Batumelebi | ბათუმში ლერმონტოვის ქუჩის ნაწილი 2 თვეა ჩაბნელებულია – რას ამბობენ მერიაში ბათუმში ლერმონტოვის ქუჩის ნაწილი 2 თვეა ჩაბნელებულია – რას ამბობენ მერიაში – Batumelebi
ნეტგაზეთი • RU

ბათუმში ლერმონტოვის ქუჩის ნაწილი 2 თვეა ჩაბნელებულია – რას ამბობენ მერიაში

დაახლოებით ორი თვეა, რაც ბათუმში, ლერმონტოვის ქუჩის უმეტეს ნაწილზე გარეგანათება არ მუშაობს. ღამით ჩაბნელებულ ქუჩაზე გადაადგილება განსაკუთრებით პრობლემური გახდა უამინდობის დროს, როგორც მძღოლებისთვის, ისე ფეხით მოსიარულეებისთვის.

ბათუმის მერიის კეთილმოწყობის სამსახურში ამბობენ, რომ ქალაქში გარეგანათებების დაზიანებული ნათურებისა თუ სხვა ტექნიკური ხარვეზების გამოსწორება ეტაპობრივად მიმდინარეობს, ამიტომ ზუსტი თარიღი, თუ როდის აღდგება ლერმონტოვის ქუჩაზე განათება, უცნობია.

საქალაქო ინფრასტრუქტურისა და კეთილმოწყობის სამმართველომ ტენდერი – 2022 წლის იანვრიდან ივლისამდე პერიოდში გარეგანათების მოვლაზე – 2021 წლის 6 დეკემბერს გამოაცხადა, წინადადებების მიღება კი 2022 წლის 1-ელ იანვარს დაიწყო და 6 იანვარს დასრულდა.

იანვრიდან ივლისამდე პერიოდში გარეგანათების მოვლისთვის ბათუმის მერიას ნახევარი მილიონი ლარი აქვს გამოყოფილი. ტენდერში გამარჯვებული კომპანია „აჭარგანათებაა“. წესით, კომპანიას თანხა ფაქტობრივად გაწეული სამუშაოს მიხედვით უნდა გადაუხადონ.

„აჭარგანათებასთან“ ხელშეკრულება რამდენიმე დღის წინ გაფორმდა. კომპანია ხელშეკრულებით ნაკისრი ვალდებულებების შესრულებას გამოდარების შემდეგ შეუდგება.

„როგორც კი ამინდი საშუალებას მოგვცემს, რომ შრომის უსაფრთხოების წესები დავიცვათ და ისე ვიმუშაოთ, იმ წამსვე დავიწყებთ ქალაქის მასშტაბით ყველა გათიშული და დაზიანებული ქუჩის განათების აღდგენას. ცხადია, რაც შედის ჩვენს კომპეტენციაში და გათვალისწინებულია ხელშეკრულებით“ – გვითხრეს  კომპანიაში.

„აჭარგანათებაში“ ასევე გვითხრეს, რომ ლერმონტოვის ქუჩის დიდ მონაკვეთზე გარეგანათების ხანგრძლივი გათიშვის მიზეზი ბაგრატიონის ქუჩის სარეაბილიტაციო სამუშაოები გახდა.

ლერმონტოვის ქუჩის მონაკვეთი

ვრცლად ამ თემაზე: ბათუმის გარეგანათებისთვის 29 მილიონი ლარი დაიხარჯება – ტენდერი 6 წლით

ნეტგაზეთის მასალების სხვა გამოცემებში გადაბეჭდვის წესი
ავტორი
ია ფრანგიშვილი არის გაზეთ "ბათუმელების" რეპორტიორი 2014 წლიდან