„ენერგო-პრო ჯორჯიას“ იმ აბონენტებს, რომლებმაც მარტის თვეში 36 ლარის და 43 თეთრის ან ნაკლები თანხის ელექტროენერგია მოიხმარეს, დენის გადასახადს სახელმწიფო დაუფარავს.
სახელმწიფო დაფარავს ასევე აპრილსა და მაისშიც მოქალაქეების მიერ იმავე ოდენობის ფარგლებში მოხმარებული დენის გადასახადსაც.
პრემიერ-მინისტრის განცხადებით, საქართველოს ყველა მოქალაქეს, რომელიც თვეში მოიხმარს 200 კილოვატზე ნაკლებ ელექტროენერგიას, სამი თვის განმავლობაში – მარტში, აპრილსა და მაისში, სრულად დაუფინანსდება კომუნალური გადასახადები.
„ენერგო-პრო ჯორჯიას“ აბონენტების შემთხვევაში კი, 200 კილოვატი სწორედ 36 ლარი და 43 თეთრია.
რაც შეეხება იმ აბონენტებს, რომლებმაც უკვე გადაიხადეს მარტის თვის დენის გადასახადი [აღნიშნული ოდენობით ან ნაკლები], სავარაუდოდ მათ ეს თანხა შეენახებათ, თუმცა კომპანიაში ამის შესახებ ზუსტად ვერ გვიპასუხეს.
„მარტის თვის გადასახადის დარიცხვები დღეიდან, 1-ელი აპრილიდან დაიწყო და არ გვგონია, ჯერ აბონენტებს გადახდილი ჰქონდეთ. თუმცა ეს დეტალიც დაზუსტდება“, – გვითხრეს „ენერგო-პროში“.
—
საქართველოში სხვა მიმწოდებელი კომპანიებიც ოპერირებენ, სუბსიდია მათ აბონენტებსაც შეეხება.
სახელმწიფო გარკვეულ მოქალაქეებს გაზის გადასახადსაც დაუფარავს.
ამ თემაზე:
https://batumelebi.netgazeti.ge/news/265597/
