Batumelebi | ჯოგური იმუნიტეტის გამომუშავების იმედად შეზღუდვების შემსუბუქება მცდარია – ცერცვაძე ჯოგური იმუნიტეტის გამომუშავების იმედად შეზღუდვების შემსუბუქება მცდარია – ცერცვაძე – Batumelebi
RU | GE  

ჯოგური იმუნიტეტის გამომუშავების იმედად შეზღუდვების შემსუბუქება მცდარია – ცერცვაძე

21 აპრილს ინფექციური პათოლოგიის, შიდსისა და კლინიკური იმუნოლოგიის სამეცნიერო პრაქტიკული ცენტრის დირექტორმა, თენგიზ ცერცვაძემ ბრიფინგზე განიხილა, თუ რატომ არის მცდარი COVID 19-ის წინააღმდეგ ჯოგური იმუნიტეტის გამომუშავების გამო მკაცრი შეზღუდვების შემსუბუქება ან სულაც მოხსნა.

„შეთავაზება ადვილია და როცა შენ ხარ პასუხისმგებელი და შენ მუშაობ ამ მოდელზე, გაცილებით ძნელია.

განვიხილოთ შემოთავაზებული მეთოდები, რომელთაგან ზოგიერთი საინტერესოა. ძირითადად ორ მოდელს გვთავაზობენ:

მკაცრი შეზღუდვები – რომელსაც მიმართავს ევროპის და ამერიკის ქვეყნების უმრავლესობა (გარკვეულწილად ჩვენც ამ ქვეყნების სიას მივეკუთვნებით). მკაცრი შეზღუდვები მიმართულია იმისკენ, რომ მინიმუმამდე დავიყვანოთ ავადმყოფთა და გარდაცვალებათა სიხშირე.

და მეორე ლიბერალური პოლიტიკა – მოვხსნათ მკაცრი შეზღუდვები, გავხსნათ ეკონომიკა, ეს ხელს შეუწყობს, რომ ქვეყანა გამოვიდეს ეკონომიკური რეცესიიდან და მოქალაქეების პასუხისმგებლობის იმედზე ვიყოთ, რომ ისინი თვითონ დაიცავენ, ნაწილობრივ მაინც, უსაფრთხოების წესებს.

ასეთი ქვეყნები მიდიან იმაზე, რომ გავრცელდეს ინფექცია, მაგრამ ეს არ იქნება ტრაგედია, რადგან ქვეყანა ეკონომიკური რეცესიიდან გამოვა და მერე რა, რომ ინფექცია გავრცელდება, რაღაც რაოდენობა სამწუხაროდ დაიღუპება, მაგრამ დანარჩენები შეიძენენ იმუნიტეტს და ქვეყანა გახდება იმუნური, ხოლო ის ქვეყნები, რომლებიც ატარებენ მკაცრ ზომებს, მართალია, შეაჩერებენ ეპიდემიას, მაგრამ მუდმივად იქნებიან ეპიდემიის განახლების შიშის ქვეშ,” – განაცხადა თენგიზ ცერცვაძემ.

მისი აზრით, მსხვერპლი, რომელიც ჯოგური იმუნიტეტის გამოსამუშავებლად უნდა გაიწიოს, ძალიან დიდი იქნება და სწორედ ამიტომ არის მცდარი შეზღუდვების მოხსნა იმის იმედად, რომ მოსახლეობის უმრავლესობა იმუნიტეტს გამოიმუშავებს:

„მეორე მოდელი მხოლოდ მოჩვენებით არის მომხიბვლელი. თქვენ უშვებთ, რომ იყოს ინფიცირებულთა დიდი რაოდენობა, როგორც ეს ინგლისშია, შვედეთშია, მაგრამ ქვეყანა იყოს ღია და არ იყოს შეზღუდვები (თუმცა გარკვეული შეზღუდვები იქაც არის). ამ გზამ კატეგორიულად არ გაამართლა ინგლისში და ქვეყანაში ამ ვირუსით სიკვდილიანობა 13%-ია. შემთხვევათა რაოდენობა ძალიან მაღალია და ინგლისი, ახლა, დაგვიანებით გადავიდა მკაცრ ზომებზე, როცა გერმანიამ, მაგალითად, დაიწყო მკაცრი ზომების შემსუბუქება იმიტომ, რომ მიაღწია ამ შეზღუდვებით გარკვეულ შედეგს.

ასევე შვედეთი, ეს მართლაც მაღალი კულტურის ქვეყანა, ისეთი ორგანიზებული მოსახლეობით, რომელიც ყველა მითითებას ასრულებს – ალაპარაკდა უკვე, რომ გადავიდეს საგანგებო ზომებზე, იმიტომ, რომ არ გაამართლა ამ ლიბერალურმა მეთოდმა“.

ცერცვაძით თქმით, იმისთვის, რომ მოსახლეობამ შეიძინოს ჯოგური იმუნიტეტი, საჭიროა მისი 2/3 მაინც დაავადდეს ამ ვირუსით.

„რამდენიმე ათასი თუ შეიძენს იმუნიტეტს, ეს არაფერი იქნება, მოსახლეობის მეტმა ნაწილმა უნდა შეიძინოს იმუნიტეტი, მეტმა ნაწილმა უნდა გადაიტანოს ეს დაავადება, ამას რა შედეგი მოჰყვება?! მართალია, ეს დაავადება 80%-ში მსუბუქად მიმდინარეობს, მაგრამ 20%-ში ხომ მიმდინარეობს უფრო მძიმედ, 5%-ში ხომ მიმდინარეობს კრიტიკულად?!

წარმოიდგინეთ, ახლა ინგლისში რომ მართლა ბოლომდე გაეშვათ მთავრობის ის ინიციატივა და 50 მილიონი ადამიანი ავად გამხდარიყო, ეს ინგლისში დაახლოებით 5 მილიონი ადამიანის სიკვდილი იქნებოდა.  რამდენად ღირს 5 მილიონი ადამიანის სიკვდილი იმად, რომ დანარჩენ მოსახლეობას ჰქონდეს იმუნიტეტი? ცხადია, რომ ეს მცდარზე მცდარი აზრია!

იგივე ხდება შვედეთში.

„მე სულაც არ გახლავართ მთავრობის აპოლოგეტი, მაგრამ მე ვამართლებ ჩვენი მთავრობის პოლიტიკას ამ საკითხში… საჭიროა მივმართოთ მკაცრ ზომებს, რაც უფრო მეტად შევიწუხებთ თავს და მკაცრად დავიცავთ შეზღუდვებს, მით უფრო ჩქარა მოვხსნით შეზღუდვებს.

ოპონენტებს ვეტყვი – მუდმივად არ ვიქნებით ამ ვირუსის განახლების შიშის ქვეშ, იმიტომ, რომ ყველა ეპიდემიას ახასიათებს გარკვეული ციკლურობა, გარკვეული დროის მერე ისინი მიდიან დაღმავალი გზით და მე იმედი მაქვს, რომ ჩვენ რომ შევაჩერებთ ეპიდემიას, თუნდაც მკაცრი საგანგებო ზომებით, ჩვენ გადავიტანთ იმ პიკის პერიოდს ნაკლები დანაკარგით,“ – განაცხადა ცერცვაძემ.

ნეტგაზეთის მასალების სხვა გამოცემებში გადაბეჭდვის წესი
ავტორი
ია ფრანგიშვილი არის გაზეთ "ბათუმელების" რეპორტიორი 2014 წლიდან