“თუ გამიშვებთ, კაი იქნება, მძიმე მუხლი არ დამირღვევია,” – მიმართა მოსამართლეს დედის ცემაში ბრალდებულმა შოთა ს.-მ.
“გააჩნია, რა კუთხით შეხედავთ,” – შეაჩერა მოსამართლემ ბრალდებული.
71 წლის დედის ცემისთვის შოთა ს. 10 მარტს დააკავეს. ის მოსამართლე თამარ ბეჟანიშვილმა დღესაც წინასწარ პატიმრობაში დატოვა.
ბრალდებულს ამ ეტაპზე ადვოკატი არ ჰყავს. დღეს, 16 აპრილს, გამართულ წინასასამართლო სხდომას არც შოთა ს.-ს რომელიმე ახლობელი დასწრებია.
გამოძიების ვერსიით, ბრალდებულმა 9 მარტს, ღამის თორმეტის ნახევარზე, მოხუცი დედა “მარცხენა მხარში ხელის მოჭერით წააქცია…”
შოთა ს. ასევე სიტყვიერად შეურაცხყოფდა საკუთარ დას, რომელმაც იმ ღამეს დასახმარებლად პოლიციას მიმართა.
“მოწმეების ჩვენებების მიხედვით, მანამდეც არსებობდა ძალადობის შემთხვევები,” – დასძინა მოსამართლემ.
“იქნებ, მალე დასრულდეს ყველაფერი… ყველაფერს ვაღიარებ,” – თქვა შოთა ს.-მ და ისევ ბრალდებულის სკამზე ჩამოჯდა.
შოთა ს.-მ დასაშვებად და უდავოდ მიიჩნია ყველა მტკიცებულება, რაც პროკურატურამ ამ საქმეზე წარმოადგინა. ამ შემთხვევაში სასამართლო მოწმეების ჩვენებებს ვეღარ მოისმენს, მათ შორის, იმ ქალის, რომელსაც შვილმა სცემა.
ბრალდებულმა მოსამართლეს ასევე უთხრა, რომ ის დაოჯახებული არ არის, საშუალო განათლების მქონეა და ერთ-ერთ სამშენებლო კომპანიაში ხელოსნად მუშაობდა.
“იმ ღამეს ნასვამი ვიყავი… მინდა, დავუბრუნდე ჩემს საქმეს,” – აღნიშნა ბრალდებულმა.
მოსამართლემ მას განუმარტა, რომ ახალი გარემოება უნდა არსებობდეს იმისთვის, რომ პატიმრობა შეიცვალოს.
ბრალის დადასტურების შემთხვევაში, შოთა ს.-ს საზოგადოებისთვის სასარგებლო შრომას შეუფარდებენ, ან 2 წლამდე თავისუფლების აღკვეთას.
