ბათუმში COVID-19-ზე აღებული 90 ლაბორატორიული ნიმუშის პასუხი უარყოფითია.
აჭარიდან კვლევისთვის ქობულეთის კლასტერთან კონტაქტში მყოფი პირების კიდევ 50 ნიმუშია გადაგზავნილი, რომელთა პასუხებიც დღეს, 21 აპრილს, გვიან საღამოს გახდება ცნობილი – ამის შესახებ აჭარის ჯანდაცვის მინისტრის მოადგილემ, ნინო ნიჟარაძემ განაცხადა დღეს, 21 აპრილს.
მინისტრის მოადგილის განცხადებით, ქობულეთის კლასტერის ირგვლივ კონტაქტირებული პირების რაოდენობა გაიზარდა 520- მდე და ინტენსიურად მიმდინარეობს მათი ლაბორატორიული დიაგნოსტიკა.
ნინო ნიჟარაძის ინფორმაციით, თითქმის დასრულებულია ქობულეთის კლასტერიდან პირველი პაციენტის კონტაქტირებული პირების თვითიზოლაციის პერიოდი. ამ პირებს განმეორებით ჩაუტარდებათ დიაგნოსტიკა და თუ პასუხები ისევ უარყოფითი იქნება კორონავირუსზე, მათი თვითიზოლაციის პერიოდი დასრულდება.
დღეს, 21 აპრილს, ბათუმში COVID-19-ით ინფიცირებულთა მონაცემები არ გაზრდილა. რაც შეეხება გამოჯანმრთელებულებს, ბათუმში ჯამში 13 პაციენტი გამოჯანმრთელდა.
ნინო ნიჟარაძის განცხადებით, ბათუმში ამ დროისთვის ვირუსის გავრცელების თვალსაზრისით ვითარება სტაბილურია, მაგრამ ეს არ გვაძლევს სიმშვიდის საფუძველს, რადგან შემდეგი ორი კვირა შესაძლოა იყოს პრობლემური იმ თვალსაზრისით, რომ გარკვეულ ადგილებზე მასიური თავშეყრის შემთხვევები დაფიქსირდა.
„ამ პერიოდში განსაკუთრებით მოვუწოდებ ჩვენს მოსახლეობას, დაიცვან სოციალური დისტანცია,“ – აცხადებს ნინო ნიჟარაძე.
__________________________
