აჭარის მთავრობამ „ქობულეთის საწარმოო კომბინატის“ საკუთარი 80%- იანი წილი აუქციონზე გაიტანა. მთავრობის ინფორმაციით, საწარმოს აქტივი 2021 წლის პირველი იანვრის მდგომარეობით 50 834 ლარია, მათ შორის 48 364 ლარი გრძევადიანი აქტივია. საწარმოსთან ერთად იყიდება 2 ჰექტრამდე მიწის ფართობი თბილისის ქუჩის #2-ში და მასთან დაკავშირებული შენობები.
ქონების საწყისი ფასი 2 მილიონ 630 000 ლარია, ბიჯი – 50 000 ლარი.
გარდა ამისა, აუქციონში გამარჯვებული ვალდებულია გადაიხადოს საწარმოს ბალანსზე არსებული დავალიანება 6 თვის ვადაში. მთავრობის ინფორმაციით, საწარმოს საბიუჯეტო დავალიანება 2021 წლის 1-ელი იანვრის მდგომარეობით 75 145 ლარია, რომელსაც ყოველ ვადაგადაცილებულ დღეზე ერიცხება საურავი.
აუქციონის პირობებში მითითებულია ასევე, რომ საწარმოს საკუთარი კაპიტალი 2021 წლის 1-ელი იანვრის მდგომარეობით 50 834 ლარია.
კიდევ ერთი პირობის მიხედვით, საბოლოო საპრივატიზებო თანხა აუქციონში გამარჯვებულმა ელექტრონული აუქციონის ჩატარებიდან 30 კალენდარულ დღეში უნდა გადაიხადოს.
სხვა რაიმე განსაკუთრებული პირობა დაწესებული არ არის. ეს იმას ნიშნავს, რომ დიდი ალბათობით ამ ადგილს სამშენებლო კომპანია იყიდის, აქ აშენებულ მაღლივ შენობას კი რამდენიმე მხარეს ზღვის ხედი ექნება, რაც ამ დრომდე არსებული პრაქტიკით ნებისმიერი ინვესტორისთვის ფულის სარფიანად დაბანდების შესაძლებლობაა, მომავალში მინიმუმ ორმაგი მოგების პერსპექტივით.
აუქციონი 7 სექტემბერს გამოცხადდა და 28 სექტემბერს უნდა დასრულდეს.
