Batumelebi

ბათუმის მერიამ საკრებულოს, ბათუმში ავარიული და სიცოცხლისათვის საფრთხის შემცველი საცხოვრებელი შენობების შესახებ ინფორმაცია წარუდგინა და არსებული პრობლემის გადაჭრასთან დაკავშირებული მისეული ხედვებიც გააცნო. მერიის ინფორმაცია საკრებულომ, 2019 წლის 12 აპრილის სხდომაზე, ცნობად მიიღო.

მერიის ინფორმაციით, ლევან სამხარაულის სასამართლო ექსპერტიზის ეროვნულმა ბიურომ ბათუმში მდებარე 34 ავარიული საცხოვრებელი შენობა-ნაგებობის საინჟინრო ექსპერტიზის დასკვნა, საქალაქო ინფრასტრუქტურისა და კეთილმოწყობის სამმართველოს დაკვეთით მოამზადა.

„წარმოდგენილი დასკვნების თანახმად, ექსპერტიზა მიიჩნევს, რომ 19 შენობის აღდგენა-გამაგრება გაუმართლებელია, არ არის მიზანშეწონილი, ავარიულია და სახლის ან/და მისი ცალკეული ზონების ექსპლუატაცია საფრთხის შემცველია [სულ ოჯახების რაოდენობა 740]. ხოლო, 2 შენობა-ნაგებობის [სულ ოჯახების რაოდენობა 13] არსებული სახით ექსპლუატაცია არ არის მიზანშეწონილი, ან დაუშვებელია“ – აღნიშნულია მერიის ინფორმაციაში. დასკვნები სამხარაულმა 2017-2018 წლებში დადო.

ბათუმში საფრთხის შემცველი შენობების მისამართები 

ოძელაშვილის ქ. #20 – საცხოვრებელი სახლის ტექნიკური მდგომარეობა არადამაკმაყოფილებელია, ხოლო, მიშენებული ნაწილების
კონსტრუქციიდან გამომდინარე, არსებული სახით მისი ექსპლუატაცია საფრთხის შემცველია. შენობის გამაგრება და სამშენებლო ნორმებთან შესაბამისობაში მოყვანა არარენტაბელურობის გამო არ მიგვაჩნია მიზანშეწონილად; ოჯახების რაოდენობა – 123.

გ. ბრწყინვალეს ქ. #48 – საცხოვრებელი სახლი ავარიულია და საფრთხის შემცველია. დაზიანებათა დიდი მოცულობიდან და შენობის
კონსტრუქციული სქემიდან გამომდინარე, შენობის აღდგენა არარენტაბელურობის გამო არ მიგვაჩნია მიზანშეწონილად; ოჯახების რაოდენობა – 25.

ყაზბეგის ქ. #16 – საცხოვრებელი სახლის ტექნიკური მდგომარეობა არადამაკმაყოფილებელია, ხოლო ცალკეული ზონები ავარიულია
და საფრთხის შემცველია. აღსადგენი ზონების მასშტაბებისა და დაზიანებათა ხასიათიდან გამომდინარე, შენობის აღდგენა, მისი არარენტაბელურობის გათვალისწინებით, არ მიგვაჩნია გამართლებულად; ოჯახების რაოდენობა – 33.

კახაბრის ქ. #34 – საცხოვრებელი სახლის ტექნიკური მდგომარეობა არადამაკმაყოფილებელია, ხოლო ცალკეული ზონები საფრთხის
შემცველია. მიშენებული ნაწილების კონსტრუქციული სქემა და რკინა-ბეტონის ელემენტების ზომები ვერ აკმაყოფილებენ სამშენებლო და სეისმური ნორმების მოთხოვნებს. შენობა საჭიროებს სარეაბილიტაციო სამუშაოების ჩატარებას, დეტალური გამოკვლევის შედეგების
საფუძველზე დამუშავებული კონსტრუქციული პროექტის მიხედვით; ოჯახების რაოდენობა – 44.

გ. კვინიტაძის ქ. #1 – საცხოვრებელი სახლის ვიზუალური დათვალიერებით მისი ტექნიკური მდგომარეობა არადამაკმაყოფილებელია. შენობა, კონსტრუქციული ელემენტების სახეობიდან გამომდინარე, მიეკუთვნება კაპიტალურობის IV გჯუფს და მისი ექსპლუატაციის ვადა შეადგენს 50 წელს. ფაქტობრივად, შენობა ამორტიზებულია. ვინაიდან შენობის მზიდ კონსტრუქციულ ელემენტებს განცდილი აქვს მაღალი ფიზიკური და ასაკობრივი ცვეთა, მისი აღდგენა-გამაგრება გაუმართლებლად მიგვაჩნია და გარკვეული საფრთხეების შემცველობის გამო, შემდგომი ექსპლუატაცია არ არის მიზანშეწონილი; ოჯახების რაოდენობა – 4.

გ. კვინიტაძის ქ. #3 – საცხოვრებელი სახლის ვიზუალური დათვალიერებით, მისი ტექნიკური მდგომარეობა არადამაკმაყოფილებელია. შენობა, კონსტრუქციული ელემენტების სახეობიდან გამომდინარე, მიეკუთვნება კაპიტალურობის IV გჯუფს და მისი ექსპლუატაციის ვადა შეადგენს 50 წელს. ფაქტობრივად, შენობა ამორტიზებულია. ვინაიდან შენობის მზიდ კონსტრუქციულ ელემენტებს განცდილი აქვს მაღალი ფიზიკური და ასაკობრივი ცვეთა, მისი აღდგენა-გამაგრება გაუმართლებლად მიგვაჩნია და გარკვეული საფრთხეების შემცველობის გამო, შემდგომი ექსპლუატაცია არ არის მიზანშეწონილი; ოჯახების რაოდენობა – 10.

იმერხევის ქ. #4 – საცხოვრებელი სახლის ვიზუალური დათვალიერებით, მისი ტექნიკური მდგომარეობა არადამაკმაყოფილებელია.
შენობა, კონსტრუქციული ელემენტების სახეობიდან გამომდინარე, მიეკუთვნება კაპიტალურობის IV გჯუფს და მისი ექსპლუატაციის ვადა შეადგენს 50 წელს. ფაქტობრივად, შენობა ამორტიზებულია. ვინაიდან შენობის მზიდ კონსტრუქციულ ელემენტებს განცდილი
აქვს მაღალი ფიზიკური და ასაკობრივი ცვეთა, მისი აღდგენა-გამაგრება გაუმართლებლად მიგვაჩნია და გარკვეული საფრთხეების შემცველობის გამო, შემდგომი ექსპლუატაცია არ არის მიზანშეწონილი. ასევე საფრთხის შემცველია მიშენებული ნაწილების ექსპლუატაცია სამშენებლო სეისმურ ნორმებთან შეუსაბამობის გამო; ოჯახების რაოდენობა – 10.

მწვანე კონცხი, მარკოზ აჭარელის მე-3 შესახვევი #36 – საცხოვრებელი შენობა ამორტიზებულია,ხანდაზმულობიდან გამომდინარე,
მისი ტექნიკური მდგომარეობა არადამაკმაყოფილებელია, ხოლო ცალკეულ ზონებში შენობა ავარიულია. არსებული სახით შენობის ექსპლუატაცია საფრთხის შემცველია. დაზიანების ხარისხიდან გამომდინარე, მისი აღდგენა არ არის მიზანშეწონილი; ოჯახების რაოდენობა – 3.

რურუას ქ. #1 – საცხოვრებელი სახლის ვიზუალური დათვალიერებით მისი ტექნიკური მდგომარეობა არადამაკმაყოფილებელია. შენობა კონსტრუქციული ელემენტების სახეობიდან გამომდინარე მიეკუთვნება კაპიტალურობის III გჯუფს და მისი ექსპლუატაციის ვადა შეადგენს 100 წელს. ნათლად ჩანს, რომ დაზიანებები შენობას მიყენებული აქვს მოუვლელობით, კაპიტალური სარემონტო სამუშაოების დიდი ხნის მანძილზე ჩაუტარებლობით და მოსახლეობის მიერ შიდა თვითნებური გადაკეთებების მეშვეობით. მიზეზს წარმოადგენს აგრეთვე დაზიანებული წყალგაყვანილობისა და კანალიზაციის სისტემები, რის გამოც სარდაფებში პერიოდულად ხდება წყლის დაგროვება. ფუძე-გრუნტის მზიდუნარიანობის შესუსტებისა და გამორეცხვის შედეგად, შესაძლებელია მოხდეს ჯდენითი დეფორმაციების განვითარება, რაც ისედაც ავარიული შენობის (ამაზე მეტყველებს შენობაზე არსებული მჭიმები) კონსტრუქციულ მდგრადობას საფრთხეს შეუქმნის. შენობის გამაგრება და სამშენებლო ნორმებთან შესაბამისობაში მოყვანა არ მიგვაჩნია მიზანშეწონილად ჩასატარებელი სამუშაოების არარენტაბელურობიდან გამომდინარე. ოჯახების რაოდენობა – 72.

ტაბიძის ქ. #7 – საცხოვრებელი სახლის ვიზუალური დათვალიერებით, მისი ტექნიკური მდგომარეობა არადამაკმაყოფილებელია. შენობა, კონსტრუქციული ელემენტების სახეობიდან გამომდინარე, მიეკუთვნება კაპიტალურობის III გჯუფს და მისი ექსპლუატაციის ვადა შეადგენს 100 წელს. დაზიანებები შენობას მიყენებული აქვს მოუვლელობითა და თვითნებურად განხორციელებული დაშენება-მიშენებების შედეგად. მიშენებული ნაწილების კონსტრუქციიდან გამომდინარე, არსებული სახით მისი ექსპლუატაცია საფრთხის შემცველია. შენობის გამაგრება და სამშენებლო ნორმებთან შესაბამისობაში მოყვანა არ მიგვაჩნია მიზანშეწონილად არარენტაბელურობის გამო. ოჯახების რაოდენობა – 74.

ფრ. ხალვაშის გამზ. #16 – საცხოვრებელი სახლის ვიზუალური დათვალიერებით მისი ტექნიკური მდგომარეობა არადამაკმაყოფილებელია. შენობა, კონსტრუქციული ელემენტების სახეობიდან გამომდინარე, მიეკუთვნება კაპიტალურობის IV გჯუფს და მისი ექსპლუატაციის ვადა შეადგენს 50 წელს. ფაქტობრივად, შენობა ამორტიზებულია. ვინაიდან შენობის მზიდ კონსტრუქციულ ელემენტებს განცდილი აქვს მაღალი ფიზიკური და ასაკობრივი ცვეთა, მისი აღდგენა-გამაგრება გაუმართლებლად მიგვაჩნია და შემდგომი ექსპლუატაცია არ არის მიზანშეწონილი გარკვეული საფრთხეების შემცველობის გამო. ოჯახების რაოდენობა – 5.

ფრ. ხალვაშის გამზ. #206 – საცხოვრებელი სახლის ვიზუალური დათვალიერებით, მისი ტექნიკური მდგომარეობა არადამაკმაყოფილებელია. შენობა, კონსტრუქციული ელემენტების სახეობიდან გამომდინარე, მიეკუთვნება კაპიტალურობის IV გჯუფს და მისი ექსპლუატაციის ვადა შეადგენს 50 წელს. ფაქტობრივად, შენობა ამორტიზებულია. ვინაიდან შენობის მზიდ კონსტრუქციულ ელემენტებს განცდილი აქვს მაღალი ფიზიკური და ასაკოვბრივი ცვეთა, მისი აღდგენა-გამაგრება გაუმართლებლად მიგვაჩნია და შემდგომი ექსპლუატაცია არ არის მიზანშეწონილი გარკვეული საფრთხეების შემცველობის გამო. ოჯახების რაოდენობა – 8.

ჰაიდარ აბაშიძის ქ. #21 – საცხოვრებელი სახლის ვიზუალური დათვალიერებით, მისი ტექნიკური მდგომარეობა არადამაკმაყოფილებელია. შენობა, კონსტრუქციული ელემენტების სახეობიდან გამომდინარე, მიეკუთვნება კაპიტალურობის III გჯუფს და მისი ექსპლუატაციის ვადა შეადგენს 100 წელს. ფაქტობრივად, შენობა ამორტიზებულია. ვინაიდან შენობის მზიდ კონსტრუქციულ ელემენტებს განცდილი აქვს მაღალი ფიზიკური და ასაკობრივი ცვეთა, მისი აღდგენა-გამაგრება შესაძლებელია, თუმცა, ჩასატარებელი სამუშაოების დიდი მოცულობისა და ღირებულებებიდან გამომდინარე, მიგვაჩნია გაუმართლებლად. გარკვეული საფრთხეების შემცველობის გამო, შენობის შემდგომი ექსპლუატაცია არ არის მიზანშეწონილი. ცალკე საფრთხის შემცველია მიშენებული ნაწილების ექსპლუატაციაც სამშენებლო სეისმურ ნორმებთან შეუსაბამობის გამო. ოჯახების რაოდენობა – 11.

კახაბრის ქ. #30 – საცხოვრებელი სახლის ტექნიკური მდგომარეობა არადამაკმაყოფილებელია, ხოლო ცალკეული ზონები საფრთხის
შემცველია. მიშენებული ნაწილების კონსტრუქციული სქემა და რკინა-ბეტობის ელემენტების ზომები ვერ აკმაყოფილებს სამშენებლო და სეისმური ნორმების მოთხოვნებს. შენობა საჭიროებს სარეაბილიტაციო სამუშაოების ჩატარებას დეტალური გამოკვლევის შედეგების საფუძველზე დამუშავებული კონსტრუციული პროექტის მიხედვით. ოჯახების რაოდენობა – 34.

იმედაშვილის ქ.#25 – ვიზუალური დათვალიერებით, შენობების ტექნიკური მდგომარეობა არადამაკმაყოფილებელია. აუცილებელია მათი ტექნიკური მდგომარეობის დეტალური გამოკვლევა და მიღებული შედეგებისა და ეკონომიკური თვალსაზრისის გათვალისწინებით, შენობების დემონტაჟი, ან გამაგრება ამ მიზნით სპეციალურად დამუშავებული პროექტების მიხედვით. აივნების ტექნიკური მდგომარეობა მწვავედ ავარიულია, ვერ უზრუნველყოფს მობინადრეების უსაფრთხოებას, მათი შემდგომი ექსპლუატაცია კატეგორიულად დაუშვებელია და ექვემდებარება დემონტაჟს. ამ მიზნით სპეციალურად დამუშავებული დემონტაჟის პროექტის მიხედვით. ოჯახების რაოდენობა – 20.

ტბ. აბუსერიძის ქ. #29ა – ვიზუალური დათვალიერებით, ქ. ბათუმში, ტბ. აბუსერიძის ქ. #29ა-ში მდებარე შენობის მიშენებული ნაწილის საძირკვლის ფუძის ჯდენის გამო, მიშენებული ნაწილი გადაიხარა ვერტიკალური სიბრტყიდან ეზოს მიმართულებით და, ძირითადი შენობის ღია აივნებთან მიშენებული ნაწილის ხისტად შეერთების გამო, თან წაიყოლა ძირითადი შენობის მზიდი კონსტრუქციები, რაც განსაკუთრებით შესამჩნევია შენობის ტორსულ კედლებთან მდებარე ბინებში. უნდა აღინიშნოს, რომ საძირკვლის ფუძის ჯდენის დინამიკური პროცესი კვლავ მიმდინარეობს, რადგან გარემონტებულ ბინებში ბზართა წარმოქმნა გრძელდება. შენობის ამ
ნაწილის ტექნიკური მდგომარეობა არადამაკმაყოფილებელია. ვერ უზუნველყოფს მობინადრეთა უსაფრთხოებას და მისი შემდგომში ექსპლუატაცია დაუშვებელია. ქ. ბათუმში, ტბ. აბუსერიძის ქ. #29ა-ში მდებარე მრავალბინიანი საცხოვრებელი სახლის შემდგომი
ნორმალური ექსპლუატაციისათვის, აუცილებელია დაუყოვნებლივ ჩატარდეს შენობის უკანა მხარეს მოგვიანებით განხორციელებული მიშენების ტექნიკური მდგომარეობის დეტალების გამოკვლევა და მიღებული შედეგების საფუძველზე, დაუყოვნებლივ განხორციელდეს
შენობის მიშენებული ნაწილის გამაგრება ამ მიზნით სპეციალურად დამუშავებული გაძლიერების პროექტის მიხედვით, ან დემონტაჟი ამ მიზნით სპეციალურად დამუშავებული დემონტაჟის პროექტის მიხედვით. ოჯახების რაოდენობა – 50.

შავშეთის ქ. #29 –  შენობის ვიზუალური დათვალიერებით, შენობის უკანა კედელზე შეინიშნება დახრილი და ვერტიკალური ბზარები. ბზარები შეინიშნება ოთახებში, შენობის შუაში არსებულ დერეფნებში, შემოსასვლელში, კიბის უჯრედში. სახურავის დაზიანების გამო, ჩამორეცხილი და დახავსებულია კედლები, ჩამოცვენილია ჭერიდან ნალესი, მთლიანად ამორტიზებულია იატაკი და კარ-ფანჯრების ხის კონსტრუქციები. ოთხებში და დერეფნებში ჩანგრეულია იატაკი, იატაკები დახრილია გარე პერიმეტრის მხარეს. სველ წერტილებში ჩამონგრეულია ჭერის ხის კონსტრუქციები, ამძვრალია თუნუქის ფურცლები და საფრთხეს უქმნის მობინადრეების სიცოცხლეს. დერეფნებში და ოთახებში ყრია სამშენებლო ნაგავი, აყრილია იატაკი, არის ანტისანიტარიული მდგომარეობა. შენობის ტექნიკური მდგომარეობა არადამაკმაყოფილებელია, საფრთხეს უქმნის მობინადრეების სიცოცხლეს და მისი შემდგომი ექსპლუატაცია დაუშვებელია. ქ. ბათუმში, შავშეთის ქ.#29-ში მდებარე შენობის შემდგომი უსაფრთხო ექსპლუატაციისათვის აუცილებელია შენობის ტექნიკური მდგომარეობის დეტალური გამოკვლევა, მიღებული შედეგების საფუძველზე და, ეკონომიკური შეფასებიდან გამომდინარე, შენობის გამაგრება და რეკონსტრუქცია ამ მიზნით სეციალურად დამუშავებული პროექტის მიხედვით, ან დემონტაჟი ამ მიზნით სპეციალურად დამუშავებული დემონტაჟის პროქეტის მიხედვით. ოჯახების რაოდენობა – 74.

გენ. ასლან აბაშიძის ქ. #7 – საცხოვრებელი სახლის ტექნიკური მდგომარეობა არადამაკმაყოფილებელია. მიშენებული ნაწილები შესრულებულია კუსტარულად და უხარისხოდ, რის გამოც, მიღებული დეფორმაციები აღემატება სამშენებლო ნორმებით დასაშვებ მნიშვნელობას. ცალკეული ზონები ავარიულ მდგომარეობაშია და მათი ექსპლუატაცია საფრთხის შემცველია. აუცილებელია დროულად განხორციელდეს მიშენებული ნაწილების დემონტაჟი და ძირითადი შენობის მიმდებარე ზონის გამაგრებაგაძლიერება, სათანადოდ დამუშავებული კონსტრუქციული პროექტის მიხედვით. ოჯახების რაოდენობა – 70.

ჯავახიშვილის ქ. #78 – საცხოვრებელი სახლი არის ავარიულ მდგომარეობაში. მიშენებული ნაწილების დეფორმირების პროცესი პროგრესირებს, რაც საფრთხეს უქმნის მობინადრეთა სიცოცხლეს. აუცილებელია დაუყოვნებლივ შეიზღუდოს მიშენებული ნაწილების ექსპლუატაცია და განხორციელდეს მათი დასაძირკვლებისა და მზიდი კონსტრუქციების გამოკვლევა, რისთვსაც საჭიროა წარმოდგენილი იქნას მიშენებების კონსტრუქციული პროექტი და საინჟინრო-გეოლოგიური კვლევის შედეგები. გამაგრების შესაძლებლობის შემთხვევაში, საჭიროა დროულად განხორციელდეს შესაბამისი სამუშაოები, სათანადოდ დამუშავებული პროექტის მიხედვით, ხოლო გამაგრებითი ღონისძიებების გატარების გაუმართლებლობის შემთხვევაში, აუცილებელია, განხორციელდეს მათი
დეონტაჟი. კვლევების ჩატარებამდე, უსაფრთხოების მიზნით, ასევე აუცილებელია ეზოში მიშენებული ნაწილების მიმდებარე ზონები შემოიღობოს უსაფრთხოების წესების დაცვით. ოჯახების რაოდენობა – 70.

ტბეთის ქ. #14 – საცხოვრებელი შენობა, ხანდაზმულობიდან გამომდინარე, ამორტიზებულია, მისი ტექნიკური მდგომარეობა არადამაკმაყოფილებელია. ჩასატარებელი სარეაბილიტაციო სამუშაოების დიდი მოცულობის გათვალისწინებით, შენობის აღდგენა არ მიგვაჩნია მიზანშეწონილად არარენტაბელურობიდან გამომდინარე. სანიტარიული ნორმების მოთხოვნათა თვალსაზრისით, შენობის ექსპლუატაცია არსებული სახით დაუშვებელია. ოჯახების რაოდენობა – 10.

ი. ნონეშვილის #3 – საცხოვრებელი სახლის ამჟამინდელი ტექნიკური მდგომარეობა არადამაკმაყოფილებელია. მზიდი კონსტრუქციიდან გამომდინარე, შენობა მიეკუთვნება კაპიტალურობის მეოთხე ჯგუფს და მისი გამოსადეგობის ვადა შეადგენს 50 წელს. შენობა ამორტიზებულია, ვინაიდან შენობის მზიდ კონსტრუქციულ ელემენტებს განცდილი აქვს ფიზიკური და ასაკობრივი ცვეთა, მისი აღდგენა-გამაგრება მიგვაჩნია გაუმართლებლად. არსებული სახით შენობის ექსპლუატაცია არ არის მიზანშეწონილი. ოჯახების რაოდენობა – 3.

რაში ხედავს მერია გამოსავალს?

მერიის მიერ საკრებულოში გაგზავნილ ინფორმაციაში აღნიშნულია:

„ქ. ბათუმის მუნიციპალიტეტის წინაშე არსებული ურთულესი გამოწვევა, რაც დაკავშირებულია ავარიული და სიცოცხლისთვის საფრთხის შემცველი შენობა-ნაგებობების ლიკვიდაციასთან, მისი მასშტაბურობიდან გამომდინარე, ვერ განხორციელდება მხოლოდ ბათუმის მუნიციპალიტეტის ფინანსური, ასევე, ქონებრივი რესურსებით. შესაბამისად, მიზანშეწონილია, საკითხის გადაწყვეტა მოხდეს ყველა დაინტერესებული მხარის ჩართულობითა და მხარდაჭერით.

ამ მიმართულებით, პრობლემის გადაწყვეტა შესაძლებლად მიგვაჩნია რამდენიმე მეთოდის გამოყენებით, ან/და მათი კომბინირებით, რომელთა საერთო მიზანი იქნება მოსახლეობისათვის ჯანსაღი/უსაფრთხო საცხოვრებელი გარემოს შექმნა და ქალაქის იერსახის გაუმჯობესება:

1. ქ. ბათუმის მუნიციპალური პროგრამის შემუშავების გზით, რომლის ფარგლებშიც, მუნიციპალიტეტის საკუთრებაში არსებული საბინაო ფონდის გამოყენებით, ეტაპობრივად მოხდება ქ. ბათუმის მუნიციპალიტეტის ადმინისტრაციულ საზღვრებში მდებარე ავარიული და სიცოცხლისთვის საფრთხის შემცველი შენობა-ნაგებობების ლიკვიდაცია. პროგრამის შემუშავება და ძალაში შესვლა უნდა მოხდეს არაუგვიანეს 2020 წლისა და მისი მოქმედების ვადა უნდა იყოს საფრთხის შემცველი ყველა შენობა-ნაგებობების სრულ ლიკვიდაციამდე პერიოდი.

2. ავარიული და სიცოცხლისთვის საფრთხის შემცველი შენობა-ნაგებობების დემონტაჟი და მათ ადგილზე მუნიციპალიტეტის ფინანსური რესურსებით ახალი საცხოვრებელი შენობა-ნაგებობის მშენებლობისთვის შესაბამისი ასიგნების გათვალისწინება უნდა დაიწყოს არაუგვიანეს 2020 წლისა და გაგრძელდეს საფრთხის შემცველი ყველა შენობა-ნაგებობების სრულ ლიკვიდაციამდე.

3. ავარიული და სიცოცხლისთვის საფრთხის შემცველი შენობა-ნაგებობების მესაკუთრეებისათვის ერთჯერადად 20 000 აშშ დოლარის ექვივალენტი ლარის კომპენსაციის სახით გადაცემა, მათ საკუთრებაში არსებული ფართის მუნიციპალიტეტის საკუთრებაში გადმოცემის სანაცვლოდ, რომლის შემდგომ, მუნიციპალიტეტის მიერ განხორციელდება ავარიული და სიცოცხლისთვის საფრთხის შემცველი შენობა-ნაგებობის ლიკვიდაცია. შესაბამისი ასიგნების გათვალისწინება უნდა დაიწყოს არაუგვიანეს 2020 წლისა და გაგრძელდეს საფრთხის შემცველი ყველა შენობა-ნაგებობების სრულ ლიკვიდაციამდე.

4. დეველოპერული კომპანიების ინფორმირება ავარიული და სიცოცხლისთვის საფრთხის შემცველი შენობა-ნაგებობების შესახებ, მათთვის ტექნიკურ-ეკონომიკური მაჩვენებლების მიწოდება, იმ მიზნით, რომ კომპანიებმა, დაინტერესების შემთხვევაში, უზრუნველყონ სალიკვიდაციო შენობების ადგილებზე ახალი მშენებლობების განხორციელება, რა დროსაც ქ. ბათუმის მუნიციპალიტეტის მიერ, შესაძლებლობის ფარგლებში, გადაწყვეტილი იქნება პოტენციური ინვესტორების წინაშე არსებული ტექნიკური სახის პრობლემური საკითხები“.

მერიაში თვლიან, რომ საკითხის ამ მიმართულებით წარმართვისათვის საჭიროა სათანადო საინფორმაციო სამუშაოს ჩატარება, საკრებულოს, არასამთავრობო ორგანიზაციებისა და ყველა სხვა დაინტერებული მხარის ჩართულობით. გარდა აღნიშნულისა, ბათუმის მერია აგრძელებს ქალაქის ტერიტორიაზე არსებული მრავალბინიანი, შესაძლო ავარიული, ამორტიზებული და საფრთხის შემცველი სხვა შენობა-ნაგებობების გამოვლენის სამუშაოებს.

„იმ შემთხვევაში, თუ საინჟინრო კვლევის შედეგად დადგინდება, რომ შენობა-ნაგებობის არსებული სახით ექსპლუატაცია საფრთხის შემცველია ადამიანთა სიცოცხლისათვის, დაზიანების ხარისხიდან გამომდინარე, მისი აღდგენა არ არის მიზანშეწონილი და ექვემდებარება სალიკვიდაციო ღონისძიებების განხორციელებას, ქ. ბათუმის მუნიციპალიტეტის მერია მოახდენს შენობა-ნაგებობის
მესაკუთრეების/მობინადრეების ინფორმირებას/ შეტყობინებას შენობა-ნაგებობის ავარიულობის, ამ შენობა-ნაგებობიდან ადამიანის სიცოცხლის ან/და ჯანმრთელობისათვის მოსალოდნელი საფრთხის თაობაზე“ – აღნიშნულია მერიის ინფორმაციაში.

ამ თემაზე:

მთავარი ფოტო: საცხოვრებელი შენობა, ბათუმში, ტბეთის ქ. #14-ში. 

არასამთავრობო ორგანიზაცია „არბაითერ-სამარიტერ-ბუნდი“-ის (ASB) 2017 წლის კვლევაში „ყოფილ პატიმართა და პრობაციონერთა რეაბილიტაცია: საერთაშორისო გამოცდილების შესწავლა“ დაწვრილებითაა განხილული, თუ როგორ მუშაობს მსოფლიოს განვითარებულ ქვეყნებში პენიტენციური სისტემები. მათ შორის ინგლისისა და უელსის სისტემა.

კვლევის მიხედვით, ინგლისსა და უელსში ყოფილი პატიმრების რეინტეგრაციაში აქტიურად არიან ჩართულები სათემო რეაბილიტაციის კომპანიები. ასე ეწოდება კომპანიებს, რომლებიც ყოფილ პატიმრებს ვაკანსიებს და საჭიროებებზე მორგებულ სარეაბილიტაციო სერვისებს სთავაზობენ. სულ 21 გეოგრაფიული ლოკაციაა ინგლისსა და უელსში, სადაც კომპანიებმა სერვისები უნდა წარმოადგინონ.

ყოფილ პატიმართა სარეაბილიტაციო პროექტებში ჩართვის მსურველი კომპანიები  განაცხადს აკეთებენ. ამის შემდეგ სახელმწიფო არჩევს საუკეთესო წინადადებებს და ორგანიზაციები სერვისების მიწოდებას. შეთავაზებული სერვისების ეფექტურობას რეგულარულად სწავლობს სახელმწიფო.

Blue Sky ერთ-ერთი ასეთი სათემო რეაბილიტაციის კომპანიაა, აქვს სოციალური საწარმო, რომელიც ყოფილი პატიმრების დასაქმებას უწყობს ხელს და გრძელვადიანი შედეგებით გამოირჩევა. 2005 წლიდან კომპანიამ დროებით დაასაქმა 1300-მდე ყოფილი პატიმარი. მათი 40 პროცენტი შემდგომში დასაქმდა მუდმივ სამუშაოზე, რაც 4-ჯერ აღემატება სახელმწიფოს დასაქმების პროგრამის მიღწევებს 2014-2015 წლებში გათავისუფლებული პატიმრებისათვის.

კომპანია სხვა წყაროებთან ერთად ფინანსდება სამართალდამრღვევთა მართვის ეროვნული სამსახურის, შრომისა და პენსიის დეპარტამენტის, ადგილობრივი ხელისუფლებისა და ევროპის სოციალური ფონდის მიერ. კომპანიას აქვს პრობაციის ეროვნულ სამსახურთან, ციხის სამსახურთან და სათემო რეაბილიტაციის კომპანიებთან მჭიდრო თანამშრომლობის 12 წლის გამოცდილება.

დასაქმებული პატიმრები იღებენ ხელფასს, დახმარებას მუშაობასთან შეგუების პროცესში; იწყებენ ურთიერთობას ახალ ადამიანებთან და მათი სოციალური ქსელი ფართოვდება. ეს ხელს უწყობს ცხოვრების უფრო ჯანსაღი წესით წარმართვას. კომპანიის საშუალებით ყოფილი პატიმრები საქმდებიან ისეთ სფეროებში, როგორიცაა ნარჩენების მართვა და გადამუშავება, დისტრიბუცია და დასაწყობება, მშენებლობა, კვების სექტორი და სხვ. კომპანია წარმოადგენს დასაქმების სააგენტოების საუკეთესო ალტერნატივას. ის თანამშრომლობს მრავალ კომპანიასთან, თავად ასაქმებს ყოფილ პატიმრებს (მაქსიმუმ ექვსთვიანი კონტრაქტის საშუალებით სრულ ან ნახევარ განაკვეთზე) და ათავსებს მათ შერჩეულ ადგილზე.

კომპანია დასაქმებულებს სთავაზობს მხარდაჭერის სრულ პაკეტს, რაშიც შედის კონსულტაციები, უპროცენტო სესხი და ტრენინგ-გრანტები. ინგლისის იუსტიციის სამინისტროს მონაცემებით, დასაქმების ხელშეწყობის მოდელმა, რომელსაც Blue Sky იყენებს, 23%-ით შეამცირა განმეორებითი დანაშაულის მაჩვენებელი, რაც მსგავს ინტერვენციებს შორის რეკორდული მაჩვენებელია.

კიდევ ერთი მნიშვნელოვანი სარეაბილიტაციო პროექტია კომპანია Startup-Startup-ი. კომპანია ყოფილ ქალ პატიმრებს სთავაზობს ბიზნეს განათლებას, კონსულტაციასა და მცირე გრანტებს, რათა მათ შეძლონ საკუთარი მცირე საწარმოების გახსნა. ყოფილი პატიმრებისთვის ხშირად თვითდასაქმება საუკეთესო გამოსავალია, რადგან დამსაქმებლის მოლოდინების დაკმაყოფილება მათ, როგორც წესი, უჭირთ. 2010 წლიდან კომპანიამ 1200-მდე ქალთან იმუშავა.

Startup-Startup-ი საქველმოქმედო ორგანიზაციაა და დაფინანსების სხვადასხვა წყარო აქვს. იმ 348 ქალს შორის, რომელმაც კომპანიის დახმარებით საკუთარი ბიზნესი წამოიწყო, განმეორებითი დანაშაულის მაჩვენებელი მხოლოდ 1 პროცენტია.

ინგლისსა და უელსში მოქმედებს ასევე სენტ გაილს თრასტ მენტორინგის პროგრამა (St Giles Trust Peer Advisor Programme), რომელიც ყოფილ პატიმრებს სთავაზობს პროფესიულ ტრენინგს და განვითარებას შემდგომი დასაქმებისთვის. ამავდროულად, მონაწილეები თავად ხდებიან მენტორები და ეხმარებიან სხვა ბენეფიციარებს წარმატების მიღწევაში. ბენეფიციარებს დახმარებას უწევენ სამუშაო ადგილების მოძიებაში.

კიდევ ერთი წარმატებული სარეაბილიტაციო პროგრამაა ბრაიტონის ქალთა ცენტრის პროგრამაა „Brighton Women’s Centre’s Inspire Programme“. აქ, ძირითადად, იმ ქალებს ეხმარებიან (ძალადობის მსხვერპლი, მენტალური დაავადების მქონე, დამოკიდებულების მქონე, ღარიბი, მარტოხელა ან უმუშევარი), რომლებიც მოხვდნენ სისხლის სამართლის სისტემაში.

პროგრამის მიზანია, გააძლიეროს ქალები და ხელი შეუწყოს მათ დამოუკიდებლობას. თითოეულ ბენეფიციარ ქალთან ინდივიდუალურად მუშაობს „ქეისის მენეჯერი“, რომელიც მასთან ერთად ადგენს დახმარების გეგმას ბენეფიციარის საჭიროებების დასაკმაყოფილებლად. შეთავაზებული პრაქტიკული და თერაპიული ინტერვენციები ამცირებს განმეორებითი დანაშაულის რისკს.

მასალა მომზადებულია პროექტის – „ყოფილი პატიმრების, პატიმართა ოჯახებისა და პრობაციონერების მხარდაჭერის პროგრამა“  ფარგლებში.
პროექტს ახორციელებს ა(ა)იპ „დემოკრატიის ინსტიტუტი“ და დაფინანსებულია ევროკავშირის მიერ.
მასალაში გამოთქმული მოსაზრებები ავტორისეულია და შესაძლოა არ გამოხატავდეს დონორი ორგანიზაციის თვალსაზრისს.

ბათუმის ბიუჯეტიდან დამატებით 273 338 ლარი გამოიყო „ბათუმობაზე“ გასართობი მომსახურებების შესასყიდად. ბათუმის კულტურის ცენტრის ინფორმაციით, აღნიშნული თანხა ტენდერის გარეშე დაიხარჯება და ის, ძირითადად, ესტრადის მომღერლების, მსახიობებისა და პოეტების ჰონორარებს მოხმარდება.

„ბათუმობისთვის“ ადრე და ამჯერად გამოყოფილ თანხებს თუ დავაჯამებთ, ამ ღონისძიების ჩატარება 2019 წელს ქალაქის ბიუჯეტს ნახევარ მილიონ ლარზე მეტი დაუჯდება.

კულტურის ცენტრის მონაცემებით, ჰონორარები შემდეგნაირად გადანაწილდება:

[checklist]

• ევგენი მიქელაძის სახელობის საქართველოს ეროვნული სიმფონიური ორკესტრის მომსახურება – 81 574,88 ლარი;
• გალა კონცერტში მონაწილე ესტრადის მომღერლების ჰონორარი – 117 938 ლარი;
• პოეტების ჰონორარი – 7 500 ლარი;
• სცენა საზაფხულო თეატრის წინ [ბათუმელი შემსრულებლები] – 34 625 ლარი;
• მიუზიკლი „welcome to Georgia“ – 22 000 ლარი;
• თითების თეატრი – 4700 ლარი;
• ფრანების შოუ – 5 000 ლარი.

[/checklist]

„სახალხო დღესასწაულის „ბათუმობა 2019“-ის საერთო ბიუჯეტი 300 000 ლარს შეადგენდა, აქედან 12 მარტს გამოცხადდა ტენდერი ღონისძიების საორგანიზაციო ნაწილზე, რომელიც ითვალისწინებს სხვადასხვა დეკორაციის დამზადებას, ბეჭდვით მომსახურებას, სცენების დადგმასა და მორთვას და სხვ. ტენდერში გამარჯვებული გამოვლენილია და გაფორმებულია ხელშეკრულებაც. ბათუმობის ბიუჯეტით გათვალისწინებულია ასევე წარმომადგენლობითი ხარჯები, – ბათუმთან დაძმობილებული ქალაქებიდან მოწვეული დელეგაციის დაბინავებასა და კვებასთან დაკავშირებული ხარჯები და კონფერენციის „ბათუმი, წარსული და თანამედროვეობა“- დაფინანსება, რომელიც ტრადიციულად ყოველ წელს „ბათუმობის“ ფარგლებში ტარდება“, – აღნიშნულია ბათუმის კულტურის ცენტრის განაცხადში, რომლითაც ცენტრი შესყიდვების სააგენტოსგან გამარტივებულ შესყიდვაზე თანხმობას ითხოვს.

ამ თემაზე: „ბათუმობას“ 190 895 ლარად „მარკა“ ჩაატარებს – ტენდერი ერთი მონაწილით შედგა

„გამომდინარე იქედან, რომ „ბათუმობისთვის“ გამოყოფილი თანხა, ძირითადად, საორგანიზაციო ნაწილს და წარმომადგენლობით ხარჯებს ხმარდება, ამასთან ღონისძიება მთელი დღის განმავლობაში ერთდროულად რამდენიმე ადგილზეა დაგეგმილი, სადაც იქნება დადგმული შესაბამისი ინფრასტრუქტურა [სცენა და გახმოვანება, განათების აპარატურა], მიზანშეწონილი გახდა სხვადასხვა ჟანრისა და თემატიკის, გასართობი და შოუს ელემენტებით დატვირთული ღონისძიებების დამატება და ბათუმელი და საქართველოში მოღვაწე პოპულარული შემსრულებლების მოწვევა, რაც ხელს შეუწყობს ღონისძიების მასშტაბურობასა და მოსახლეობის დაინტერესების ზრდას.

აღნიშნულის გათვალისწინებით, მიმდინარე წლის ბიუჯეტის ცვლილების დროს, 2019 წლის 12 აპრილს ბათუმის მუნიციპალიტეტის საკრებულოზე განსახილველად იქნა გატანილი საკითხი „ბათუმობისთვის“ დამატებითი ასიგნების გამოყოფის თაობაზე და ამ მიზნით ბიუჯეტში გასართობი მომსახურების შესყიდვისათვის დამატებით გამოიყო 273 338 ლარი [ესტრადის მომღერლების და მსახიობების ჰონორარები], – აღნიშნულია კულტურის ცენტრის განაცხადში.

ტენდერის გარეშე შესყიდვის განხორციელებას კულტურის ცენტრი შემდეგნაირად ასაბუთებს: „დაგეგმილი ღონისძიებების მაღალი საზოგადოებრივი მნიშვნელობის გათვალისწინებით და მათი მაღალ დონეზე და შეუფერხებლად ჩატარების მიზნით, ღონისძიებებისა და კვალიფიციურ შემსრულებლებთან თანამშრომლობის სპეციფიკიდან გამომდინარე, მიზანშეწონილია აღნიშნული ღონისძიებებისათვის საჭირო მომსახურებების შესყიდვა გამარტივებული შესყიდვის საშუალებით განხორციელდეს. გამომდინარე აქედან, მხოლოდ გამარტივებული შესყიდვის საშუალების გამოყენებით არის ღონისძიების ჩატარების შესაძლებლობა. სხვა შემთხვევაში, შესყიდვები ვერ განხორციელდება“.

ბათუმის მერიის ცნობით, ღონისძიებები წელს ბათუმის ბულვარში 28 აპრილის 12-დან, 29 აპრილის 02:00 საათამდე გაიმართება.

ამ თემაზე:

ბათუმში, გიორგი ბრწყინვალეს და 26 მაისის ქუჩების კვეთაში, საცხოვრებელ კორპუსებს შორის შემავალ გზაზე ავტომანქანები ღიად დატოვებულ თხრილში ვარდებიან. ამ მისამართზე მცხოვრები ადამიანების თქმით, ბოლო ორი დღის განმავლობაში „ბათუმის წყლის“ მიერ გათხრილ ორმოში სამი ავტომანქანა ჩავარდა. ორი შემთხვევის ამსახველი ფოტო მოქალაქემ მოგვაწოდა.

„დღისით ვიზუალურად ყველა ამჩნევს, რომ იქ თხრილია. ჩვენ გვქონდა ნიშნულები, რომელიც ალბათ ქარმა დააზიანა,“ – გვითხრეს შპს „ბათუმის წყლის“ პიარსამსახურში. აქვე განმარტეს, რომ წყალარინების ახალ სისტემაზე დაერთების სამუშაოები მიმდინარეობს და ჯერ უცნობია, როდის დასრულდება ეს პროცესი.

„ბათუმის წყალში“ ასევე აღნიშნეს, რომ მათთვის არავის მიუმართავს მანქანების თხრილში ჩავარდნის პრობლემით.

აუნაზღაურებს თუ არა კომპანია მოქალაქეებს ზარალს მიმართვის შემთხვევაში? „ამას ახლა ვერ გეტყვით. მოგვმართონ და შემდეგ განვიხილავთ,“ – გვიპასუხეს „ბათუმის წყალში“.

აჭარის ტელევიზიისა და რადიოს დირექტორის იმპიჩმენტის საკითხს 23 არასამთავრობო ორგანიზაცია ეხმაურება.

„არასამთავრობო ორგანიზაციები მკვეთრად უარყოფითად ვაფასებთ საზოგადოებრივი მაუწყებლის აჭარის ტელევიზიისა და რადიოს მრჩეველთა საბჭოს ორი წევრის ინიციატივას, ტელევიზიის დირექტორის ნათია კაპანაძის იმპიჩმენტის შესახებ.

აჭარის ტელევიზია და რადიო ნათია კაპანაძის დირექტორობის პერიოდში არაერთი საერთაშორისო და ადგილობრივი ავტორიტეტული ორგანიზაციის მხრიდან შეფასდა, როგორც თავისუფალი, მიუკერძოებელი და მზარდი ინსტიტუტი, მკვეთრად პოლარიზებულ და პოლიტიზირებულ მედია გარემოში. დირექტორის იმპიჩმენტის საკითხის განხილვისას კარგად უნდა იყოს გათვითცნობიერებული ის ზიანი, რაც მიადგება ქვეყნის დემოკრატიულ განვითარებას და მედიის თავისუფლებას. იმედს გამოვთქვამთ, რომ მრჩეველთა საბჭოს სხვა წევრები გამოიჩენენ კეთილგონიერებას და დაიცავენ არხის სარედაქციო დამოუკიდებლობას.

არასამთავრობო ორგანიზაციები ყურადღებით ვაკვირდებით აჭარის ტელევიზიასა და რადიოში მიმდინარე პროცესებს და იმედს გამოვთქვამთ, რომ განხილვა იქნება საჯარო და საზოგადოებას მიეცემა საშუალება ჩაერთოს ამ პროცესებში“ – ვკითხულობთ განცხადებაში, რომელსაც ხელს 23 ორგანიზაცია აწერს.

ეს ორგანიზაციებია: ჟურნალისტიკის რესურს ცენტრი; ლიბერალური აკადემია თბილისი; თავისუფალი არჩევანი; ფონდი ”სამოქალაქო განათლების განვითარების მულტიეთნიკური რესურსცენტრი”; სამეცნიერო-ინტელექტუალური კლუბი „თაობათა დიალოგი“; კვლევების ტექნოლოგიებისა და ინოვაციების ხელშემწყობი საერთაშორისო ცენტრი; საერთაშორისო ბიზნესის და ეკონომიკური განვითარების ცენტრი; რადიო ათინათი; “სამოქალაქო საზოგადოების და დემოკრატიის განვითარების ცენტრი”; ასოციაცია ,,დეა”; ,,ახალი თაობა დემოკრატიული საქართველოსათვის “; ადგილობირივი დემოკრატიის სააგენტო საქართველო; საქართველოს საერთაშორისო განვითარების სააგენტო; “სტუდენტურ-ახალაგზრდული სათათბირო”; მშვიდობის, დემოკრატიისა და განვითარების კავკასიური ინსტიტუტი; ასოციაცია ევროპული კვლევები საქართველოს ინოვაციური განვითარებისთვის; საზოგადოებრივი განვითარების აკადემია”; გადავარჩინოთ მომავალი თაობა”; საქართველოს მედია მონიტორინგის ცენტრი; ,აფხაზეთი- ჩემი სახლი”; ადამიანის უფლებათა ცენტრი; კულტურულ-ჰუმანიტარული ფონდი “სოხუმი“; ენერგოეფექტურობის ფონდი.

აჭარის ტელევიზიის დირექტორის შესაძლო იმპიჩმენტთან დაკავშირებით ბოლო დღეებში არასამთავრობო ორგანიზაციებმა და პოლიტიკურმა პარტიებმა გაავრცელეს განცხადებები. განცხადებებში ნათქვამია, რომ აჭარის ტელევიზია და რადიო ნათია კაპანაძის დირექტორობის პერიოდში არაერთი საერთაშორისო და ადგილობრივი ავტორიტეტული ორგანიზაციის მხრიდან შეფასდა, როგორც თავისუფალი, მიუკერძოებელი და მზარდი ინსტიტუტი, მკვეთრად პოლარიზებულ და პოლიტიზებულ მედიაგარემოში; „ხელისუფლებას არ აწყობს დაბალანსებული ტელევიზია და გადაწყვიტა მის საქმიანობაში ჩარევა და ამ გეგმის ნაწილია ტელევიზიის დირექტორის გადაყენება“; ჩნდება სარედაქციო დამოუკიდებლობაზე შეტევის რისკი და ა.შ.   

აჭარის ტელევიზიის დირექტორის შესაძლო იმპიჩმენტის საკითხს გამოეხმაურა ევროკავშირის ელჩი, კარლ ჰარცელიც, რომლის განცხადებითაც აჭარის ტელევიზია არის ის აქტივი, რომელსაც დღევანდელ მედიაგარემოში გაფრთხილება სჭირდება.

საზოგადოებრივი მაუწყებლის აჭარის ტელევიზიისა და რადიოს მრჩეველთა საბჭო დირექტორისათვის უნდობლობის გამოცხადების საკითხს 19 აპრილს განიხილავს. სხდომა 13 საათზეა ჩანიშნული.

საზოგადოებრივი მაუწყებლის აჭარის ტელევიზიისა და რადიოს მრჩეველთა საბჭო დირექტორისათვის უნდობლობის გამოცხადების საკითხს 19 აპრილს განიხილავს. სხდომა 13 საათზეა ჩანიშნული.

გუშინ გახდა ცნობილი, რომ სხდომა 18 აპრილს ჩაინიშნა, თუმცა დღეს მრჩეველთა საბჭოს განცხადებაში ცვლილება შევიდა და სხდომა ერთი დღით გადაიდო.

რიგგარეშე სხდომაზე გადაწყდება, დარჩება თუ არა აჭარის ტელევიზიისა და რადიოს დირექტორი, ნათია კაპანაძე დირექტორის პოსტზე.

საბჭოს ტელევიზიის დირექტორის იმპიჩმენტის მოთხოვნით ორმა წევრმა: ირაკლი დარცმელიძემ [„ერთიანი ნაციონალური მოძრაობის“ კვოტით წარდგენილი წევრი] და გიგა ჩხარტიშვილმა [„ქართული ოცნება“] მიმართა 10 აპრილს. 19 აპრილს გაიმართება ფარული კენჭისყრა, რომელშიც საბჭოს ხუთივე წევრი მონაწილეობს. ხუთწევრიანი ბორდიდან უმრავლესობა, ანუ სამი წევრი თუკი მისცემს ხმას მოქმედი დირექტორის წინააღმდეგ, ნათია კაპანაძე თანამდებობას დატოვებს.

ნათია კაპანაძე აჭარის ტელევიზიის დირექტორად 2016 წლის ოქტომბერში აირჩიეს. მას ამ პოსტზე ვადის ამოწურვამდე 6 თვეზე მეტი დრო დარჩა. სამწლიანი ვადის განმავლობაში ეს არის პირველი შემთხვევა, როცა ნათია კაპანაძის იმპიჩმენტის საკითხი დადგა დღის წესრიგში.

აჭარის ტელევიზიის დირექტორის შესაძლო იმპიჩმენტთან დაკავშირებით ბოლო დღეებში არასამთავრობო ორგანიზაციებმა და პოლიტიკურმა პარტიებმა გაავრცელეს განცხადებები. განცხადებებში ნათქვამია, რომ აჭარის ტელევიზია და რადიო ნათია კაპანაძის დირექტორობის პერიოდში არაერთი საერთაშორისო და ადგილობრივი ავტორიტეტული ორგანიზაციის მხრიდან შეფასდა, როგორც თავისუფალი, მიუკერძოებელი და მზარდი ინსტიტუტი, მკვეთრად პოლარიზებულ და პოლიტიზებულ მედიაგარემოში; „ხელისუფლებას არ აწყობს დაბალანსებული ტელევიზია და გადაწყვიტა მის საქმიანობაში ჩარევა და ამ გეგმის ნაწილია ტელევიზიის დირექტორის გადაყენება“; ჩნდება სარედაქციო დამოუკიდებლობაზე შეტევის რისკი და ა.შ.   

აჭარის ტელევიზიის დირექტორის შესაძლო იმპიჩმენტის საკითხს გამოეხმაურა ევროკავშირის ელჩი, კარლ ჰარცელიც, რომლის განცხადებითაც აჭარის ტელევიზია არის ის აქტივი, რომელსაც დღევანდელ მედიაგარემოში გაფრთხილება სჭირდება.

2017 წელს კუროტ გოდერძიზე დაშავებული და რამდენიმე დღის შემდეგ ბათუმის რეფერალურ საავადმყოფოში გარდაცვლილი თემურ გაბაიძის საქმის გამოძიება შინაგან საქმეთა სამინსიტრომ 2017 წლის 13 იანვარს დაიწყო. მას შემდეგ ორ წელი და სამი თვე გავიდა, თუმცა ამ დრომდე გამოძიება კონკრეტულ შედეგზე ვერ გავიდა. შესაბამისად, არც არავისთვის დაუკისრებიათ პასუხისმგებლობა. შს სამინისტრო იმ დასკვნას ელოდება, რომელიც სამხარაულის სახელობის ექსპერტიზის ეროვნულ ბიუროს 9 თვის წინ შეუკვეთა.

გამოძიება ამ საქმეზე სისხლის სამართლის კოდექსის 116-ე მუხლით მიმდინარეობს, რაც გულისხმობს სიცოცხლის მოსპობას გაუფრთხილებლობით.

თემურ გაბაიძის გარდაცვალებიდან დაახლოებით ერთი წლის შემდეგ – 2018 წლის თებერვალში სამედიცინო რეგულირების სააგენტომ სამ ექიმს დააკისრა პროფესიული პასუხისმგებლობა – ორს სამედიცინო საქმიანობის ლიცენზია გაუუქმდა, ერთს კი შეუჩერდა –  3 თვით.

„იმისთვის, რომ გამოიკვეთოს კონკრეტული ექიმების სისხლის სამართლებრივი პასუხისმგებლობის საკითხი, საჭიროა კომისიური ექპერტიზის ჩატარება, სადაც მოიწვევენ სხვადასხვა სპეციალისტს და დაიდება კონკრეტული დასკვნები. ამ დასკვნის გაკეთება ვერ მოხერხდა,“ – აღნიშნავს ანნა მდინარაძე, „ახალგაზრდა იურისტთა ასოციაციის“ აჭარის ფილიალის ხელმძღვანელი. ეს ორგანიზაცია თემურ გაბაიძის ოჯახის ინტერესებს იცავს.

„გვეუბნებიან, რომ სხვა საქმეებს უფრო მეტი დრო სჭირდება და პრეტენზია არ უნდა გვქონდეს,“ – ამას თამილა გაბაიძე გვიყვება, გარდაცვლილი თემურ გაბაიძის და. მისივე თქმით, შიდა კულუარებში მას უთხრეს, რომ ექიმებს მიზერულ თანხას უხდიან და ესაა მთავარი მიზეზი, რის გამოც კომისიის მიწვეული წევრების შეკრება და საქმის განხილვა ვერ ხერხდება.

თემურ გაბაიძის ოჯახს დამოუკიდებელი ექსპერტიზაც შეუკვეთავს, რაც 3800 ლარი დაჯდება. ექსპერტიზის ამ დასკვნას გამოძიება ვერ დაეყრდნობა და რომელიმე პირის ბრალეულობას ვერ გამოკვეთს. დასკვნას ოჯახი თბილისის საქალაქო სასამართლოში წაიღებს, სადაც დავა ადმინისტრაციული წესით სამედიცინო რეგულირების სააგენტოს წინააღმდეგ მიმდინარეობს – თემურ გაბაიძის ოჯახი მიიჩნევს, რომ ერთ-ერთი ექიმისთვის სამი თვით ლიცენზიის შეჩერება არ იყო ადეკვატური სანქცია და სასამართლო დავა ამ კუთხითაც გრძელდება.

„სისხლის სამართლის საქმეში კი, გამოძიება დამოუკიდებელ დასკვნას ვერ დაეყრდნობა, რადგან ოჯახს დაზარალებულის  სტატუსი არ აქვს [პროკურატურამ არ მიანიჭა ოჯახს დაზარალებულის სტატუსი], ის საერთოდ არ არის ამ პროცესის მონაწილე. დაზარალებულის სტატუსიც რომ ჰქონდეს,  ოჯახს არ აქვს უფლება ჩაერთოს სისხლის სამართლის პროცესში და იყოს ექსპერტიზის დამკვეთი,“ – განმარტავს პაატა დიასამიძე, საია-ს იურისტი.

თემურ გაბაიძის ოჯახი აქცენტს აკეთებს იმაზე, რომ არცერთ კანონში არ არის გაწერილი კონკრეტული ვადა, როცა სამხარაულის ექსპერტიზის ბიურომ დასკვნა უნდა დადოს.

„შესაძლოა, სამი წელიც დასჭირდეს ამას, გააჩნია საქმეს,“ – გვითხრეს სამხარაულის სახელობის ექსპერტიზის ეროვნული ბიუროს პრესცენტრში. თემურ გაბაიძის გარდაცვალების საქმესთან დაკავშირებით  კი, ბიუროში განმარტეს, რომ სპეციალისტები ამ საქმეზე უკვე გამოყოფილია და კვლევაც დაწყებულია.

რა ჯდება კომისიური სამედიცინო ექსპერტიზის ჩატარება? – ბიუროს ვებგვერდზე გამოქვეყნებული ინფორმაციის მიხედვით, ექსპერტიზა 230 ლარი ჯდება და ამას ემატება 85 ლარი –  თითო მოწვეული სპეციალისტისთვის. ბიუროს პრესცენტრში გვითხრეს, რომ „მოწვეულ სპეციალისტში“ იგულისხმებიან არა კონკრეტულად ექიმები, არამედ სხვადასხვა სპეციალისტი, ვინც ბიუროს აყვანილი ჰყავს მუდმივი ხელშეკრულებით.

„სამედიცინო მიმართულებით ბევრი სპეციალისტია საჭირო. ყველა სპეციალისტი ჩვენ ხომ ვერ გვეყოლება. შესაბამისად, საქმიდან გამომდინარე, ჩვენ ვთხოვთ ექსპერტიზის დამნიშნავს, ანუ საგამოძიებო ორგანოს, შესაბამისი კვალიფიკაციის ექსპერტების, ამ შემთხვევაში – ექიმების ჩართვას ამ კომისიის მუშაობაში. რამდენს უხდიან ამ სპეციალისტებს, ეს ინფორმაცია ჩვენ არ გვაქვს,“ – აღნიშნეს სამხარაულის სახელობის ექსპერტიზის ეროვნულ ბიუროს პრესცენტრში.

რამდენს უხდიან მოწვეულ ექიმებს და არის თუ არა დაბალი ანაზღაურება ერთ-ერთი მიზეზი იმის, რომ კომისია დასკვნას დროულად ვერ ამზადებს? – ინფორმაცია ვერც შინაგან საქმეთა სამინისტროში მივიღეთ. გამოძიებას ამ დრომდე ეს უწყება აწარმოებს, კერძოდ კი, ხულოს პოლიციის განყოფილება. შინაგან საქმეთა სამინისტრო მხოლოდ მშრალი ინფორმაციის გაცემით შემოიფარგლა: „გამოძიება გრძელდება 116-ე მუხლით, სიცოცხლის მოსპობა გაუფრთხილებლობით და ელოდება კომისიური ექსპერტიზის დასკვნას. რაც შეეხება ექიმებისთვის გადახდილ თანხას, საჯარო ინფორმაციის ბიუროს უნდა მიმართოთ“, – მოგვწერეს შსს-ს პრესცენტრიდან.

სამედიცინო დაწესებულებებში გარდაცვლილი ადამიანების ახლობლებმა საპროტესტო აქცია ბათუმში 14 აპრილსაც გამართეს. აქციაზე შეკრებილებმა ალტერნატიული კომისიის შექმნა მოითხოვეს, რომელიც მსგავს შემთხვევებს „ობიექტურად და დროულად“ გამოიძიებს.

„ორგანოები ფორმალურად არსებობს, რომლებმაც ეს პრობლემა უნდა მოაგვაროს. საუბარია მათ ეფექტურ მუშაობაზე… სამართლებრივად ყველა განსხვავებულ მოცემულობაშია: არსებობს საქმე, რომელსაც რეგულირების სააგენტო განიხილავს; საქმე, რომელმაც სასამართლოში გადაინაცვლა, რადგან სამედიცინო რეგულირების სააგენტოს მიერ დაწესებული სანქცია იყო არაადეკვატური და არათანაზომიერი… პრობლემა უფრო არის დროში უსაზღვროდ გაწელილი და არაეფექტური წარმოების პროცესი,“ – მიიჩნევს ანნა მდინარაძე, საიას აჭარის ფილიალის უფროსი.

ამავე თემაზე: 

1953 წელს გამოშვებული „პაბედა“ აჭარის ფინანსთა და ეკონომიკის სამინისტრომ ამჯერად 10 080 ლარად გაყიდა. სამინისტროს ინფორმაციით, განმეორებით აუქციონზე ყველაზე მაღალი ფასი ფიზიკურმა პირმა ნანა ფარჩუკაშვილმა დააფიქსირა. აუქციონში გამარჯვებულმა თანხა 30 დღის განმავლობაში უნდა გადაიხადოს და ავტომანქანა წაიღოს.

„პაბედა“, რომლის საწყისი ფასი 600 ლარი იყო, 474-ე ბიჯზე გაიყიდა. აუქციონში ექვსი მყიდველი მონაწილეობდა. ვაჭრობის ბიჯი კი 20 ლარი იყო.

წინა აუქციონზე ავტომანქანის გაყიდვის საბოლოო ფასი 12 255 ლარი დაფიქსირდა, თუმცა გამარჯვებულმა „ობო მოტორსიმ“ „პაბედას“ შეძენაზე უარი თქვა.

გაყიდული „პაბედის“ აღწერილობა: „ავტოსატრანსპორტო საშუალება არის არამუშა მდგომარეობაში, აღენიშნება დიდი რაოდენობით ჟანგვა, ვიზუალურად არადამაკმაყოფილებელია, დაზიანებული აქვს სავალი ნაწილი და ძრავი. სახელმწიფო ნომერი: ავტომანქანა   „GAZ M20 POBEDA“ [სახელმწიფო ნომერი: BB 194 BT, საიდენტიფიკაციო N; 40842, ძრავის საიდენტიფიკაციო N: 258972, გამოშვების წელი: 1953].

სამინისტროს კიდევ ერთი „პაბედა“ აქვს.

საზოგადოებრივი მაუწყებლის აჭარის ტელევიზიისა და რადიოს „ახალი ამბების“ სამსახურის 13 ოპერატორი შესაძლოა გაიფიცოს. მათი პროტესტი ანაზღაურებას უკავშირდება. ოპერატორები აცხადებენ, რომ ძირითად საქმიანობასთან ერთად ასრულებენ მემონტაჟის მოვალეობასაც, თუმცა ამისათვის ისინი ანაზღაურებას არ იღებენ.

ოპერატორების განცხადებას, რომელსაც აჭარის ტელევიზია ავრცელებს, უცვლელად გთავაზობთ:

„წლების განმავლობაში აჭარის ტელევიზიის ახალი ამბების სამსახურის ოპერატორები, ძირითად საქმიანობასთან ერთად ვასრულებთ მემონტაჟის ფუნქციას, მაგრამ დღემდე ვღებულობთ მხოლოდ ოპერატორის დაბალ ანაზღაურებას. ჩვენი არაერთი მოთხოვნის მიუხედავად, რომ გაზრდილიყო ხელფასები ან მოეხსნათ მემონტაჟის ფუნქცია, ეს მოთხოვნა არ დაკმაყოფილებულა. მივმართეთ დირექტორს, ბორდს, ჩავრთეთ პროფკავშირები.

პროფკავშირების მიმართვით დაიწყო მედიაცია, თუმცა უშედეგოდ. დირექტორის განმარტებით, ჩვენი საკითხი უნდა განიხილოს 2020 წლისთვის, მაშინ, როდესაც დირექტორის საარჩევნო ვადა მთავრდება 2019 წელს. დირექტორის მხრიდან ჩვენი მოთხოვნების იგნორირება გრძელდება. ზემოთ ხსენებულიდან გამომდინარე ვაცხადებთ, რომ  იძულებული გავხდებით მივმართოთ პროტესტის უკიდურეს ფორმას”.

იანვრიდან მარტის ჩათვლით ბათუმის საერთაშორისო აეროპორტით 51 900-მა მგზავრმა ისარგებლა, რაც 41.19 პროცენტით [15 140 მგზავრი] მეტია 2018 წლის ანალოგიური პერიოდში დაფიქსირებულ მგზავრთა რაოდენობის მაჩვენებელზე – ინფორმაციას სამოქალაქო ავიაციის სააგენტო ავრცელებს.

ავიაციის სააგენტოს ინფორმაციით, 2019 წლის პირველი სამი თვის განმავლობაში საქართველოს აეროპორტები ჯამში 1 016 098 მგზავრს მოემსახურა. 2018 წლის პირველ კვარტალთან შედარებით, მგზავრთნაკადი 20.93 პროცენტით [175 865 მგზავრით], ხოლო 2017 ანალოგიურ პერიოდთან შედარებით 63.02 პროცენტით [840 233 მგზავრით] არის გაზრდილი.

თბილისის საერთაშორისო აეროპორტი 804 673 მგზავრს მოემსახურა, რაც 11.15%-ით მეტია, ვიდრე 2018 წლის პირველი კვარტალის მონაცემებით გადაყვანილი მგზავრების რაოდენობა.

ყველაზე მკვეთრად – 101 პროცენტით გაიზარდა მგზავრთნაკადი ქუთაისის საერთაშორისო აეროპორტში. 2019 წლის პირველ სამ თვეში ქუთაისის აეროპორტიდან  სულ გადაყვანილ იქნა 156 784 მგზავრი – 78 733  მგზავრით მეტი ვიდრე 2018 წლის ანალოგიურ პერიოდში.

რაც შეეხება ადგილობრივი დანიშნულების აეროპორტებს, ავიაციის სააგენტოს ცნობით, მესტია მიმდინარე წლის 3 თვის განმავლობაში 1 246 მგზავრს მოემსახურა, რაც 562 მგზავრით, შესაბამისად 82.16%-ით მეტია ვიდრე გასულ ანალოგიურ პერიოდში გადაყვანილი მგზავრების რაოდენობა. ამბროლაურის აეროპორტმა წელს 195 მგზავრი მიიღო, რაც 110 მგზავრით მეტია, ვიდრე გასული წლის პირველ კვარტალში მომსახურებული მგზავრების რაოდენობა.

2019 წლის განვლილი სამი თვის განმავლობაში საქართველოს აეროპორტებში 859-ით მეტი რეისი განხორციელდა. სამგზავრო და სატვირთო რეისების რაოდენობა სულ იყო  5 200, აქედან რეგულარული რეისების რაოდენობაა – 4 640, ხოლო ჩარტერების  – 560. 2018 წლის პირველ კვარტალში განხორციელებული რეისების რაოდენობასთან შედარებით, ზრდა 24%-ს შეადგენს.

მიმდინარე წლის პირველი სამი თვის მონაცემებით, ზრდა დაფიქსირდა სატვირთო გადაზიდვების კუთხითაც. საჰაერო გზით გადაზიდული ტვირთის მოცულობამ 5 805.041 ტონა შეადგინა, რაც 1 753.213 ტონით, შესაბამისად, 43.27%-ით მეტია, ვიდრე წინა წლის ანალოგიურ პერიოდში გადაზიდული ტვირთის ოდენობა.

რეგულარული რეისებით გადაყვანილი მგზავრების რაოდენობის/პროცენტული წილის მიხედვით პირველი ხუთეული ასე გამოიყურება:

• Wizz Air – 152 697 მგზავრი [ბაზრის 15%]
• Turkish Airlines – 110 962 მგზავრი [ბაზრის 11%]
• Georgian Airways – 99 324 მგზავრი [11%]
• Pobeda Airlines – 96 546 მგზავრი [10%]
• Ural Airlines – 60 507 მგზავრი [6%]

____________________

მთავარ ფოტოზე: ბათუმის საერთაშორისო აეროპორტი. ფოტო: „ბათუმელები“, მანანა ქველიაშვილი

საქართველოს ფინანსთა სამინისტროს საგამოძიებო სამსახურის ინფორმაციით, დიდი ოდენობით სხვისი ქონების მოტყუებით დაუფლების მცდელობის ფაქტზე, ერთი პირი დააკავეს.

„გამოძიებით დადგინდა, რომ ბრალდებული, თაღლითურად დაუკავშირდა და ნდობაში შევიდა ერთ-ერთ პირთან, რომელსაც დამატებითი ღირებულების გადასახადში [დღგ] ერიცხებოდა ზედმეტობა 112 000 ლარის ოდენობით, დაარწმუნა იგი, რომ სხვადასხვა მაღალი რანგის მოხელის მეშვეობით, შეეძლო დახმარებოდა მას დღგ-ს ნაწილში არსებული ზედმეტობის განაღდებაში, რაშიც მოსთხოვა 35 000 ლარი. აღნიშნული თანხიდან, ბრალდებულმა, წინასწარ მოითხოვა და გამოართვა 20 000 ლარი, რა დროსაც მოხდა მისი დაკავება.“ – აცხადებს საგამოძიებო სამსახური.

გამოძიება მიმდინარეობს საქართველოს სისხლის სამართლის კოდექსის 19-180-ე მუხლის მესამე ნაწილით, რაც სასჯელის სახით ითვალისწინებს თავისუფლების აღკვეთას 6-დან 9-წლამდე ვადით.

ქართველ მუსლიმთა კავშირის განცხადებაში ნათქვამია, რომ რელიგიის საქმეთა სახელმწიფო სააგენტოს წარმომადგენლად აჭარაში დაინიშნა ადამიანი, რომელიც გამოირჩევა მუსლიმი თემის მიმართ კრიტიკით და ნეგატიური განწყობებით.

„ჩვენთვის განსაკუთრებით მიუღებელია ის გარემოება, რომ აჭარაში სააგენტოს წარმომადგენლად დაინიშნა ადამიანი, რომელიც, ზოგადად, გამოირჩევა მუსლიმი თემის მიმართ კრიტიკით და ნეგატიური განწყობებით. აბესალომ ასლანიძის დანიშვნა სააგენტოს წარმომადგენლად აჭარაში მუსლიმი თემის ინტერესების უგულებელყოფის აშკარა ნიშნებს შეიცავს და ის გაართულებს სახელმწიფო უწყებებთან ჩვენი თემის დემოკრატიულ ურთიერთობას. ჩვენ მას ვუცხადებთ უნდობლობას“, – ნათქვამია განცხადებაში.

„ბათუმელების“ კითხვაზე, თუ რა იგულისხმება „ნეგატიურ განწყობებში“, მუსლიმთა კავშირის თავმჯდომარე ტარიელ ნაკაიძე ამბობს, რომ ის ბათუმში ახალი მეჩეთის მშენებლობაზე თავის ნეგატიურ პოზიციას ხშირად გამოხატავდა სოციალურ ქსელებში.

„მისი განწყობები ასახულია ფეისბუქში, განსაკუთრებით მეჩეთთან დაკავშირებით, რომ ბათუმს და მუსლიმებს არ სჭირდებათ მეჩეთი. რომ ჩვენ რაღაცებს ვიგონებთ და თურქეთის ინტერესებს ვატარებთ ამ მიმართულებით. რომ მეჩეთის მშენებლობის მოთხოვნა არის მტრის წისქვილზე წყლის დასხმა და ა.შ. და ამას არა მარტო ფეისბუქში წერდა, სატელევიზიო კომენტარებიც ჰქონდა და, ზოგადად, სხვა დამოკიდებულებებიც არ არის პოტიზიური“, – ამბობს ტარიელ ნაკაიძე.

ის ასევე საუბრობს აბესალომ ასლანიძის მიერ 2018 წელს გამოქვეყნებულ ერთ-ერთ პოსტზე, სადაც ასლანიძე წერს, რომ ახალი მეჩეთის მშენებლობაზე გადაწყვეტილება „არ შეიძლება მიღებული იქნას ნაჩქარევად“, ბათუმთან ახლოს კი ბევრი მეჩეთია და მუსლიმებს იქ შეუძლიათ ილოცონ: „დასავლეთ საქართველოს მუფთმა ორგანიზება გაუკეთოს მორწმუნეთა გადაყვანას ბათუმის მიმდებარედ არსებულ მეჩეთებში. რამდენადაც მე ვიცი, მომლოცველთა შორის ძალიან ბევრია ისეთი მუსლიმები, რომლებსაც ჰყავთ მიკროავტობუსები და შესაბამისი მოწოდების შემთხვევაში ისინი უფასოდ მოემსახურებიან მუსლიმებს.

აბესალომ ასლანიძე ერთ-ერთ პოსტში, რომელიც ასევე ახალი მეჩეთის მშენებლობას უკავშირდება, ამბობს: „ბათუმში ახალი მეჩეთის აშენების საკითხი ერთობ ფაქიზი და გარკვეული რისკების შემცველიცაა, ამიტომ გთავაზობ, საკითხის განსაკუთრებული პოლიტიზებულობის გამო დროებით შევაჩეროთ ახალი მეჩეთის აშენების საკითხი და მისი გადაწყვეტა მივანდოთ დასავლეთ საქართველოს სამუფთოს, ხოლო თქვენ მიერ შეძენილ მიწის ნაკვეთზე იმ თანხებით, რაც თქვენ მოიძიეთ, ააშენეთ ისლამური კულტურის კვლევის ცენტრი, სადაც საშუალება ექნებათ არამარტო სხვადასხვა მუსლიმურ ორგანიზაციებს შეხვედრისთვის, არამედ ფართოდ გაიშლება ისლამური კულტურის პრობლემატიკის კვლევა“.

„ბათუმელების“ კითხვაზე, როგორ აპირებს ის მუსლიმი თემის ნაწილთან დიალოგს, ზემოთ აღნიშნული პრობლემების ფონზე, აბესალომ ასლანიძე ამბობს, რომ მუსლიმთა კავშირის გამოქვეყნებული წერილი ჯერ არ უნახავს.

„ბათუმში 20-მდე კონფესია მოქმედებს და აქედან ჩემ მიმართ პრეტენზიას გამოთქვამს მხოლოდ მუსლიმური თემის ერთი ნაწილი. თუნდაც მრავალრიცხოვან არასამთავრობო ორგანიზაციას, რამდენად აქვს უნდობლობის გამოცხადების ლეგიტიმაცია, ანუ რამდენად ვალდებული ვართ, რომ მოვუსმინოთ. რამდენად არის ხელისუფლება ვალდებული, რომ თითოეულ ასეთ არასამთავრობო ორგანიზაციას (იგულისხმება მუსლიმთა კავშირი) ჩამოუაროს და ჰკითხოს მისი აზრი, ეს დავნიშნო თუ ის.

ეს არის მნიშვნელოვანი ჯგუფი, რომელმაც შექმნა ახალი მეჩეთის მშენებლობის საინიციატივო ფონდი, მაგრამ გაცილებით დიდი ჯგუფი და დიდი კონფესიაა მართლმადიდებლობა. ვის მოვუსმინოთ ახლა უფრო მეტად?“ – გვეუბნება აბესალომ ასლანიძე.

მიუხედავად ამ პოზიციისა, აბესალომ ასლანიძე დასძენს, რომ ის სამსახურებრივად ვალდებულია, ნებისმიერ რელიგიურ ჯგუფთან მივიდეს და მოუსმინოს.

„თუ არ უნდათ საუბარი, ეს მათი ნებაა. სად ვნახოთ ისეთი ადამიანი, რომელიც ყველა კონფესიისთვის მისაღები იქნება? ამაში ტრაგედიას ვერ ვხედავ, ვიღაცას მოვწონვარ თუ არა“, – ამბობს ასლანიძე.

აბესალომ ასლანიძე ამბობს, რომ ის არ არის ახალი მეჩეთის მშენებლობის წინააღმდეგი. „შეგიძლიათ ნახოთ ჩემი კომენტარები, სტატუსები ფეისბუქში, თუ ერთ სიტყვას მაინც აღმოაჩენთ, რომ მე ვარ მეჩეთის მშენებლობის წინააღმდეგი, მე პირველი ბოდიშს მოვუხდი როგორც მუსლიმთა კავშირს, ასევე მთლიანად მუსლიმ თემს.

ჩემი პოზიცია ყოველთვის იყო შემდეგი: საქართველოს გეოპოლიტიკური მდგომარეობიდან გამომდინარე, ჩვენი ქვეყანა ფაქტობრივად, არის მუსლიმურ გარემოცვაში, ამ ქვეყნებში გარკვეული პროცესები მიმდინარეობს და ჩემი დაკვირვებით, აქედან გამომდინარე ვამბობ, რომ ბათუმში ახალი მეჩეთის მშენებლობა საფრთხილო საქმეა. მოკლედ, ყველა დაინტერესებული მხარე უნდა დასხდეს და განიხილოს, რომ ყველა ეს რისკი იქნას გამორიცხული“.

შეგიძლიათ დაასახელოთ ის რისკები, რასაც მეჩეთის მშენებლობაში ხედავთ? – ვკითხეთ აბესალომ ასლანიძეს. ის ამბობს, რომ „საფრთხეები“ სიტყვის მასალად არ გამოუყენებია. „მე ვაკვირდები მიმდინარე პროცესებს როგორც ქვეყნის შიგნით, ასევე, ზოგადად, მუსლიმურ სამყაროში მიმდინარე პროცესებს და გამომდინარე აქედან ვხედავ ამ საფრთხეებს. არ გსმენიათ თურქეთში გიულენის ძალებზე, რომელიც მთელ მსოფლიოს ობობას ქსელივით არის მოდებული?  სულ არ ვმეზობლობთ ჩვენ სირიასთან, საიდან აღმოჩნდნენ ჩვენი ახალგაზრდები სირიაში ისლამური სახელმწიფოს რიგებში? ამიტომ არის საფრთხეების შემცველი“, – ამბობს ასლანიძე.

მუსლიმთა კავშირის ამავე განცხადებაში ჩამოთვლილია ის მიზეზები, რის გამოც მუსლიმთა კავშირი რელიგიის სახელმწიფო სააგენტოს მიმართ უნდობლობით განაწყობს.

ბათუმში აღმოჩენილი ნეშტების შესასწავლად სამთავრობო კომისია შეიქმნა. სამთავრობო კომისიას აჭარის ჯანდაცვის მინისტრი, ზაალ მიქელაძე ხელმძღვანელობს. მისი მოადგილე კი აჭარის განათლების მინისტრი ინგა შამილიშვილი იქნება. კომისიაში ასევე შედიან აჭარის მთავრობის აპარატის ადმინისტრაციულ ორგანოებთან ურთიერთობის დეპარტამენტის უფროსი კახა შაშიკაძე, აჭარის ფინანსთა და ეკონომიკის სამინისტროდან ქონების მართვის და პრივატიზების უფროსი კობა თედორაძე და კულტურული  მემკვიდრეობის დაცვის სააგენტოს დირექტორი ზაურ ახვლედიანი.

აჭარის ჯანდაცვის სამინისტროში „ბათუმელებს“ უთხრეს, რომ ამ მიზნით თანხის გამოყოფის საკითხზე კომისია პირველ სხდომაზე იმსჯელებს.

აჭარის ჯანდაცვის სამინისტროს განმარტებით, კომისიის მუშაობაში მონაწილეობა უნდა სთხოვონ ბათუმისა და ლაზეთის ეპარქიას, ასევე, სრულიად საქართველოს მუსლიმთა სამმართველოს.

სამთავრობო კომისიაში საკითხის შესასწავლად მიიწვევენ ასევე შესაბამისი დარგის სპეციალისტებს, ექსპერტებს ან სხვა დაინტერესებულ პირებს. კომისიის პირველ სხდომაზე, სამუშაო პროცესში ჩართვის მიზნით, მიმართვას გაუგზავნიან სამხარაულის სახელობის ექსპერტიზის ბიუროს.

როგორც „ბათუმელებს“ აჭარის ჯანდაცვის სამინისტროში უთხრეს, ექსპერტიზის ბიუროს დახმარებით შეიქმნება ნეშტების დნმ ბაზა.

ბათუმისა და ლაზეთის ეპარქიამ 5 აპრილს გამოაქვეყნა 2017 წელს აღმოჩენილი სამარხიდან ამოღებული ნეშტების ფოტოები. ეპარქიის განცხადებით, ფრიდონ ხალვაშის გამზირზე, ყოფილი მესამე სამხედრო ბაზის  ტერიტორიაზე აღმოჩენილი 150 ნეშტი სტალინური რეპრესიების მსხვერპლთა საერთო სამარხიდან იყო.

ეპარქია ნეშტების დაკრძალვას 21 აპრილს აპირებდა. ამ განცხადებამ საზოგადოებაში აზრთა სხვადასხვაობა გამოიწვია. მოქალაქეები ითხოვდნენ, ნეშტები სათანადო შესწავლის გარეშე არ დაეკრძალათ. საბჭოთა კვლევის ლაბორატორიამ კი სახელმწიფოს მიმართა თხოვნით –ექსპერტებისთვის ნეშტების შესწავლის საშუალება მიეცათ.