დანიურმა კვლევამ აჩვენა, რომ ომიკრონის BA.2 ვარიანტი, რომელიც სწრაფად გავრცელდა დანიაში, უფრო გადამდებია, ვიდრე ომიკრონის უფრო გავრცელებული BA.1 ვარიანტი და უფრო ადვილად შეუძლია აცრილი ადამიანების ინფიცირება. კვლევის შესახებ როიტერსი წერს.
კვლევამ, რომელმაც გააანალიზა კორონავირუსული ინფექციები 8500-ზე მეტ დანიურ ოჯახში დეკემბრიდან იანვრამდე პერიოდში, აჩვენა, რომ ომიკრონის BA.2 ვარიანტით ინფიცირებული ადამიანები დაახლოებით 33 პროცენტით უფრო მეტად აინფიცირებდნენ სხვებს, ვიდრე BA.1-ით ინფიცირებულები.
მსოფლიოში ომიკრონის „ორიგინალ“ ვარიანტ BA.1-ზე ომიკრონის შემთხვევების 98%-ზე მეტი მოდის, მაგრამ მისი მონათესავე ვარიანტი BA.2 მალევე გახდა დომინანტური შტამი დანიაში.
„თუ კონტაქტი გქონდათ ომიკრონ BA.2-თან, 39 პროცენტია ალბათობა იმისა, რომ დაინფიცირდეთ შვიდი დღის განმავლობაში. თუ მის ნაცვლად დაგემართათ BA.1, ალბათობა არის 29 პროცენტი”, – ამბობს „როიტერსთან“ საუბრისას კვლევის წამყვანი ავტორი, ფრედერიკ პლესნერი.
BA.2-ით ინფიცირების შემთხვევები ასევე რეგისტრირებულია აშშ-ში, ბრიტანეთში, შვედეთსა და ნორვეგიაში, მაგრამ გაცილებით ნაკლები რაოდენობით, ვიდრე დანიაში, სადაც BA.2 შეადგენს შემთხვევების დაახლოებით 82%-ს.
კვლევამ ასევე აჩვენა, რომ BA.2 BA.1 -ზე უფრო ძლიერი იყო ვაქცინირებული და დაბუსტული ადამიანების ინფიცირებაში, რაც მიუთითებს მის უფრო ძლიერ „იმუნური აცილების თვისებებზე“.
კვლევაში ხაზგასმითაა აღნიშნული, რომ ვაქცინები კვლავ მნიშვნელოვან როლს ასრულებდნენ, რადგან როგორც ბუსტერით ვაქცინირებული, ასევე სრულად ვაქცინირებული პირები ნაკლებად ინფიცირდებოდნენ და ასევე ნაკლებად აინფიცირებდნენ სხვებს, არავაქცინირებულ პირებთან შედარებით.
დანიის ჯანდაცვის სამინისტროს ცნობით, წინასწარმა ანალიზმა აჩვენა, რომ ომიკრონის ამ ვარიანტებს შორის ჰოსპიტალიზაციის რისკი ერთნაირია.
________________________________________________
მთავარ ფოტოზე: კორონავირუსის ომიკრონის ვარიანტის კომპიუტერული გენერირებული სურათი. წყარო: Uma Shankar Sharma/Getty Images
