Batumelebi

ბათუმში, ზღვაში ხელოვნური კუნძულის მოწყობის პროექტი აჭარის მთავრობის თავმჯდომარემ, თორნიკე რიჟვაძემ დააანონსა, თუმცა მან არ დააკონკრეტა, კონკრეტულად ვინ და სად გეგმავს ხელოვნური კუნძულის მოწყობას.

ცოტა ხნის წინ „ფეისბუქში“ გავრცელდა ბათუმში მოაზრებული ხელოვნური კუნძულის სავარაუდო რენდერები, რამდენიმე წუთის წინ კი იგივე ფოტოები აჭარის მთავრობის აპარატის უფროსმა, ჯაბა სურმანიძემ გამოაქვეყნა ფეისბუქის საკუთარ გვერდზე წარწერით – „როგორი იქნება ხელოვნური კუნძული ბათუმში (პირველადი ვერსია)“.

ამ ფოტოების მიხედვით ხელოვნური კუნძულის მოწყობა ბათუმში, თამარის დასახლებაში, რკინიგზის სადგურის მიმდებარედ არსებულ სანაპიროზე განიხილება.

ამავე ტერიტორიაზე 131 მეტრი სიმაღლის ცათამბჯენს აშენებენ, პროექტი ზღვაზე გადასახედი ხიდის მოწყობასაც ითვალისწინებს. მშენებელ კომპანიაში გვითხრეს, რომ ხელოვნური კუნძულის პროექტის თაობაზე მათ არაფერი იციან.

„ქართული ოცნების“ ლიდერი ირაკლი კობახიძე ირწმუნება, რომ გიორგი გახარია კოკაინის მომხმარებელი მას შემდეგ გახდა, რაც „ქართული ოცნება“ დატოვა და ოპოზიციაში გადავიდა.

„ეს პრობლემა მას არ ჰქონია მაშინ [როცა პრემიერ-მინისტრი იყო], ეს პრობლემა მას გაუჩნდა ბოლო პერიოდის განმავლობაში.

შეგვიძლია გავიხსენოთ ძალიან მარტივი გამონათქვამი – ხარი ხართან დააბი და ასე შემდეგ.

როდესაც ის თავისი საქმიანობით დაუკავშირდა კონკრეტულ პოლიტიკურ ძალას, რომელსაც აქვს მჭიდრო შეხება კონკრეტულად კოკაინთან, ამის შემდეგ გაუჩნდა მას ეს პრობლემა. კონკრეტულმა ადამიანებმა მიუტანეს მას ეს ნარკოტიკული საშუალება.

ხარი ხართან დააბი არის ის, რაც დაემართა გიორგი გახარიას,“ – თქვა კობახიძემ დღეს, 20 სექტემბერს, ჟურნალისტებთან.

კობახიძე უკვე რამდენიმე დღეა საუბრობს იმაზე, რომ გახარია კოკაინის მომხმარებელია და არ სჯერა იმ ანალიზის შედეგების, რომელიც გახარიამ გამოაქვეყნა იმის დასტურად, რომ ნარკოტიკების მომხმარებელი არ არის.

რაც შეეხება გიორგი გახარიას, მან გასულ შაბათს ჟურნალისტების კითხვას, რომელიც კობახიძის განცხადებას ეხებოდა კოკაინის მოხმარებაზე, არ უპასუხა.

„არ მაინტერესებს ეგ ბიჭი,“ – თქვა გახარიამ.

ამავე თემაზე: 

ჯუმბერ ბერიძე პარტია „გახარია – საქართველოსთვის“ ხელვაჩაურის მერობის კანდიდატია. ის 2015 წელს ხელვაჩაურის საკრებულოს თავმჯდომარეც კი იყო. ამბობს, რომ „ოცნების“ ერთგული იყო ბოლომდე, თუმცა არ დაუფასეს. რას აპირებს მერობის შემთხვევაში და როგორია მისი საარჩევნო გეგმები – ამ თემაზე ის „ბათუმელებთან“ საუბრობს.

• ბატონო ჯუმბერ, როგორც ვიცით, 2015 წელს თქვენ იყავით საკრებულოს თავმჯდომარე, რას საქმიანობდით ამის შემდეგ?

არაფერს, მოძულებული პიროვნება ვიყავი და ვიჯექი სახლში.

• უმუშევარი ხართ, რითი არსებობთ?

არაფერი, ცარიელი ჯიბე. ყანა მაქვს, ბაღჩა ახალსოფელში… ამ ქვეყანაში ადამიანი არ არის დაფასებული.

• მომიძულესო ამბობთ, ვინ მოგიძულათ?

ისევ საკუთარმა პარტიამ.

• რის გამო, შეგიძლიათ გვითხრათ?

არაფერი ისეთი, ხომ იცით, პორტირებული „ნაციონალები“, ისინი, ესენი და მე არ ვაწყობდი. შიგადაშიგ არჩევნები რომ ტარდებოდა, მეძახდა „ოცნება“ და ვეხმარებოდი. ბოლომდე არ მიმიტოვებია, თქვენ წარმოიდგინეთ, ვეხმარებოდი.

• მომიძულესო ამბობთ და მაინც ეხმარებოდით, რატომ, რა ტიპის ურთიერთობა იყო ეს?

დაგავალებთ ათასნაირ დავალებას, შეგასრულებინებ და მერე ჩემსას რომ მივაღწევ, მავიწყდები.

• იმის თქმა გინდათ, რომ ხელფასს არ გიხდიდნენ?

მე გადახდებზე არ ვმუშაობ. მე ასეთ რაღაცებს არ ვითხოვდი, მე ვეხმარებოდი უბრალოდ პარტიას. „ოცნებას“ აღარ აინტერესებდა ხალხი, ერთმანეთის ლანძღვაზე გადავიდნენ. ხალხი რომ გაღარიბდა, არც ეს აინტერესებთ, არ არის პრიორიტეტი მათთვის. მხოლოდ საკუთარ კეთილდღეობაზე არიან ორიენტირებული. ამიტომ გავემიჯნე მაგათ.

• გახარიამ თქვენზე რატომ გააკეთა არჩევანი, კარგად იცნობდით?

გახარიას არ გაუკეთებია არჩევანი, მე შევთავაზე ჩემი კანდიდატურა. მე მაინც ვიყრიდი კენჭს და შევთავაზე.

• მიუხედავად იმისა, რომ „ოცნებასთან“ ბოლომდე მუშაობდით?

ბოლომდე ვიყავი, მაგრამ პოლიტიკაში მეგობრობა არ არსებობს. 2020-ის არჩევნებზე აღარ მივეხმარე. მე პიროვნება ვარ და ავტორიტეტიც ვარ. „ოცნებას“ გავემიჯნე, რადგან აღარ ზრუნავდა ხალხზე და გადავედი გახარიას პარტიაში. გახარია ორიენტირებულია ხალხზე. მის გარდა დღემდე არავის არ უთქვამს, რომ ბიუჯეტის დეცენტრალიზაცია გაკეთდეს. ხალხმა უკეთ იცის, როგორ მოიხმაროს თავისი ბიუჯეტი და გაანაწილოს.

ბიუჯეტი ხალხზე უნდა იყოს მორგებული. ბიუჯეტით უნდა განისაზღვროს ყველა ის პრობლემა, რაც ხალხს აწუხებს და მაქსიმალურად უნდა განაწილდეს მოსახლეობაში სოფლების მიხედვით, რომ რაღაც სარგებელი ნახოს მოსახლეობამ.

ტენდერები ტარდებოდა და ადგილობრივი მოსახლეობა არ საქმდებოდა, შემოსავლები არ ჩნდებოდა სოფელში. 20 მილიონი იყო ტრანსფერები, მაგრამ როგორც მიცვალებულს „დაკრუგავ ზალაში“ და გამოდიხარ გარეთ, ასე „დაკრუგავდა“ ეს თანხები ბიუჯეტს და ისე ქრებოდა, კაცმა არ იცოდა სად. ინფრასტრუქტურაში იყო გაბნეული, რომელიც უხარისხოდ იყო შესრულებული.

• თქვენ ფიქრობთ, რომ კორუფციაა მერიაში?

მე არაფერს არ ვამტკიცებ. ეს უნდა აინტერესებდეს კომპეტენტურ ორგანოებს.

• თუ აგირჩევენ მერად, თქვენ როგორ გაანაწილებთ ბიუჯეტს?

მე პრობლემების ნუსხა მაქვს. პირველი პრობლემა ეს არის მიწის საკუთრების აღიარება. აუცილებლად უნდა აღმოიფხვრას ბიუროკრატიული მიდგომა და მიწა გლეხს უნდა გადაეცეს. თუ სადავო მიწა არ არის, გლეხს უნდა გაუფორმდეს მიწა.

მეორე – სოფლის მეურნეობის ფონდი უნდა დავაარსოთ, რომელშიც ჩაიდება ბიუჯეტიდან 3-დან 5 მილიონამდე ლარი. ამ ფონდით ხილ-წვენების საწარმო აშენდება, რომელიც მოემსახურება არა მარტო ხელვაჩაურის მოსახლეობას, არამედ ქედასაც.

• რამდენად სწორია საბიუჯეტო სახსრებით საწარმოს გახსნა?

აიპი იქნება ან შპს. ხალხს რაც აწყობს, იმას ვაკეთებთ. ბიუჯეტი ზემოდან არ უნდა იგეგმებოდეს, არამედ ქვემოდან. მთელი წლის განმავლობაში გავაფორმებთ ხელშეკრულებებს კომპანიებთან და გავყიდით პროდუქციას.

• შემოსავალი როგორ განაწილდება?

ეს თანხები განაწილებული იქნება მოსახლეობაზე.

• ასეთი მოდელი სადმე გინახავთ, თუ რატომ გაგიჩნდათ ეს იდეა?

ადრე კეთდებოდა.

• როდის, საბჭოთა კავშირის დროს?

რა მნიშვნელობა აქვს, როდის იყო და სად იყო, არ მაინტერესებს. ამ თანხებით დავეხმარებით მოსახლეობას, მივაწვდით პესტიციდებს, ტრაქტორებს შევიძენთ და დავეხმარებით მოსახლეობას. ეს ყველაფერი მოემსახურება ხალხს. ამით სოფლის მეურნეობის პროდუქტების რეალიზაციის დონეც ამაღლდება.

• ხელვაჩაურში ინფრასტრუქტურის პრობლემაცაა, რას გეგმავთ ამ მიმართულებით?

ინფრასტრუქტურა დიდად მნიშვნელოვანი არ არის. ეგ ისედაც გაკეთდება, ჩემი ძირითადი მიმართულება იქნება სოფელი.

ასევე გვინდა, რომ ხელმოწერები შევაგროვოთ სოფლებში და მოვითხოვოთ, რომ 5 ათასზე მეტი ლარის განკარგვის უფლება გვქონდეს ტენდერის გარეშე. სულ ცოტა 60 ათასი ლარის მაინც, რომ ეს თანხები სოფლებში შევიტანოთ.

• ხელვაჩაურში არის მძიმე ეკოლოგიური მდგომარეობა, დაბინძურებულია ჰაერი, მდინარეებიდან  უკონტროლოდ ამოაქვთ ინერტული მასალა. რა გეგმები გაქვთ ამ პრობლემებზე?

ეკოლოგიისთვის ბრძოლა ყველას გვევალება. არავითარი ინერტული მასალის ამოღება არ მოხდება 20 კილომეტრის ფარგლებში. მთები დგას უკვე ინერტული მასალების, წყალქვეშა ნავი დაიმალება, ისეთი ორმობია ამოთხრილი, უკვე საქონელიც იხრჩობა.

• როგორც ირკვევა, ინერტული მასალების ბიზნესს მაღალჩინოსნები და კრიმინალური ავტორიტეტები მფარველობენ, როგორ აპირებთ მათთან დაპირისპირებას?

მე არ მაქვს მაგის მტკიცებულებები, არ ვიცი. ზედამხედველობის სამსახურთან ერთად ავკრძალავ ინერტული მასალის ამოღებას. მე გავლენიანებს არ ვემორჩილები. მე ხალხის ნების აღსასრულებლად მოვდივარ და არა ვიღაცების ნების.

• ხალხზე უნდა ვიზრუნოო ამბობთ, ჯოჭოს ტრაგედია გახსოვთ ალბათ, რა გეგმები გაქვთ ფერდსამაგრ სამუშაოებთან დაკავშირებით, როგორც ვიცით, ბევრი ოჯახია მეწყრის საფრთხის წინაშე.

ამ ოჯახების ადგილმონაცვლეობა ძალიან რთული იქნება, რადგან თავის დროზე ძალიან არაგეგმაზომიერად გასხვისდა მიწები. კერძო საკუთრებას ხომ ვერ შევეხებით, ამიტომ ამ კატეგორიის ოჯახებისთვის საცხოვრებელი ბინები უნდა აშენდეს. ასევე ძალიან ბევრია სოციალურად დაუცველი და  ვფიქრობ, ამ ხალხისთვისაც უნდა იყოს გათვალისწინებული ბინები.

კიდევ გადაწყვეტილი მაქვს ტურისტული სააგენტოს შექმნა, საოჯახო სასტუროების განვითარებას შევუწყობთ ხელს. ზღვისპირი აღარ გვაქვს, ფაქტობრივად, სარფის გარდა ფერდობებზე შეფენილი სოფლები გვაქვს, მაგრამ ტურისტმაც ისწავლა, რომ ღამის გათევა სოფლად სჯობს, დასვენება კი – ზღვაზე. ამიტომ საოჯახო ტურიზმის განვითარებით სოფელიც განვითარდება. ასევე ვაპირებ, რომ ბიუჯეტის სახსრებით ავაშენოთ მუნიციპალური საავადმყოფო და აფთიაქი.

კორონავირუსის ყოველკვირეული გათამაშების ლატარიაში ბათუმში ორმა ადამიანმა მოიგო 1500 ლარი, ხოლო კიდევ ორმა პირმა – 1000-1000 ლარი.

ყოველკვირეულ გათამაშებაში უფრო მსხვილი თანხა თამაშდება. მაგალითად, გასულ კვირას ყოველკვირეულ გათამაშებაში 10 000 ლარიც გათამაშდა, რომელიც ბოლნისში მცხოვრებმა მოქალაქემ მოიგო.

რაც შეეხება ყოველდღიურ გათამაშებას, 20 სექტემბერს აჭარაში 20-მდე ადამიანმა მოიგო 100 ლარი, ორმა ბათუმელმა კი – 500 ლარი.

ყოველდღიურად გათამაშების პროგრამა 160 ადამიანს არჩევს, ყოველკვირეულ გათამაშებაში კი – 17 პირს.

ყოველდღიური და ყოველკვირეული ლატარიის გათამაშების შედეგები შეგიძლიათ ნახოთ ვებგვერდზე stopcov.lotto.ge.

ქუთაისში, კლინიკა „ბომონდში“, გარდაიცვალა კორონავირუსით ინფიცირებული ახალშობილი ტყუპი, რომლებიც 20 აგვისტოს, ორსულობის 28-ე კვირაზე, დაიბადნენ. მანამდე კოვიდით გარდაიცვალა ტყუპების დედა, 47 წლის ქალი.

ტყუპმა დედის გარდაცვალების შემდეგ 18 დღე იცოცხლა.

როგორც კლინიკაში აცხადებენ, ორივე ახალშობილის ფილტვი „კოვიდური პნევმონიით სრულად იყო მოცული და მთელი განყოფილება იბრძოდა მათი სიცოცხლისათვის“.

„ტყუპი დაბადებისთანავე აპარატზე გადავიდნენ. რესპირატორული დისტრესსინდრომით დაიბადნენ და დინამიკაში დამძიმდნენ. ორივე კოვიდდადებითი დაიბადა.

კოვიდური პნევმონია ჰქონდათ. მთელი განყოფილება 24-საათიან რეჟიმში ვიბრძოდით მათი სიცოცხლისათვის. პატარებისთვის მკურნალობა და ყურადღება არ დაგვიკლია, თუმცა ამის მიუხედავად, სამწუხარო შედეგი დადგა,“ – აცხადებს „კლინიკა ბომონდის“ ახალშობილთა ინტენსიური განყოფილების ხელმძღვანელი მარინა ბარათაშვილი.

აჭარის კულტურული მემკვიდრეობის სააგენტომ დაადასტურა ინფორმაცია იმის თაობაზე, რომ შპს „ამბასადორი ბათუმი“ პროექტს სანებართვო პირობების დარღვევით აწარმოებდა. ეს კომპანია ძველ ბულვარში უკანონოდ აშენებს მე-17 სართულს: დაწყებული აქვს კოლონების ჩამოსხმისა და გადახურვის სამუშაოები. „ამბასადორის“ დამტკიცებული პროექტი 16-სართულიანი იყო [დამატებით სამი მიწისქვეშა სართული].

უკანონო სართულის მშენებლობა „ბათუმელებმა“ 17 სექტემბერს აღმოაჩინა. აჭარის კულტურული მემკვიდრეობის დაცვის სააგენტოში დღეს, 20 სექტემბერს, ბრიფინგი სწორედ ამის საფუძველზე გამართეს.

„დაფიქსირდა პროექტისგან გადახვევა, სართულებს შორის გადახურვების ზომები არის მცირედით გაზრდილი. თითო სართულის ფილა უნდა ყოფილიყო 26 სანტიმეტრი და არის 27. ამან მოგვცა სხვაობა სიმაღლეში. სხვა ყველაფერი პროექტის შესაბამისია. გარდა ამისა, მეთექვსმეტე სართულის ზემოთ მოწყობილია კოლონები, რაც არ შეესაბამება პროექტს. ეს კოლონები არ არის საპროექტო დოკუმენტაციით გათვალისწინებული“, –  განმარტა სააგენტოს დირექტორის მოვალეობის შემსრულებელმა, ოლეგ ბოლქვაძემ.

სააგენტოს ხელმძღვანელის თქმით, დარღვევასთან დაკავშირებით დაიწყო ადმინისტრაციული წარმოება – „ვამზადებთ გაფრთხილებას სანებართვო პირობების დარღვევასთან დაკავშირებით. ასევე მოვითხოვთ უკანონო სამუშაოების შეჩერებას“.

სააგენტო ვარაუდობს, რომ კომპანია პროექტით გაუთვალისწინებელი სამუშაოების გამო 10 000 ლარით დაჯარიმდება. „ასევე თუ არ მოხდა პროექტის კორექტირება, მოვითხოვთ დემონტაჟს. ცვლილების გარეშე ეს არის უნებართვო სამუშაოები და ექვემდებარება დემონტაჟს“, – განმარტავს ოლეგ ბოლქვაძე.

აპირებს თუ არა კომპანია მიმართოს სააგენტოს პროექტის კორექტირების მოთხოვნით, თუნდაც პოსტფაქტუმ, სართულის აშენების შემდეგ? – სააგენტოში გვიპასუხეს, რომ ამის შესახებ არ იციან.

„ბათუმელების“ ინფორმაციით, „ამბასადორს“ ბოლო სართულზე ვერტმფრენის დასაფრენი სივრცის მოწყობა სურს. თუმცა უცნობია, ეს მეჩვიდმეტე სართული იქნება, თუ პირობითად მეოცე. ჯერჯერობით არ არის ცნობილი, რა სიმაღლეზე აპირებს კომპანია შეჩერებას.

ბათუმში 15 სექტემბერს აღმოაჩინეს, რომ 7 კორპუსი შენდება უკანონოდ გოგოლის ქუჩაზე. პროტესტის მიუხედავად, ეს მშენებლობა დღემდე ვერ შეაჩერა მერიამ. მერიის ზედამხედველობის სამსახურში აცხადებენ, რომ კომპანია დააჯარიმეს.

არ არის გამორიცხული, იგივე განმეორდეს „ამბასადორის“ შემთხვევაშიც.

___

ძველ ბულვარში 16-სართულიანი კორპუსის მშენებლობას ბათუმის მოსახლეობა რეგულარული საპროტესტო აქციებით აპროტესტებდა. ამის მიუხედავად, სააგენტომ მაინც გასცა ამ მასშტაბის მშენებლობის ნებართვა.

19 სექტემბერს უკრაინის დედაქალაქში გაიმართა „კიევი პრაიდი“, რომელშიც ათასობით ადამიანმა მიიღო მონაწილეობა.

„პრაიდმა“ კიევში ექსცესების გარეშე ჩაიარა. პარალელურად მიმდინარეობდა ანტიპრაიდის აქციაც, რომელშიც რამდენიმე ასეული ადამიანი მონაწილეობდა, თუმცა ფიზიკურ დაპირისპირებას ადგილი არ ჰქონია.

აქციაზე მობილიზებული იყო ათასობით პოლიციელი.

„კიევი პრაიდი“ უკრაინის დედაქალაქში უკვე მეათედ ჩატარდა.

„ჩემი ინფორმაციით, იქ შეიძლება იყოს პროექტის გარკვეული გადახვევები,“ – აღნიშნა დღეს, 20 სექტემბერს, აჭარის მთავრობის თავმჯდომარემ, თორნიკე რიჟვაძემ ბათუმის ბულვარში „ამბასადორი ბათუმის“ მშენებლობაზე. ეს კომპანია ძველ ბულვარში მე-17 სართულს უკანონოდ აშენებს.

ბათუმის ბულვარში მშენებარე კორპუსზე ნებართვა 16 სართულის აშენებაზეა გაცემული. „ბათუმელებმა“ გუშინ  დააფიქსირა მე-17 სართულის მშენებლობა.

„ამაზე შესაბამისი უწყებები ატარებენ ყველა საჯარიმო ღონისძიებას. რაც შეეხება ზოგადად ობიექტს. ჩემი პოზიცია ადრე და ახლაც ცნობილია, რომ ნებართვის პირობებში უნდა ხდებოდეს მშენებლობები,“ – დასძინა თორნიკე რიჟვაძემ.

დღეს თორნიკე რიჟვაძეს „ბათუმელებმა“ ასევე ჰკითხა ბათუმში კიდევ ერთ უკანონოდ აშენებულ 7 კორპუსზე. რეგიონის ხელმძღვანელმა არ გვითხრა, რა მიზნით აშენდა კორპუსები და რატომ ვერ ხერხდება ამ უკანონობის შეჩერება.

___

ამ თემაზე ვრცლად ნახეთ აქ:

„კანონი არის ალბათ შესაცვლელი,“ – გვიპასუხა დღეს, 20 სექტემბერს, აჭარის მთავრობის თავმჯდომარემ, თორნიკე რიჟვაძემ, რომელსაც ბათუმში 7 კორპუსის უკანონოდ აშენებაზე ვკითხეთ. უკანონო მშენებლობა გოგოლის ქუჩაზე ახლაც [14:00 საათი] გრძელდება, ოპოზიცია აქციას მართავს.

აჭარის მთავრობის თავმჯდომარემ არ დაგვიკონკრეტა, როგორ მოახერხა ბიზნესმენმა ქალაქში 7 კორპუსის, პრაქტიკულად ერთი უბნის უკანონოდ აშენება და რატომ ვერ აჩერებს ამ უკანონობას ქალაქის მერია.

თორნიკე რიჟვაძეს „ბათუმელებმა“ ჰკითხა, რა კანონი უნდა შეიცვალოს და რატომ? – „უკანონო მშენებლობების“ მხოლოდ ეს გვიპასუხა თორნიკე რიჟვაძემ „ქართული ოცნების“ ბათუმის ოფისში ტრიბუნის დატოვებამდე.

მანამდე თორნიკე რიჟვაძემ აბსურდი უწოდა იმას, რომ გოგოლის ქუჩაზე უკანონო 7 კორპუსი ბიძინა ივანიშვილის ბიზნესს უკავშირდება. თუმცა რეგიონის ხელმძღვანელი ვერ ასახელებს – რისთვის, რა მიზნით აშენდა 7 კორპუსი უკანონოდ ქალაქში.

„ეს არის აბსურდი… ზედამხედველი მოქმედებს კანონის შესაბამისად. ჩვენ ვიცით რა შენდება… შენდება შესაბამისი ობიექტები. მე ვიცი, რომ თავდაპირველად იქ იყო საუბარი სასაწყობე მეურნეობაზე, შემდეგ შეცვალეს გეგმები… რა საჯარიმო ღონისძიებები გატარდა, თვითმმართველობა მოგაწვდით ზუსტ ინფორმაციას,“ – უთხრა თორნიკე რიჟვაძემ ჟურნალისტებს.

————-

ბათუმის მუნიციპალური ინსპექციის ინფორმაციით, კომპანია „მეტრო ტერმინალი“ 6-ჯერ დააჯარიმეს და გამოცემულია მშენებლობის შეჩერების ნებართვა. მერიის მიერ გამოცემული აქტები კომპანიამ სასამართლოში გაასაჩივრა, დავა ამ დრომდე დასრულებული არ არის.

დღეს, 20 სექტემბერს, პარტია „ქართულმა ოცნებამ“ ბრიფინგზე განაცხადა, რომ მათი რეიტინგებით, ბათუმში „ქართული ოცნების“ მერობის კანდიდატი, არჩილ ჩიქოვანი არჩევნებს პირველივე ტურში მოიგებს.

მეტიც, „ოცნება“ ამბობს, რომ არჩილ ჩიქოვანის რეიტინგი ბათუმში უფრო მაღალია, ვიდრე პარტია „ქართული ოცნების“.

„ოცნების“ ცნობით, კითხვაზე, ხვალ რომ არჩევნები ტარდებოდეს, რომელ კანდიდატს მისცემდით ხმას, პასუხები ასე განაწილდა: არჩილ ჩიქოვანი, „ქართული ოცნება“ 54.1 პროცენტი, გიორგი კირთაძე, „ნაციონალური მოძრაობა“ – 30,6 და ირაკლი მიქელაძე, „საქართველოსთვის“ – 4,6 პროცენტი.

ბრიფინგზე „ოცნებამ“ წარმოადგინა პარტიული რეიტინგებიც, რომლის მიხედვითაც „ქართული ოცნების“ რეიტინგი ბათუმში 49.2 პროცენტია.

განსხვავებული რეიტინგი გამოაქვეყნა კვლევითმა კომპანიამ Edison Research-მა, რომელსაც კვლევა ტელეკომპანია „ფორმულამ“ დაუკვეთა 2021 წლის ივლისში.

Edison Research-ის კვლევის თანახმად, დღეს რომ საპარლამენტო არჩევნები ტარდებოდეს, შედეგები ასე გადანაწილდებოდა: „ქართული ოცნება“ – 39%, გადაუწყვეტელი ამომრჩეველი – 20%, ენმ – 16%, ევროპული საქართველო – 5%, ლელო – 3%, ლეიბორისტები – 3%, ახალი საქართველო (გიორგი ვაშაძე) – 3%, პატრიოტთა ალიანსი – 3%, გირჩი – 2%, მოქალაქეები (ალეკო ელისაშვილი) – 2%.

ადგილობრივი თვითმმართველობის არჩევნები საქართველოში 2 ოქტომბერს გაიმართება.

აქამდე ბათუმში მხოლოდ ერთ არჩევნებზე გახდა შესაძლებელი ქალაქის მერის პირველივე ტურით არჩევა  – 2017 წელს ბათუმში ლაშა კომახიძემ 55.95 მიიღო. კომახიძეს უფლებამოსილების ვადა წელს ეწურებოდა, თუმცა, 2020 წელს, კომახიძე, „ბათუმელების“ ინფორმაციით, აიძულეს გადამდგარიყო და მერის მოვალეობის შემსრულებლად არჩილ ჩიქოვანი დანიშნეს.

20 სექტემბრის მონაცემებით, ბოლო 24 საათში აჭარაში კოვიდის 68 ახალი შემთხვევა დადასტურდა.

დღეის მონაცემებით, აჭარის კოვიდკლინიკებში 578 პაციენტს მკურნალობენ კოვიდზე, მათგან 20 ხელოვნურ სუნთქვაზეა.

რეგიონში კოვიდსასტუმროშია 305 ადამიანი.

20 სექტემბრის მონაცემებით, საქართველოში კორონავირუსის 662 ახალი შემთხვევა დადასტურდა. ბოლო 24 საათში ქვეყნის მასშტაბით ჩატარდა 12 503 კვლევა ტესტით.

გასულ დღე-ღამეში საქართველოში 34 ადამიანი გარდაიცვალა კოვიდით.

19 სექტემბრის მდგომარეობით, დადებითობის დღიური მაჩვენებელი არის 5.29%, ბოლო 14 დღის მანძილზე – 7.14% ხოლო 7 დღის მანძილზე – 6.91%.

ამ ეტაპზე ინფიცირების მიმდინარე აქტიური შემთხვევაა 23 795, მათგან 5 445 ადამიანი მკურნალობს საავადმყოფოში.

ბათუმის დრამატული თეატრის მსახიობი ზურაბ ქავთარაძე კორონავირუსით გარდაიცვალა. იგი ბათუმის რესპუბლიკური საავადმყოფოს კოვიდკლინიკაში მკურნალობდა კოვიდზე.

ზურაბ ქავთარაძე 68 წლის იყო. იგი არ იყო აცრილი კორონავირუსზე.

ზურაბ ქავთარაძე პროფესიით მსახიობი და რეჟისორი იყო. შესრულებული აქვს ათობით როლი თეატრის სცენასა და კინოში, გადაღებული აქვს ფილმები: „ჰომოსაპიენსები“; “ტრიუმფი”, “დუბლ D”, “ტაო-კლარჯეთი”, “კიშინოვური პორტრეტები”, “ჭალას ჩიტი მომკვდარიყო”, “კულისებიდან კულისებში”, “ბათუმი-ტრაპიზონი-ბათუმი”, “იყო და არა იყო რა” და ა.შ.

2005 წელს მიღებული აქვს საქართველოს თეატრის მოღვაწეთა კავშირის საპატიო სიგელი ბათუმის დრამატულ თეატრში შემოქმედებითი მოღვაწეობისათვის.

ჭყონდიდის ეპარქიაში 10-მდე სასულიერო პირი განკვეთეს.

ამის შესახებ დღეს, 19 სექტემბერს, გახდა ცნობილი, როცა ჭყონდიდის მიტროპოლიტმა სტეფანე კალაიჯიშვილმა ამბიონიდან წაიკითხა განჩინება სასულიერო პირების განკვეთის შესახებ.

„სრულიად განიკვეთოს სასულიერო და სამონაზვნო დასიდან და დაყვანილ იქნან ერისკაცობამდე შემდეგი პირები:

ნასყიდა ღუდუშაური, ყოფილი ბერ-დიაკონი პეტრე; მიხეილ მდივანი, ყოფილი მონაზონი ათინოგენი; ტარიელ გვილავა, ყოფილი მონაზონი დანიელი; თამაზ ხულუხია, ყოფილი მონაზონი ამბროსი; ბაჩუკი ხელაია, ყოფილი მონაზონი დავითი; ბათა, ავთანდილ გვილავა, ყოფილი მონაზონი ბასილი; მარკოზ წულაია, ყოფილი მონაზონი მარკოზი.

აეკრძალოთ მათ სამონაზვნო და სხვა საეკლესიო შესამოსლით შემოსვა, აგრეთვე სამონაზვნო ატრიბუტიკის ტარება და გამოყენება.

მათ და მათთან ერთად გაგა ავალიანსა და ჯაბა ცეცხლაძეს აეკრძალოთ ჭყონდიდის ეპარქიის მონასტრებში და სხვა საეკლესიო ნაგებობებში ცხოვრება და საქმიანობა. აგრეთვე საეკლესიო მიწების გამოყენება,“ – განაცხადა სტეფანე კალაიჯიშვილმა საკვირაო ქადაგებისას.

________________________

ჭყონდიდის ეპარქიაში დაპირისპირება უკვე 2 წელია მიმდინარეობს, მას შემდეგ რაც ეპარქია მიტროპოლიტმა პეტრემ (ცაავა) დატოვა. მას მღვდელმთავრობა 2019 წლის 31 ოქტომბერს ჩამოართვეს სინოდის სხდომაზე. იმ დღეს სინოდის სხდომიდან გამოსულმა პეტრე ცაავამ ჰომოფობიური ენით განაცხადა, რომ პატრიარქმა, მღვდელმთავრობიდან ეკლესიაში „მამათმავლობის ცოდვის მხილების გამო განაყენა”.

მიტროპოლიტი პეტრე (ცაავა) და ჭყონდიდის ეპარქიის დაქვემდებარებაში მყოფი ათეულობით სასულიერო პირი საჯაროდ თუ პირად საუბრებში ჰომოფობიური ენის გამოყენებით ამბობენ, რომ საქართველოს პატრიარქი ჰომოსექსუალია.

საქართველოს კათოლიკოს-პატრიარქის მიმართ არსებულ ბრალდებებზე საუბრისას სასულიერო პირები ამბობენ, რომ არსებობენ მოწმეები, ვისაც პირადი ისტორიები აქვთ კათოლიკოს-პატრიარქ ილია მეორესთან. მათივე თქმით, ასევე არსებობს კადრები, რომლებიც პატრიარქის პირად ცხოვრებას ასახავს.

მიტროპოლიტმა სტეფანემ, რომელიც ამჟამად ჭყონდიდის ეპარქიის მღვდელთმთავარია, დღევანდელ განკვეთამდე სასულიერო პირებს სხვადასხვა საეკლესიო სასჯელი დაადო – ზოგს ღვთისმსახურება აუკრძალა, ზოგს – ზიარების მიღების უფლება, არქიმანდრიტ ათინოგენს წოდება ჩამოართვა და სამღვდელო ხარისხიდან განკვეთა, გადააყენა მარტვილის დედათა მონასტრის წინამძღვარი მონაზონი სოსანა, მოგვიანებით კი მისი სხვა მონასტერში გადაყვანის ბრძანება გამოსცა. მიტროპოლიტი სასულიერო პირებისთვის დასჯას „საქართველოს მართლმადიდებელ ეკლესიაში განხეთქილების მცდელობასა და დაუმორჩილებლობის ქმედებებში მონაწილეობის“ მოტივით ხსნის.

ბოლო დაპირისპირება ჭყონდიდის ეპარქიაში 14 სექტემბერს მოხდა, როცა სასულიერო პირები მიტროპოლიტ სტეფანეს ეპარქიასთან არსებულ სკოლის შენობაში არ უშვებდნენ.

ვრცლად ამ თემაზე: 

19 სექტემბრის მონაცემებით, ბოლო 24 საათში აჭარაში კოვიდის 101 ახალი შემთხვევა დადასტურდა, ამავე პერიოდში 5 პაციენტი გარდაიცვალა კოვიდით.

დღეის მონაცემებით, აჭარის კოვიდკლინიკებში 570 პაციენტს მკურნალობენ კოვიდზე, მათგან 24 ხელოვნურ სუნთქვაზეა.

რეგიონში კოვიდსასტუმროშია 304 ადამიანი.

19 სექტემბრის მონაცემებით, საქართველოში კორონავირუსის 1501 ახალი შემთხვევა დადასტურდა. ბოლო 24 საათში ქვეყნის მასშტაბით ჩატარდა 22 920 კვლევა ტესტით.

გასულ დღე-ღამეში საქართველოში 43 ადამიანი გარდაიცვალა კოვიდით.

18 სექტემბრის მდგომარეობით, დადებითობის დღიური მაჩვენებელი არის 6.55%, ბოლო 14 დღის მანძილზე – 7.19% ხოლო 7 დღის მანძილზე კი – 6.89%.

შპს „ამბასადორი ბათუმი“ ბულვარში მიმდინარე სამშენებლო პროექტის მეჩვიდმეტე სართულს აშენებს. ეს „ბათუმელებმა“ დღეს ადგილზე გადამოწმების შედეგად აღმოაჩინა. სართული სრულად დახურული ჯერ არ არის, თუმცა იქ, სადაც პროექტის მიხედვით მხოლოდ ღია სივრცე უნდა ყოფილიყო და მხოლოდ მსუბუქი, ლითონის მოაჯირით უნდა შემოესაზღვრათ, კოლონებია ჩამოსხმული. ეს სივრცე უკვე ნაწილობრივ გადახურულია.

პროექტის თანახმად, აქ 16-სართულიან შენობაზეა ნებართვა გაცემული. როგორც კულტურული მემკვიდრეობის დაცვის სააგენტოში გაგვიმარტეს, კომპანიას პროექტში ცვლილება და სართულის დამატება არ მოუთხოვია. შესაბამისად, ცვლილება არ შეუთანხმებიათ.

სააგენტოში გვითხრეს ისიც, რომ ბოლოს მიმდინარე მშენებლობის პროექტთან შესაბამისობა თვენახევრის წინ შეამოწმეს და დარღვევა არ გამოვლენილა.

პროექტის მიხედვით, მეთოთხმეტე სართული შედარებით მაღალია და აქ სარესტორნო სივრცის მოწყობაა დაგეგმილი, ხოლო მეთხუთმეტე ტექნიკური სართულია და შედარებით დაბალია. მეთექვსმეტე სართულზე კი სპაცენტრი და აუზი უნდა მოაწყონ [ეს სართულიც მაღალია]. დღევანდელი, 18 სექტემბრის მდგომარეობით, კომპანია „ამბასადორს“ დაწყებული აქვს მეჩვიდმეტე სართულის მშენებლობა და აპირებს თუ არა აქ გაჩერებას, ეს ჯერ ვიცით.

კომპანიაში „ბათუმელებმა“ იკითხა, შენდება თუ არა დამატებით მეჩვიდმეტე სართული. გვიპასუხეს, რომ ეს „ტექნიკური სართულის ნაწილია.“

სხვა განმარტება კომპანიიდან არ მიგვიღია.

პროექტი, რომელიც სააგენტოდან გამოვითხოვეთ, პროფესიონალ არქიტექტორს ვაჩვენეთ და მშენებარე კარკასთან შედარება ვთხოვეთ. მისი განმარტებით, მეჩვიდმეტე სართული პროექტს არ შეესაბამება.

გამოავლენს თუ არა ამ დარღვევას სააგენტო ან როდის, ეს, ჯერჯერობით, არ ვიცით.

იმ შემთხვევაში, თუ სააგენტო სანებართვო პირობების დარღვევას დაადასტურებს, ეს პირველი შემთხვევა არ იქნება, როცა კომპანია „ამბასადორი“ პროექტს არღვევს.

ბათუმის მცხოვრებლები რეგულარულად აპროტესტებდნენ ამბასადორისთვის ძველ ბულვარში 16-სართულიანი კორპუსის მშენებლობაზე ნებართვის გაცემას.

___

ამავე თემაზე ვრცლად წაიკითხეთ აქ:

ონლაინ პეტიცია  „მწვანე უბნები ბათუმს“ საინიციატივო ჯგუფმა ბათუმის  საკრებულოში 2021 წლის ივნისში დაარეგისტრირა. ამ პეტიციით  მოქალაქეები, არასამთავრობო ორგანიზაციებთან ერთად ქალაქის რეკრეაციული სივრცეების სახელდებას, სტატუსის მინიჭებას და მათ დაცვას ითხოვენ.

როგორც საინიციატივო ჯგუფს შეატყობინეს პეტიცია საკრებულოს ბიუროს აგვისტოში უნდა განეხილა, თუმცა ბიუროს სხდომა გადაიდო. ბოლო ინფორმაციით რაც საინიციატივო ჯგუფის წევრებს აქვთ არის ის, რომ საკრებულომ საკითხი განსახილველად მერიაში გადააგზავნა. დაიწყო თუ არა მერიამ მისი შესწავლა დაზუსტებით არ ვიცით.

პეტიციის ავტორების ინფორმაციით ამ დროისთვის ბათუმში სტატუსის მქონე მხოლოდ 18  სივრცეა და  ეს რაოდენობა არასაკმარისია ქალაქისთვის. გარდა ამისა,  რეალურად ბათუმს  სტატუსის მქონე მეტი სივრცის არსებობის შესაძლებლობა აქვს.

„ყველანი ვთანხმდებით, რომ დასახლების სიმჭიდროვის და მშენებლობის ბუმის პარალელურად მნიშვნელოვანია არსებობდეს რეკრეაციული სივრცეები, რომლებიც მოსახლეობას დაეხმარება სოციალიზაციაში და მისცემს შესაძლებლობას დამღლელი  სამუშაო დღის შემდეგ  დრო სასიამოვნოდ, მწვანე და სუფთა გარემოში გაატარონ.“- ნათქვამია პეტიციაში.

პეტიციის ავტორებმა ბათუმში მწვანე სივრცეების მოძიებისა და აღწერის მიზნით შექმნეს მონიტორინგის ჯგუფი. ამ ჯგუფის მიერ აღწერილი სივრცეების ჩამონათვალში შედის ისეთი სარეკრეაციო ადგილები, რომლებსაც სტატუსი დღემდე არ აქვს მინიჭებული.

ასეთებია მაგალითად: ხელოვნების მუზეუმთან, დრამატულ თეატრთან, ღვთისმშობლის ეკლესიასთან არსებული გამწვანებული სივრცეები. ასევე, კუნძულებად შემორჩენილი რეკრეაციული ტერიტორიები, როგორიცაა: ჭოროხის დელტა [გონიოს პოლიგონი], ფრიდონ ხალვაშის  გამზირის ნაძვნარი [სამრეწველო უბანი]) ან თუნდაც ჭავჭავაძის ქუჩაზე არსებული ხეივანი.

პეტიციის ავტორების ინფორმაციით, ქალაქში სულ  აღრიცხულია 93 სივრცე, რომლებიც მზად არის სკვერის სტატუსის მისანიჭებლად, 7 სივრცე- პარკის სტატუსს იმსახურებს, ხოლო 6 სივრცე – ხეივნის სტატუსს.

აქვე უნდა ითქვას ისიც, რომ გასულ ხუთშაბათს, 16 სექტებერს საკრებულოს სხდომაზე სკვერის სტატუსი მიანიჭეს ზურაბ გორგილაძისა და დემეტრე თავდადებულის ქუჩების კვეთაში არსებულ ტერიტორიას. საკრებულოს გადაწყვეტილებით ამ სკვერს ზაქარია ფალიაშვილის სახელი უწოდეს. ეს ადგილი პეტიციის მისამართების ჩამონათვალშიც იყო.

პეტიციის ერთერთ ავტორს ნათია აფხაზავას ვკითხეთ მისაღები იქნება  თუ არა საინიციატივო ჯგუფისთვის თუ მერია წარდგენილი მისამართების ეტაპობრივად განხილვას და შესაბამისი გადაწყვეტილების საკრებულოსთვის წარდგენას შესთავაზებს მათ.

ნათია აფხაზავას განმარტებით საკითხი მერიამ პეტიციის ავტორებისა და მთავრობის ჩართულობით სრულად უნდა შეისწავლოს, რადგან მონიტორინგი მოქალაქეების ჩართულობით განხორციელდა და მათ მიერ შეგროვებული მონაცემები შესაძლებელია დასაზუსტებელიც იყოს, გარდა ამისა ჩამონათვალში შედის ისეთი ნაკვეთებიც, რომლებიც არ არის მუნციპალური საკუთრება და მთავრობის ბალანსზეა.

„ეს ტერიტორიები მთავრობამ უნდა გადმოსცეს მერიას, როგორც გამწვანებული ადგილები, რომ შემდეგ მერიამ იმუშაოს მათთვის სკვერის სტატუსის მინიჭებაზე, თუმცა სამწუხაროდ პრაქტიკა გვაქვს სხვაგვარი, უფრო მთავრობას მიაქვს ხოლმე მუნიციპალური ქონება იმისთვის, რომ შემდეგ გაასხვისოის.“ –  ამბობს ნათია აფხაზავა.

პეტიციის მიზანია ბათუმის 14-ვე  უბანში არსებობდეს თანაბარი და ხელმისაწვდომი მწვანე გარემო.

პეტიციით წარდგენილი სივრცეები მოძიებულ იქნა 2020 წელს განხორციელებული სამოქალაქო მონიტორინგის შედეგებზე დაყრდნობით, მონიტორინგის ფარგლებში ჯგუფის წევრებმა ქალაქ ბათუმის 14-ვე უბნიდან გამოავლინეს ის გამწვანებული ტერიტორიები, რომლებიც  შეესაბამებოდნენ სკვერის/პარკის/ხეივნის სტანდარტებს, თუმცა არ ჰქონდათ შესაბამისი სტატუსი და საჭიროებდა კეთილმოწყობას – ნათქვამია პეტიციაში.

მონიტორინგის ჯგუფში მუშაობდნენ: ნინო ლომაია, ლევან ხუჯაძე, აზა გაბუნია, ქრისტინე გურგენიძე, დარიკო შაინიძე, გიორგი ბოლქვაძე, დავით ხილაძე, თათია ქათამაძე, ნინო ჩხაიძე და ექსპერტები: გიორგი რამიშვილი, დავით ოქრაძე, შიო დემეტრაშვილი, ნათია აფხაზავა.

პეტიციით ითხოვენ ისეთ სივრცეებზე სტატუსის მინიჭებას,  როგორებიცაა:  ხელოვნების მუზეუმთან, დრამატულ თეატრთან, ღვთისმშობლის ეკლესიასთან არსებული გამწვანებული სივრცეები.

ასევე კუნძულებად შემორჩენილ რეკრეაციულ ტერიტორიებზე, როგორიცაა: ჭოროხის დელტა [გონიოს პოლიგონი], ფრიდონ ხალვაშის  გამზირის ნაძვნარი [სამრეწველო უბანი], ასევე ჭავჭავაძის ქუჩაზე არსებული ხეივანი. სულ 93 სივრცე – რომელიც მზად არის მიენიჭოს სკვერის სტატუსი, 7 სივრცე- პარკის სტატუსი, ხოლო 6 სივრცე –  ხეივნის სტატუსი.