Batumelebi

პარტია „ქართული ოცნების“ თავმჯდომარე ბიძინა ივანიშვილი, რომელიც ქვეყანაში ახალი კორონავირუსის პანდემიის პერიოდში საჯაროდ არ გამოჩენილა, სოციალურ ქსელ tiktok-ში, ბერა ივანიშვილის ვიდეოში გამოჩნდა.

ბერამ დღეს, 21 აპრილს, საღამოს, გამოაქვეყნა ვიდეო წარწერით – „საიდუმლო მისალმება მამასთან“, რომელშიც ჩანს როგორ ესალმებიან ერთმანეთს ბერა და ბიძინა ივანიშვილი.

ვიდეო, სავარაუდოდ, შეკვეთილშია გადაღებული.

@bera_nanukaSecret handshake with my father ??♬ original sound – bera_nanuka

საქართველოს პრემიერ-მინისტრმა გიორგი გახარიამ 9 აპრილს ივანიშვილს „უნიკალური დაზღვევა“ უწოდა. ასე გამოეხმაურა  გახარია ბიძინა ივანიშვილის გადაწყვეტილებას STOPCOV ფონდში 100 მილიონის ლარის ჩარიცხვასთან დაკავშირებით.

შეგახსენებთ, რომ კოროავირუსის პანდემიის მიუხედავად, საქართველოში ივანიშვილის ბაღისთვის ხეების ამოთხრისა და ტრანსპორტირების პროცესი არ შეფერხებულა. „ტვ პირველის“ ცნობით, 24 მარტს ხობის სოფელ ქარიატიდან გადაიტანეს მრავალწლოვანი ჭადრები ივანიშვილის ბაღისთვის.

საზოგადოებრივი მაუწყებლის აჭარის ტელევიზიისა და რადიოს დირექტორმა, გიორგი კოხრეიძემ საინფორმაციო გამოშვება „მთავარის“ ერთ-ერთი წამყვანი თეონა თურმანიძე ეთერიდან მოხსნა.

როგორც თავად ჟურნალისტი ფეისბუქზე წერს, გადაწყვეტილების მიზეზად სოციალურ ქსელში მაუწყებელთან დაკავშირებით მის მიერ დაფიქსირებული პოზიცია დაუსახელეს.

„მივიღე საყვედური სოციალურ ქსელში პოზიციის დაფიქსირების გამო, რომელიც ეხება მაუწყებელს.
ეთერიდან დირექტორმა მომხსნა, ვიდრე მოკვლევა დასრულდება.

ხვალ ეთერში არ ვიქნები, არც ზეგ.

თეონა თურმანიძის განმარტებით, საკითხი ეხება ფეისბუქის პირად გვერდზე გამოქვეყნებულ სტატუსს, სადაც ის აკრიტიკებდა დირექტორის გადაწყვეტილებას ტელევიზიის ვებგვერდთან დაკავშირებით.

„ვწერდი, რომ არაობიექტურად და არადემოკრატიულად ვითარდება მოვლენები და დირექტორი თვითნებურად იღებს გადაწყვეტილებებს და იქ ერთგვარ მოწოდებასავით მქონდა ნათქვამი, რომ თუ ასე უნდა გაგრძელდეს, მაშინ საერთოდ მოითხოვეთ ამ ვების დახურვა-მეთქი.  ჩათვალა, რომ ეს იყო მაუწყებლის იმიჯის შემლახავი განცხადება“, – ამბობს თეონა თურმანიძე.

აჭარის ტელევიზიის ონლაინსამსახურის უფროსი სოფო ჟღენტი ვებგვერდს აღარ ხელმძღვანელობს მას შემდეგ, რაც მას ტელევიზიის დირექტორმა ამ კონკრეტული სამსახურის შეცვლილი დებულება გაუგზავნა, რომლის მიხედვითაც, ონლაინსამსახური ახალ ამბებს ვეღარ გაავრცელებს და ამისთვის ცალკე რედაქტორი იმუშავებს.

თეონა თურმანიძის თქმით, თანამშრომელთა ქცევის წესი, რაც თავისი შინაარსით ჟურნალისტს ფეისბუქზე საკუთარი პოზიციის დაფიქსირებას უზღუდავს, მენეჯმენტმა ორი დღის წინ ატვირთა მაუწყებლის ვებგვერდზე ისე, რომ ჟურნალისტებისთვის არ წარუდგენია.

თეონა თურმანიძე ამბობს იმასაც, რომ მოკვლევა ორ დღეში უნდა დასრულდეს, ხოლო ამის შემდეგ, იმ შემთხვევაში, თუ დირექტორი თეონა თურმანიძის გათავისუფლების გადაწყვეტილებას მიიღებს, ჟურნალისტი აპირებს სასამართლოს მიმართოს.

თეონა თურმანიძე ერთ-ერთია მაუწყებლის იმ ჟურნალისტებს შორის, რომლებიც აქტიურად აკრიტიკებდნენ ახალი მენეჯმენტის გადაწყვეტილებებს და ტელევიზიის საინფორმაციო სამსახურის პოლიტიკის ცვლილებაზე საუბრობდნენ.

ხელვაჩაურის მერიამ გაკეთებული საქმეების საზოგადოებისთვის გაცნობა საინფორმაციო სააგენტო „მარშალპრესის“ საშუალებით გადაწყვიტა. ეს სააგენტო „მითების დეტექტორმა“ არაერთხელ ამხილა სიძულვილის ენის ტირაჟირებაში, ასევე იმ მასალების მიზანმიმართულად გავრცელებაში, რომელიც კრემლს და რუსულ პროპაგანდას აწყობს.

სახელისუფლებო ორგანოების მხრიდან ე.წ. კრემლისტური მედიაორგანიზაციების დაფინანსების რამდენიმე ფაქტი აქამდეც დაფიქსირდა. ამ შემთხვევაში ხელვაჩაურის მერს, ჯუმბერ ვარდმანიძეს გაუფორმებია კონტრაქტი „მარშალპრესთან“, რისთვისაც ხელვაჩაურის ბიუჯეტიდან 11 თვის განმავლობაში 2200 ლარი დაიხარჯება.

გაფორმებული კონტრაქტის მიხედვით, ხელვაჩაურის მერიის მიერ გადაცემულ ნიუსებს, პრესრელიზებს, ანონსებს შეუზღუდავად განათავსებენ ინტერნეტგვერდზე: marshalpress.ge.

„ბელგიის ჯანდაცვის მინისტრმა ჯგუფური სექსი აკრძალა – მიზეზი კორონავირუსის გავრცელების საფრთხეა,“ – ეს ერთ-ერთი ბოლო ყალბი ინფორმაციაა, რომელსაც „მარშალპრესი“ ევროპის შესახებ ავრცელებს. პანდემიის დროს რუსული პროპაგანდის და კრემლის მედიის ერთ-ერთი სამიზნე სწორედ იმის ჩვენებაა, რომ ევროპა გარყვნილია და კორონავირუსის გავრცელებამ ევროკავშირის ქვეყნების რეალური სახე აჩვენა.

„მარშალპრესის“ მხრიდან დეზინფორმაციის გავრცელების ასეთ ფაქტზეც წერდა „მითების დეტექტორი“ – „პოლონეთმა იტალიის დასახმარებლად აფრენილ რუსულ თვითმფრინავებს საჰაერო სივრცე ჩაუკეტა” – ამ სათაურით ინფორმაცია „მარშალპრესმა“ 24 მარტს გამოაქვეყნა. აქვე აღნიშნულია, რომ წყარო რუსეთის ფედერაციის საბჭოს საინფორმაციო პოლიტიკის კომისიის თავმჯდომარე ალექსეი პუშკოვია. პუშკოვმა ტვიტერზე ამ ყალბი ინფორმაციის შემცველი სტატუსი წაშალა, მაგრამ სააგენტოს მიერ გავრცელებული ყალბი  ინფორმაცია უცვლელი დარჩა.

„მითების დეტექტორის“ მონაცემებით, სტატიების გარდა „მარშალპრესის“ პრესკლუბში პრესკონფერენციებს პრორუსული და ანტიდასავლური პოლიტიკის მომხრე ისეთი პირები ატარებენ, როგორიც არის პარტია „ნეიტრალური ევრაზიული საქართველოს“ ლიდერი არჩილ ჭყოიძე, პოლიტოლოგი და მედიაკავშირ „ობიექტივის“ მუდმივი რესპონდენტი ჰამლეტ ჭიპაშვილი.

რატომ არჩია ხელვაჩაურის მერიამ თავისი ამბების საზოგადოებისთვის გაცნობა „მარშალპრესის“ საშუალებით? – ვკითხეთ ხელვაჩაურის მერს, ჯუმბერ ვარდმანიძეს.

„…არ მახსოვს, ვისთან გავაფორმეთ ხელშეკრულება. ხომ შეიძლება, რომ არ მახსოვდეს? გავარკვევ ყველაფერს და ხვალ დაგირეკავთ,“ – გვიპასუხა ჯუმბერ ვარდმანიძემ.

დოკუმენტაციის მიხედვით, ჯუმბერ ვარდმანიძეს „მარშალპრესთან“ ხელშეკრულების გაფორმება არჩილ მხეიძემ ურჩია, მერიის მასმედიისა და დონორებთან ურთიერთობის განყოფილების ხელმძღვანელმა. არჩილ მხეიძემ გვითხრა, რომ მისი ეს არჩევანი  ამ სააგენტოს საიტზე ნიუსების ულიმიტოდ განთავსების საშუალებამ განაპირობა.

არჩილ მხეიძემ „ბათუმელებს“ ასევე უთხრა, რომ მას ამ დრომდე არაფერი სმენია ამ საააგენტოს მხრიდან სიძულვილის ენის გამოყენების ან რუსული პროპაგანდის გავრცელების შესახებ. ის დაგვპირდა, რომ ხელმძღვანელებთან ერთად შეისწავლის და განიხილავს ამ საკითხს.

აპრილში „მარშალპრესმა“ ორი ახალი ამბავი გამოაქვეყნა ხელვაჩაურზე, ორივე 9 აპრილსაა გამოქვეყნებული. ერთი ნიუსი აღწერს იმას, რომ საბავშვო ბაღების აღსაზრდელებს საკვები პროდუქტები დაურიგეს, მეორე ამბავი კი, 9 აპრილის მემორიალისთვის პატივის მიგებაა.

ხელვაჩაურის მერია მე-9 სახელმწიფო უწყებაა, რომელმაც marshalpress.ge-თან საინფორმაციო მომსახურების შესყიდვაზე ხელშეკრულება გააფორმა წელს. მხოლოდ 9 სახელმწიფო უწყებიდან, რომლებთანაც ამ ეტაპზეა კონტრაქტი გაფორმებული, 19 338 ლარი მიიღო „მარშალპრესმა“.

საინტერესოა კიდევ ერთი დეტალი – ერთი და იმავე პირობით – ულიმიტოდ ამა თუ იმ მუნიციპალიტეტის ამბების გავრცელების პირობის მიუხედავად, ხელვაჩაურის მერია თვეში „მარშალპრესს“ 200 ლარს გადაუხდის, მაგალითად, დედოფლისწყაროს მერია კი, იმავე სააგენტოს თვეში 165 ლარს მისცემს.

საქართველოს საგარეო საქმეთა სამინისტროს განცხადებით, დღეს, 21 აპრილს, რომიდან საქართველოში 180 მოქალაქე ჩამოფრინდება.

მგზავრთა შორის არიან საქართველოს არასრულწლოვანი მოქალაქეები, ხანდაზმულები, ორსულები, სტუდენტები, შშმ პირები, ონკოლოგიური პაციენტები, ქრონიკული დაავადებებისა და ჯანმრთელობის მძიმე მდგომარეობის მქონე პირები. ამავე რეისით დაბრუნდება 11 ქართველი მეზღვაური.

ქობულეთში, სოფელ გვარაში მცხოვრები რიმა შაინიძე ამბობს, რომ ჩაკეტილ სოფელში მოსახლეობას პროდუქტებისა და წამლების მარაგი ამოეწურა. სოფელი კვირაზე მეტია კორონავირუსის პანდემიის გამო ჩაკეტილია.

რიმა შაინიძის თქმით, მოსახლეობისთვის სოფლის ჩაკეტვა მოულოდნელი იყო, ამიტომ პროდუქტების მომარაგება ოჯახებმა ვერ მოასწრეს.

„ფქვილის მარაგი მეწურება, წამლები აღარ გვაქვს. ოჯახში ორი პენსიონერი გვყავს, ერთს პერიკარდიტი აქვს და მედიკამენტები მუდმივად სჭირდება. ეს წამლებიც ამოწურული გვაქვს. მეც ხშირად თავი მტკივა და ერთი ცალი გამაყუჩებელიც კი აღარ მაქვს  სახლში,“- გვეუბნება ის.

მისი თქმით, პანდემიის გამო სოფლის ჩაკეტვის შემდეგ სოფელში მხოლოდ ერთხელ შევიდა ბოსტნეულის მანქანა.

„ისიც, ისეთი მაღალი ფასები ჰქონდა ყველაფერს, ვერ მიეკარებოდი. ჩემს ოჯახში დედამთილი მუშაობდა სანიტრად და საავადმყოფოს დაკეტვის შემდეგ ვერც ის ვეღარ მუშაობს. მთელი ოჯახი დედამთილ-მამამთილის პენსიაზე ვართ დამოკიდებული, ჩემს შვილსაც ჯანმრთელობის პრობლემები აქვს და მუდმივად ექიმების მეთვალყურეობა სჭირდება. საიდან მოვიტანოთ ფული, როგორ ვიყიდოთ ასეთი ძვირი პროდუქტი? ან იაფად მაინც შემოიტანონ, ან რაღაცით დაგვეხმარონ,“ – გვითხრა რიმამ.

ისპანის დასახლებაში, როგორც რიმა შაინიძე ამბობს, 27 ოჯახი ცხოვრობს, დასახლება გვარას ცენტრს საკმაოდ მოშორებულია, ამიტომ ცენტრში გასვლას ფეხით ვერ ახერხებენ.

ბოსტნეულის გარდა სოფელში სხვა საჭიროებებზეც საუბრობენ.

„სარეცხი საშუალება, ზეთი, მარგარინიც ხომ გჭირდება ოჯახში. გუშინ რომ გავაპროტესტეთ, მერე მოიტანეს პური.

ცხელს ხაზზე დავრეკე, იქედან მერიაში გადამამისამართეს, მერიამ – რწმუნებულთან, რწმუნებული კი სოფელშიც არ შემოვიდა, სოფლის გადასახვევთან დაიბარა ხალხი. დავწერე განცხადება მერიაში, მაგრამ არავინ გამოგვეხმაურა,“ – ამბობს შაინიძე.

ამ სოფლის კიდევ ერთი მცხოვრები იმედო შაინიძეც კრიზისზე საუბრობს:

„მოუმზადებელი ვიყავით. არ ველოდით კარანტინს. დღეს ბიცოლაჩემს ბავშვის საფენები გაუთავდა, ჯარისკაცებმა უთხრეს, ცხელ ხაზზე დარეკეო. იქ კიდევ მერიაში გამისამართებენ და ასე.“

„ბათუმელები“ ქობულეთის მერს, მირიან ქათამაძესაც ესაუბრა და ჰკითხა, აწვდიან თუ არა კარანტინში მყოფ სოფლებს სურსათს და სხვა საყოფაცხოვრებო საშუალებების ან წამლების მარაგს და ჰქონდა თუ არა ინფორმაცია აღნიშნულ დასახლებაზე.

მირიან ქათამაძე ამბობს, რომ პირველ რიგში, დახმარების პაკეტი უკიდურესად გაჭირვებულ ოჯახებზე, ხანდაზმულებსა და შშმ პირებზეა გათვალისწინებული.

„ყველგან შედის მობილური ბაზრები, თუმცა, იყო პრეტენზია იმაზე, რომ მობილური ბაზრების ფასები არის მაღალი. ზოგიერთ პროდუქტზე შეიძლება იყოს ფასი მომატებული, მაგრამ მობილური ბაზრების ფასები 4 ადმინისტრაციულ ერთეულში თითქმის არ აღემატება საბითუმო ფასებს“.

მირიან ქათამაძის თქმით, გვარაში, გარდა მთავრობის სასურსათო კალათებისა, ქობულეთის მერიის მიერ მომზადებული სასურსათო კალათებიც დარიგდა, მაგრამ მხოლოდ მოწყვლადი ჯგუფებისთვის.

„შეიძლება არიან ოჯახები, რომლებიც ამ კატეგორიაში არ არიან, მაგრამ შესაძლოა, შემდგომში მათი ეკონომიკური მდგომარეობის გათვალისწინებით, მათაც გადაეცეს სასურსათო პაკეტი. იგივე მიმართულება არის აღებული მედიკამენტებზეც,“ – ამბობს მირიან ქათამაძე.

კითხვაზე, როდის შეძლებს თუნდაც შაინიძეების ოჯახი წამლების ან სხვა პირველადი საჭიროების პროდუქტების და ნივთების შეძენას, ქობულეთის მერი ამბობს, რომ ასეთ შემთხვევაში მათ კურიერების და  წარმომადგენლების მეშვეობით უნდა მიიღონ მომსახურება.

„მაგალითად, ამ დასახლებაში გუშინ ვიყავი და პირადად მე მივუტანე რამდენიმე მოსახლეს წამალი. მუხაესტატეს ადმინისტრაციულ ცენტრში განთავსებულია ორი აფთიაქი და იქედან ხდება წამლების მიწოდება“.

კითხვაზე, თუკი ეს მექანიზმი აწყობილია, მაშინ რატომ ვერ ახერხებენ ადამიანები თუნდაც წამლების შეძენას, ქათამაძე ამბობს: „არ ვიცი. ჩვენ ძირითადად ცხელ ხაზზე შემოსულ ინფორმაციას ვაგროვებთ, ვამუშავებთ და შემდეგ ვრეაგირებთ. ვინც „ბათუმელებს“ ესაუბრა, ეს ოჯახები ჩანიშნულია და მათი საჭიროებაც შეძლებისდაგვარად  იქნება დაკმაყოფილებული,“ – გვითხრა მან.

ქობულეთის 4 სოფელში [ადმინისტრაციულ ერთეულში] კარანტინი 12 აპრილს გამოცხადდა. ქობულეთს უკავშირდება კორონავირუსის 30-ზე მეტი დადასტურებული შემთხვევა, რის გამოც სოფლებში კარანტინი გამოცხადდა.

ერთ დღეს ფერად ქალაქში აჩრდილი გამოჩნდება და თანდათან ადამიანებს, სახლებს, ქალაქის ქუჩებს ფერს უკარგავს – ამის შესახებ გვიამბობს ქართული ანიმაციური ფილმი „ჭირი“, რომელმაც 1984 წელს კანის კინოფეტივალზე „ოქროს პალმის რტო“ მიიღო, როგორც ფესტივალის საუკეთესო მოკლემეტრაჟიანმა ფილმმა.

„ჭირის“ რეჟისორი დავით თაყაიშვილია. მას საქართველოში უფრო იცნობენ ანიმაციური ფილმებით „ბაბილინა“, „ბატი ტასიკო“ და „ოჯახი“ –  ამბავი პატარა ლეკვზე, რომელიც სახლში მოწყენილი ელოდება ბავშვების დაბრუნებას.

რეჟისორ დავით თაყაიშვილის შესახებ ინტერნეტში მცირე ბიოგრაფიულ ცნობას იპოვით, სადაც აღნიშნულია, რომ იგი 1959 წლის 13 აპრილს დაიბადა, 1981 წელს დაამთავრა თბილისის შოთა რუსთაველის სახელობის თეატრალური ინსტიტუტის კინოფაკულტეტი და კინოსტუდია ,,ქართული ფილმის“ მულტგაერთიანებაში მუშაობდა, იყო საკავშირო და საერთაშორისო კინოფესტივალების ლაურეატი, 1984 წელს კი კანის კინოფესტივალზე მისმა ანიმაციურმა ფილმმა ,,ჭირი“ – გრანპრი – „ოქროს პალმის რტო“ მიიღო.

დავით თაყაიშვილი 1989 წელს, 30 წლისა გარდაიცვალა. ამავე წელს,  ჟურნალ „კინოში“ გამოქვეყნდა მი შესახებ  – „დაგვიანებული წერილი“, რომელშიც რეჟისორი „ჭირზე“ საუბრობდა:

„ჭირი“ ინსტიტუტის დამთავრების შემდეგ შესრულებული ჩემი პირველი დამოუკიდებელი ნამუშევარია. ჯერ კიდევ სტუდენტობის დროს დათო სიხარულიძემ წამიკითხა სცენარი, რომელმაც დამაინტერესა მკაფიოდ ჩამოყალიბებული იდეით – სამყარო ისეთი მრავალფეროვანია, რომ დაუშვებელია მხოლოდ ერთი ფერის გამეფება. მუშაობის პროცესში სცენარი გადამუშავდა და მიიღო უფრო მკვეთრი სოციალური ხასიათი. ქალაქი, ხალხი, გარემო, უფრო რეალური გახდა. ყავისფერიც ფილმში მოგვიანებით შევიტანეთ (სცენარის მიხედვით ქალაქში შემძვრალი ბაცილა ყველაფერს უფეროდ, თეთრად ღებავდა).“

„ოქროს პალმის რტოს“ მფლობელ ქართველ რეჟისორზე ვერ იპოვით ინტერნეტში ვერც ფოტომასალას. იძებნება მხოლოდ ერთი, პასპორტის ფოტო და ასევე, 1984 წლის კანის კინოფესტივალის ბროშურაში დაბეჭდილი მისი სახელი ვიმ ვენდერსისა და ბერტრან ტავერნიეს გვერდით. ვენდერსის ფილმმა „პარიზი, ტეხასი“ იმავე წელს მიიღო კანის ფესტივალის მთავარი პრიზი, ბერტრან ტავერნიეს სურათი კი, „კვირადღე სოფელში“ – საუკეთესო რეჟისურისთვის დაჯილდოვდა.

ფილმის დამდგმელი მხატვარი დავით სიხარულიძეა. იგი „კვირის პალიტრასთან“ იხსენებს, რომ „ჭირ­ზე“ მუ­შა­ო­ბი­სას ჯგუფს „გოს­ფილ­მი­დან“ დაურეკეს – ეს ან­ტი­საბ­ჭო­თა ფილ­მი რად გინ­დათ, დე­ბი­უ­ტით მო­მა­ვალს რა­ტომ იფუ­ჭებ­თო.

„ჭირის“ ნახვა იუთუბზე შეგიძლიათ: