საქართველოს დაავადებათა კონტროლის ეროვნული ცენტრის დირექტორის, ამირან გამყრელიძის განცხადებით, საქართველოში მომავალი 3 კვირა მნიშვნელოვანია კორონავირუსის გავრცელების თვალსაზრისით. მან დღეს, 21 აპრილს, ბრიფინგზე განმარტა, რა არის ამის მიზეზი:
„რატომ ვამბობ სამ კვირას? ამაზე ხშირად მეკითხებიან. ჩვენ პირველი შემთხვევა დაგვიფიქსირდა 26 თებერვალს და 22 მარტს დავაფიქსირეთ უკვე შიდა გავრცელების შემთხვევები, როცა ჩვენ ვეღარ გავედით პირველ წყაროზე.
შიდა გავრცელების შემდეგ, მეექვსედან მერვე კვირამდე ითვლება ყველაზე უფრო კრიტიკულ პერიოდად. დღეს ჩვენ შევედით მეხუთე კვირაში, ამიტომ აპრილის ბოლოდან მაისის პირველი კვირები მოსალოდნელია, რომ იყოს ინფექციის შემთხვევების კიდევ ზრდა.
ამიტომ კიდევ ერთხელ მოგიწოდებთ და გთხოვთ, მთავარი სლოგანი, რაც ხშირად გესმით ამ დღეებში – დავრჩეთ სახლში – ძალაშია და ძალაში იქნება უმრავლესობისთვის კარგა ხანს,“ – განაცხადა ამირან გამყრელიძემ.
დღეს, 21 აპრილს, საკოორდინაციო საბჭოს სხდომის შემდეგ ცნობილი გახდა, რომ საქართველოში მთავრობა საგანგებო მდგომარეობის გაგრძელებას 22 მაისის ჩათვლით გეგმავს, მთავრობამ პრეზიდენტს უკვე მიმართა.
ასევე, დღეს ცნობილი გახდა, რომ ავტომობილებით გადაადგილება 27 აპრილამდე ისევ აკრძალულია.
