5 აპრილიდან ბათუმის მე-16 საჯარო სკოლაში სწავლა დისტანციური ფორმით გაგრძელდება. სამინისტრომ გადაწყვეტილება უსაფრთხოების წესების გათვალისწინებით მიიღო.
სამინისტროს ინფორმაციით, შენობის კედლებზე ბზარები გაჩნდა, რომელიც ბოლო პერიოდში გაღრმავდა. შესაბამისად, გადაწყვიტეს, რომ სწავლება დისტანციურად გაგრძელდეს.
აჭარის განათლების მინისტრის მოადგილის, ჯემალ სურმანიძის ინფორმაციით, სპეციალისტები შენობაში არსებულ ვითარებას სწავლობენ და დასკვნას უახლოეს პერიოდში მოამზადებენ. ამის შემდეგ კი სამინისტრო მიიღებს გადაწყვეტილებას დაიწყოს ალტერნატიული შენობის მოძებნა სკოლისთვის, თუ გამაგრებითი სამუშაოები.
სკოლის დირექტორის, ცირა ქობულაძის ინფორმაციით, სკოლას გამაგრებითი სამუშაოები ადრეც ჩაუტარდა, თუმცა ბზარები მაინც გაჩნდა, ამიტომაც სკოლაში სასწავლო პროცესის გაგრძელება უსაფრთხო არ იყო.
—
მე-16 სკოლა ერთერთია იმ 13 სკოლიდან, სადაც საქართველოს ენერგეტიკის განვითარების ფონდმა მზის მიკროელექტროსისტემები დაამონტაჟა.
მზის მიკროელექტროსისტემა ბათუმის მე-16 საჯარო სკოლის ეზოში / 3.04.2021
გავრცელდა ასევე ინფორმაცია, რომ სკოლის შენობა უნდა დაინგრეს და მის ადგილზე სკოლის ახალი შენობა აშენდება; მე-16 საჯარო სკოლის მოსწავლეები კი, დროებით, სავარაუდოდ გოროდოკის დასახლებაში გადავლენ, სადაც კომაროვის სკოლა აშენდა.
ეს ინფორმაცია აჭარის განათლების სამინისტროში არ დაგვიდასტურეს. „ველოდებით ექსპერტიზის დასკვნას“ – გვითხრეს სამინისტროს პრესსამსახურში.
ბათუმის ავტოსადგურის გვერდით, მაიაკოვსკის ქუჩაზე იმ ტერიტორიის ფართობი, სადაც მე-16 საშუალო სკოლის შენობა დგას, 6 259 კვ/მ-ია და მისი მესაკუთრე სახელმწიფოა. თავად ოთხსართულიანი შენობის საერთო ფართობი კი, არის 3 065.8 კვ/მ.
ბათუმის მე-16 სკოლა
ბათუმის მე-16 სკოლა / 3.04.2021
ამავე თემაზე:
მე-16 საჯარო სკოლის ტერიტორიის გეოლოგიური და შენობის კონსტრუქციული კვლევა ჩატარდება
