მთავარი,სიახლეები

რა ეტაპზეა საკანალიზაციო ქსელის სარეაბილიტაციო სამუშაოები ბათუმში

20.04.2020 • 2459
რა ეტაპზეა საკანალიზაციო ქსელის სარეაბილიტაციო სამუშაოები ბათუმში

ბათუმში საკანალიზაციო ქსელის სარეაბილიტაციო სამუშაოები, ქალაქის მერიის ინფორმაციით, ამ ეტაპზე შეუფერხებლად გრძელდება. პროექტის მეოთხე ფაზის ფარგლებში ახალი სისტემის მოწყობა მიმდინარეობს ანგისის დასახლებაში. 2020 წლის ბილომდე კი ახალი ქსელის მოწყობა უნდა დასრულდეს ჯავახიშვილის ქუჩასა და მდინარე მეჯინისწყალს შორის არსებულ ტერიტორიაზე.

ბონი-გოროდოკის, ბარცხანისა და თამარის დასახლებების შიდა ქსელები უკვე დაერთებულია ახალ ცენტრალურ სისტემაზე, ანუ, ადლიის გამწმენდ ნაგებობაზე. შესაბამისად, ქალაქის კანალიზაცია უკვე ადლიის გამწმენდი ნაგებობის გარეშე ზღვაში აღარ ჩაედინება.

„ჯავახიშვილის ქუჩიდან მეჯინისწყლამდე მონაკვეთიც ჩართულია ახალ ცენტრალურ ქსელში, თუმცა, არსებული სისტემა [შიდა ქსელი] არის მოძველებული და ხდება მისი განახლება. სამუშაოები და დაერთებების დიდი ნაწილი წლის ბოლომდე უნდა დასრულდეს, თუ არსებული მდგომარეობიდან გამომდინარე არ შეიქმნა რაიმე სახის პრობლემა“ – გვითხრეს ბათუმის მერიაში.

რაც შეეხება მახინჯაურს, მწვანე კონცხსა და სხვა შემოერთებულ ტერიტორიებს, აქ საკანალიზაციო ქსელი პროექტის მეხუთე ფაზაში უნდა მოეწყოს.

„უკვე გამოცხადებულია საერთშორისო ტენდერი კონსულტანტი კომპანიის შესარჩევად, თუმცა ახალი კორონავირუსის პანდემიის გამო სატენდერო პროცედურები გადაიწია დროში. შერჩეული კონსულტანტი მოამზადებს წყალანირების პროექტს, რომლის საფუძველზეც გამოცხადდება ტენდერი უკვე მშენებელი კომპანიის გამოსავლენად. პროექტის ავტორი კონსულტანტი კომპანია კი, შემდგომში, მშენებლობის პროცესსაც გაუწევს ზედამხედველობას“ – გვითხრა ჯაბა ტუღუშმა, ბათუმის ვიცე-მერმა.

„ბათუმელები“ დაინტერესდა, როგორ ხდება, ამ შემთხვევაში, ბათუმის საავადმყოფოებიდან კანალიზაციის ჩაშვება ცენტრალურ ქსელში.

ჯაბა ტუღუშის თქმით, ასეთ ობიექტებს უნდა ჰქონდეთ თავიანთი გამწმენდი და არის ზღვრული ნორმები – თუ რა ქიმიური შემცველობის მქონე მოხმარებული წყალი შეიძლება ჩაიშვას ცენტრალური წყალარინების სისტემაში.

მისივე თქმით, მაგალითად, ბათუმის ინფექციურ საავადმყოფოს აქვს ასეთი გამწმენდი, იქ იწმინდება ჯერ საკანალიზაციო წყლები და შემდეგ ჩადის ცენტრალურ სისტემაში. ეს კიდევ იწმინდება ადლიის ნაგებობაზე და ამის შემდეგ ჩადის ზღვაში.

მერიის შპს „ბათუმის წყლის“ [რომელიც ოპერირებას უწევს წყალარინების სისტემას და ადლიის გამწმენდ ნაგებობას] ინფორმაციით, სამედიცინო დაწესებულებების მიმდებარედ ყველგან განთავსებულია ინდივიდუალური სპეციალური ჭები, სადაც გროვდება კანალიზაციის წყალი და ის გადაიტუმბება ცენტრალურ სისტემაში.

„წითელი ხაზის შიგნით, ანუ, ამა თუ იმ კლინიკის შიდა ტერიტორიაზე და შენობაში რა ხდება, ამაზე პასუხისმგებელი „ბათუმის წყალი“ ვერ იქნება. გარე პერიმეტრზე განთავსებული ჭებიდან კი, საკანალიზაციო წყალს ვტუმბავთ ადლიის გამწმენდ ნაგებობაში და იქ სამჯერადი გაწმენდის შემდეგ – რითაც ყველანაირი ბაქტერია ნადგურდება – ამ წყალს ვუშვებთ ზღვაში, 40 მეტრ სიღრმეში“ – გვითხრეს „ბათუმის წყალში“.

_________________

აშშ-ს ჯანდაცვისა და სოციალური სამსახურის სამინისტროს ინფორმაციით, ამ დროისთვის არ აქვთ მტკიცებულება, რომ „COVID-19-ს შეუძლია გადარჩეს წყალში ან ჩამდინარე წყლებში [კანალიზაციაში]. ამ პირობებში, დიდი ალბათობით ვირუსი გახდება უმოქმედო ბევრად უფრო სწრაფად, ვიდრე სხვა, არაკონვერტირებული ადამიანის ვირუსები, რომლებსაც წყლით გადადებაც ახასიათებთ [ადენოვირუსები, ნეროვირუსები, როტავირუსები და ა ჰეპატიტი]“.

ამ თემაზე:

საშიშია თუ არა ზღვაში ბანაობა და სასმელი წყალი? – ახალი კორონავირუსი

მთავარი ფოტო: ბათუმის ხედი [ცენტრში] და ადლიის გამწმენდი სადგური [მარჯვნივ] / ფოტო: „ბათუმელები“

გადაბეჭდვის წესი


ასევე: