სტუდენტებმა, რომლებსაც კორონავირუსის გამო ხულოს მუნიციპალიტეტში დაბრუნება მოუხდათ, საქველმოქმედო ფონდი „ხულო“ შექმნეს და სოფლად მცხოვრებ ღარიბ ოჯახებს ეხმარებიან.
მაია რიჟვაძე, ქეთი ბოლქვაძე, თამთა აბულაძე, გიორგი რიჟვაძე, ნინია თავართქილაძე და ქეთევან ბოლქვაძე ხულოს მუნიციპალიტეტიდან არიან. ექვსივე სხვადასხვა უნივერსიტეტში სწავლობს. ხულოში დაბრუნების შემდეგ ერთი იდეის გარშემო გაერთიანდნენ – დახმარებოდნენ მათ, ვისაც ყველაზე მეტად სჭირდება ახლა ეს.
„ერთ-ერთ მეგობართან ვიყავით შეკრებილი და ვფიქრობდით, ჩვენი ძალებით რა შეიძლებოდა გაგვეკეთებინა. მოგვივიდა იდეა, რომ გაგვეკეთებინა ფონდი, სადაც ხალხის დახმარებით და ჩვენი ძალებით შევძლებდით ბევრი ოჯახის გახარებას.
ამ ეტაპზე უკვე 12 ოჯახს დავეხმარეთ. თითოეული ოჯახის კალათა 90-ლარიანია. აქციაში ჩაერთო ადგილობრივი ბიზნესიც. მაღაზიები და აფთიაქები ძალიან დაგვეხმარნენ პირველ ეტაპზე. 6 ოჯახის სასურსათო კალათა მოგვცეს ადგილობრივებმა. ასევე, ორი მძღოლია, რომელიც თავიანთი ხარჯებით გვეხმარება და მათ ფულს არ ვუხდით, როდესაც სურსათს ვურიგებთ გაჭირვებულებს,“ – ამბობს მაია რიჟვაძე, საქველმოქმედო ფონდ „ხულოს“ ერთ-ერთი დამფუძნებელი.
სტუდენტებს კიდევ ექვსი ოჯახისთვის აქვთ შეძენილი სასურსათო კალათები, თუმცა იმის გამო, რომ რამდენიმე დღეა ქვეყანაში ავტომობილებით გადაადგილება აკრძალულია, ბენეფიციარები კი შორს მდებარე სოფლებში ცხოვრობენ, სტუდენტებს 22 აპრილამდე აქვთ შეჩერებული კალათების დარიგება.
ხულოში მსგავსი ინიციატივა პირველია.
„ამიტომ უფრო მეტ პასუხისმგებლობას ვგრძნობთ, პირველ რიგში იმ ადამიანებთან, ვინც ფულს რიცხავს და შემდეგ იმ ადამიანებთან, ვის გულებსაც ვახარებთ. თავდაპირველად სოციალური სააგენტო გვეხმარებოდა. მერე გავარკვიეთ, რომ სოციალურს ვინც იღებს, ასეთ ოჯახებს სახელმწიფო ისედაც ეხმარება.
ჩვენ სოფლის რწმუნებულების დახმარებით სოფლებში მოვიძიეთ ისეთი ადამიანები, ვისაც სოციალური დახმარება არ აქვს, მაგრამ დაბალი შემოსავალი აქვთ და ძალიან უჭირთ. სწორედ ასეთ ადამიანებთან მიგვაქვს სასურსათო კალათები,“ – ამბობს მაია.
https://www.facebook.com/107685534236491/photos/a.115906296747748/115904993414545/?type=3&theater
