Batumelebi

„ჩემი პირადი აზრი თუ გაინტერესებთ, ჩემთვის ნათელია, რომ რუსეთი ახორციელებს აგრესიას. ამ შემთხვევაში ეს ფაქტია, რომელსაც ვერსად ვერ გავექცევით. ამიტომ ჩემი პირადი მოსაზრებაა, რომ რუსეთი არის აგრესორი,“ – მიიჩნევს დავით ნარდაია, ის ნატო-ში საქართველოს წარმომადგენლის მოადგილეა. დავით ნარდაია დღეს, პირველ თებერვალს ნატო-ს საინფორმაციო ცენრის ორგანიზებით რეგიონული მედიის ჟურნალისტებს შეხვდა. ონლაინშეხვედრაზე ჟურნალისტებმა კითხვები ძირითადად უკრაინაზე დასვეს და იმ რეზოლუციაზე, რომელიც საქართველოს პარლამენტმა მიიღო ისე, რომ რუსეთი არც კი ახსენა.

„უნდა იყოს თუ არა პარლამენტის მიერ მიღებულ რეზოლუციაში ნახსენები რუსეთი?“ – ჰკითხა „ბათუმელებმა“ ნატო-ში საქართველოს წარმომადგნლის მოადგილეს მას შემდეგ, როცა მან თქვა, რომ „რუსეთი ახორციელებს აგრესიას“. დავით ნარდაიას ვუთხარით ისიც, რომ ხელისუფლების ცალკეული პირი „ოცნებიდან“ ამბობს იგივეს, რომ რუსეთი აგრესორია, თუმცა რეზოლუციაში იმავეს არ წერენ.

„მე არ ვარ პარლამენტის წევრი, სამწუხაროდ… მე ვარ ბიუროკრატი, აღმასრულებელი ხელისუფლების წარმომადგენელი და შემიძლია ვთქვა ის, რაც კეთდება აღმასრულებელი ხელისუფლების მხრიდან, კონკრეტულად რა კეთდება ნატოში უკრაინის საკითხთან დაკავშირებით. ყველაფერს ვაკეთებთ უკრაინელებთან კონსულტაციით, ყოველ კვირას გვაქვს შეხვედრები, ვცვლით ინფორმაციას, ყოველ კვირა ვაჯერებთ პოზიციებს უკრაინელებთან ერთად…

პარლამენტი არის ორგანო, სადაც ეს გადაწყვეტილება მიიღება. ჩემი აზრით, გადაწყვეტილება რეზოლუციის ტექსტთან დაკავშირებით უნდა მიიღონ პარლამენტარებმა. მე, პირადად, ვფიქრობ, რომ რუსეთი აგრესორია და ამას ვამბობ არამხოლოდ 2008 წლიდან გამომდინარე, მე თვითონ ვარ წარმოშობით აფხაზეთიდან, ვარ იძულებით გადაადგილებული პირი, ჩემთვის რუსეთი აგრესორია მოყოლებული 1991 წლიდან. ამიტომ ჩემთვის კითხვა არ არსებობს ამასთან დაკავშირებით,“ – გვიპასუხა დავით ნარდაიამ.

ნატო-ში საქართველოს წარმომადგენლის მოადგილეს ვკითხეთ, ჰქონდათ თუ არა საქართველოს პოზიციაზე და რეზოლუციაზე საუბარი ნატო-ს მაღალჩინოსნებთან და რამდენად აისახება ეს საქართველოს იმიჯზე, როცა ჩვენ ნატო-ში წევრობა რუსეთისგან მოსალოდნელი, თუ შექმნილი საფრთხის გამო გვინდა, ოფიციალურად კი, ამას რეზოლუციით ვერ ვამბობთ.

დავით ნარდაიას შევახსენეთ, რომ საქართველოს პარლამენტის რეზოლუციას უკრაინასთან დაკავშირებით ექსპერტები აფასებენ, როგორც „გაურკვეველს“, „არადამაჯერებელს,“ ასევე „ჰგავს რუსული პოზიციის გამყარების მცდელობას“.

„იმოქმედებს თუ არა ეს კონკრეტული რეზოლუცია ჩვენს იმიჯზე, ამაზე საკითხი საერთოდ არ დგას, ყველამ იცის ნატოში ჩვენი პოზიცია უკრაინასთან დაკავშირებით, ყველამ იცის ჩვენი პოზიცია რუსეთთან დაკავშირებით. მიუხერდავად იმისა, საბოლოოდ რა ტექსტი იქნება რეზოლუციაში, ამას ნატო-ში გავლენა იმაზე, თუ რა იმიჯი გვექნება ჩვენ, დამერწმუნეთ არ ექნება. ყველას ესმის ჩვენ რა პოზიცია და დამოკიდებულება გაგვაჩნია რუსეთის ფედერაციის მიმართ,“ – აღნიშნა დავით ნარდაიამ.

ქმნის თუ არა მინიმუმ უხერხულობას, როცა რუსეთის ხსენების გარეშე იღებს რეზოლუციას პარლამენტი? – ნატო-ში საქართველოს წარმომადგენლის მოადგილემ კითხვის პასუხად ვრცლად ისაუბრა იმაზე, რომ უკრაინის საკითხი მხოლოდ უკრაინას არ ეხება და ეს პირდაპირ ჩვენი ფრონტიცაა.

„უკრაინის საკითხი დღეს არა მხოლოოდ უკრაინას ეხება, არამედ ჩვენც გვეხება. ეს არის ფრონტი, რომელიც არამხოლოდ უკრაინას და რუსეთს ჰყოფს, არამედ ჰყოფს რუსეთს და დანარჩენს დემოკრატიულ სამყაროს.

ამიტომაც უკრაინაში მიმდინარე მოვლენები ეხება არამხოლოდ უკრაინას.

თქვენ თუ გაიხსენებთ ბოლო ასეთ მაღალი დონის შეხვერას, ეს იყო მინისტერიალი რიგაში, სადაც საქართველო და უკრაინა ერთად  ვიყავით შეხვედრაზე, სადაც საქართველო და უკრაინა ერთიანი პოზიციით გავედით, სადაც საქართველო და უკრაინა ზუსტად ერთსა და იმავეზე ვსაუბრობდით… ამ შემთხვევაში მნიშვნელოვანია, რომ როცა საუბარია უკრაინაზე, არ იყოს საუბარი მხოლოდ უკრაინაზე. ეს პროცესი უკრაინით არ დაწყებულა, პროცესი დაიწყო საქართველოდან, სამწუხაროდ 2008 წელს. მე ასე ვიტყოდი, რომ ამ საკითხს სათანადო ყურადღება არ მიექა, ზუსტად ამით არის განპირობებული მოვლენები, რა მოვლენებიც განვითარდა შემდგომში უკრაინაში.

ის აგრესია, რასაც რუსეთი ახორციელებს დღეს უკრაინის მიმართ, ის აგრესია, რაც განხორციელდა, მაგალითად, ყირიმის აგრესიით, ეს საკითხი ეხება არამხოლოდ უკრაინას, ეს საკითხი პირდაპირ გვეხება ჩვენ.

არ ვიცი, რეზოლუციაზე მოლაპარაკებები როგორ დასრულდება, თუმცა აღმასრულებელი ხელისუფლების მხრიდან ამ საკითხს ყოველთვის ესმება ხაზი, რომ ჩვენ არ ვაღიარებთ ყირიმის ოკუპაციას, რომ ჩვენ ვართ კატეგორიული წინააღმდეგი იმ აგრესიული პოლიტიკის, რასაც რუსეთი ახორციელებს აღმოსავლეთ უკრაინაში. ჩვენ ვართ უკრიანელი მეგობრების გვერდით და ამას გამოვხატავთ არამხოლოდ საუბრებით, მოლაპარაკებებზე, არამედ იმ საერთაშორისო ფორუმებზე, შეხვედრებზე, სადაც ჩვენ და უკრაინა ერთობრლივად გამოვდივართ.

იმის თქმა, რომ ჩვენ ამ შემთხვევაში არ ვუჭერთ უკრაინას მხარს, ან არასათანადოდ ვუჭერთ მხარს, ამაზე ალბათ ვერ დაგეთანხმებით – მე ვიცი, ყოველდღიურად აქ რაც ხდება,“ – აღნიშნა ონლაინშეხვედრაზე კითხვის პასუხად დავით ნარდაიამ, ნატო-ში საქართველოს წარმომადგენლის მოადგილემ.

კითხვებზე პასუხის გაცემამდე დავით ნარდაიამ ისაუბრა ნატო-სთან ინტეგრაციის კუთხით რამდენიმე აქტუალურ საკითხზე, მათ შორის, ხაზი გაუსვა იმას, რომ ნატო-ს სტრატეგიული თანამშრომლობის დოკუმენტში რუსეთი აღარ განიხილება და გამოჩნდა ახალი მოთამაშე – ჩინეთი.

„2010 წლის სტრატეგიულ დოკუმენტში არის ჩანაწერი, რომ ნატო-ს აქვს თანამშრომლობა რუსეთთან. წარმოიდგინეთ, თანამშრომლობაზე იყო საუბარი. დღეს არანაირ თანამშრომლობა არ არსებობს… რუსეთის მისია ნატო-ში არ ფუნქციონირებს… ნატო შეეცდება შეინარჩუნოს ჩანაწერი, რომ ნატო განაგრძობს დიალოგს რუსეთთან, რათა არ მოხდეს ესკალაცია სხვადასხვა საკითხზე.

ჩინეთი 2010 წელსაც იყო აქტუალური, მაგრამ მაშინ ქვეყნებმა ჩათვალეს, რომ ამის ასახვა არ იყო საჭირო. ამ შემთხვევაში იქნება საინტერესო ნატო-ს პოლიტიკა რა იქნება ჩინეთთან დაკავშირებით… ნატო-ს მოუწევს ერთ პოზიციაზე ჩამოყალიბება ჩინეთთან დაკავშირებით,“ – აღნიშნა დავით ნარდაიამ.

ნატო-ში საქართველოს წარმომადგენლის მოადგილეს ჟურნალისტებმა საქართველოს სამეზობლოზეც ჰკითხეს, ნატო-ში გაწევრიანების პერსპექტივაზე საუბრის დროს.

„მე მაქვს თურქეთის იმედი,“ – აღნიშნა დავით ნარდაიამ და ხაზი გაუსვა იმასაც, რომ რუსეთის გარდა, საქართველოს სხვა მეზობლებთან არ აქვს ცუდი ურთიერთობა: „ვიცი, რომ ეს არ არის პოპულარული მოსაზრება, განსაკუთრებით ზოგიერთ რეგიონში, თუმცა მინდა გითხრათ, რომ თურქეთი არის ყველაზე დიდი ინვესტორი, როდესაც ვსაუბრობთ საქართველოს უსაფრთხოებაზე. თურქეთი არის ყველაზე მსხვილი კონტრიბუტორი არამხოლოდ მორალური, ან განცხადებების დონეზე, არამედ ფინანსური კონტრიბუტორი, როდესაც საუბარი გვაქვს საქართველოს შეიარაღებულ ძალებზე. წლების განმავლობაში თურქეთი ხარჯავს საკმაოდ სოლიდურ თანხას იმისთვის, რომ გაძლიერდეს საქართველოს შეიარაღებული ძალები.

დამეთანხმებით, რომ თურქეთს რაღაც სხვა აზრები ჰქონდეს, შენ არ დაეთანხმები შენს მეზობელს შეიარაღებული ძალების გაძლიერებაში. ეს არის ერთ-ერთი ყველაზე კარგი ინდიკატორი იმისა, თუ რა პოზიცია გააჩნია თურქეთს საქართველოს მიმართ. თურქეთი არის ყველაზე აქტიური ქვეყანა ნატოში, როდესაც საუბარი ეხება ნატოში საქართველოს ინტეგრაციის საკითხს. ნებისმიერი გამოსვლა, რომელიც აქვს თურქეთის წარმომადგენელს ნატოში, ამბობს: მე ვფიქრობ, რომ საქართველო უნდა იყოს ნატოს წევრი ქვეყანა გუშინ, დღეს და ხვალ კი არა, უკვე უნდა იყოს ნატოს წევრი ქვეყანა. თურქეთი არის ჩვენი ერთადერთი მეზობელი, რომელთანაც საზღვარი გვაქვს დადგენილი“.

ნატაშა შევჩენკო მეუღლესთან და 2 შვილთან ერთად უკრაინიდან ბათუმში რამდენიმე წლის წინ გადმოსახლდა და აქ ინტერიერის დიზაინის სტუდია გახსნა.

უკრაინაში ნატაშასა და მისი მეუღლის მშობლები, ნათესავები და მეგობრები რჩებიან.

ბათუმში მცხოვრები უკრაინის მოქალაქე ქვეყანაში მიმდინარე მოვლენებზე საუბრობს და 2014 წლის ომს იხსენებს უკრაინაში.

• ნატაშა შევჩენკო, ბათუმში მცხოვრები უკრაინის მოქალაქე:

„5 წელია რაც მეუღლესთან და შვილებთან ერთად ვცხოვრობ საქართველოში. ლუგანსკის ოლქიდან ვარ, იმ ნაწილიდან, რომელიც ისევ უკრაინის შემადგენლობაშია. დიდხანს ვცხოვრობდით ხარკოვში და შემდეგ ბათუმში გადმოვედით საცხოვრებლად.

ჩემი მშობლები ფრონტისპირა ზონაში ცხოვრობენ, ლუგანსკში. ომის დროს საკუთარი თვალით ნახეს მათი ქალაქის აღება და მერე გათავისუფლება. მეუღლის მშობლები კი ხარკოვში ცხოვრობენ და მხოლოდ ტელევიზორიდან ვიგებთ, რა ხდება იქ.

ლუგანსკთან 2014 წლიდან მოყოლებული არ წყდება სროლები და ამასთან შეგუება უწევს ხალხს. ამასაც შეეჩვივნენ, მაგრამ მშვიდად ცხოვრება და მუშაობა უნდათ ადამიანებს.

თუ ისევ დაიწყება უკრაინაში ომი, ჩემი ასაკოვანი მშობლები ვერსად წავლენ, არ უნდათ წასვლა. რას იზამს ჩემი და თავის 18 წლის შვილთან ერთად, ომი რომ დაიწყოს, არ ვიცი, ამ თემაზე არ გვისაუბრია.

ომი არავის უნდა ჩემს ქვეყანაში. უკრაინაში ახლა ყველა მშვიდობისთვის ლოცულობს.

2014 წელს, როცა საშინელება ტრიალებდა ლუგანსკში, ომის შუაგულიდან ჩამოვიდა ჩემი და შვილთან ერთად ხარკოვში, სადაც შედარებით სიმშვიდე იყო.

უკრაინის ამბებს ვიგებთ მეგობრების, მშობლების და ნაცნობებისგან. საქართველოს ძალიან შევეჩვიეთ, ძალიან კარგად მიგვიღეს, აქ მშვიდად ვცხოვრობთ, ვმუშაობთ, ვაკეთებთ ჩვენს საყვარელ საქმეს, ადგილობრივებისგან დიდ მხარდაჭერას ვგრძნობთ.

რუსეთს უკრაინის ნატოში შესვლა არ სურს, ამიტომაც ხდება ის, რაც ახლა ხდება უკრაინაში. არავინ იცის რა იქნება მომავალში, როგორც პრაქტიკა გვაჩვენებს, მდგომარეობა შეიძლება ქვეყნის ნებისმიერ წერტილში დაიძაბოს. სამწუხაროდ, ესაა ჩვენი რეალობა.

ბათუმში ბევრი უკრაინელი ცხოვრობს და მუშაობს, არამხოლოდ 2014 წლის ომის დროს წამოსული ხალხი, სხვა დროსაც გადმოსახლებულები. ზუსტად არ ვიცი მათი რიცხვი, მაგრამ პირადად მე ბათუმში 80-მდე ნაცნობი მყავს უკრაინელი.

ახლა უკრაინისთვის ყველაზე მნიშვნელოვანი ორი რამ არის, მშვიდობა და ქვეყნის საზღვრების ხელშეუხებლობა“.

ხელვაჩაურის მუნიციპალიტეტის 2019-2020 წლების საქმიანობის შესაბამისობის აუდიტის ანგარიშის თანახმად, ხელვაჩაურის მერიამ ორ სოფელში გემურაულსა და განახლებაში ჭაბურღილის მოწყობისთვის, წყლის რესურსის განსაზღვრის მიზნით გეოლოგიური კვლევისათვის, მუნიციპალიტეტის ბიუჯეტიდან 45 000 ლარი გადაიხადა. ხოლო სოფელ განახლებაში წყლის სისტემის მოწყობის სამუშაოებზე 134 829 დახარჯა. თუმცა, სოფელს წყალი არ მიეწოდება.

„მუნიციპალიტეტის ინფორმაციით, აღნიშნული გამოწვეულია წყლის მარაგის დაწევით, თუმცა შესაბამისი დოკუმენტური დასაბუთება ვერ იქნა წარმოდგენილი. ამასთან, ანალოგიური მიზეზის გამო არ გამოიყენება მეორე სოფელში მოწყობილი ჭაბურღილიც.

აღნიშნული გარემოებით დასტურდება, რომ მერიის შესაბამისი პასუხისმგებელი პირების მიერ გეოლოგიური კვლევისა და სამშენებლო სამუშაოების მიმდინარეობის და მიღება-ჩაბარების ეტაპზე არ განხორციელდა სათანადო ღონისძიებები, არ გაითვალისწინეს წყლის მიუწოდებლობის შესაძლო რისკები. შედეგად, მოსახლეობისთვის წყლის ფაქტობრივი მიუწოდებლობის პირობებში, მერიამ ჩაიბარა სამუშაოები და ბიუჯეტიდან ჯამში გახარჯულია 179 829 ლარი,“ – ნათქვამია დასკვნაში, რომელსაც აუდიტის სახელმწიფო სამსახური აქვეყნებს.

აუდიტის კიდევ ერთი მიგნება შპს „ხელვაჩაურის წყალკანალს“ ეხება.

სახელმწიფო აუდიტის დასკვნის თანახმად, მუნიციპალიტეტში არსებული 66 ერთეული წყალსადენის რეზერვუარის მოვლა-ექსპლუატაციისთვის შპს „ხელვაჩაურის წყალკანალში“ დასაქმებულია 81 შტატგარეშე თანამშრომელი, რომლებზეც ორი წლის განმავლობაში გაიცა ხელფასი 431 000 ლარის ოდენობით.

„დასაქმებულ პირებს უნდა განეხორციელებინათ წყლის და შენობა-ნაგებობის რეცხვა-გასუფთავება, თუმცა ხელშეკრულებით გათვალისწინებული პირობებით ვალდებულების ჯეროვნად შესრულება წარმოდგენილი დოკუმენტებით არ დასტურდება. ამასთან, ვერ იქნა წარმოდგენილი დასაბუთებული რწმუნება შტატგარეშე თანამშრომელთა რაოდენობის განსაზღვრის თაობაზე,“ – ნათქვამია დასკვნაში.

აუდიტის დასკვნაში ასევე წერია, რომ შპს „ხელვაჩაურის წყალკანალმა“, 2019-2020 წლებში სათავე ნაგებობების გაწმენდისთვის, 195 შემთხვევაში 19 ფიზიკურ პირთან ყოველთვიურად გააფორმა ერთჯერადი ხელშეკრულებები და ბიუჯეტიდან დამატებით გადაიხადა 369 985 ლარი. თუმცა წარმოდგენილი დოკუმენტებით მათ მიერ სამუშაოების ფაქტობრივად განხორციელება ვერ იქნა დადასტურებული.

შესაბამისად, 2019-2020 წლებში, მუნიციპალიტეტმა, შპს „ხელვაჩაურის წყალკანალის“ მეშვეობით, წყალსადენის სათავე ნაგებობების და რეზერვუარის მოვლა-ექსპლუატაციისათვის დაქირავებულ ფიზიკურ პირებზე შრომის ანაზღაურებისათვის ჯამში 800 985 ლარი დახარჯა.

„ვერ დგინდება შესრულებული სამუშაოების მოცულობა, პერიოდულობა, შემსრულებელ პირთა ვინაობა და სამუშაოების განხორციელების ადგილმდებარეობა. აქვე საყურადღებოა, რომ შპს „ხელვაჩაურის წყალკანალს“ 2019 წლის 1 ივნისამდე აღნიშნული საქმიანობისათვის დამატებითი ხარჯები არ გაუწევია და სამუშაოები თავად განახორციელა, ხოლო აუდიტის პერიოდში მოპოვებული ინფორმაციით, 31 სათავე ნაგებობების გაწმენდით სამუშაოებს ახორციელებენ შტატგარეშედ დასაქმებული ოპერატორ-დეზინფექტორები,“ – ვკითხულობთ აუდიტის დასკვნაში.

აუდიტმა ხელვაჩაურის მერიას მისცა რეკომენდაცია, რომ დანერგოს ისეთი კონტროლის სისტემა, რომელიც დროულად გამოავლენს ხარვეზით შესრულებულ სამუშაოებს, განახორციელებს სათანადო რეაგირებას და უზრუნველყოფს შესრულებაში ნაჩვენები სამუშაოების ხელშეკრულების პირობებთან შესაბამისობის დადგენას.

ამასთან, მუნიციპალიტეტმა იმსჯელოს წყალსადენის სათავე ნაგებობების მომსახურებისთვის გაწეული ხარჯების მიზანშეწონილობის შესახებ, დაადგინოს ფაქტობრივად გაწეული მომსახურების დადასტურების გარეშე და წყლის სისტემის გაუმართაობის პირობებში, საბიუჯეტო სახსრების ხარჯვის გამომწვევი მიზეზები და გაატაროს კანონმდებლობით გათვალისწინებული ღონისძიებები.

საქართველოს ჯანდაცვის მინისტრის მოადგილის, თამარ გაბუნიას განცხადებით, პირველი თებერვლიდან კორონავირუსით ინფიცირებულ პირებს შეუძლიათ შეუძლიათ პირდაპირ მიმართონ თავიან ოჯახის ექიმს.

„დღეიდან შევიდა კიდევ ერთი ცვლილება, გადავედით დეცენტრალიზებულ მოდელზე, რაც ნიშნავს იმას, რომ თითოეულ მოქალაქეს შეუძლია უკვე კოვიდისთვის მეთვალყურეობა მიიღოს თავისივე ოჯახის ექიმისგან.

ეს განსაკუთრებით მნიშვნელოვანია ხანდაზმულ პირებში, ქრონიკული დაავადებების მქონე პირებში, რომლებმაც იციან, ვინ არის მათი ოჯახის ექიმი და როგორც კი დიაგნოზი დაუდასტურდებათ, შეუძლიათ დაუკავშირდნენ ოჯახის ექიმს და მიიღონ მისგან ბინაზე მეთვალყურეობა და რჩევა, თუ კი საჭირო იქნება, რა თქმა უნდა, გადამისამართდებიან ჰოსპიტალში“ – განაცხადა თამარ გაბუნიამ.

stopcov.ge-ის ინფორმაციით, პირველი თებერვლის მდგომარეობით კორონავირუსმა საქართველოში უკვე იმსხვერპლა 15 016 ადამიანი.

ბოლო მონაცემებით, ყოველდღიურად იზრდება ქვეყანაში ინფიცირების სტატისტიკა. მაგალითად, ბოლო 24 საათის განმავლობაში საქართველოში 24 201 ადამიანი დაინფიცირდა. ეს ბევრად მეტია, ვიდრე, მაგალითად გუშინ, როცა 13 150 ადამიანი იყო ინფიცირებული.

ბოლო ორი კვირის განმავლობაში კოვიდით ინფიცირების სტატისტიკა მუდმივად მზარდია.

დაავადებათა კონტროლის ეროვნული ცენტრის ხელმძღვანელის, ამირან გამყრელიძის თქმით, სიკვდილიანობის თითქმის 86 პროცენტი მოდის 60 წელს ზემოთ ადამიანებზე.

დღეს, პირველ თებერვალს, საკოორდინაციო საბჭომ  „მწვანე პასპორტები“ გააუქმა. დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ ჟურნალისტებს არ უპასუხა კითხვაზე – დაუჭირა თუ არა მხარი „მწვანე პასპორტების“ გაუქმებას?

ამ ეტაპზე საქართველოში კოვიდითაა ინფიცირებული 164 572 ადამიანი. მათგან 5 454 ადამიანი მკურნალობს საავადმყოფოში.

საქართველოში კორონავირუსით ინფიცირების პირველი შემთხვევა 2020 წლის 26 თებერვალს დაფიქსირდა.

ბუსტერიზაციის განსაკუთრებულ მნიშვნელობას გაუსვა ხაზი საკოორდინაციო საბჭოს დღევანდელი სხდომის შემდეგ ამირან გამყრელიძემ, დაავადებათა კონტროლის ეროვნული ცენტრის დირექტორმა. მისი თქმით, ბოლო მონაცემებზე დაკვირვების მიხედვით, ადამიანებს, რომლებსაც ბუსტერდოზა გაკეთებული აქვთ, იშვიათია ომიკრონით ინფიცირების შემთხვევა.

„ბუსტერიზირებულებში ინფექციის განვითარება ომიკრონის შედარებით იშვიათია და ის მიმდინარეობს ბევრად უფრო მსუბუქად, ამიტომ კიდევ ერთხელ ვიმეორებ მთავარ სლოგანს, რომ ბუსტერიზაცია გახლავთ ერთ-ერთი მთავარი იარაღი,“ – აღნიშნა ამირან გამყრელიძემ.

ამირან გამყრელიძემ ორჯერადად აცრისა და ბუსტერდოზის გაკეთებისკენ განსაკუთრებით 60 წელს ზევით მყოფ ადამიანებს მოუწოდებს.

„სადაც მეტი გვაქვს გართულებები, სადაც მოდის სიკვდილიანობის თითქმის 86 პროცენტი 60 წელს ზემოთ, რომ ეს ადამიანები აუცილებლად უნდა აიცრან, ვინც არ არის ორჯერადად აცრილი, ხოლო ვინც ორჯერადად აცრილია, გაიკეთონ ბუსტერი,“ – თქვა ამირან გამყრელიძემ.

დღეს, პირველ თებერვალს, საკოორდინაციო საბჭომ  „მწვანე პასპორტები“ გააუქმა. ამირან გამყრელიძემ ჟურნალისტებს არ უპასუხა კითხვას: დაუჭირა თუ არა მხარი „მწვანე პასპორტების“ გაუქმებას?

ხელისუფლებამ „მწვანე პასპორტი“ გააუქმა იმ ვითარებაში, როცა კორონავირუსით ინფიცირების მაჩვენებელი დღე-ღამეში უკვე 24 ათასს გასცდა, ხოლო ქვეყანაში კორონავირუსით 15 ათასზე მეტი ადამიანი გარდაიცვალა.

უწყებათაშორისი საბჭოს გადაწყვეტილებით ე.წ. მწვანე პასპორტი გაუქმდა.

„ომიკრონის გავრცელების სწრაფი ტემპისა და ვირუსის სუსტი მიმდინარეობის, ასევე, მსოფლიო პრაქტიკის გათვალისწინებით, საბჭომ მიიღო გადაწყვეტილება გაუქმდეს მწვანე პასპორტის მოთხოვნის ვალდებულება.

ის პირები, რომელთაც მწვანე პასპორტი საზღვარგარეთ გასამგზავრებლად ესაჭიროებათ, კვლავინდებურად შეძლებენ მისით სარგებლობას“ – განაცხადა დღეს, პირველ თებერვალს გიორგი ღიბრაძემ,  საკოორდინაციო საბჭოსთან არსებული შტაბის უფროსმა.

ე.წ. მწვანე პასპორტი, იგივე მწვანე სტატუსი, საქართველოში პირველ დეკემბერს ამოქმედდა და იგი საჭირო იყო რესტორნებში, კაფეებში, ბარებში, კინოთეატრებში, თეატრებში, ოპერაში, გასართობ ცენტრებში, სათამაშო ბიზნესთან დაკავშირებულ ობიექტებში, სპაცენტრებში, სასტუმროებში და სამთო კურორტების საბაგიროებზე შესასვლელად.

მწვანე პასპორტი ჰქონდა პირს, თუ იგი იყო კორონავირუსზე სრულად ვაქცინირებული, ან ჩატარებული ჰქონდა 72-საათიანი ვალიდურობის PCR-ტესტი ან 24-საათიანი ვალიდურობის ანტიგენ-ტესტი, ან გადატანილი ჰქონდა კორონავირუსი.

სახელმწიფო აუდიტის დასკვნის თანახმად, ხელვაჩაურის მუნიციპალიტეტმა ეკომიგრანტი ოჯახებისთვის მრავალბინიანი საცხოვრებელი სახლის მშენებლობა ისეთ იურიდიულ პირს დაუკვეთა, რომელსაც მსგავსი სამუშაოს ჩატარების გამოცდილება არ ჰქონდა. ბიუჯეტიდან ამ მიზნით 2 884 841 ლარი გაიცა.

აუდიტმა გამოარკვია, რომ კომპანიამ, რომელმაც ტენდერი მოიგო, სამუშაოების შესასრულებლად სხვა პირები დაიქირავა.

საცხოვრებელი სახლის საპროექტო-სახარჯთაღრიცხვო დოკუმენტაციის მომზადებასა და სამშენებლო სამუშაოებზე ტენდერი ხელვაჩაურის მერიამ 2019 წელს გამოაცხადა. ტენდერში  ამხანაგობა „მშენებლებმა“ გაიმარჯვა, რომელიც ორი იურიდიული პირის მიერ იყო დაფუძნებული 2019 წლის 18 იანვარს.

ტენდერით გათვალისწინებული სამუშაოების შესრულების მიზნით, საპროექტო-სახარჯთაღრიცხვო დოკუმენტაცია უნდა მოემზადებინა შპს „მშენებელთა ჯგუფი“, ხოლო სამშენებლო სამუშაოები უნდა შეესრულებინა „ახალ სტილს“.

სახელმწიფო აუდიტმა გამოარკვია, რომ პროექტის და ხარჯთაღრიცხვის მიმწოდებელს, შპს „მშენებელთა ჯგუფს“ საპროექტო დოკუმენტაციის შედგენის შესაბამისი გამოცდილება არ გააჩნდა და ფაქტობრივადაც ეს სამუშაო მას არ შეუსრულებია. სამუშაოები მესამე მხარემ შეასრულა.

„სატენდერო კომისიის ოქმებით ირკვევა, რომ სამშენებლო სამუშაოების შესრულებისათვის შესაბამისი გამოცდილება წარმოდგენილი აქვს ამხანაგობის დამფუძნებელს, შპს „ახალ სტილს“ და მისი ვალდებულებაა სამშენებლო სამუშაოების წარმოება, თუმცა როგორც პროექტირების შემთხვევაში, ანალოგიურად, სამშენებლო საქმიანობა ფაქტობრივად მას არ განუხორციელებია და გაფორმებულია დამატებითი ხელშეკრულება შპს „მშენებელი 2020“-თან, რომელიც დაფუძნებულია 2019 წლის 11 ივნისს.

აღსანიშნავია, რომ ამ უკანასკნელს არ გააჩნდა სამშენებლო საქმიანობის გამოცდილება. აღნიშნულთან დაკავშირებით მერიამ არ გაატარა შესაბამისი ღონისძიება. შედეგად, მრავალბინიანი საცხოვრებელი სახლის მშენებლობა განახორციელა გამოცდილების არმქონე შპს-მ, ამასთანავე, სამუშაოების მიღება-ჩაბარების ეტაპზე ინსპექტირება ჩატარდა მხოლოდ შესრულებული სამუშაოების, შესრულების აქტში ასახულ სამუშაოებთან შესაბამისობაზე, რაც წარმოშობს ფაქტობრივად შესრულებული სამუშაოების საპროექტო-სახარჯთაღრიცხვო დოკუმენტაციით გათვალისწინებულ პირობებთან შეუსაბამობის რისკს,“ – ვკითხულობთ აუდიტის დასკვნაში.

პროექტისა და ხარჯთაღრიცხვის შედგენისას და შემდეგ მშენებლობისას, დაშვებულია გარკვეული სახის ხარვეზები. კერძოდ, კონტრაქტით უნდა აეშენებინათ 2 805 კვ.მეტრი ფართი, თუმცა ააშენეს 61 კვ.მ-ით ნაკლები – 2 744 კვ.მეტრი საცხოვრებელი ფართობი.

„აღნიშნული მიუთითებს, რომ არ მიმდინარეობდა სათანადო ზედამხედველობა, მერიამ მიიღო სატენდერო წინადადებასთან შეუსაბამოდ შედგენილი პროექტი, არ გამოიყენა ხელშეკრულებით გათვალისწინებული უფლებები და შეუსრულებელი სამუშაოებისთვის ბიუჯეტიდან გადახდილია არანაკლებ 45 760 ლარით მეტი,“ – ვკითხულობთ აუდიტის დასკვნაში.

ეს არ არის ერთადერთი არამიზნობრივი ხარჯი, რომელიც მუნიციპალიტეტს აქვს გაღებული ეკომიგრანტი ოჯახებისათვის მრავალბინიანი საცხოვრებელი სახლის მშენებლობისთვის. მერიამ კომპანიას აუნაზღაურა სატრანსპორტო ხარჯი, მასზე დარიცხული ზედნადები ხარჯებისა და მოგების ჩათვლით, ჯამში 45 064 ლარი.

„ეკომიგრანტი ოჯახებისათვის 2 884 841 ლარის ღირებულების მრავალბინიანი საცხოვრებელი სახლის მშენებლობა განხორციელდა გამოცდილების არმქონე იურიდიული პირის მიერ, სადაც საბაზრო ფასთან შედარებით, ზედმეტად არის გადახდილი 194 586 ლარი, ხოლო სატრანსპორტო ხარჯის გაწევის დამადასტურებელი დოკუმენტების გარეშე ანაზღაურებულია 45 064 ლარი. აღნიშნული გარემოებები წარმოშობს საბიუჯეტო სახსრების არაეკონომიური ხარჯვის და არამართლზომიერი ქმედების რისკებს,“ – ნათქვამია აუდიტის ანგარიშში.

აუდიტმა რეკომენდაცია გასცა, რომ მერიამ შეიმუშაოს და დანერგოს დამატებითი კონტროლის მექანიზმები, რომლებიც უზრუნველყოფს სამშენებლო სამუშაოების მიმდინარეობაზე ეფექტიან ზედამხედველობას, კვალიფიციური ქვეკონტრაქტორის შერჩევას, ხარვეზების დროულად გამოვლენას და შესაბამის რეაგირებას. ამასთან, დაადგინოს მიმწოდებლის მიერ შეუსრულებელი სახელშეკრულებო ვალდებულების პირობებში სამუშაოს ჩაბარების გამომწვევი მიზეზები და გაატაროს სამართლებრივი ღონისძიებები.

ხელვაჩაურის მერიაში დასაქმებული 64 პირი, რომელთა ხელფასზეც ბიუჯეტიდან 230 851 ლარი დაიხარჯა, პარალელურად სხვა სამსახურშიც მუშაობდა.

ეს და სხვა ათობით დარღვევა ხელვაჩაურის მუნიციპალიტეტის 2019-2020 წლების საქმიანობის შესაბამისობის აუდიტის ანგარიშშია მოცემული, რომელსაც აუდიტის სახელმწიფო სამსახური აქვეყნებს.

აუდიტის თანახმად, 2019-2020 წლებში მუნიციპალიტეტში სრულფასოვნად არ გამოიყენებოდა სამუშაო დროის აღრიცხვის სისტემა. ამასთან არ დასტურდება, რომ ის 64 პირი, რომლებიც შეთავსებით სხვა უწყებებშიც იყვნენ დასაქმებული, მუნიციპალიტეტში სამუშაო დროს რაციონალურად იყენებდნენ.

დღეს დილით, ბათუმში, ჭავჭავაძის ქუჩაზე არსებული სუპერმარკეტების ქსელ „მეტრომარტის“ თანამშრომლებს, მაღაზიის შესასვლელში შუშები ჩამსხვრეული დახვდათ.

სავარაუდოდ ადგილი ჰქონდა ქურდობის ფაქტს ან ქურდობის მცდელობას.

თანამშრომლებმა არაფერი თქვას, წაღებულია თუ არა სუპერმარკეტიდან თანხა ან პროდუქცია.

ადგილზე უკვე მუშაობენ კრიმინალისტები.

პირველი თებევრლის მონაცემებით, გასულ 24 საათში აჭარაში კორონავირუსის 2 204 ახალი შემთხვევა დადასტურდა.

დღეის მონაცემებით, აჭარის კოვიდკლინიკებში 776 პაციენტს მკურნალობენ კოვიდზე.

______________

ფოტოზე: კოვიდზე ტესტირების მსურველთა რიგი ბათუმის პირველ პოლიკლინიკასთან. პირველი თებერვალი, 2022.

პირველი თებერვლის მონაცემებით, საქართველოში დადასტურდა კორონავირუსის 24 201 ახალი შემთხვევა.

გასულ 24 საათში 36 პაციენტი გარდაიცვალა კოვიდით.

დღეის მონაცემებით, დადებითობის დღიური მაჩვენებელია 28,41%, ბოლო 14 დღის – 21,96%, ბოლო 7 დღის – 24,96%.

ამ ეტაპზე საქართველოში კოვიდითაა ინფიცირებული 164 572 ადამიანი. მათგან 5 454 ადამიანი მკურნალობს საავადმყოფოში.

დღეს ქვეყანაში გამოვლენილი ინფიცირების 24 201 ახალი შემთხვევიდან თბილისში გამოვლენილია 11 800 შემთხვევა, აჭარაში – 2 204, იმერეთში – 3 134, ქვემო ქართლში – 1 199, შიდა ქართლში – 1 461, გურიაში – 473, სამეგრელო – ზემო სვანეთში – 1 628, კახეთში – 1 059, მცხეთა-მთიანეთში – 683, სამცხე-ჯავახეთში – 471, რაჭა-ლეჩხუმსა და ქვემო სვანეთში – 89.

საქართველოს მთავრობის ცნობით, პრემიერ-მინისტრ ირაკლი ღარიბაშვილს კორონავირუსის ომიკრონის შტამი დაუდასტურდა.

განცხადება ამის შესახებ მთავრობის ოფიციალური ფეისბუქგვერდზე გამოქვეყნდა.

„მთავრობის მეთაური თავს კარგად გრძნობს და მუშაობას დისტანციურ რეჟიმში განაგრძობს.

პრემიერ-მინისტრი სრულად ვაქცინირებულია. მას კოვიდ-19 გეგმური ტესტირების ფარგლებში დაუდასტურდა“ – ვკითხულობთ განცხადებაში.