ნეტგაზეთი • RU

ბათუმში საკრებულოს მაჟორიტარი წევრის არჩევნები 2 აპრილს გაიმართება

საქართველოს ცენტრალური საარჩევნო კომისიის ცნობით, ბათუმში საკრებულოს მაჟორიტარი წევრის არჩევნები 2022 წლის 2 აპრილს გაიმართება.

ინფორმაცია ამის შესახებ ცესკომ დღეს, პირველ თებერვალს გამოაქვეყნა.

ბათუმში 14 საარჩევნო უბანი გაიხსნება. ამომრჩეველმა საკრებულოს მაჟორიტარი დეპუტატი ადლიის საარჩევნო ოლქში უნდა აირჩიოს.

ადლიის საარჩევნო ოლქში ბათუმის საკრებულოს მაჟორიტარი დეპუტატი „ერთიანი ნაციონალური მოძრაობის“ წევრი, ნუგზარ ფუტკარაძე იყო. იგი 2021 წლის ნოემბერში, ახალი საკრებულოს შეკრებამდე გარდაიცვალა. ენმ აცხადებს, რომ მასზე მმართველი პარტია ზეწოლას ახდენდა და მის მოსყიდვას ცდილობდა.

მაჟორიტარი დეპუტატის არჩევა ბათუმის საკრებულოში გადაწყვეტს პოლიტიკურ ძალთა ბალანსს. 35 წევრისგან შემდგარ ბათუმის საკრებულოში ამჟამად „ქართული ოცნებას“ 16 წევრი ჰყავს, ოპოზიციას – 17 [მათ შორის: „ერთიანი ნაციონალური მოძრაობის“ 14 წევრი, „გახარია – საქართველოსთვის“ – 2, „ლელო“ -1], ხოლო ერთი წევრი დამოუკიდებელი დეპუტატია, გახარიას პარტიის ყოფილი წევრი, რომელმაც ღიაც განაცხადა, რომ ენმ-თან თანამშრომლობა მისთვის მიუღებელია.

იმ შემთხვევაში, თუ კი ბათუმში საკრებულოს მაჟორიტარ დეპუტატად ოპოზიციის წარმომადგენელს აირჩევენ, საკრებულოში უმრავლესობა ოპოზიციას ექნება, „ოცნების“ წარმომადგენლის შემთხვევაში კი – მმართველ პარტიას.

______________

ფოტოზე: 2021 წლის ადგილობრივი თვითმმართველობის არჩევნები ბათუმში.

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com