Batumelebi | „ჩახედული არ ვარ“ – შუახევში ოპოზიციური ერთობის მერობის კანდადატი სოფლებში უწყლობაზე „ჩახედული არ ვარ“ – შუახევში ოპოზიციური ერთობის მერობის კანდადატი სოფლებში უწყლობაზე – Batumelebi
RU | GE  

„ჩახედული არ ვარ“ – შუახევში ოპოზიციური ერთობის მერობის კანდადატი სოფლებში უწყლობაზე

მთავარ პრობლემად უწყლობას და ხილის საწარმოების არქონას ასახელებს ოპოზიციური ერთობის მერობის კანდიდატი შუახევში როინ ზოიძე. ის მიიჩნევს, რომ საქმე კორუფციასთან გვაქვს და ამიტომაც აწუხებთ ამ დრომდე შუახევის სოფლებში სასმელი წყლის პრობლემა.

როგორ აპირებს წყლის პრობლემის მოგვარებას მერობის კანდიდატი, რა ფინანსებით და როდის? – როინ ზოიძეს „ბათუმელებმა“ რამდენიმე კითხვა დაუსვა.

  • ბატონო როინ, თქვენი აზრით, რა არის შუახევში ყველაზე დიდი პრობლემა და როგორ წარმოგიდგენიათ მისი მოგვარება? 

პრობლემები არის ძირითადად უწყლობა, ასევე სოფლის მეურნეობა – უხვი მოსავალია და რეალიზაცია არ არის, ხილი არის ძალიან ბლომად და ნიავდება, არ არის მიმღები პუნქტები. ამას სჭირდება ძირეული ცვლილებები. ფერმერმა უნდა ჩააბაროს ხილი. ასევე არის მესაქონლეობა, მაგრამ რეალიზებას ვერ უკეთებენ რძეს, ყველს, ხორცს.

  • თქვენ როგორ დაეხმარებით გლეხს ამ პრობლემების მოგვარებაში? 

ძირეული ცვლილებებია საჭირო, რომ მთავრობის ხელშეწყობით მოხდეს ბიზნესსა და ფერმერზე დახმარება. ცენტრალური ხელისუფლება უნდა დაგვეხმაროს.

  • ახლა მერის სავარძელში რომ იჯდეთ, კონკრეტულად თქვენ რას შეცვლიდით

მოვთხოვდი ხელისუფლებას, რომ აუცილებლად გაიხსნას რამდენიმე მიმღები პუნქტი, მერე თამბაქოს მიმღები პუნქტი უნდა გაიხსნას, ასევე ხორცი, ყველი, კარაქი უნდა ბარდებოდეს ადგილზე.

შუახევს აქვს პოტენციალი ძალიან დიდი, რომ ტურიზმის განვითარება მოხდეს. ტურიზმის განვითარება დაწყებული იყო 2012 წლამდე ღომაზე და გომარდულზე. კიდევ არის რამდენიმე ღირშესანიშნავი ადგილი, სადაც შესაძლებელია, რომ ჩვენ ტურისტები მოვიზიდოთ. მოვა ტურისტი და გლეხი ადგილზე რასაც მოიყვანს, ტრანსპორტი, რაც სჭირდება ბათუმში ჩასატანად, იმას დაზოგავს და ტურისტი ადგილზე შეისყიდის მოყვანილ პროდუქტს.

ტურიზმი თუ განვითარდება, ამით გლეხი და ფერმერი საშუალებას ნახავს, რომ ოჯახი არჩინოს. ამას პლუს რაიონები იცლება, სოფლები იცლება. დღეს სოფლებში სკოლაში 10, 15 მოსწავლეა, 20 მოსწავლე თუ არის სოფელში, ეს არის რეკორდული მაჩვენებელი. როცა მოსავალს ფასი ექნება, სოფლიდან აღარ წავა არავინ. როცა ხელისუფლება შეუწყობს ხელს, სოფლის მეურნეობა აღორძინდება.

  • მაგალითად, კურორტ გომარდულისთვის რას აკეთებს დღეს მერია და თქვენ რას გააკეთებთ? 

გომარდულზე და ღომას მთაზე იყო დაწყებული სამუშაოები და არ არის დასრულებული ინფრასტრუქტურული ღონისძიებები, არც სასტუმროა, არც კოტეჯები.

  • რა თანხა დასჭირდება ამ ინფრასტრუქტურულ სამუშაოებს და სად ნახავთ ამ ფულს? 

ამისთვის საჭიროა ხელისუფლების ძირეული ცვლილებები, რომ მთავრობასთან მოლაპარაკებით დავეხმაროთ რაიონს. უნდა მოგვცეს სუბსიდია ან ტრანსფერი. შესაძლებელია სასტუმრო რამდენიმე კერძო პირმა გააკეთოს, მაგრამ ინფრასტრუქტურა არის ხელისუფლების გასაკეთებელი.

რა თანხაც შუახევშიც იხარჯება, ნახევარზე მეტი მიდის ჯიბეებში, კორუფციის დიდი ნიშნები არსებობს, 20 თუ 25 მილიონი იყო დახარჯული წყლის მოსაყვანად შუახევის რაიონში და დღეს შუახევის დონეზე მოსახლეობას წყალი არ მიეწოდება. ჩვენ ხელისუფლებაში აუცილებლად მოვალთ და ამის შემდეგ გაკეთდება ყველაფერი.

  • კორუფციის კონკრეტული ფაქტები შეგიძლიათ დაასახელოთ? 

მე ხშირი შეხება არ მქონია, აქ არ ვმუშაობდი, მაგრამ არიან კომპეტენტური პირები, რომლებიც გასცემენ მაგ ციფრებზე პასუხს. არ ვარ მაგ საქმეში ჩახედული და ვერ გავცემ მაგაზე პასუხს.

  • გაქვთ გეგმა შემუშავებული, რა ფორმით ჩართავთ მოქალაქეებს გადაწყვეტილებების მიღების პროცესში? 

აუცილებლად მოსახლეობა უნდა ჩავაყენოთ საქმის კურსში და მოქალაქემ უნდა იცოდეს თითოეული კაპიკი რაში იხარჯება. დახარჯული ფული უნდა აისახებოდეს თითოეული ჩვენგანის ოჯახებზე.

ჩვენ 24-საათიან რეჟიმში გვექნება მოსახლეობასთან კომუნიკაცია, ვივლით კარდაკარ და მოსახლეობის პრობლემებს მივიტანთ გულთან, მოსახლეობა გვეტყვის, მის სოფელში რა არის გასაკეთებელი. ჩვენი შესაძლებლობით, რაც რომ შეგვიძლია, მუნიციპალიტეტს დავუდგებით გვერდში. არც ერთი კაპიკი არ დაიხარჯება მოსახლეობის გარეშე.

  • ვინ მიიღებს გადაწყვეტილებებს, თუკი თქვენ 24-საათიან რეჟიმში მოსახლეობასთან აპირებთ ურთიერთობას? 

მუდმივად ვიქნებით მოსახლეობასთან ყოველდღიურ რეჟიმში, არ ვიქნებით კაბინეტებში გამოკეტილი, არ ვიქნებით იმათთან გარიგებული, ვინც მუშაობს ტენდერებში და „ატკატების“ სახით რომ ორი კაპიკი ჯიბეში ჩავიდოთ.

  • ისევ აღნიშნეთ კორუფცია და „ატკატები“. იქნებ კონკრეტულად უთხრათ ამომრჩეველს, რაზე გაქვთ ინფორმაცია? 

გითხარით, რომ დახარჯულია 20 თუ 25 მილიონი და შუახევის დონეზე წყლის დიდი პრობლემაა. როცა გაწვიმდება, ყანებს რწყავენ მაშინ, დანარჩენი არაფერი გაკეთებული არ არის, არის ყველაფერი უხარისხო, მაგის ფაქტებიც არის. რა თანხაც არის დახარჯული, მისი ნახევარიც არ არის გაკეთებული. მაგალითად, ფურტიოში, ნიგაზეულში, ბუთურაულში, ნენიაში, ჩანჩხალოში არის დიდი ფული დახარჯული და წყალი საერთოდ არ მოედინება.

  • იქნებ პროფესიონალიზმის პრობლემაა? 

ვისი ბრალია მერე? ხელისუფლების ბრალია ესეც. რატომ ჩაიბარეს, ამდენი ფული როცა ჩაურიცხეს?… არაპროფესიონალიზმის პრობლემა იმდენად არ დგას, რამდენი პრობლემაც დგას ხელისუფლების, რომელმაც გამოაცხადა ტენდერი და ჩაიბარა სამუშაოები, რაც ხარისხიანად შესრულებული არ არის.

თანხა არ არის რეალურად დახარჯული, ეს წავიდა კონკრეტული ჩინოვნიკების ჯიბეში.

  • თქვენი აზრით, როგორ უნდა გაიზარდოს შუახევის ბიუჯეტი. რა გზებით? 

დღეს ადამიანი ექიმთან რომ მივიდეს, იმის ჯიბის ფულიც კი არ აქვს. ჩვენი ხელისუფლება კი, აგარაკებს, ბინებს ყიდულობს, ყველა კვარტალში მანქანებს იცვლიან და ხალხი ახსენდებათ არჩევნებამდე ერთი კვირით ადრე. არჩევნები ჩაივლის და ხალხთან აღარ მიდიან…

  • ქონება, რომელიც მუნიციპალიტეტშია, უნდა იყოს თუ არა მუნიციპალური საკუთრება? რა გზებით წარმოგიდგენიათ ამის მიღწევა? 

შუახევის რაიონში რომ მოსახლეობამ იგრძნოს თავი ძალიან კარგად, ჩვენ ხელი უნდა შევუწყოთ ფერმერებს. ამისათვის საჭიროა, რომ გაიხსნას მიმღები პუნქტები და ხელისუფლებამ შეღავათები უნდა გააკეთოს გადასახადებზე. უყურადღებოდ არის რაიონი მიგდებული.

  • კონკრეტულად რას შეცვლით მუნიციპალურ ქონებასთან დაკავშირებით? 

იქნება მაქსიმალური ყურადღება ჩვენს რაიონში მცხოვრებზე…

[აქ როინ ზოიძესთან სატელეფონო საუბარი შეწყდა და მასთან ხელახლა დაკავშირება ვეღარ მოვახერხეთ. მერობის კანდიდატს ტელეფონით მაშინ ვესაუბრეთ, როცა ის შუახევში ხვდებოდა მოსახლეობას].

ნეტგაზეთის მასალების სხვა გამოცემებში გადაბეჭდვის წესი
ავტორი