გამჭვირვალობის, ანგარიშვალდებულებისა და მოქალაქეთა ჩართულობის გაზრდა ბათუმის ურბანული პოლიტიკის განვითარებაში – ეს იყო დღეს, 16 აპრილს, ბათუმის უნივერსიტეტში გამართული შეხვედრის თემა.
ვიდრე დამსწრე საზოგადოებას კითხვების დასმის საშუალებას მისცემდნენ არასამთავრობო ორგანიზაცია NDI- ის წარმომადგენლებმა, კვლევის ფარგლებში შემუშავებული რეკომენდაციების შესახებ ისაუბრეს. პროექტის ფარგლებში ბათუმში კვლევა NDI-ისთან პარტნიორობის ფარგლებში სტუდია Rec- მა ჩაატარა.
ორგანიზაციის ინფორმაციით, სამუშაო შეხვედრებში მონაწილეობა მიიღეს როგორც ბათუმის მერიის ქალაქგანვითარებისა და ურბანული პოლიტიკის სამსახურის სპეციალისტებმა, ასევე მოწვეულმა ექსპერტებმა: არქიტექტორმა გიორგი რამიშვილმა და იურისტმა გიორგი ხიმშიაშვილმა. პროექტის ფარგლებში დაგეგმილ შეხვედრებზე დისკუსიებისას გამოიკვეთა ბათუმის ურბანული განვითარებისთვის საჭირო ორი ძირითადი საკითხი: მოქალაქეთა მონაწილეობის გაზრდა საკითხის გადაწყვეტის პროცესში და სამშენებლო პროცესზე ზედამხედველობის მექანიზმის გაძლიერება.
კვლევაში ჩართული პირების მოსაზრებებზე დაყრდნობით შემუშავებულ რეკომენდაციებში ნათქვამია, რომ ბათუმის ურბანული პოლიტიკა ღია მმართველობის სამოქმედო ნაწილი უნდა გახდეს, იმისათვის, რომ მუნიციპალიტეტმა ამ სფეროში გამჭვირვალობისა და ანგარიშვალდებულების, ასევე მოქალაქეთა მონაწილეობის პრინციპები დანერგოს. ამ ყველაფრის განხორციელების ერთ-ერთ გზად კი ქალაქში დაგეგმილი ყველა მშენებლობის შესახებ ინფორმაციის ელექტრონულ პორტალზე მისაწვდომობა დაასახელეს. კვლევის მონაწილეების მოსაზრებით, ამავე პორტალზე უნდა იძებნებოდეს მშენებლობასთან დაკავშირებული ყველა დოკუმენტი განაცხადის წარდგენიდან ნებართვის გაცემამდე.
შეხვედრაზე ბათუმის მერიის წარმომადგენელმა აკაკი გვიანიძემ წარმოადგინა იმ ვებგვერდების პრეზენტაცია, სადაც მოქალაქეებს ინფორმაციის მიღება შეუძლიათ ქალაქში მიმდინარე სამშენებლო პროცესებთან დაკავშირებით. ეს ვებგვერდებია: batumi.ge და ubnebi.ge. თუმცა იქვე ითქვა, რომ ამ ვებგვერდებზე მონაცემები სრულყოფილად არ არის წარმოდგენილი.
სამოქალაქო საზოგადოების ინსტიტუტის ბათუმის ფილიალის ხელმძღვანელმა ნათია აფხაზავამ ზოგადად მიმოიხილა თვითმმართველი ორგანოების როლი და კომპეტენციები ქალაქის ურბანულ პროცესებში, ასევე ვებგვერდი marte.ge, რომელიც საკრებულოს მრჩეველთა საბჭოსთან არსებული პლათფორმაა და იმ მიზნით შეიქმნა, რომ უზრუნველყოს მოსახლეობის ჩართულობა ურბანული პოლიტიკის შემუშავებაში და ასევე, ამ მიმართულებით კონტროლში.
კვლევის ფარგლებში შემუშავებულ ერთ-ერთ რეკომენდაციაში საუბარია ასევე მრჩეველთა საბჭოს ჩართულობის გააქტიურებაზე ურბანული საკითხების განხილვაში. შეხვედრაში მონაწილეობას იღებდა ამ საბჭოს თავმჯდომარე თეონა დაიასამიძე. შეხვედრას სტუმრის სტატუსით ესწრებოდნენ ასევე ბათუმის საკრებულოს „ოცნების“ ფრაქციის თავმჯდომარე ნატალია ზოიძე და ბათუმის მერიის ქალაქგანვითარებისა და ურბანული პოლიტიკის სამსახურის ხელმძღვანელის მოადგილე მამუკა რამიშვილი. მათ მოქალაქეების კითხვებსაც უპასუხეს.
შეხვედრის შემდეგ ერთ-ერთი სტუდენტი დაინტერესდა, თუ როგორ, რა ფორმით არის შესაძლებელი, რომ სტუდენტები ამ პროცესში აუცილებლად ჩართონ. ვიდრე მას პასუხს გასცემდა, საკრებულოს წევრმა ნატალია ზოიძემ ისაუბრა იმაზე, თუ რა საშუალებები დანერგეს ბათუმის საკრებულოსა და მერიაში მოქალაქეთა ჩართულობითვის, სტუდენტს კი ჩართულობის მიზნით საკრებულოშ შეხვედრა შეთავაზა: „ხუთშაბათს, ხუთ საათზე შევხვდეთ და ვისაუბროთ, გელოდებით საკრებულოს სხდომათა დარბაზში“ , ამასთან ერთად მან იმედი გამოთქვა, რომ რადგან არჩევნები არ მოდის, სტუდენტების საკრებულოში მიპატიჟებას მას პოლიტიკურ აგიტაციაში არ ჩაუთვლიან.
შეხვედრას ესწრებოდა ორგანიზაცია „ბათომის“ თავმჯდომარე ნინო ინაიშვილიც, რომელიც დაინტერესდა [მისი კითხვა მერიის და საკრებულოს თანამშრომლებს მიემართებოდა] ბათუმში მიმდინარე პროცესი ასევე უნდა გაგრძელდეს, როგორც დღეს მიმდინარეობს, ვიდრე გენგეგმას შეიმუშავებენ თუ გენგეგმის შემუშავებამდე მერია რაიმე შეზღუდვების დაწესებაზე იზრუნებს: „თქვენ იცით , რომ გენგეგმა არ გვექნება კიდევ ათი წელი ეს ყველაფერი ასე ქაოსურად უნდა დარჩეს?“
საიას თავმჯდომარე ანა მდინარაძე დაინტერესდა, რა ბედი ეწია ბათუმში კულტურული მემკვიდრეობის ზონების დამტკიცების საკითხს. მას მერის წარმომადგენელმა მამუკა რამიშვილმა უპასუხა, რომ დაზუსტებული პასუხი ამ საკითხზე ისევ არ არის.
შეხვედრა ბათუმის სახელმწიფო უნივერსიტეტის დარბაზში შედგა.
