„ლავასოღლის ექსტრადაციის მოთხოვნით საქართველოს თურქეთისთვის არ მიუმართავს, დოკუმენტაცია გაგზავნილი არ არის,“ – აცხადებს „კანონიერ ქურდობაში“ მსჯავრდებული მინდია ლავასოღლის ადვოკატი ლექსო კობაიძე. მისივე თქმით, ლავასოღლი ამ დროისთვის ისევ შიმშილობს თურქეთის სადეპორტო დაწესებულებაში.
„ორი საათის წინ ვესაუბრე ტელეფონით. მითხრა, რომ ისევ შიმშილობს. მისი მოთხოვნა უცვლელია. ითხოვს, რომ საქართველოს ხელისუფლებამ მისი ექსტრადაცია მოითხოვოს, ან თავი დაანებონ, იქ ყოფნა გაუსაძლისია… მას დღეს შეხვდნენ საქართველოს საკონსულოს წარმომადგენლები,“ – ამბობს ადვოკატი ლექსო კობაიძე.
მინდია ლავასოღლის ბათუმის საქალაქო სასამართლომ 12 აპრილს გამამტყუნებელი განაჩენი გამოუტანა და 10 წლით პატიმრობა მიუსაჯა.
რატომ შეიძლება არ სურდეს საქართველოს მინდია ლავასოღლის საქართველოში ჩამოყვანა? – ადვოკატი მიიჩნევს, რომ რეალურად ლავასოღლი პოლიტიკური დევნილია და კიდევ ერთი დევნილი ხელისუფლებას არ აწყობს.
„ის თუ ქართულ ციხეში იქნება, უფრო მეტად იბრძოლებს საკუთარი უფლებების დასაცავად, აქ უფრო მეტად მოახერხებს ბრძოლას,“ – დასძენს ადვოკატი.
ლექსო კობაიძის თქმით, სადეპორტაციო დაწესებულებიდან ლავასოღლის დაახლოებით ერთ თვეში გაათავისუფლებენ, თუკი საქართველო მის ექსტრადაციას არ მოითხოვს.
პროკურატურის პრესცენტრში აცხადებენ, რომ ექსტრადაციის მოთხოვნით საქართველომ თურქეთს ოფიციალურად მიმართა და მიმდინარეობს საექსტრადაციო პროცედურები. სხვა დეტალებზე უწყებაში კომენტარს არ აკეთებენ. მინდია ლავასოღლი ტრაბზონში გასული წლის ოქტომბერში დააკავეს.
