27 წლის პიანისტი ბუღრა ჩანკირი აუტისტური სპექტრის აშლილობის მქონე პირველი დოქტორანტი გახდა თურქეთში, მას შემდეგ, რაც ქვეყნის უმაღლესი განათლების საბჭომ მიიღო გადაწყვეტილება აუტისტური სპექტრის აშლილობის მქონე სტუდენტებისთვის დაუშვას გამონაკლისი და მოხსნას სადოქტორო პროგრამაზე უცხო ენის გამოცდა.
ამ გადაწყვეტილებას წინ უძღოდა ბუღრა ჩანკირის მამის პეტიცია და კამპანია აუტისტური სპექტრის აშლილობის მქონე სტუდენტების განათლების მხარდასაჭერად.
ბუღრა ჩანკირს თურქულ მედიაში მუსიკალურ გენიოსს უწოდებენ. როცა 10 წლის იყო, მისმა მუსიკის მასწავლებელმა იეჭვა, რომ ბავშვს აბსოლუტური სმენა ჰქონდა. ბურგა ოჯახმა 2004 წელს კალიფორნიის უნივერსიტეტში წაიყვანა, სადაც ბუღრა მიიჩნიეს მსოფლიოში ყველაზე კარგი სმენის მქონე ადამიანად. მან სმენის ტესტის 36-ვე ქულა აიღო.
თურქული მედია წერს, რომ ბუღრა ჩანკირს 3 წლის ასაკში დაუსვეს აუტიზმის დიაგნოზი. მედიის ცნობით, 3.5 წლის ასაკში მას არ ჰქონდა წარმოთქმული არც ერთი სიტყვა, მაგრამ უკვე შეეძლო კითხვა.
