„ეს იქნება ნაბიჯი დიპლომატიური ურთიერთობების აღდგენისკენ… არა მგონია, მთავრობამ ეს გააკეთოს, ეს იქნება პოლიტიკური თვითმკვლელობა,“ – ასე აფასებს ვალერი ჩეჩელაშვილი რუსეთის საგარეო საქმეთა მინისტრის, სერგეი ლავროვის დღეს გაკეთებულ შეთავაზებას სავაჭრო წარმომადგენლობის გახსნის შესახებ. ვალერი ჩეჩელაშვილი საქართველოს ყოფილი ელჩია რუსეთში და ამჟამად „რონდელის ფონდის“ მკვლევარი.
ვალერი ჩეჩელაშვილი განმარტავს, რომ სავაჭრო წარმომადგენლების გახსნა მოძველებული მეთოდია და მას მაშინ იყენებდნენ, როცა საგარეო ვაჭრობაზე მონოპოლია იყო დამყარებული.
„ახლა არავითარი ფუნქციონალური დატვირთვა სავაჭრო წარმომადგენლობას არ ექნება, რადგან სახელმწიფო არ არეგულირებს ვაჭრობას და იგი ხორციელდება კერძო კომპანიების მიერ. ამის გაკეთება ახლა იქნება ანაქრონიზმი და უაზრობა. ეს არის რუსეთის პოლიტიკის გაგრძელება, მათი მთავარი ქვაკუთხედი საქართველოსთან მიმართებაში არის ის, რომ საქართველომ უნდა აღიაროს აფხაზეთის და ე.წ. სამხრეთ ოსეთის ე.წ. დამოუკიდებლობა და დაამყაროს დიპლომატიური ურთიერთობა რუსეთთან,“ – უთხრა „ბათუმელებს“ ვალერი ჩეჩელაშვილმა.
_____
რუსეთის ფედერაციის საგარეო საქმეთა მინისტრის, სერგეი ლავროვის განცხადებით, მოსკოვი მზადაა, საქართველოსთან სავაჭრო წარმომადგენლობის გახსნის საკითხი განიხილოს. ინფორმაცია ამის შესახებ რუსულმა სახელმწიფო მედიამ – „ტასსმა“ დღეს, 21 აპრილს, გაავრცელა.
მედიის ცნობით, ლავროვი აღნიშნავს, რომ ასეთი შეთავაზება ქართული მხარისგან უნდა წამოვიდეს.
„მზად ვიქნებით, დიპლომატიური ურთიერთობები აღვადგინოთ, რადგანაც ჩვენ არ ვყოფილვართ მათი შეწყვეტის ინიციატორები. ალბათ, უნდა დაველოდოთ ქართველი კოლეგები როდის შეუდგებიან ამ საკითხის განხილვას. სავაჭრო წარმომადგენლობებიც ითვალისწინებს გარკვეული შეთანხმებების არსებობას. არ ვფიქრობ, რომ ეს უცებ შემატებს რაღაც უპირატესობას, მაგრამ თუ შემოგვთავაზებენ, ნამდვილად განვიხილავთ ასეთ შესაძლებლობას“, – აცხადებს ლავროვი.
