საქართველოს საგარეო საქმეთა სამინისტროს განცხადებით, დღეს, 21 აპრილს, რომიდან საქართველოში 180 მოქალაქე ჩამოფრინდება.
მგზავრთა შორის არიან საქართველოს არასრულწლოვანი მოქალაქეები, ხანდაზმულები, ორსულები, სტუდენტები, შშმ პირები, ონკოლოგიური პაციენტები, ქრონიკული დაავადებებისა და ჯანმრთელობის მძიმე მდგომარეობის მქონე პირები. ამავე რეისით დაბრუნდება 11 ქართველი მეზღვაური.
საკოორდინაციო საბჭოსთან შეთანხმებული ავიარეისების ფარგლებში საქართველოს მიმართულებით შესრულდა რეისები ვარშავიდან, ბერლინიდან, ვენიდან, ლონდონიდან, ათენიდან, აშშ-დან, ლარნაკადან, ამსტერდამიდან, პეკინიდან, რომიდან, პარიზიდან, თელ-ავივიდან და ა.შ.
საგარეო საქმეთა სამინისტროს მონაცემებით საქართველოში სულ 6934 მოქალაქე დაბრუნდა.
ევროპიდან საქართველოს მიმართულებით ავიარეისებს საკოორდინაციო საბჭოს დავალებით კომპანია Georgian Airways-ი ახორციელებს. საბჭოსთან შეთანხმებით ყველა ასეთ რეისზე ბილეთის ფასი 199 ევროა.
ყველა მგზავრი, რომელიც ჩამოვა საქართველოში, გაივლის 14-დღიან სავალდებულო კარანტინს.
მთავარ ფოტოზე: საქართველოს საგარეო საქმეთა სამინისტროს ილუსტრაცია
