„ჩვენ პირველი დღიდანვე ვაფრთხილებდით ყველას, რომ ეს არის ბოროტება, რომელსაც ყველა უნდა ებრძოლოს.
პრობლემის მოგვარების გზა, რასაც გთავაზობთ, არის ნაციონალური ერთობა და გლობალური სოლიდარობა, ამის გარეშე, გვერწმუნეთ, უარესი ჯერ კიდევ წინ გვაქვს. …ჩვენ ვამბობდით, რომ ეს ვირუსი განვითარებულ ქვეყნებს, მდიდარ ერებსაც გააკვირვებდა. და ასეც მოხდა.
მოდით, შევაჩეროთ დამატებითი ტრაგედიები, გავერთიანდეთ“ – განაცხადა ჯანდაცვის მსოფლიო ორგანიზაციის დირექტორმა, ტედროს გებრეისუსმა გუშინ, 20 აპრილს გამართულ ბრიფინგზე.
გებრეისუსმა კიდევ ერთხელ მოუწოდა სხვადასხვა ქვეყნის ლიდერებს, მმართველი პარტიისა თუ ოპოზიციის წარმომადგენლებს, რომ არ გამოიყენონ ვირუსი შიდა დაპირისპირებებისთვის და ქულების დასაწერად.
„ეს ძალიან საშიშია, ეს ცეცხლთან თამაშივითაა. გთხოვთ, იმუშავეთ ერთად, ჩვენ გვჭირდება ეროვნული ერთობა და გლობალური სოლიდარობა… ბზარები ხალხებსა და პარტიებს შორის, ეს პოლიტიკური პრობლემაა, რამაც შეიძლება ხელი შეუწყოს ამ პანდემიის განვითარებას” – აღნიშნა მან.
ტედროს გებრეისუსმა განაცხადა, რომ გასულ საუკუნეში მომხდარ პანდემიასთან შედარებით, რომელმაც მილიონობით ადამიანის სიკვდილი გამოიწვია, ახლა კაცობრიობას უპირატესობა აქვს:
„ახლა ჩვენ გვაქვს ტექნოლოგიები, ჩვენ არ ვართ იმავე სიტუაციაში. არ უნდა შეგვეშინდეს, თავდაჯერებული უნდა ვიყოთ, რომ ვირუსს საპასუხო დარტყმას მივაყენებთ. თუ გვექნება ეროვნული ერთობა და გლობალური სოლიდარობა, თუ ვირუსს მივიღებთ, როგორც კაცობრიობის საერთო მტერს და გავაკეთებთ ჩვენს მაქსიმუმს, რა თქმა უნდა, იმის გააზრებით, რომ ეს სრულიად ახალი და ძალიან საშიში ვირუსია, ჩვენ შეგვიძლია მოვიგოთ ბრძოლა,“ – განაცხადა მან.
