Batumelebi | ფლექსის პროგრამის შემდეგ ევრო 2000-ის მოსწავლე ონლაინსწავლებაში კარანტინიდან ჩაერთო ფლექსის პროგრამის შემდეგ ევრო 2000-ის მოსწავლე ონლაინსწავლებაში კარანტინიდან ჩაერთო – Batumelebi
RU | GE  

ფლექსის პროგრამის შემდეგ ევრო 2000-ის მოსწავლე ონლაინსწავლებაში კარანტინიდან ჩაერთო

მე ვარ ქეთევან ხალვაში, სკოლა ევრო-2000-ის მე-10 ა კლასის მოსწავლე. წინა სასწავლო წელს მონაწილეობა მივიღე ფლექსის პროგრამაში და მოვხვდი იმ მოსწავლეთა სიაში, რომლებსაც წილად გვხვდა 2019-2020 სასწავლო წელს ამერიკის შეერთებულ შტატებში გამგზავრება და იქაურ სკოლებში სწავლა ამერიკელ თანატოლებთან ერთად.

მე ნიუ ჰემპშირის შტატში, ქალაქ ნიუ ბოსტონში ვცხოვრობდი და დავდიოდი ლოკალურ საჯარო სკოლაში – Goffstown High School-ში. მიუხედავად იმისა, რომ ქალაქი თავისი სიდიდით არ გამოირჩეოდა, სკოლაში 1500-მდე მოსწავლე სწავლობდა (მე-9 – მე-12 კლასები). სკოლის დაწყებისთანავე არ გამჭირვებია ბავშვებთან დაახლოება, რადგან ყველა კომუნიკაბელური აღმოჩნდა. თანატოლებთან ურთიერთობაში ძალიან დამეხმარა სხვადასხვა წრე და სპორტული კლუბი, რომელთა შეკრებებსაც მათთან ერთად ვესწრებოდი. საქართველოსგან განსხვავებით, ბავშვები უმეტესად სპორტით არიან დაკავებულნი, რაშიც მასწავლებლებიც ეხმარებიან იმით, რომ ბევრ დავალებას არ აძლევენ და ითვალისწინებენ მათ ინტერესებს.

განსაკუთრებით მომეწონა ის, რომ ამერიკული სკოლა ხელს უწყობს სხვადასხვა ინტერესის მქონე ბავშვებს და აძლევს მათ შესაძლებლობას, აირჩიონ მათთვის სასურველი საგნები. ესპანური, ინგლისური, ბიოლოგია, კულინარია, გეომეტრია, ცეკვა, სივიკი, გეოგრაფია და სოციოლოგია – ეს გახლავთ იმ საგნების ჩამონათვალი, რომლებსაც მე ვსწავლობდი იქ ყოფნის პერიოდში. შეძლებისდაგვარად ვეცადე განსხვავებული საგნები ამერჩია და რაიმე ახალი, საქართველოსგან განსხვავებული საგნები  მესწავლა. ნაცნობ საგნებში საქართველოში ნასწავლი მასალაც გამოვიყენე, რითაც შევძელი ქართულ და ამერიკულ სასკოლო პროგრამას შორის პარალელები გამევლო.

გაკვეთილები დილის რვა საათზე გვეწყებოდა, დღეში 4 გაკვეთილი გვქონდა და თითოეული გაკვეთილის ხანგრძლივობა  90 წუთს შეადგენდა. საგაკვეთილო პროცესიც ძალიან განსხვავებული იყო: ახალი მასალის განსამტკიცებლად უმეტესად კომპიუტერებსა და ტელეფონებს ვიყენებდით, ხოლო უკვე ნასწავლი მასალის გამოკითხვა ონლაინთამაშების მეშვეობით ხდებოდა. გაკვეთილების შემდეგ მოსწავლეების უმეტესობა სპორტის გამო სკოლაში რჩებოდა.

მასპინძელ ოჯახთან ერთად ძირითადად შაბათ-კვირას ვატარებდი დროს, ვინაიდან კვირის განმავლობაში მეც და მასპინძელი ოჯახის ბავშვებიც ძალიან დატვირთულნი ვიყავით.

სამწუხაროდ, მსოფლიოში შექმნილი საერთო სიტუაციის გამო სასწავლო წლის ბოლომდე შეუძლებელი გახდა ჩემი დარჩენა ზემოთ აღნიშნულ სკოლაში.

ამერიკის შეერთებულ შტატებში  გატარებულმა დრომ დიდი გამოცდილება შემძინა. იქ  ყოფნამ მთლიანად შეცვალა ჩემი სამომავლო გეგმები, გამხადა თავდაჯერებული, დამოუკიდებელი და თავისუფალი.

რამდენიმე დღეა, რაც სამშობლოს დავუბრუნდი და უკვე კარანტინიდან ვერთვები მშობლიური სკოლის ონლაინგაკვეთილებს. მასწავლებლებსა და თანაკლასელებსაც ამ რეჟიმში ვეხმიანები. არადა, ეს შეხვედრა ერთწლიანი დაშორების მერე სულ სხვანაირად წარმომედგინა. იმედს ვიტოვებ, რომ მალე ისევ შევხვდებით ერთმანეთს სკოლაში, ჩვენს საკლასო ოთახში.

_____________________________________

ნეტგაზეთის მასალების სხვა გამოცემებში გადაბეჭდვის წესი
ავტორი