მთავარი,სიახლეები

რუსეთის 30-მდე დიპლომატი სამწლიანი ვადის ამოწურვის გამო აშშ-ს ტოვებს

31.01.2022 • 1060
რუსეთის 30-მდე დიპლომატი სამწლიანი ვადის ამოწურვის გამო აშშ-ს ტოვებს

შეერთებული შტატებში რუსეთის საელჩოდან 27 დიპლომატი წავიდა. მათ საელჩო დატოვეს ვაშინგტონის პირობების საფუძველზე, რომლის მიხედვითაც რუს დიპლომატებს აშშ-ში მხოლოდ სამწლიანი ვადით შეუძლიათ დარჩენა. ამ ინიციატივას მოგვიანებით რუსეთის საგარეო საქმეთა სამინისტრომ „დიპლომატების გამოხმობა“ უწოდა.

ინფორმაციას BBC ავრცელებს.

აშშ-ის სახელმწიფო დეპარტამენტის ცნობით, არ იგეგმება რუს დიპლომატთა სამწლიანი ლიმიტის შეცვლა.

2021 წლის სექტემბერში აშშ-მ რუსეთის დიპლომატიური მისიის 55-კაციანი სია გადასცა რუსეთს, რომლებმაც 2022 წელს ორ ეტაპად უნდა დატოვონ აშშ. 27-მა დიპლომატმა 30 იანვრამდე დატოვა ქვეყანა, 28 დიპლომატი კი 30 ივლისისთვის დაბრუნდება რუსეთში.

აშშ-ში რუსეთის ელჩის, ანატოლი ანტონოვის ცნობით, საელჩოში ამჯერად 184 თანამშრომელი რჩება, დიპლომატებისა და ადმინისტრაციულ-ტექნიკური პერსონალის ჩათვლით.

რაც შეეხება აშშ-ს საელჩოს რუსეთში, აშშ-ს ელჩის, ჯონ სალივანის ინფორმაციით, ახლა იქ 120 ადამიანი მუშაობს.

დიპლომატებთან დაკავშირებული შეზღუდვები ვლადიმერ პუტინმა დააწესა გასული წლის 21 აპრილს, რომლის თანახმადაც „არამეგობრულ ქვეყნებს“ ჩამოერთვათ უფლება რუსეთისა და მესამე სამყაროს ქვეყნების მოქალაქეების დაქირავების. ჩამონათვალში პირველი აშშ მოხვდა.

რუსეთში აშშ-ის ელჩის ინფორმაციით, 5 წლის განმავლობაში ამერიკული დიპლომატიური მისიის თანამშრომელთა რაოდენობა რუსეთში ათჯერ შემცირდა.

გადაბეჭდვის წესი


ასევე: