საზოგადოებრივი მაუწყებლის აჭარის ტელევიზიისა და რადიოს „ახალი ამბების“ 13 ოპერატორი მუშაობას 19 აპრილიდან შეაჩერებს – ინფორმაცია ამის შესახებ „ბათუმელებს“ ომარ ბერიძემ, აჭარის ტელევიზიისა და რადიოს პროფკავშირების ხელმძღვანელმა დაუდასტურა.
გაფიცვის შესახებ „ახალი ამბების“ ოპერატორებმა გუშინ, 15 აპრილს განაცხადეს. ისინი ამბობენ, რომ ოპერატორზე დაკისრებული მოვალეობების გარდა მემონტაჟის საქმიანობის შესრულებაც უწევთ, თუმცა ამისათვის ანაზღაურებას არ იღებენ.
„ოპერატორები ითხოვენ, ან აიყვანეთ მემონტაჟე და ეს ფუნქცია ჩამოგვაცილეთ, ან თუ ვიქნებით ოპერატორ-მემონტაჟეები, რაც მემონტაჟეს უნდა გადაუხადოთ, იმის ნახევარი ხელფასი მაინც გადაგვიხადეთო. შეიძლება სავაჭრო გახდეს ეს და იყოს 30 პროცენტი, მაგრამ კატეგორიული „არა“ – მიუღებელია. ეს მოლაპარაკების საგანი იქნებოდა, მაგრამ ესეც არ ყოფილა“, – ამბობს ომარ ბერიძე, საზოგადოებრივი მაუწყებლის აჭარის ტელევიზიისა და რადიოს პროფკავშირების ხელმძღვანელი.
ოპერატორები ამბობენ, რომ მათი პროტესტი ახალი არ არის და უკვე ერთ წელზე მეტია ისინი ხელფასების გაზრდას ითხოვენ.
