მთავარი,სიახლეები

„ჩავალთ პარლამენტთან და ძროხებსაც მაქ დავაბამთ“ – საპროტესტო აქცია წალკაში

17.04.2019 • 1909
„ჩავალთ პარლამენტთან და ძროხებსაც მაქ დავაბამთ“ – საპროტესტო აქცია წალკაში

„აღდგომამდე ვაძლევთ დროს მთავრობას. თუ ისევ არ მოგვაქცევენ ყურადღებას, პარლამენტთან ჩავალთ და ძროხებსაც მაქ დავაბამთ, სად წავიდეთ, აბა?“ – კითხულობს ელგუჯა შავაძე. ის წალკაში გამართული საპროტესტო აქციის ერთ-ერთი მონაწილეა.

ელგუჯა შავაძის ოჯახი წალკაში 2003 წლიდან ცხოვრობს. მისი თქმით, ის და წალკის სხვა მაცხოვრებლებიც მესაკუთრეებმა გააფრთხილეს და აღდგომამდე სახლების დაცლა მოსთხოვეს. ელგუჯა ამბობს, რომ წასასვლელი არსად აქვს.

„აქედან 220 ოჯახი „ოცნების ქალაქში“ წავიდა, 60 ოჯახი – ერაყში წავიდა სამუშაოდ და გადასახლდა, სოფელში აღარავინ რჩება. ისე 2 ათას ოჯახამდე ვიყავით ბოლო წლებია. ხელისუფლება სულ გვპირდება, მაგრამ რეალურად მხოლოდ 330 ოჯახს მისცეს სახლი საკუთრებაში,“ – გვეუბნება ელგუჯა შავაძე.

„წელს ქვეყნის მასშტაბით 174 ეკომიგრანტი მიიღებს თანხას საცხოვრებელი სახლის შესაძენად. ჯერ არ ვიცით, რამდენი იქნება მათ შორის წალკაში მცხოვრები ეკომიგრანტი. კომისია მაისში უნდა შეიკრიბოს,“ – ამბობს კოტე რაზმაძე, ჯანდაცვის სამინისტროს დევნილთა და ეკომიგრანტთა დეპარტამენტის უფროსის მოადგილე. ის ასევე განმარტავს, რომ წალკაში მცხოვრები ოჯახების უმრავლესობა იქ თვითნებურად, „ოჯახის გაფართოვების მიზნით“ ჩასახლდა და დაახლოებით 300 ოჯახია რეალურად ეკომიგრანტი.

რას პასუხობს ხელისუფლება აქციაზე გამოსულ ადამიანებს? – კოტე რაზმაძე მიიჩნევს, რომ წალკაში მცხოვრები ადამიანების პროტესტი წინა ხელისუფლებამ გააჩინა, რადგან მაშინ ეკომიგრანტებისთვის საცხოვრებლის გადაცემა აღარ ხდებოდა.

„არსებობს სამართლებრივი აქტი და კონკრეტული კრიტერიუმები, რითაც ეტაპობრივად ყველა ეკომიგრანტი დაკმაყოფილდება. ქვეყნის მასშტაბით ამ დროისთვის დაახლოებით 5 ათასი ეკომიგრანტია დასაკმაყოფილებელი საცხოვრებლით“, – განმარტავს კოტე რაზმაძე.

ეკომიგრანტი ოჯახისთვის სახლის შესაძენად ხელისუფლება სპეციალური პროგრამის ფარგლებში 25 ათას ლარს იხდის.

 

გადაბეჭდვის წესი


ასევე: