Batumelebi | როგორ ჩატარდება წელს ბათუმის კინოფესტივალი | ინტერვიუ როგორ ჩატარდება წელს ბათუმის კინოფესტივალი | ინტერვიუ – Batumelebi
RU | GE  

როგორ ჩატარდება წელს ბათუმის კინოფესტივალი | ინტერვიუ

18-24 სექტემბერს ბათუმის საერთაშორისო კინოფესტივალი [BIAFF] გაიმართება. უკვე მეორე წელია ფესტივალი კორონავირუსის პანდემიის პირობებში ტარდება. კინოფესტივალის მენეჯერი, ზვიად ელიზიანი ამბობს, რომ გასული წლისგან განსხვავებით, წელს კინოფესტივალი უკვე კინოდარბაზში ჩატარდება, ოღონდ რეგულაციების დაცვით. მას „ბათუმელები“ ესაუბრა.

  • როგორ ჩატარდება წერს კინოფესტივალი?

წელს ვაპირებთ ფესტივალი კინოდარბაზში ჩავატაროთ.

ამ დღეებში გვქონდა კონსულტაციები შრომის ინსპექციასთან და კინოფესტივალი ჩვეულებრივ რეჟიმში ჩატარდება 18-24 სექტემბერს, თუმცა, რა თქმა უნდა, რეგულაციების დაცვით და არსებული შეზღუდვებით.

შარშან მოგვიხდა კინოფესტივალის ონლაინ ჩატარება, რამდენჯერმე გადავდეთ კიდეც, ველოდით გადაწყვეტილებას, მაგრამ წელს უკვე ფიზიკურ სივრცეში ჩატარდება.

  • კონკრეტულად რა შეზღუდვები იქნება?

კინოთეატრში შესაძლებელია დაკავებული იყოს ადგილების მხოლოდ ნახევარი.

ჩვენი მხრიდან დავამატეთ ის, რომ კინოსეანსებზე დასწრება შესაძლებელი იქნება მხოლოდ მათთვის, ვინც არის ვაქცინირებული, ან გადატანილი აქვს კოვიდი უახლოეს ხანებში ან PCR ტესტის საფუძველზე – ეს საბუთი მაყურებელმა ნაბეჭდი სახით ან ელექტრონულად უნდა წარმოადგინოს დარბაზში შესვლისას.

„აპოლოს“ ბილეთების გაყიდვების სისტემას გამოვიყენებთ, რომ კინოდარბაზში შესვლა ორგანიზებულად მოხდეს და არ იყოს გაუგებრობა. დღისით, პირველ 2 სეანსზე დასწრება უფასო იქნება, საღამოს სეანსებს კი ექნება სიმბოლური ფასი – 2.5 ლარი, რაც ონლაინსისტემების გამოყენების თვითღირებულებაა.

ფილმს მაყურებელმა პირბადით უნდა უყუროს.

  • ამჟამად შეინიშნება კოვიდის ახალი შემთხვევების კლების ტენდენცია, თუმცა თუ დაწესდება ახალი შეზღუდვები, მზად ხართ ფესტივალის ისევ ონლაინ ჩასატარებლად?

დიდი დრო არ არის დარჩენილი 18 სექტემბრამდე. თუ რეგულაცია არ შეიცვალა, ჩავატარებთ აუცილებლად კინოდარბაზში და თუ არ იქნება ამის საშუალება, მაშინ მოგვიწევს ონლაინ ჩატარება.

  • რაც შეეხება წლევანდელი კინოფესტივალის პროგრამას, აისახა თუ არა პანდემია ფილმებისა და კინოფესტივალის სექციების რაოდენობაზე?

დიდი გავლენა არ ყოფილა. წელს საკმაოდ დიდი რაოდენობის ფილმები იყო გასულ წელთან შედარებით. წელს ჩატარდა კინოფესტივალები. შარშან, როგორც იცით, გაუქმდა კანის, ლოკარნოს და კიდევ რამდენიმე მნიშვნელოვანი კინოფესტივალი, სადაც პრემიერები ვერ შედგა. ეს პრობლემაა ჩვენთვის, რადგან თუ ფილმი პრემირებული არ არის დიდ ფესტივალზე, ვერ აჩვენებ. წელს ეს პრობლემა ნაკლებად იყო.

პრობლემა ისაა, რომ შეზღუდული ვართ ბიუჯეტში უკვე, მნიშვნელოვნად შემცირდა ბიუჯეტი, უცხოელი სტუმრები ფაქტობრივად არ გვეყოლება, მხოლოდ რამდენიმე სტუმარი გვყავს. ჩვენთვისაც არ იყო ცნობილი როგორ ჩატარდებოდა ფესტივალი, რა რეგულაციები იქნებოდა და ამ პირობებში ძალიან რთულია ვინმეს მოელაპარაკო ჩამოსვლაზე.

ფესტივალის პროგრამა უკვე მზად არის. საერთაშორისო მხატვრული ფილმების კონკურსში გვექნება 9 ფილმი, აქედან 2 ქართული ფილმია, ქართულ-გერმანული კოპროდუქციები. ერთია ალექსანდრე კობერიძის ფილმი [ “რას ვხედავთ, როდესაც ცას ვუყურებთ?“], რომელიც ბერლინალეს კინოფესტივალზე იყო პრემირებული და, ასევე, სოსო ბლიაძის ფილმი [„ოთარის სიკვდილი“], რომლის პრემიერა კარლოვი ვარის კინოფესტივალზე შედგა. ასევე იქნება რამდენიმე ირანული, უნგრული ფილმი, უკრაინელი რეჟისორის ოლეგ სენცოვის ფილმი, რომლის პრემიერაც ახლახან შედგა ვენეციის კინოფესტივალზე.

რაც შეეხება დოკუმენტურ ფილმებს, 7 დოკუმენტური ფილმი იქნება საკონკურსო სექციაში, ძალიან საინტერესო პროგრამაა, არის ფილმები რუსეთიდან, იტალიიდან და პოლონეთიდან.

მოკლემეტრაჟიანი ფილმების სექციაში 25 ფილმი იქნება წარმოდგენილი, აქედან 6-7 ქართული ფილმია.

ასევე, ტრადიციულად, ფესტივალის პროგრამის ნაწილია „დიდოსტატთა კოლექცია“, სადაც წარმოდგენილი იქნება ლეო კარაქსის, სერგეი ლოზნიცას, ასგარ ფარადის და რომან ბალაიანის ფილმები.

გვაქვს სექცია „ქართული პანორამაც“, სადაც არასაკონკურსოდ ვაჩვენებთ წლევანდელ და შარშანდელ ქართულ ფილმებს.

ასევე, დოკუმენტური ფილმების ფესტივალ artdocfest-თან თანამშრომლობის ფარგლებში ვაჩვენებთ რამდენიმე დოკუმენტურ ფილმს.

  • როგორ იმუშავებს ჟიური? ფიზიკურად დაესწრებიან ფესტივალს, თუ დისტანციურად ნახავენ? 

ჟიურის წევრების უმრავლესობა ქართველია. არის რამდენიმე უცხოელი, რომლებიც ჩამოვლენ და ადგილზე ნახავენ ფილმებს, თუ რაიმე განსაკუთრებული ცვლილება არ მოხდა.

  • ვინ არიან ჟიურის თავმჯდომარეები სექციების მიხედვით? 

მხატვრული ფილმების ჟიურის თავმჯდომარე ლანა ღოღობერიძეა, დოკუმენტური ფილმების კონკურსის თავმჯდომარე იქნება ვახტანგ კუნცევ-გაბაშვილი და მოკლემეტრაჟიანი ფილმების კონკურსის – დათო ჯანელიძე.

  • კორონავირუსის პანდემიამ დააზარალა ბათუმის საერთაშორისო კინოფესტივალი?

შარშან იყო პირველი წელი, როცა ფესტივალი ვერ ჩატარდა. იცით, რომ შარშან იმავე სიტუაციაში იყო ბევრი ცნობილი ფესტივალი, რადგან სხვა გზა არ აყო. ჩვენ მზად ვიყავით, იყო პროგრამა, თარგმნილი იყო ფილმები და ამიტომ ჩავატარეთ ონლაინ. ეს არ არის ფესტივალისთვის მისაღები ფორმატი, მაგრამ ადამიანებმა შეძლეს ფილმების ნახვა.

პანდემიის პირობებში კინოფესტივალის ბიუჯეტი შემცირებულია, ნახევარზე ნაკლებია, რაც პანდემიამდე გვქონდა, ვერ ვახერხებთ უცხოელი სტუმრების მოწვევას, მოგვიწია ფილმების რაოდენობის შემცირება 10-15 პროცენტით. ადრე თუ ფესტივალი 8 დღეს გრძელდებოდა, წელს 7 დღე იქნება, თუმცა წარმოდგენილია ძალიან საინტერესო პროგრამა.

 

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com