“ – 10 100 ლარი

ანსამბლი „ნართები“ – 10 000 ლარი

ანსამბლი „ოდა“ – 7 000 ლარი

თეიმურაზ თათარაშვილი – 4 000 ლარი

ჯგუფი TABEMONO – 3 000 ლარი

„ბონა დეა“ – 2 000 ლარი

ჰონორარებს ბიუჯეტიდან გამარტივებული შესყიდვის საშუალებით, ექსკლუზიური უფლების ფარგლებში გადაიხდიან.

„ფესტივალი „განდაგანა“ ითვალისწინებს როგორც ქალაქური, ისე ეთნო-მუსიკის შემსრულებლების მონაწილეობას. ღონისძიების კონცეფციიდან გამომდინარე, მხოლოდ გარკვეული ბენდების რეპერტუარი შეესაბამება ღონისძიებას და შესაბამისად მიზანშეწონილია წინასწარ შერჩეული, მაღალი პოპულარობითა და ფართო მსმენელთა აუდიტორიით გამორჩეული ბენდებისა და შემსრულებლების მოწვევა.

ორდღიანი მუსიკალური ფესტივალის პროგრამა შეირჩა ისე, რომ მორგებული ყოფილიყო სხვადასხვა სეგმენტის, ასაკისა და მუსიკალური გემოვნების აუდიტორიას“ – აცხადებს აჭარის ტურისტული პროდუქტების განვითარების სააგენტო.

გარდა ჰონორარებისა, ჯამში 544 080 ლარი დაიხარჯება ფესტივალ „განდაგანას“ ორგანიზებასა და სხვადასხვა მომსახურებაში, რასაც სააგენტო მის მიერ გამოცხადებულ ტენდერებში გამარჯვებულ კერძო კომპანიებს გადაუხდის.

მათ შორის:

95 700 ლარი – შპს „ჯეოვოისი“  – „ევროპის მოედანზე ორი სცენის მოწყობა: რაც გულისხმობს მასშტაბური სცენის მოწყობას სკაფოლდის სისტემებით, სასცენო განათებას, სასცენო ეფექტებს, გახმოვანების აპარატურას, 100 კვტ. სიმძლავრეს, 120 კვ.მ -ის ლედ ეკრანებს, ლაივ ჩართვებს და სატელევიზიო სადგურით მომსახურებას, სასცენო დაცვასა და ე.წ. ბექ სტეიჯის მომსახურების უზრუნველყოფას“.

118 000 ლარი – შპს კრეატივ-ჯგუფი – „დეკორაციული მომსახურების სახელმწიფო შესყიდვა, რომელიც ითვალისწინებს ევროპის მოედანსა და მემედ აბაშიძის ქუჩაზე სივრცითი დეკორაციების, ინსტალაციების, კვების ზონების, ეთნო კუთხეების, თაღებისა და საშემოდგომო თემატიკაზე გარემოს მოწყობას“.

129 980 ლარი – შპს „მარკა“ – „ეთნო-სივრცის შექმნა, რომელიც ვიზუალურად და შინაარსობრივად ასახავს აჭარული კულტურის, ყოფისა და ტრადიციების უნიკალურობასა და ასევე, არამატერიალურ კულტურულ მემკვიდრეობას“.

91 000 ლარი – შპს „ჩვენი თეატრი“ – „თეატრალური წარმოდგენებისა და ქუჩაში კოსტუმირებული მსვლელობების ორგანიზება – 20 მონაწილისგან შემდგარ მოსიარულე ორკესტრის შოუს, თემატურ სამოსში გამოწყობილ სხვადასხვა პერსონაჟების მსვლელობებს, გიგანტურ თოჯინებისა და ძელზე მდგარი აკრობატების შოუს, შემეცნებითი ზონა სადაც წარმოდგენილი იქნება კერამიკის ნივთების მოხატვა, ყვავილების გვირგვინების დამზადება, თოჯინების თეატრი და სხვადასხვა საბავშვო აქტივობები“.

109 400 ლარი – შპს „კრეატივ ჯგუფი“ – „კულინარიული მოგზაურობის“ ზონაში აჭარული კერძების სადემონსტრაციო სივრცის მოწყობა, რომელიც მოიცავს კვების ჯიხურების და მასთან დაკავშირებული სრული ტექნიკური აღჭურვილობის უზრუნველყოფას, კვებისა და კულინარიული მასტერკლასებისთვის თემატური და დეკორაციული სივრცის მოწყობას და მასთან დაკავშირებული მომსახურებების ორგანიზებას“.

____________

ფოტოზე: ფესტივალი „განდაგანა 2024“.

„თქვენი თვალით იხილავთ, 2025 წლის 4 ოქტომბერს შსს-ს რამდენი თანამშრომელი გადმოვა და დადგება საზოგადოების გვერდით“, – ამბობს განსაკუთრებულ დავალებათა დეპარტამენტის ყოფილი მაღალჩინოსანი ირაკლი შაიშმელაშვილი, რომელიც ამჟამად აშშ-ში იმყოფება.

ირაკლი შაიშმელაშვილი „ბათუმელებთან“ ინტერვიუში ასევე საუბრობს გდდ-ს იმ თანამშრომლებზე, რომლებმაც ლევან ხაბეიშვილის წინააღმდეგ მისცეს ჩვენება.

• ბატონო ირაკლი, როგორც იცით, ლევან ხაბეიშვილი დააკავეს იმ მიმართვის გამო, რაც მან პოლიციელების მისამართით გააკეთა – თუ გადმოხვალთ ხალხის მხარეს, ხელისუფლების ცვლილების შემდეგ, ჯილდოდ 200 000 დოლარს მიიღებთო. ხაბეიშვილი 3 პირის – შოთა არჯევანიძის, შოთა პაპუაშვილის და ბექა რუხაძის ჩვენების საფუძველზე დააკავეს. თავი შეურაცხყოფილად იგრძნეს ამ შეთავაზების გამოო. თუ იცნობთ ამ ადამიანებს და რა ნიშნით შეარჩიეს ისინი, როგორ ფიქრობთ?

ეს ადამიანები, სამივე, არიან ერთი დანაყოფიდან. მასობრივი ღონისძიებების მთავარი სამმართველო არსებობს გდდ-ში და აქედან არიან სამივე. ერთ-ერთი მათგანი სამმართველოს ხელმძღვანელია.

ითქვა, რომ ეს პოლიციელები შემთხვევითობის პრინციპით შეარჩიეს, რაც აბსურდია. არანაირი შემთხვევითობა არ არსებობს.

36 სამმართველო არსებობს განსაკუთრებულ დავალებათა დეპარტამენტში და „შემთხვევითობის პრინციპით“ სამივე პირი ერთი სამმართველოდან აარჩიეს?

შოთა არჯევანიძე არის მთავარი სამმართველოს პირველი განყოფილების მეორე ქვეგანყოფილების უფროსი. ბექა რუხაძეც არის იმავე მთავარი სამმართველოს, პირველი სამმართველოს მესამე განყოფილების ინსპექტორი.

შემთხვევითობის პრინციპი რომ ყოფილიყო, მაშინ ეს ხალხი, მინიმუმ 50-100 კაცი, უნდა შეეკრიბათ, მაგალითად, სადღაც დარბაზში ან ბრიფინგების ოთახში, ეჩვენებინათ ხაბეიშვილის განცხადება ჯილდოს თაობაზე და ეკითხათ, იგრძნეს თუ არა თავი შეურაცხყოფილად ან ქრთამის შეთავაზებად მიიღეს თუ არა ეს განცხადება. იქ ვიღაცას უნდა აეწია ხელი.

მიმოწერები, რომელიც გასაჯაროვდა, აჩვენებს, რომ ყველაფერი ერთ დღეშია გაკეთებული. ანუ სახელმწიფო უსაფრთხოების სამსახურს მიწერილი აქვს გდდ-ს უფროსზე და იმავე დღეს აქვს პასუხი გაცემული რომან ქარცივაძეს.

ეს რომ სამართლებრივ ჩარჩოებში გაკეთებულიყო, სამიდან ხუთ სამუშაო დღემდე გაიწელებოდა პროცესი. მაგრამ ეს დადგმული სპექტაკლია და ამ სპექტაკლში  ყველაზე მძიმე ფაქტორი არის ის, რომ ეს პოლიციელები, ჩემი ვარაუდით, დაითანხმეს გარკვეული პრემიების, ფულადი კომპენსაციების სანაცვლოდ. სხვა შემთხვევაში, ისინი ამაზე ხელს არ მოაწერდნენ.

• ფიქრობთ, რომ დიდი თანხა გადაუხადეს?

200 000-ს არავინ გადაუხდის. პრემიის სახით მისცემდნენ ალბათ 1500 ან 5000 ლარს. ზუსტად ვერ გეტყვით, მაგრამ ყოველ შემთხვევაში, ეს თანხის სანაცვლოდ აქვთ გაკეთებული.

22 წელი ვიყავი ამ სისტემაში და ვფიქრობ, ასეთი რამ ძალიან შეურაცხმყოფელია. მე რომ ახლა მოქმედი თანამშრომელი ვიყო, ჩემთვის შეურაცხმყოფელი იქნებოდა ის, რასაც ეს ადამიანები იძახიან, რომ თურმე ტელევიზიით მოისმინეს ხაბეიშვილის განცხადება და თავი იგრძნეს შეურაცხყოფილად.

იმ მოცემულობაში, როდესაც წულუკიანი გვიგინებს ანწუხელიძეს და თავს შეურაცხყოფილად არ გრძნობ; მაშინ, როდესაც ჩვენი ქვეყნის ტერიტორიებიდან მოქალაქეებს იტაცებენ ოკუპანტები და თავს შეურაცხყოფილად არ გრძნობ; მოქალაქეებს გვიკლავენ – ვგულისხმობ გინტურის მკვლელობას ეკლესიაში და თავს შეურაცხყოფილად არ გრძნობ; როდესაც შენი შვილის ტოლა ბავშვებს ასისხლიანებენ, ამაზე არათუ ვინმეა დასჯილი, ფორმალურადაც კი არ არის ჩატარებული გამოძიება და შენ, სამართალდამცავი, რომელსაც ფიცი გაქვს დადებული, რომ ემსახურო შენს მოქალაქეებს და შენი ქვეყნის უსაფრთხოებას, ამაზე შეურაცხყოფილად არ გრძნობ თავს; ტელევიზორში მოსმენილი განცხადების გამო იგრძენი თავი „შეურაცხყოფილად“?

ხაბეიშვილს არ უთქვამს ისეთი რამ, რაც სამართალს ეწინააღმდეგება. მან თქვა, რომ თუ მოქალაქეების ცემაზე იტყვით უარს და დადგებით ხალხის მხარეს, როდესაც შეიცვლება ხელისუფლება, სახელმწიფო ბიუჯეტიდან მიიღებთ თანხას, როგორც პრემიას. ეს თქვა.

ქრთამის დეფინიცია არის ის, როცა უკანონო ქმედების ჩადენის გამო სთავაზობ რაღაცას. პოლიციის შესახებ კანონიც ხომ ამას გულისხმობს, რომ დაიცვან მოქალაქეები? ანუ უნდა დაიცვან ფიცი, რომელზეც ხელი აქვთ მოწერილი.

ამ განცხადებით, ხაბეიშვილს კი არ დაარტყეს, რეალურად დაარტყეს შინაგან საქმეთა სამინისტროს, რადგან ამით უფრო მეტად დააზიანეს შინაგან საქმეთა სამინისტროს რეპუტაცია, ვიდრე ის, რომ საქმე შეუკერეს ხაბეიშვილს.

მე მაქვს კომუნიკაცია მოქმედ თანამშრომლებთან, ყოფილ თანამშრომლებთანაც და ძალიან გაბრაზებული არიან გდდ-ეს თანამშრომლების ასეთი მდაბიო საქციელის გამო.

ხარაზიშვილის ქმედებებით მთლიანად შინაგან საქმეთა სამინისტრო შეაძულეს საზოგადოებას და ერთეული ადამიანები მთლიან დეპარტამენტს, მთლიან სტრუქტურას აშავებენ ასეთი ქმედებებით.

• თქვენ 22 წელი იყავით ამ სტრუქტურაში. როგორ ფიქრობთ, რეალურად არსებობს რესურსი პოლიციაში, ვინც არ დაემორჩილება ხალხის დარბევის ბრძანებას და სისტემის წინააღმდეგ წავა, თუ ფუჭია ეს მოლოდინები?

შემიძლია დადასტურებული ინფორმაცია გითხრათ, რომ მე ვისთანაც მაქვს ურთიერთობა და კომუნიკაცია, ის ბიჭები არანაირი ფულის სანაცვლოდ ამას არ გააკეთებენ და არ გაიმეორებენ იმ სცენარს, რაც 2024 წლის ნოემბერ-დეკემბერში გააკეთეს. თქვენი თვალით იხილავთ 2025 წლის 4 ოქტომბერს, შინაგანი საქმეთა სამინისტროს რამდენი თანამშრომელი დადგება საზოგადოების გვერდით.

• რა გაძლევთ ამის იმედს?

აქ მარტო ჩემს განწყობებზე არ არის საუბარი. მე ბევრჯერ ვთქვი – საზოგადოების მხრიდან უნდა შეიქმნას პოზიტიური განწყობა შინაგან საქმეთა სამინისტროს თანამშრომლების მიმართ, რომ მათ გაუჩნდეთ სურვილი დადგნენ მოქალაქეების გვერდით.

• საპროტესტო აქციებზეც მომისმენია ფრაზები – „დადექით ხალხის მხარეს“, „ნუ სცემთ მოქალაქეებს“ და დავივიწყებთ იმას, რომ ჩვენზე ძალადობდით, მეტი რა განწყობა უნდათ?

ეს კარგად მუშაობს, მაგრამ დღეს რომ წამოვიდეს თუნდაც ათი ადამიანი, ამით არაფერი შეიცვლება. აქ საუბარია კონკრეტულ დღეს რა გადაწყვეტილებას მიიღებენ პოლიციელები.

რუსთაველზე 4 ოქტომბერს საზოგადოება რომ გაერთიანდება და მოითხოვს იმას, რაც მათ კონსტიტუციით ეკუთვნით – თავისუფალ საარჩევნო გარემოს, სამართლებრივ სახელმწიფოს, საარჩევნო გარემოს ჩამოშორებულ შინაგან საქმეთა სამინისტროს, სახელმწიფო უსაფრთხოების სამსახურს და ისეთი საარჩევნო კომისიას, რომელიც არ იქნება მიკერძოებული, რას იტყვის ამაზე პოლიცია, რომ უნდა დაგარბიოთო?

თუკი ამ დღეს ისინი დადგებიან მოსახლეობის გვერდით, მერწმუნეთ, ეს რეჟიმი იქნება დამხობილი. ყველა ქვეყანაში, ყველა მშვიდობიანი რევოლუცია ზუსტად ასე მოხდა, როდესაც ძალოვანი სტრუქტურის თანამშრომლები დადგნენ საზოგადოების გვერდით.

• ახლაც იმავეს ითხოვს მოსახლეობა, მაგრამ მაინც ძალადობს პოლიცია მათზე.

შს სამინისტრო არის 25 000-კაციანი სტრუქტურა. ვინ არიან ისინი, ვინც ფულის გამო ძალადობენ? – ესენი არიან ცხოვრებაში შეუმდგარი პიროვნებები, ვერაფერს რომ ვერ მიაღწიეს და ნეპოტიზმით მიიღეს გარკვეული თანამდებობები. ესენი არიან არასრულფასოვნების განცდით შეპყრობილი ადამიანები, რომლებსაც სხვა რესურსი არ აქვთ, რომ რაიმე გააკეთონ და იმიტომ დგანან იქ, სადაც დგანან. ესენი ხალხის მხარეს არასდროს დადგებიან.

ეს არიან ადამიანები, ვისაც ფინანსური კეთილდღეობა აქვთ ამ ყველაფრისგან – ვგულისხმობ მაღალ ხელფასებს, პრემიებს, დანამატებს, სამსახურებრივ ავტომობილებს და ასე შემდეგ. მთლიანობაში, ასეთი ხალხი იქნება 500-1000 კაცამდე.

რეალურად, ღირსეული და პატრიოტი უფრო მეტია და რადგან იქ მუშაობენ, არ ნიშნავს, რომ მოსწონთ ის ქმედებები, რასაც ხედავენ, მაგრამ ამ ხალხის უკან ოჯახები დგას, პასუხისმგებლობები, ვალდებულებები…

• სამშობლოც დგას, ამაზე არ ფიქრობენ?

ჰოდა, სამშობლო რომ უდგათ, 4-ში, რომ დადგება მათ წინაშე საზოგადოება – სხვადასხვა პოლიტიკური შეხედულების, სხვადასხვა სოციალური ჯგუფის და განსხვავებული ასაკობრივი ჯგუფის ადამიანები, მათ გვერდით უნდა დადგნენ ესენიც.

პოლიციაც დაიღალა, რადგან ბოლო 12 წელია, რაც „ოცნება“ მართავს ქვეყანას, პოლარიზებული გახდა საზოგადოება. შს სამინისტრო პარტიულ მუშახელად აქციეს.

• ფიქრობთ, რომ ივანიშვილმა რეალურად იგრძნო ეს საფრთხე და ამიტომ დააკავა ლევან ხაბეიშვილი?

დაახლოებით 16-17 აგვისტოს მქონდა კომუნიკაცია ჩემს მეგობრებთან და მითხრეს, რომ გაცემული იყო ბრძანება ხაბეიშვილზე გარკვეული კომპრომატების შესაქმნელად და დასაკავებლად. ეს არ გააკეთა ან ვერ გააკეთა ოხანაშვილმა. შესაძლოა ის მტკიცებულებები და მოდელი არ მიიჩნია სანდოდ, რაც ახლა მდინარაძემ შექმნა.

მაგრამ ფაქტია, რომ ამ 4-მა ოქტომბერმა საზოგადოების ისეთი ფენები გააერთიანა, რომლებიც ერთად შესაძლოა არასდროს მდგარიყვნენ. ვგულისხმობ განსხვავებული პოლიტიკური შეხედულებების მქონე ადამიანებს, განსხვავებული წარსულის მქონე ადამიანებს და როცა დაინახეს, რომ ეს გაერთიანება რეალურია, რომ ერთიანდებიან რიგითი მოქალაქეები, სტუდენტები, პროფესორ-მასწავლებლები, ექიმები, გლეხები, ემიგრანტები, რომ იხსნან ქვეყანა ამ არამზადებისგან, რა თქმა უნდა, რეალური შიში გაუჩნდა „ოცნებას“.

ლევან ხაბეიშვილიც ამიტომ დააკავეს, რომ მას რეალურად მოჰქონდა ეს მუხტი, რწმენა დაუბრუნა ადამიანებს, რომ ბრძოლას ნამდვილად აქვს აზრი.

• როგორ ფიქრობთ, ხაბეიშვილის დაკავება ამ პროცესს შეცვლის?

პირიქით მგონია. რასაც ვუყურებ, გინდათ სოციალურ ჯგუფებში, გინდათ გადაცემებში, ვხედავ ადამიანებს, რომლებიც აძლიერებენ ამ მუხტს.

რამდენიმე დღეში მეც გავაკეთებ იგივე განცხადებას და სხვებიც მიმართავენ ჩვენს კოლეგებს, რომ კონკრეტულ დღეს, ხალხის წინააღმდეგ ხელი არ აღმართონ და ვინც ხელს არ აღმართავს და ხალხის გვერდით დადგება, აუცილებლად მიიღებს ჯილდოს, პრემიის სახით იმ თანხას სახელმწიფო ბიუჯეტიდან, რაზეც ხაბეიშვილი საუბრობდა. დღეს „ქართული ოცნება“ ამ ადამიანებს ფულს უხდის ხალხის ცემაში, ჩვენ კი გადავუხდით ხალხის გვერდით დადგომისთვის.

• ხარაზიშვილი ახსენეთ, ამბობდით, რომ მისმა ქმედებებმა შეაძულა ხალხს პოლიცია. იმასაც ამბობენ, რომ მას დიდი გავლენა ჰქონდა სპეცრაზმელებზე. რა შეიცვალა მისი წასვლის შემდეგ ამ სისტემაში და როგორ ფიქრობთ, ახალ ხელმძღვანელს გაუჭირდება პროცესების მართვა?

ხარაზიშვილს (მეტსახელად „ხარება“) ძველი კადრებიდან არავინ სცემდა პატივს. უფრო მეტიც, ზიზღიც კი ჰქონდათ მის მიმართ, ვერ იტანდნენ.

ამიტომ მან თავისი ხალხით დააკომპლექტა განსაკუთრებულ დავალებათა დეპარტამენტი.

• ანუ, ვინც ხალხს სცემდა, ეგ ხარაზიშვილის მოყვანილი ხალხი იყო?

ყველა ხარაზიშვილის ხალხი იყო და როცა წავიდა უწყებიდან, ძალიან დიდი ნაწილი გაჰყვა მას. იყო საუბარი, რომ ხარაზიშვილი უნდა დაებრუნებინათ სახელმწიფო უსაფრთხოების სამსახურში შავნაბადაზე, საიდანაც თავის დროზე გადმოვიდა, მაგრამ როგორც ჩანს, ხარაზიშვილი უბრალოდ მოისროლეს.

• ხომ არ იცით, სად არის ეხლა და რას აკეთებს?

ჩემი ინფორმაციით, ახლა სახლშია.

ხარაზიშვილი მაგ სისტემაში ყოველთვის ყველაზე ბინძური საქმეების შემსრულებელი იყო და ძალიან სოლიდურ თანხებსაც უხდიდნენ ამაში. შეასრულებინებდნენ და მოისროდნენ. ამას მიჩვეული იყო.

მისი მოყვანილი ხალხიდან ახალმა უფროსმა, ქარცივაძემ, ბევრი უკან დააბრუნა და ცდილობს მათი კეთილგანწყობა მოიპოვოს, მაგრამ ერთი რაღაც ვერ გათვალა ვერც ქარცივაძემ და ვერც გეკამ თუ რა ჰქვია იმ კაცს, შინაგან საქმეთა მინისტრი რომ არის, რომ ამ ხალხის უკან დაბრუნებით უფრო მეტი უკმაყოფილება გამოიწვიეს გდდ-ში და უფრო მეტად არიან გაბრაზებულები დეპარტამენტის თანამშრომლები, ვიდრე მანამდე იყვნენ.

• რა აბრაზებთ?

ესენი იყვნენ მხეცები, არაადამიანები და შიგნით დეპარტამენტში სასტიკად უსწორდებოდნენ იმ ხალხს, ვინც ხმას ამოიღებდა.

ვინმეს რომ ეთქვა, სამსახურიდან წავალო, შეიძლება ცემაში მოეკლათ და ამისი არაერთი ფაქტი იყო 2024 წლის დეკემბერში. ვისზეც გაიგეს, რომ წასვლას აპირებდნენ, ყველა სასტიკად სცემეს. ეს ხალხი რომ უკან არ დაებრუნებინათ, გდდ-ე, შესაძლოა, დღეს სხვა პოზიციაზე ყოფილიყო.

დააბრუნეს ხარაზიშვილის ხალხი და მე ჩემი ინფორმაციით, ამის გამო ძალიან დიდი უკმაყოფილებაა.

• სპეცრაზმელები ხშირად ვარჯიშობენ თავდაცვის სამინისტროს ბაზაზე. კადრებში, რომელიც გასაჯაროვდა, ჩანს, რომ ისინი აქციების დარბევაზე ვარჯიშობდნენ. იყო საუბარი ახალი წყლის ჭავლის მანქანების შეძენაზეც. თქვენ თუ გაქვთ რაიმე ინფორმაცია ამაზე?

სადაც კადრები იყო გადაღებული, ეს არის თავდაცვის სამინისტროს სამხედრო აეროდრომის ტერიტორია. კადრებში რაც ვნახე, კონსტრუქციებით ქმნიან პარლამენტის მაკეტს და ათამაშებენ პარლამენტის დაცვის გეგმის სხვადასხვა ვარიანტებს. მათ შორის, ცოცხალი ძალით, სპეციალური ტექნიკით და ასე შემდეგ. მაგრამ ეს ტექნიკა ახალი არ არის, შარშან რაც გამოიყენეს, ის ჩანდა.

4 ოქტომბრის მიმართ აქვთ შიშები, რადგან მსგავსი მასშტაბის სწავლება განსაკუთრებულ დავალებათა დეპარტამენტს 2019 წლის დეკემბრის შემდეგ არ ჩაუტარებია.

• როგორ ფიქრობთ, იგივეს გამეორებას აპირებენ, რაც გასულ წელს ვნახეთ? თუ მაინც გაქვთ იმედი, რომ სპეცრაზმელები განუდგებიან სისტემას?

ეს დამოკიდებულია იმაზე, რამდენად მტკიცე იქნება საზოგადოება და რამდენად ბევრი ადამიანი იქნება რუსთაველზე. აქციაზე ხელისუფლება ითვლის ხალხის რაოდენობას.

ამიტომ, ერთია მასშტაბი და მეორე ხალხის ერთსულოვნება. ამიტომ, ყველა უნდა გამოვიდეს, არა მარტო თბილისი, საქართველოს ყველა კუთხიდან უნდა ჩამოვიდნენ ადამიანები, რადგან დასაცავი გვაქვს ჩვენი ქვეყანა.

ჩვენ ან გადავრჩებით 4-ში, მაგრამ თუ რეჟიმმა გაგვტეხა და დაგვამარცხა, მომდევნო წლების განმავლობაში ფეხზე ვეღარ დავდგებით.

გომის მთაზე მიკროავტობუსი ავარიაში მოყვა.

შსს-ს ინფორმაციით, მძღოლმა საჭე ვერ დაიმორჩილა, რის შედეგადაც გზიდან გადავარდა.

მიკროავტობუსის ყველა მგზავრი (დაახლოებით 15 ადამიანი) საავადმყოფოშია გადაყვანილი.

დაშავებულნი არიან როგორც საქართველოს მოქალაქეები, ასევე უცხოელები.

შემთხვევა 15 სექტემბერს მოხდა.

გამოძიება დაწყებულია სსკ-ის 276-ე მუხლით, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს.

აპირებთ თუ არა წასვლას ადგილობრივი თვითმმართველობის არჩევნებზე? როგორ ფიქრობთ, რას შეცვლის ეს არჩევნები? – ეს და მუნიციპალურ არჩევნებთან დაკავშირებული სხვა კითხვები „ბათუმელებმა“ მოქალაქეებს ქალაქის ქუჩებში დაუსვა.

ნახეთ „ბათუმელები“ ვიდეო, რას ამბობენ მოქალაქეები.

„ოცნების“ პრემიერი ირაკლი კობახიძე ამბობს, რომ საარჩევნო ბანერებთან დაკავშირებით „კანონი უმკაცრესად იმოქმედებს“.

„დღეიდან, პრაქტიკა იქნება სწორი – ვინც კი ჩაიდენს დანაშაულს, განურჩევლად იმისა, თუ რომელი პარტიის წარმომადგენელია, ყველას მიმართ უმკაცრესად იმოქმედებს კანონი“ – თქვა კობახიძემ ჟურნალისტის კითხვის პასუხად განაცხადა, რომელიც საარჩევნო კამპანიების დროს ბანერებისა და სააგიტაციო მასალების დაზიანებას შეეხებოდა.

მისი თქმით, აქამდე ზედმეტად „რბილი პრაქტიკა“ იყო დამკვიდრებული და საჭიროა, კანონი მკაცრად იყოს დაცული.

„იცით, რა რეჟიმში წარიმართებოდა საარჩევნო კამპანია 2020, 2021, 2024 წლებში, ხდებოდა ბანერების დაზიანება, სააგიტაციო მასალების დაზიანება – ორმხრივი იყო ეს ყველაფერი და პრაქტიკა იყო განსხვავებული, არასწორი.

დღეიდან, პრაქტიკა იქნება სწორი – ვინც კი ჩაიდენს დანაშაულს, განურჩევლად იმისა, თუ რომელი პარტიის წარმომადგენელია, ყველას მიმართ უმკაცრესად იმოქმედებს კანონი. იყო

რბილი მიდგომა ყველა მიმართულებით, გახსოვთ, მათ შორის, თითქმის ნახევარი თბილისი გადაწვეს და ერთი კაცი იყო დაჭერილი, ისიც მერე სალომე ზურაბიშვილმა შეიწყალა. მეორე შემთხვევაში 6 ადამიანი იყო დაჭერილი, მეტი არა. იყო ზედმეტად რბილი პრაქტიკა და, რა თქმა უნდა, ეს არასწორია. ჩემი მიდგომაა, რომ კანონი უნდა იყოს მკაცრად დაცული,“- განაცხადა კობახიძემ.

„ოცნების“ პრემიერს არ უთქვამს, რომ საარჩევნო ბანერებისა და პლაკატების დაზიანებას ძირითადად, წლების განმავლობაში ოპოზიცია უჩივის, თუმცა ასეთი საქმეების დიდ ნაწილზე, რომელიც ოპოზიციის საარჩევნო ბანერების ჩამოხევას და დაზიანებას უკავშირდებოდა, გამოძიებას აქამდე შედეგი ფაქტობრივად არ ჰქონია.

როგორც ჩანს, „ოცნებას“ მხოლოდ საკუთარი, უფრო ზუსტად თბილისის მერობის კანდიდატის, კახა კალაძის საარჩევნო ბანარები აღელვებს.

დღეს, 15 სექტემბერს, ოპოზიციონერი პოლიტიკოსი ელენე ხოშტარია დააკავეს. საქმე სავარაუდოდ ეხება მელიქიშვილზე მომხდარ ფაქტს, რომლის გამოც ხოშტარიას წინააღმდეგ გამოძიება დაიწყო. ხოშტარიამ კალაძის ბანერს მარკერით „რუსული ოცნება“ დააწერა.

ამავე თემაზე: 

რატომ გახდა საარჩევნო ბანერზე წარწერა დანაშაული – ათობით მსგავსი საქმე რეაგირების გარეშეა

See more

„სივრცეში, სადაც პოლიტიკოსი, საჯარო ფიგურა, ხელისუფლების წარმომადგენელი წყვეტს კონკრეტულ სკოლაში, თან კერძო სკოლაში, უნდა იყოს თუ არა კონკრეტული მასწავლებელი, მე ამ სივრცეში ვერ დავრჩები“, – ამბობს მალხაზ ჭკადუა, სამოქალაქო განათლების მასწავლებელი, რომელმაც სკოლა დღეს, 15 სექტემბერს, პროტესტის ნიშნად დატოვა.

მან ამის შესახებ ფეისბუქზეც გამოაქვეყნა პოსტი.

„ბათუმელები“ მალხაზ ჭკადუას დაუკავშირდა და სკოლიდან წამოსვლის კონკრეტულ მიზეზებზე ესაუბრა.

• მალხაზ, ფეისბუქზე დაწერეთ, რომ სკოლა „ევრო 2000“-დან პროტესტის ნიშნად წამოხვედით. ასევე, მიანიშნეთ იმაზე, რომ სკოლის საქმიანობაში ჩაერია „ქართული ოცნების“ წარმომადგენელი. შეგიძლიათ მოგვიყვეთ, კონკრეტულად რა მოხდა?

სკოლაში მითხრეს, რომ კონკრეტულ კლასში არ უნდა გამეგრძელებინა სწავლება. როცა ვიკითხე ადმინისტრაციაში, რატომ ხდება ასე, დამაჯერებელი პასუხი ვერ მივიღე, ვერც ერთი პირისგან.

წონადი არგუმენტები ვერ მოვისმინე. მხოლოდ ის ითქვა, რომ არის კონკრეტული ჩივილი, კონკრეტული მითითება იმაზე, რომ რაღაც პოლიტიკური ნიშნით დისკრიმინაცია ხდება.

ვითხოვე, რომ ფაქტი დაასახელოს მომჩივანმა-მეთქი, მაგრამ პასუხი ვერ მივიღე.

• სამოქალაქო განათლება მოიცავს ისეთ საკითხებს, როგორიცაა კორუფცია, ნეპოტიზმი, სახელმწიფო ინსტიტუტები და ასე შემდეგ. იყო შემთხვევა, როცა კონკრეტული პირები დაასახელეთ ვთქვათ კორუფციაზე საუბრისას?

ზოგადად, ვერიდები ხოლმე იმგვარი ინფორმაციის გაჟღერებას, გავრცელებას სკოლაში, რომელსაც არ აქვს წყარო. თუ ეს არის ვთქვათ “ბათუმელების” სტატია, ან “სტუდია მონიტორის”, „აი ფაქტის” გამოძიება ან ჩვენი ორგანიზაციის “საერთაშორისო გამჭვირვალობა – საქართველოს” კვლევები თუ სხვა ნებისმიერი სანდო ორგანიზაცია, რომელიც მუშაობს ადამიანის უფლებების თემაზე საქართველოში, საჯარო პოლიტიკის საკითხებზე, საჯარო მმართველობის მონიტორინგზე, რა თქმა უნდა, მე ამ სტატიებს ვუგზავნი დავალებებად, წასაკითხად.

ასევე, დოკუმენტურ ფილმებს, იმიტომ, რომ სწავლების და სასკოლო პროცესის ერთ-ერთი მთავარი მიზანი ის არის, რომ ცოდნა, რომელსაც გადასცემ მოსწავლეს, იყოს ყოველთვის რეალობასთან დაკავშირებული, არ იყოს მოკლებული კონტექსტს და მისი ასპექტები იყოს გაჯერებული თანამედროვე ცხოვრების გამოწვევებით, ხომ?

როცა ვლაპარაკობთ დემოკრატიაზე, უნდა ვილაპარაკოთ იმაზე, რომ დემოკრატიის თვალსაზრისით საქართველოში არის პრობლემები და ეს არ არის მხოლოდ Amnesty International-ის ან Human Rights Watch-ის მონაცემებით, არამედ კონკრეტული სტატიებით აჩვენებ ამას. როდესაც თანამდებობის პირს შეუძლია, ვთქვათ, საკუთარი ოჯახის წევრებს ტყეები აჩუქოს, როცა თანამდებობის პირი უკანონოდ იშენებს სახლს და მისი დეკლარირებაც „ავიწყდება“ ქონებრივ დეკლარაციაში. ასეთი ფაქტები ამზადებს მოსწავლეს, მით უმეტეს, მაღალ კლასში იმისთვის, რომ მან იცოდეს, რა საზოგადოებაში ცხოვრობს, რა გამოწვევების წინაშე აღმოჩნდება, როგორც პროფესიონალი, როგორც მოქალაქე.

ბევრჯერ მიხსენებია ძველი ბერძნების დამოკიდებულება, რომ არ უნდა ვიყოთ პოლიტიკური იდიოტები, რადგან პოლიტიკური იდიოტი როცა ხარ, ადვილად გმართავს ნებისმიერი პარტია და ადვილად გამოგიყენებს მანიპულაციისთვის.

სამოქალაქო განათლება არის ის ყველაფერი, რაც ქმნის ადამიანს მოქალაქედ.

თუ შენ არ იცი, რატომ იხდი გადასახადებს, როგორ ნაწილდება ეს გადასახადები, როგორ უნდა მოერგოს ხალხის საჭიროებებს ბიუჯეტი, როგორ უნდა იყოს მოქალაქე ჩართული ამ ბიუჯეტის განაწილებაში, რატომ არიან საჯარო მოხელეები და თანამდებობის პირები ჩვენი დაქირავებულები და ჩვენი მსახურები და არა პირიქით.

თუ არ ვლაპარაკობთ ეკოლოგიურ გამოწვევებზე, თუ არ ვლაპარაკობთ ქალაქდაგეგმარების პრობლემებზე, რაც ბათუმს აწუხებს, თუ არ ვლაპარაკობთ გამდიდრებული, ასე ვთქვათ, ბიზნესისა და სახელისუფლებო პირების კავშირებზე, მაშინ რა არის სამოქალაქო განათლების სწავლების მიზანი?

შეიძლება დემოკრატიაზე ვილაპარაკოთ მხოლოდ ბელარუსისა და რუსეთის მაგალითზე?

ჩვენი სახელმძღვანელოებიც კი გაჯერებულია იმ სასამართლო საქმეებით, სადაც მოქალაქეები ედავებიან სახელმწიფოს ან ნაციონალურ სასამართლოებში, ან სტრასბურგში, ხომ? ეს იმიტომ არის გრიფირებულ სახელმძღვანელოებში, რომ მოსწავლემ დაინახოს, რამდენად რთულია, მაგრამ აუცილებელი საკუთარი უფლებებისთვის ბრძოლა.

ჩემი მასწავლებლობის მთელი მიზანი და საფუძველი სწორედ ეს იყო, რომ დავეხმარო ჩემს მოსწავლეებს ნავიგაციაში, რომ იყვნენ არა მხოლოდ მომხმარებლები კონსიუმერულ საზოგადოებაში, არამედ იყვნენ მოქალაქეები, რომლებიც პასუხისმგებლები არიან საკუთარ თავისუფლებაზე, საკუთარ ქმედებაზე, რომ ცოტა უკეთესი საზოგადოება მაინც ააშენონ, ვიდრე, სამწუხაროდ, ჩვენ მათ ვახვედრებთ.

• ამ ინფორმაციის მოსმენამ შეუქმნა რომელიმე მოსწავლეს დისკომფორტი?  

როდესაც მე დავასახელე კონკრეტული თანამდებობის პირის სახელი და გვარი ამ საკითხის განხილვის დროს, ადმინისტრაციამ დამიდასტურა, რომ ნამდვილად ამ ადამიანისგან მოდიოდა ეს პრეტენზიები…

სახელისუფლებო პარტიის წარმომადგენელია და როცა მე სკოლაში დავიწყე მუშაობა, ამ ადამიანისგან დაახლოებით სამ თვეში მივიღე ზარი. მითხრა – მიხარია, ჩემი შვილის მასწავლებელი რომ ხარო.

კიდევ რამის თქმა ხომ არ გნებავთ-მეთქი – ასე ვუპასუხე მაშინ – რადგან არანაირად არ ვაპირებ რაიმე ტიპის განსაკუთრებული დამოკიდებულება მქონდეს ვინმეს შვილის მიმართ-მეთქი.

• როგორ ფიქრობთ, რატომ დაგირეკათ?

არ ვიცი, შეიძლება ეს იყო მინიშნება.

დარწმუნებული ვარ, მისი შვილი კარგი მოქალაქე დადგება. უბრალოდ, სივრცეში, სადაც პოლიტიკოსი, საჯარო ფიგურა, ხელისუფლების წარმომადგენელი წყვეტს კონკრეტულ სკოლაში, თან კერძო სკოლაში, უნდა იყოს თუ არა კონკრეტული მასწავლებელი მისი შვილის მასწავლებელი, ამ სივრცეში ვერ დავრჩები.

• ფიქრობ, რომ ამ ადამიანმა მოახდინა დირექტორზე ზეწოლა?

როგორც გარემოებებიდან ირკვევა, ეს ასე იყო.

დისკომფორტი ექმნებოდათ ალბათ, მაგრამ არასდროს მივცემდი საკუთარ თავს იმის უფლებას, რომ მისი შვილის თანდასწრებით მასზე მესაუბრა. ეს არის მასწავლებლის ელემენტარული ეთიკის დარღვევა.

თუმცა, რა თქმა უნდა, ძალიან ბევრს ვსაუბრობდი ხელისუფლების მიერ, როგორც არჩევნებამდე, ისე დე ფაქტო ხელისუფლების მერეც, არჩევნების შემდეგ ჩადენილ დანაშაულებზე, გადაცდომებზე, კორუფციაზე, ნეპოტიზმზე და ასე შემდეგ. ამის გარეშე წარმოუდგენელია სამოქალაქო განათლების სწავლება. მაშინ რაზე უნდა ვილაპარაკოთ?

რომელი ხელისუფლების შტოების დანაწილებაზე უნდა ვილაპარაკოთ, როდესაც პრაქტიკულად სასამართლოები ქცეულია ნოტარიულ სამსახურად, როცა პროკურატურას არავითარი დამოუკიდებლობა არ აქვს და პოლიტიკურ ინსტრუმენტად არის გამოყენებული.

როდესაც ვხედავთ, რომ ადამიანებს ერთი მხრივ, სილის გაწვნის გამო ორი წლით უშვებენ ციხეში და მაშინ, როცა პოლიციელს ეხება ან “ქართული ოცნების” წარმომადგენელს ეხება საკითხი, მათ ყოველგვარი სანქციის გარეშე ათავისუფლებენ.

• დღეს დაიწყო ახალი სასწავლო წელი და დღეს გითხრეს, რომ არ უნდა შესულიყავი საჯარო მოხელის შვილის კლასში?

ეს არის ამ ზაფხულს მიღებული გადაწყვეტილება. მე, უბრალოდ, პასუხს ვითხოვდი სკოლის ადმინისტრაციისგან, თუ რა იყო კონკრეტული მიზეზები.

მე ამ მოსწავლეებთან ემოციური კავშირი მაქვს, აკადემიური ურთიერთობა ჩამოყალიბდა ამ წლების განმავლობაში. უამრავი რამე გვქონდა დაგეგმილი, მით უმეტეს, არის ძალიან საინტერესო კლასი და უამრავ თემაზე გვისაუბრია დაწყებული, ვთქვათ, სამეწარმეო საქმიანობის იდეებიდან, დასრულებული იმაზე, თუ როგორი ორიენტირით შეიძლება წავიდნენ პროფესიული არჩევის დროს და უამრავი აქტივობა მქონდა დაგეგმილი.

მაგრამ, იქ, სადაც სკოლა მეუბნება, რომ შენ, ამა და ამ თანამდებობის პირის პირდაპირი თუ ირიბი მითითებით გაშორებ კლასს, იმ სკოლაში არაფერი მესაქმება.

თუ ვერ მხედავს ადმინისტრაცია როგორც მასწავლებელს, თუ არ იცავს სკოლა საკუთარ მასწავლებელს და ემორჩილება ნომენკლატურას, ემორჩილება პოლიტიკურ კონიუნქტურას, ჩემი ადგილი ასეთ სკოლაში არ არის.

სკოლამ აირჩია ეს შედეგი, მან გადაწყვიტა, რომ ჩემ დაუკითხავად, ჩემთან კონსულტაციის გარეშე, ჩემთან დალაპარაკების გარეშე მიეღო ეს გადაწყვეტილება. შესაბამისად, მე ამ სკოლაში ვეღარ გავაგრძელებ მუშაობას. იქ, სადაც აზრს არ მეკითხებიან და სადაც მიჭირს პასუხის მიღება კითხვაზე, თუ რატომ ჩამომაშორეს კლასს, სადაც ვასწავლი ორი წელია, ცხადია, იქ ჩემი ადგილი არ არის.

იქ, სადაც სკოლა მეუბნება, რომ შენ გარკვეულწილად ჩრდილი მიაყენე მოსწავლეს ამგვარი შინაარსის შეტანით სასკოლო პროცესში, არც სხვა მოსწავლეებთან, არც საგანმანათლებლო მიზნებთან და არც ჩემს სახელმწიფოსთან არ ვიქნებოდი მართალი, მაინც რომ დავრჩენილიყავი.

სკოლა ამ ქვეყანაში არის ყველაზე დაუცველი, არაავტონომიური, რომელიც ყოველთვის მოიაზრება ადმინისტრაციული რესურსის წყაროდ, სადაც ყოველთვის დიდია მმართველი პარტიის გავლენა.

ეს ყველა ხელისუფლების დროს ასე იყო და პრაქტიკულად, სასკოლო საზოგადოების მართვა იყო ნებისმიერი ხელისუფლების და განსაკუთრებით “ქართული ოცნების” პოლიტიკის, ასე ვთქვათ, გავლენის სფერო.

 

საქართველოს სამოქალაქო და აკადემიური საზოგადოება change.org-ზე პეტიციას აქვეყნებს გერმანიის ფედერაციული რესპუბლიკის მიმართ განსაკუთრებული მადლიერებისა და ელჩ პეტერ ფიშერისადმი სოლიდარობის გამოსახატად. საქმე ისაა, რომ ბოლო თვეების განმავლობაში სწორედ ელჩ  ფიშერს ესხმიან თავს ინტენსიურად „ქართული ოცნების“ მაღალი თანამდებობის პირები. 

პეტიციას უკვე გამოეხმაურა თავად ელჩი – პეტერ ფიშერმა სოციალურ ქსელში დაწერა: „გერმანია და მე მადლიერები ვართ იმ სიყვარულის და მხარდაჭერის გამო, რომელიც ამ პეტიციაშია გამოხატული. ეს ტექსტი აჩვენებს რამდენ რამეს მიაღწია გერმანიამ და საქართველოს ერთად ბოლო 30 წელში. ჩვენ დიდ პროგრესს მივაღწიათ საერთო ხედვისკენ. მოდი დავიცვათ ეს და ერთად გავაგრძელოთ წინ სიარული“.

უცვლელად გთავაზობთ პეტიციის ტექსტს, რომლის ხელმოწერაც ნებისმიერ ადამიანს შეუძლია:

„ჩვენ, საქართველოს სამოქალაქო და აკადემიური საზოგადოების წარმომადგენლები, დიდი შეშფოთებით ვაკვირდებით ბოლო დროს გაჟღერებულ საჯარო თავდასხმებს გერმანიის ელჩის, ბატონ პეტერ ფიშერის წინააღმდეგ.

უკვე რამდენიმე ათწლეულის მანძილზე, გერმანია არის საქართველოს ერთ-ერთი ყველაზე მნიშვნელოვანი პარტნიორი. ძნელად თუ მოიძებნება საქართველოს მოქალაქე, რომელიც გერმანიის მხარდაჭერას არ გრძნობს – იქნება ეს ბათუმისა და აჭარის რეგიონის წყლის მომარაგების სისტემების გაძლიერებით, გერმანელი გადასახადის გადამხდელების მიერ დაფინანსებული სტუდენტების/მეცნიერების სტიპენდიებით, მცირე ბიზნესის ხელშემწყობი, თუ ადგილობრივი თვითმმართველობის გაძლიერების პროგრამებით.

ჩვენ კარგად ვიცით, რომ გერმანიამ ჩვენს ქვეყანას არაერთ მნიშვნელოვან სფეროში დაუჭირა მხარი – პოლიტიკურად, ეკონომიკურად და საზოგადოებრივად:

• GIZ – ის , KfW – ს და გერმანიის საგარეო საქმეთა სამინისტროს პროექტებით, რომლებიც ხელს უწყობენ საჯარო სამსახურის განვითარებას, სამართლებრივ რეფორმებს, დემოკრატიის, დამოუკიდებელი მედიისა და სამოქალაქო საზოგადოების გაძლიერებას, ასევე ინფრასტრუქტურის, ენერგომომარაგების, პროფესიული განათლებისა და სოფლის მეურნეობის განვითარებას.
• პოლიტიკური ფონდების საქმიანობით, რომლებიც წლებია უჭერენ მხარს პარტიული პლურალიზმს, პოლიტიკურ განათლებას და საჯარო დისკუსიის განვითარებას, ასევე ჯანმრთელობის, გარემოს დაცვის, კულტურისა და მეცნიერების სფეროებში დახმარებით და სტუდენტებისა და მკვლევრებისთვის სტიპენდიებით, განსაკუთრებით DAAD-ის მეშვეობით;
• და ბოლოს, გერმანიის მკაფიო პოლიტიკური მხარდაჭერით საქართველოსთვის ევროპის კავშირში გაწევრიანების გზაზე.

ამ მხარდაჭერის გარეშე ჩვენი ქვეყნის ინფრასტრუქტურული განვითარება, ინსტიტუტების გაძლიერება თუ ახალგაზრდებისთვის ახალი შესაძლებლობების შექმნა, ამ მასშტაბებით ვერ განხორციელდებოდა. ამისთვის საქართველო გერმანელი ხალხის მადლიერია.

ბატონი პეტერ ფიშერი საქართველოში ამ პარტნიორობის სიმბოლოა. მისი ღია მხარდაჭერა დემოკრატიის, სამართლის უზენაესობისა და ევროპული ინტეგრაციისათვის წარმოადგენს იმ ღირებულებებს, რომლებიც აერთიანებს საქართველოსა და გერმანიას. მის წინააღმდეგ ბოლო პერიოდში არსებული მუქარები, მათ შორის მისი შესაძლო გაძევების საკითხის წამოწევა, ჩვენთვის არის თავდასხმა არა მხოლოდ თვით ელჩზე, არამედ ქართულ-გერმანულ მრავალწლიან მეგობრობაზე.

ვუცხადებთ სოლიდარობას ელჩ პეტერ ფიშერს და გამოვხატავთ ჩვენს განსაკუთრებულ მადლიერებას გერმანიის ფედერალური რესპუბლიკის მიმართ. მოვუწოდებთ საქართველოს ხელისუფლებას, დაიცვას დიპლომატიური პროტოკოლი, შეწყვიტოს უცხოელი დიპლომატების წინააღმდეგ მიმართულ თავდასხმები და აღიაროს გერმანიის ფასდაუდებელი წვლილი საქართველოს დემოკრატიულ და ევროპულ განვითარებაში.

საქართველო საჭიროებს ძლიერ პარტნიორებს და არა კონფრონტაციას!

ჩვენ მტკიცედ ვდგავართ ჩვენი ევროპელი მეგობრების გვერდით და ვიცავთ იმ ღირებულებებს, რომლებიც საქართველოს ევროპული ოჯახის განუყოფელ ნაწილად აქცევს“.

ქობულეთის შემოვლითი 2-ზოლიანი გზის 4-ზოლიან ავტომაგისტრალად მოდერნიზების პროექტზე მუშაობა ორი წლის წინ დაიწყო, თუმცა პროექტის დაფინანსების, სამშენებლო სამუშაოების დაწყების ვადა და სხვა დეტალები ამ დრომდე კვლავ უცნობია.

არ არსებობს [ან ოფიციალურად არ ასაჯაროებენ] ასევე ინფორმაცია საპროექტო არეალში მოქცეული კერძო უძრავი ქონებისა და საკომპენსაციო თანხის ოდენობის შესახებ.

საავტომობილო გზების დეპარტამენტისა და „ბათუმელების“ მონაცემებით, მთლიანობაში, 2018 წლიდან 2025 წლის 20 აგვისტოს ჩათვლით პერიოდში ქობულეთის შემოვლით გზაზე 105 ავტოსაგზაო შემთხვევის შედეგად დაიღუპა 35 და დაშავდა სულ ცოტა 221 ადამიანი [მარტო 2025 წლის ზაფხულში ამ გზაზე ავარიის შედეგად 9 ადამიანი დაიღუპა და 15-მდე დაშავდა, მათ შორის არასრულწლოვნებიც].

ქობულეთის შემოვლით გზაზე 2014 წლიდან 2018 წლამდე პერიოდში მომხდარი ავარიების შესახებ კი მონაცემები არ გვაქვს.

რა ეტაპზეა ქობულეთის შემოვლითი გზის 4-ზოლიან მაგისტრალად მოდერნიზების პროექტი – დაფინანსების წყარო[ები], არის თუ არა ცნობილი დონორი და პროექტის მთლიანი ღირებულება [მშენებლობის ჩათვლით]. როდის გამოცხადდება ტენდერი მშენებლობაზე? – ამ კითხვებით „ბათუმელებმა“ საქართველოს საავტომობილო გზების დეპარტამენტს პირველ სექტემბერს მიმართა.

„დეპარტამენტის დაკვეთით მიმდინარეობს E-70 საერთაშორისო მნიშვნელობის სენაკი-ფოთი-სარფის [თურქეთის რესპუბლიკის საზღვარი] ქობულეთის შემოვლითი გზის 4-ზოლიან მაგისტრალად მოდერნიზების დეტალური საპროექტო დოკუმენტაციის მომზადების პროცედურები და ამ ეტაპისთვის არ არის დასრულებული საპროექტო სამუშაოები. შესაბამისად, დეპარტამენტი მოკლებულია შესაძლებელობას, მოგაწოდოთ თქვენს მიერ მოთხოვნილი სხვა ინფორმაცია.“ – მოგვწერეს დეპარტამენტიდან 11 სექტემბერს.

დეპარტამენტს ასევე ვკითხეთ „ქობულეთის შემოვლითი გზის 4-ზოლიან მაგისტრალად მოდერნიზების პროექტის გამო რამდენი კერძო ნაკვეთი და რამდენი საცხოვრებელი სახლი მოხვდა აღებაში? რა თანხაა გათვალისწინებული მათ საკომპენსაციოდ? დაწყებულია თუ არა გამოსყიდვა?“

„ამასთან, მოგახსენებთ, რომ აღნიშნული პროექტის ფარგლებში, დეპარტამენტის დაკვეთით, მომზადების პროცესშია მიწის შესყიდვისა და განსახლების სამოქმედო გეგმა. აღნიშნულ ეტაპზე ხდება არსებული სიტუაციის შესწავლა და შესაბამისი გადაწყვეტილების მიღება საკონსულტაციო კომპანიის მიერ. შესაბამისად, დეპარტამენტისთვის დღეისათვის უცნობია განთვისების ზოლში მოქცეული უძრავი ქონების რაოდენობა და საკომპენსაციო ღირებულებები.“ – მოგვწერეს დეპარტამენტიდან.

ქობულეთის შემოვლითი გზის 4-ზოლიან ავტომაგისტრალად მოდერნიზებაზე მუშაობა 2023 წელს დაიწყო.

ინფორმაციისთვის:

• 4-ზოლიანად გადაკეთების შემდეგ, ქობულეთის ავტობანი, შეკვეთილიდან, გრიგოლეთი-ქობულეთის ავტობანის გაგრძელება იქნება, რომელიც ასევე 4-ზოლიანია და რომლის მშენებლობა ჯერ დასრულებული არ არის.
• ქობულეთის ავტობანი ჩაქვი-მახინჯაურის გვირაბებთან შეუერთდება ბათუმის შემოვლით გზას, რომელიც ასევე 2-ზოლიანია.
• ბათუმის შემოვლითი გზის გაგრძელება ფრიდონ ხალვაშის გამზირიდან ბათუმი[ჭოროხი]-სარფის ახალი მაგისტრალი უნდა იყოს. ამ გზის პროექტირების დასრულება 2017 წლის მაისამდე იგეგმებოდა, მშენებლობის კი – 2020 წლის გაზაფხულზე, თუმცა, ჯერ მშენებლობაზე ტენდერიც არ არის გამოცხადებული. ბათუმი[ჭოროხი]-სარფის გზის პროექტი ითვალისწინებს 4-ზოლიან მაგისტრალს, თუმცა, როგორც დეპარტამენტიდან მოგვწერეს „ამ ეტაპისთვის იგეგმება მხოლოდ 2-ზოლიანი საავტომობილო გზის მშენებლობა.“

ჩვენს ხელთ არსებული სკოპინგის დასკვნის მიხედვით:

პროექტი ქობულეთის შემოვლითი გზის პარალელურად დამატებითი ორზოლიანი გზის მოწყობას ითვალისწინებს [ასაშენებელი გზა მიუყვება არსებულ ორზოლიან გზას პარალელურად თითქმის მთლიან სიგრძეზე მარცხენა მხრიდან და მხოლოდ გარკვეულ მონაკვეთებში გადადის არსებული გზის მარჯვენა მხარეს, მრუდების გაუმჯობესების მიზნით.]

ქობულეთის შემოვლითი გზის პარალელური ახალი გზის სიგრძე 30.37 კილომეტრი იქნება.

გათვალისწინებულია ორი დამატებითი კვანძის მოწყობა და არსებული გვირაბების პარალელურად 2 ახალი, ორზოლიანი გვირაბის მშენებლობა. გვირაბები აშენდება სოფ. ქვედა აჭყვასთან და დაბა ჩაქვთან. პირველი გვირაბის [ქვედა აჭყვასთან] სიგრძე შეადგენს 250 მეტრს, ხოლო მეორე გვირაბის [ჩაქვთან] – 164 მეტრს.

საპროექტო გზაზე მაქსიმალური დასაშვები სიჩქარე იქნება 120 კმ/სთ.

პროექტის შერჩეული ვარიანტით ახალი გზის ზემოქმედების ქვეშ ხვდება – 581 მიწის ნაკვეთი საერთო ფართობით – 10 031 191 კვ.მ. აქედან კერძო საკუთრების მიწის ნაკვეთების რაოდენობაა – 193; მთლიანი ფართობი – 2 491 944 კვ.მ.

საავტომობილო გზების დეპარტამენტის მიერ უკვე გამოსყიდული ნაკვეთების რაოდენობა [სკოპინგის ანგარიშის მიხედვით] იყო – 246. სულ სავარაუდო განსახლების ღირებულება კი შეადგენდა – 19 252 485 ლარს.

ამ თემაზე:

„დასრულდება ავტობანის მშენებლობა“ – „ოცნების“ შეუსრულებელი საარჩევნო დაპირება

See more

ოპოზიციონერ პოლიტიკოსს, „კოალიცია ცვლილებებისთვის“ წევრ მურთაზ ზოდელავას მოსამართლე ფიქრია სიქტურაშვილმა საპატიმრო გირაო შეუფარდა. რაც იმას ნიშნავს, რომ ის ციხეს მას შემდეგ დატოვებს, რაც ოჯახის წევრები გირაოს თანხას გადაიხდიან.

მურთაზ ზოდელავას სასამართლო ლევან ხაბეიშვილის პროცესთან ერთად გაიმართა. ორივე დაკავებულის ადვოკატები ითხოვდნენ ხაბეიშვილის და ზოდელავას საქმე აეცილებინა და არ განეხილა მოსამართლე ფიქრია სიქტურაშვილს.

ენმ-ის პოლისტსაბჭოს თავმჯდომარე ლევან ხაბეიშვილი 11 სექტემბერს სწორედ ფიქრია სიქტურაშვილის განჩინების საფუძველზე დააკავეს.

ადვოკატების არგუმენტაცია იყო, რომ იმ მოსამართლეს არ უნდა განეხილა აღკვეთის ღონისძიების შეფარდების საკითხი, რომელმაც დაკავების განჩინება გამოსცა.

მურთაზ ზოდელავას ადვოკატს, ბექა ბასილაიას დამატებითი არგუმენტი ჰქონდა მოსამართლის ასაცილებლად. ფიქრია სიქტურაშვილი არის ის მოსამართლე, რომელმაც მიიღო გადაწყვეტილება სინდისის პატიმრის, მასწავლებელ ნინო დათაშვილის ფსიქიატრიულ დაწესებულებაში გადაყვანის შესახებ.

ფიქრია სიქტურაშვილმა ადვოკატების შუამდგომლობა არ დააკმაყოფილა და სხდომა განაგრძო. სხდომაზე სიტყვით გამოვიდა ლევან ხაბეიშვილი.

„გადაწყვეტილება მიღებულია – ტყუილად ვსხედვართ. მამიდაჩემი დაღლილია, ძმამკვდარი ქალი ზის აქ, ძმისშვილის სასამართლო სხდომაზე. ტყუილად ვსხედვართ!“ – საკუთარი განაჩენი წინმსწრებად გამოაცხადა ლევან ხაბეიშვილმა მანამ, სანამ მოსამართლე ორთვიან წინასწარ პატიმრობაში გაუშვებდა.

ლევან ხაბეიშვილის სიტყვას დარბაზში ტაში მოჰყვა, რის გამოც მოსამართლემ სასამართლოს სხდომა დახურა.

პროკურორმა ბექა ხუნაშვილმა მურთაზ ზოდელავას გათავისუფლების სანაცვლოდ 25-ათასლარიანი გირაო მოითხოვა. საბოლოოდ მოსამართლემ მურთაზ ზოდელავას საპატიმრო გირაო შეუფარდა.

• რა ხდება

მურთაზ ზოდელავა 11 სექტემბერს დააკავეს ენმ-ის პოლიტსაბჭოს თავმჯდომარე ლევან ხაბეიშვილთან ერთად.

თავდაპირველად გავრცელდა ინფორმაცია, რომ მურთაზ ზოდელავას სუს-ის თანამშრომლებისთვის წინააღმდეგობის გაწევას ედავებოდნენ. თუმცა საბოლოოდ, პროკურატურამ მას ბრალი გამოძიებისთვის ხელის შეშლის მუხლით  წარუდგინა.

„მოპოვებული მტკიცებულებებით დადგინდა, რომ მურთაზ ზოდელავა უკანონოდ ჩაერია სახელმწიფო უსაფრთხოების სამსახურის გამომძიებლის საქმიანობაში და საქმის ყოველმხრივი, სრული და ობიექტური გამოძიებისთვის ხელის შეშლის მიზნით სცადა გადაემალა ლევან ხაბეიშვილის მობილური ტელეფონი, რომლის ამოსაღებადაც სასამართლოს მიერ გაცემული იყო ჩხრეკის განჩინება.

შესაბამისად, მას ნაცვლად საქართველოს სსკ-ის 353-ე მუხლისა, საბოლოოდ სსკ-ის 364-ე მუხლის პირველი ნაწილით გათვალისწინებული ბრალდება წარედგინა, რაც მოცემულ შემთხვევაში გულისხმობს საქმის ყოველმხრივი, სრული და ობიექტური გამოძიებისთვის ხელის შეშლის მიზნით გამომძიებლის საქმიანობაში ამა თუ იმ ფორმით უკანონო ჩარევას. დანაშაული ერთ წლამდე თავისუფლების აღკვეთას ითვალისწინებს,“ – ნათქვამია პროკურატურის განცხადებაში.

პროკურატურამ სასამართლოსგან მურთაზ ზოდელავას მიმართ აღკვეთის ღონისძიების სახით   გირაოს შეფარდება მოითხოვა.

ამავე თემაზე:

რა მუხლებით წარუდგინეს ბრალი ლევან ხაბეიშვილს და მურთაზ ზოდელავას

See more

„გადაწყვეტილება მიღებულია – ტყუილად ვსხედვართ. მამიდაჩემი დაღლილია, ძმამკვდარი ქალი ზის აქ, ძმისშვილის სასამართლო სხდომაზე. ტყუილად ვსხედვართ!“ – საკუთარი განაჩენი წინმსწრებად გამოაცხადა ლევან ხაბეიშვილმა მანამ, სანამ მოსამართლე ორთვიან წინასწარ პატიმრობაში გაუშვებდა.

დღეს, 13 სექტემბერს, თბილისის საქალაქო სასამართლოში „ნაციონალური მოძრაობის“ პოლიტსაბჭოს თავმჯდომარის, ლევან ხაბეიშვილის სასამართლო პროცესი გაიმართა.  თითქმის ხუთსაათიანი სხდომის დასასრულს, თბილისის საქალაქო სასამართლოს მოსამართლე ფიქრია სიქტურაშვილმა მას ორთვიანი წინასწარი პატიმრობა შეუფარდა.

სწორედ მოსამართლე ფიქრია სიქტურაშვილის მიერ გამოცემული განჩინების საფუძველზე დააკავა სახელმწიფო უსაფრთხოების სამსახურმა ლევან ხაბეიშვილი 11 სექტემბერს.

ლევან ხაბეიშვილის ადვოკატებმა ხდომაზე მოსამართლის აცილების საკითხი დააყენეს.  ადვოკატების განცხადებით, იმ ფაქტმა, რომ იგივე მოსამართლემ განიხილა მისი აღკვეთის ღონისძიების შეფარდების საკითხი, რომელმაც დაკავების განჩინება გამოსცა, პოლიტიკოსს სამართლიანი სასამართლოს უფლებას წაართვა.

სასამართლოდან ლაივბლოგი ჰქონდა “რადიო თავისუფლებას”, რომლის ცნობითაც, ლევან ხაბეიშვილის ადვოკატმა გიორგი კონდახიშვილმა ასე დაასაბუთა მოსამართლის აცილების შუამდგომლობა:

„თქვენ წინასწარ გაქვთ ლევან ხაბეიშვილის საქმეზე ჩამოყალიბებული პოზიცია. ჩვენ უნდა ვიმსჯელოთ, რამდენად არსებობს პატიმრობის საფუძველი. თქვენ არათუ ჩამოყალიბებული გაქვთ პოზიცია, არამედ ორი დღის წინ გაცემული განჩინებით თქვენ თქვით, რომ დანაშაულის შემადგენლობა… თქვენ აღნიშნეთ, რომ ლევანი მისი ქცევებიდან გამომდინარე სახიფათოა საზოგადოებისთვის. ეს არის პოზიცია. დღეს, აბა, რაზე უნდა ვისაუბროთ?!. თქვენ რაზეც უნდა იმსჯელოთ, უკვე ნამსჯელი გაქვთ… მიგვაჩნია, რომ უნდა აიცილოთ ეს საქმე“.

ადვოკატების შემდეგ სიტყვა თქვა თავად ლევან ხაბეიშვილმა, რომელმაც პირადად უთხრა მოსამართლეს, რომ ითხოვდა მის აცილებას. მხოლოდ პროკურორი, ბექა ხუნაშვილი არ იყო წინააღმდეგი, რომ ლევან ხაბეიშვილის და მურთაზ ზოდელავას საქმე ფიქრია სიქტურაშვილს განეხილა.

მოსამართლე ფიქრია სიქტურაშვილმა ლევან ხაბეიშვილის ადვოკატის შუამდგომლობა არ დააკმაყოფილა და საქმის განხილვა განაგრძო.

სხდომაზე სიტყვა თქვა ლევან ხაბეიშვილმა:

„ჟანდარმერიის თანამშრომლებს, რომლებმაც მოახდინეს ჩემი დაკავება, მინდა გესმოდეთ მარტივი ჭეშმარიტება – არ არსებობს არანაირი მოქმედება, ფაქტი, არაფერი, გარდა პოლიტიკური განცხადებისა. ეს არის ჩემი პოლიტიკური დაპირება. დიახ, ესაა 200 000-იანი ჯილდო მას, ვინც არ აწამებს ადამიანს.

მინდა ვუთხრა სასამართლოს, მე მინდა ვუთხრა საზოგადოებას, მოსამართლემ მოისმინოს, საზოგადოებამ გაიგოს –  მე ამის მორალური ადამიანური, პოლიტიკური უფლება მაქვს, მე სახის ძვლები დამიმტვრიეს. 14 თვეა გასული. ჩემს გარდა, არაერთ ადამიანს ახადეს სკალპი, ასობით ადამიანია ნაწამები  – ბატონო პროკურორო, სანამ მე წარმიდგენდით ბრალს, ერთი ადამიანი დაგიკავებიათ ამის გამო?

ნუთუ არ აქვს პოლიტიკოსს უფლება, არ მაქვს მე უფლება, რომ სამართალდამცავებს დავპირდე, თუ ისინი არ აწამებენ ხალხს,  ხელისუფლების შეცვლის შემდეგ დაჯილდოვდებიან? ოღონდ ქრთამის სახით კი არა,  ხელისუფლება რომ შეიცვლება, მე მოვემსახურები ხალხის ინტერესს, რომ ეს ფული გაიცეს”.

ლევან ხაბეიშვილის სიტყვას სასამართლო დარბაზში ტაში მოჰყვა. ამის გამო მოსამართლე ფიქრია სიქტურაშვილმა სასამართლო სხდომა დახურა და დამსწრეები დარბაზიდან გააძევა.

ლევან ხაბეიშვილის სიტყვა სრულად ნახეთ აქ: “ივანიშვილმა დაიჯერა მარცხის, რომ ლევან ხაბეიშვილი ხალხთან ერთად ამარცხებს მათ”.

5-საათიანის ხდომის შემდეგ, მოსამართლე ფიქრია სიქტურაშვილმა ლევან ხაბეიშვილს აღკვეთის ღონისძიების სახით, 2 თვიანი წინასწარი პატიმრობა შეუფარდა.

• რა ხდება

ენმ-ის პოლიტსაბჭოს თავმჯდომარეს, ლევან ხაბეიშვილს პროკურატურა სისხლის სამართლის კოდექსის 2 მუხლით გათვალისწინებული დანაშაულის ჩადენას ედავება:

სსკ-ს 339-ე მუხლის მეორე ნაწილთ – მოხელისთვის ქრთამის დაპირება უკანონო ქმედების ჩასადენად – ითვალისწინებს პატიმრობას 4-დნ 7 წლამდე და სსკ-ს 317-ე მუხლით  – საქვეყნოდ მოწოდებას სახელმწიფო ხელისუფლების დამხობისაკენ – ითვალისწინებს პატიმრობას 3 წლამდე.

„პოლიციაში ბზარის გაჩენის ეშინიათ პარანოიდულად“ – ინტერვიუ

See more