Batumelebi

ფინანსთა სამინისტროს შემოსავლების სამსახურის ინფორმაციით, მებაჟე ოფიცრებმა, განსაკუთრებით დიდი ოდენობით ოქროს საიუველირო ნაკეთობების შემოტანის მცდელობის ფაქტი აღკვეთეს „სადახლო საავტომობილოს“ საბაჟო გამშვებ პუნქტზე.

„ყაზახეთის მოქალაქეების შ.ნ.-ს და ს.ს.-ს კუთვნილი ბარგის, ეჭვის საფუძველზე, დეტალური დათვალიერების შედეგად, 2 კილოგრამამდე არადეკლარირებული ოქროს ნაკეთობები აღმოაჩინეს.

აღსანიშნავია, რომ სამართალდამრღვევ მოქალაქეებს ძვირფასეულობა საკვები პროდუქტების შეფუთვებში და ტაქსის მომსახურებით მოსარგებლე ავტოსატრანსპორტო საშუალების საბარგულში, მალულად ჰქონდათ განთავსებული.

საქონლის საერთო საბაჟო ღირებულებამ 189 040.96 ლარი შეადგინა.“ – აცხადებს შემოსავლების სამსახური

საქმე, შემდგომი რეაგირების მიზნით, ფინანსთა სამინისტროს საგამოძიებო სამსახურს გადაეცა.

ოზურგეთის სოფელ შრომაში მდებარე კულტურის სახლის შენობის რეაბილიტაციაზე საქართველოს კულტურული მემკვიდრეობის დაცვის ეროვნულმა სააგენტომ ტენდერი გამოაცხადა. სატენდერო თანხა 2 470 910 ლარია.

სოფელ შრომის კულტურის სახლის შენობა 1953-1956 წლებშია აშენებული და მას კულტურული მემკვიდრეობის ძეგლის სტატუსი აქვს.

შენობის რეაბილიტაციაზე საუბარი 2022 წელს დაიწყო.

სამუშაოები კულტურული მემკვიდრეობის დაცვის სააგენტოს 2023-2024 წლების დაფინანსების ფარგლებში ჩატარდება.

„სარეაბილიტაციო სამუშაოების შედეგად უნდა შენარჩუნდეს/აღდგეს ძეგლის ისტორიული იერსახე, ჩასატარებელმა სამუშაოებმა უნდა უზრუნველყოს ძეგლის არსებული მდგომარეობის გამოსწორების აუცილებელი ყველა ასპექტი. სამუშაოები მოითხოვს გამორჩეულად ფაქიზ მიდგომას, კარგად გამართულ მეთოდოლოგიურ და სწორ ხელმძღვანელობას“ – აღნიშნულია სატენდერო განაცხადში.

სატენდერო დოკუმენტაციაში ასევე ვკითხულობთ, რომ „შენობას პომპეზური და მხატვრულად გაფორმებული დარბაზი გააჩნია. ამ სივრცის მთავარი დეკორატიული აქცენტი მისი ჭერია, რომელიც უხვად არის მოხატული გასული საუკუნის 50-იანი წლებისათვის დამახასიათებელი ფიგურული კომპოზიციებით.“

„ხანგრძლივი მოუვლელობის შედეგად შენობა, განსაკუთრებით დარბაზის ინტერიერი, უმძიმეს მდგომარეობაშია და სასწრაფო რეაბილიტაციას საჭიროებს. ჩაშლილია ხის იატაკები, დაზიანებულია მოხატული ჭერი, ჩამოცვენილია რელიეფები და ა.შ.“

„ობიექტის მხატვრულ-არქიტექტურულ ღირებულებების შენარჩუნებასთან ერთად, აღნიშნული დოკუმენტაცია ითვალისწინებს მის გამართულ ფუნქციონირებას, თანამედროვე სტანდარტების მოთხოვნათა გათვალისწინებით.“ – აღნიშნულია ტენდერში.

პროექტის მიხედვით, რეაბილიტირებული შენობა ადაპტირებული იქნება შშმ პირებისთვის.

[toggle title=”შრომის კულტურის სახლის შესახებ ვრცლად სანახავად დააწკაპუნეთ აქ“]

„სოფელი შრომა ოზურგეთის მუნიციპალიტეტში, ოზურგეთიდან 36 კმ-ის დაშორებით, მდ. სუფსის მარცხენა ნაპირზე მდებარეობს. სოფ. შრომა მნიშვნელოვანია საბჭოთა პერიოდის ისტორიული შენობებით, კერძოდ, XX საუკუნის 50-იან წლებში აგებული ადმინისტრაციული შენობითა და კულტურის სახლით.

ორივე შენობა სოფლის განაშენიანებაში გამოირჩევა თავისი მასშტაბითა და დეკორატიული შემკულობით.

როდესაც გადაწყდა სოფელში კულტურის სახლის აგება, კოლმეურნეობის თავმჯდომარის, მიხაკო ორაგველიძის მიერ მოწვეულები იყვნენ არქიტექტორი ლევან ცომაია და მხატვარი რობერტ სტურუა. კულტურის სახლის აშენების თარიღად ცნობილია 1953-1956 წწ. შენობა მარტივი ფორმის მართკუთხედს წარმოადგენს, ფასადის ორივე სართული დეკორატიული პილასტრებით არის შემკული.

ფასადის დეკორატიული ელემენტებიდან აღსანიშნავია სართულშუა სარტყელზე და ღიობების თავზე ჩადგმული ფილები, რომლებზეც სხვადასხვა მცენარეული და დეკორატიული ორნამენტებია გამოსახული. შენობის ცენტრალურ ნაწილზე მართკუთხა პორტიკი არის მიდგმული, რომელიც ცალკე მდგომ სვეტებს ეყრდნობა.

შენობის მარცხენა ნაწილის ქვედა სართულის ღიობები ყრუა, ხოლო ზედა სართულის ღიობები ფანჯრებად არის გახსნილი. ცენტრალური პორტიკის მარჯვენა მხარე, ორივე სართულზე გახსნილია ფანჯრებით.

სავალალოდ გამოიყურება კულტურული მემკვიდრეობის ძეგლის უკანა ფასადი, რომელიც თავდაპირველად დეკორატიული ელემენტებით ყოფილა მორთული. დღეის მდგომარეობით, ეს ფასადი ნაწილობრივ შიფერის მასალით არის დაფარული. შიფერისგან თავისუფალ კედელზე ჯერ კიდევ შენარჩუნებულია ავთენტური დეკორი.

უკანა მხარეს შენობას მიშენებული აქვს ორსართულიანი მოცულობა, რომელიც მთლიანად ფარავს დეკორატიული კომპოზიციის დიდ სეგმენტს. შენობის ერთ გვერდზე სკოლის შენობა, ხოლო მეორე გვერდზე, მხატვრულ-არქიტექტურულ ფორმას მოკლებული, ორსართულიანი მოცულობა აქვს მიშენებული.

კულტურის სახლის მიმდებარე ეზო შემოფარგლულია დეკორატიული ღობით, რომელიც შედგება თანადროული, მცირე არქიტექტურული ფორმის ნალესი ელემენტებისაგან. ასეთივე იყო შენობის ჭიშკარი და მთლიანად ღობეზე განთავსებული დეკორატიული გაზონები, რომლებიც დღეს აღარ არსებობს.

შენობას, პომპეზური და მხატვრულად გაფორმებული დარბაზი გააჩნია. დარბაზის სივრცე ორ სართულად არის გადაწყვეტილი.პარტერი ორნაწილიანია, ხოლო ზედა სართულზე ორი შეკიდული ლოჟა და უკანა მხარეს გასასვლელი დერეფანია მოწყობილი. ამ სივრცის მთავარი დეკორატიული აქცენტი მისი ჭერია, რომელიც უხვად არის მოხატული გასული საუკუნის 50-იანი წლებისათვის დამახასიათებელი ფიგურატიული კომპოზიციებით.

დარბაზის სცენა განსაკუთრებულად არის აქცენტირებული მაღალი მხატვრული ოსტატობით შექმნილი ნაძერწი რელიეფური ფრიზებითა და ცენტრალურ ნაწილში ფიგურატიული კომპოზიციით.

ცალკე მდგომი მუშებისა და გლეხების ფიგურებიანი მხატვრული პანოებით შემკულია ფანჯრის ღიობებს შორის არეები. ასეთი ფიგურები ორივე მხრიდან მიუყვება დარბაზის მეორე სართულსაც.

ხანგრძლივი მოუვლელობის შედეგად შენობა, განსაკუთრებით დარბაზის ინტერიერი, უმძიმეს მდგომარეობაშია და სასწრაფო რეაბილიტაციას საჭიროებს. ჩაშლილია ხის იატაკები, დაზიანებულია მოხატული ჭერი, ჩამოცვენილია რელიეფები და ა.შ.

ძეგლის დეტალური შესწავლა-ფიქსაციის შედეგების საფუძველზე შემუშავდა ობიექტის რეაბილიტაციის საპროექტო-სახარჯთაღრიცხვო დოკუმენტაცია.

ობიექტის მხატვრულ-არქიტექტურულ ღირებულებების შენარჩუნებასთან ერთად, აღნიშნული დოკუმენტაცია ითვალისწინებს მის გამართულ ფუნქციონირებას, თანამედროვე სტანდარტების მოთხოვნათა გათვალისწინებით.“ – სატენდერო დოკუმენტაციიდან.

[/toggle]

ტენდერში წინადადებების მიღება 2023 წლის 27 აგვისტოს დაიწყება და პირველ სექტემბერს დასრულდება.

კულტურის სახლის რეაბილიტაცია ტენდერში გამარჯვებულთან ხელშეკრულების გაფორმებიდან 15 თვეში უნდა დასრულდეს.

საპენსიო სააგენტომ, მოქალაქეებისგან დამოუკიდებლად, მათი საპენსიო დანაზოგები სხვადასხვა რისკის მქონე საინვესტიციო პორტფელებში გადაანაწილა.

დაგროვებით საპენსიო სქემაში მონაწილეთა საპენსიო დანაზოგები ამ დროისთვის გადანაწილებულია მაღალრისკიან, საშუალორისკიან და ნაკლებადრისკიან პორტფელებში.

საპენსიო სააგენტოში „ბათუმელებს“ უთხრეს, რომ მოქალაქეებს 2023 წლის 6 სექტემბრის ჩათვლით აქვთ ვადა, რათა მათ თავიანთი დანაზოგი მათთვის სასურველ რომელიმე პორტფელში გადაიტანონ ან გადაანაწილონ რამდენიმეში [ორ-სამ პორტფელში].

„6 აგვისტოდან საპენსიო სქემის მონაწილეებს მიეცათ 1-თვიანი ვადა [6 სექტემბრის ჩათვლით], რა დროსაც მათ თავად შეეძლებათ აირჩიონ, რომელ პორტფელში მოხდება მათი საპენსიო დანაზოგების ინვესტირება, ხოლო ის მოქალაქეები, რომლებიც თავად არ აირჩევენ სასურველ პორტფელს, ავტომატურად გადანაწილდებიან სხვადასხვა პორტფელში, ასაკის შესაბამისად.“ – აცხადებენ სააგენტოში.

თუ ზემოთ აღნიშნულ პერიოდში სქემის მონაწილეები არჩევანს არ გააკეთებენ, მათი საპენსიო დანაზოგი, ასაკის მიხედვით, პორტფელებში შემდეგნაირად გადანაწილდება:

• სქემაში გაწევრების მომენტისთვის 40 წლამდე ასაკის მონაწილის საპენსიო აქტივები გადანაწილდება მზარდ [მაღალრისკიან] საინვესტიციო პორტფელში;
• სქემაში გაწევრების მომენტისთვის 40-დან 50 წლამდე ასაკის მონაწილის საპენსიო აქტივები − შერეულ [საშუალორისკიან] საინვესტიციო პორტფელში;
• ხოლო 50 ან 50-ზე მეტი წლის მონაწილის საპენსიო აქტივები − სტაბილურ [ნაკლებადრისკიან] საინვესტიციო პორტფელში.

საინვესტიციო პორტფელის არჩევა სქემის მონაწილეს მისი პირადი ელექტრონული გვერდიდან შეუძლია [my.pensions.ge], ოღონდ ამ შემთხვევაში აუცილებელი იქნება ელექტრონული ხელმოწერა;

ასევე შესაძლებელია მონაწილემ ეს არჩევანი იუსტიციის სახლებიდან გააკეთონ [ეს მათ, როგორც საპენსიო სააგენტოში გვითხრეს, იუსტიციის სახლის ნებისმიერ ფილიალში შეუძლიათ];

საინვესტიციო პორტფელის არჩევა ასევე შესაძლებელია საპენსიო სააგენტოს ოფისში მისვლით.

ამჯერად თუ საინვესტიციო პორტფელს არ აირჩევთ, თქვენი დანაზოგი დარჩება ავტომატურად [ასაკის მიხედვით] შერჩეულ პორტფელში და მას ერთი წლის განმავლობაში ვეღარ შეცვლით.

„სქემის მონაწილეს საინვესტიციო პორტფელზე არჩევანის გაკეთება 12 თვეში ერთხელ შეეძლება“ – აცხადებენ საპენსიო სააგენტოში.

სააგენტოში „ბათუმელებს“ ისიც უთხრეს, რომ მიმდინარეობს მუშაობა და შესაძლოა ეს ვადაც შეიცვალოს, რათა სქემის მონაწილეს უფრო მოქნილად შეეძლოს არჩევანის გაკეთება საინვესტიციო პორტფელების არჩევასა თუ მათში დანაზოგის გადანაწილებაზე.

საპენსიო სააგენტოს ინფორმაციით, „დაგროვებითი პენსიის შესახებ“ საქართველოს კანონი 2018 წლის 6 აგვისტოს ამოქმედდა და კანონის მიღებიდან პირველი 5 წლის განმავლობაში მოქალაქეთა საპენსიო დანაზოგების ინვესტირება ხორციელდებოდა მხოლოდ ნაკლებადრისკიან საინვესტიციო პორტფელში – როგორებიცაა საბანკო ანაბრები და ობლიგაციები.

„იმის გამო, რომ ინვესტიციების უმეტესობა საპროცენტო ინსტრუმენტებში ხდება, ეს პორტფელი სტაბილური მომგებიანობით და შედარებით ნაკლები რისკით ხასიათდება და ამიტომ მას შეიძლება სტაბილური პორტფელი ვუწოდოთ. ეს პორტფელი უკეთ შეეფერება იმ ადამიანებს, ვინც ინვესტიციებში სიფრთხილეს არჩევს და არ უყვარს რისკის აღება. ხშირად ასეთები არიან საპენსიო ასაკთან მიახლოებული ადამიანები, რომლებსაც არ სურთ პენსიაზე გასვლის წინ მათი დანაზოგების ღირებულების მნიშვნელოვანი მერყეობა“ – აცხადებენ სააგენტოში.

იმავე სააგენტოს განმარტებით, „მაღალრისკიან პორტფელში დაგროვებული დანაზოგები [განსხვავებით ნაკლებადრისკიანისგან], უმეტესად ინვესტირდება უცხოურ ვალუტაში და გლობალურ აქციებში. ეს პორტფელი გრძელ ვადაში ხასიათდება მაღალი, მზარდი მომგებიანობით, ამიტომ მას შეიძლება მზარდი პორტფელი ვუწოდოთ. აქვე აღსანიშნავია, რომ აქციების ფასის შესაძლო მერყეობის გამო ამ პორტფელს თან ახლავს შედარებით მაღალი რისკიც“.

ამ შემთხვევაში აქტივების ძირითადი ნაწილის ინვესტირება საერთაშორისო საფონდო ბირჟებზე, კომპანიების აქციებში მოხდება. გარდა ამისა, პორტფელის 10%-მდე მოცულობის ინვესტირება შესაძლებელია „ალტერნატიული“ აქტივების კლასშიც, რაც მოიცავს მაღალი შემოსავლიანობის მქონე ისეთ აქტივებს, როგორებიცაა საინვესტიციო ფონდები [კერძო კაპიტალის საინვესტიციო ფონდები, ვენჩურული კაპიტალის საინვესტიციო ფონდები], პირდაპირი სესხები და სხვა.

ეს პორტფელი უკეთ შეეფერებათ ისეთ ადამიანებს, ვისაც უყვართ რისკის აღება და ამის ხარჯზე სურთ მაღალი მოგების მიღება გრძელ ვადაში. ასეთები ხშირად არიან ახალგაზრდები, რომელთაც საპენსიო ასაკამდე რამდენიმე ათწლეული აშორებს“ – მიიჩნევენ საპენსიო სააგენტოში.

სააგენტოში ასევე აცხადებენ, რომ „ნებისმიერი ინვესტიციის მსგავსად, გლობალურ აქციებში ინვესტირება რისკებთანაა დაკავშირებული, განსაკუთრებით მოკლევადიან პერიოდში. საფონდო ბირჟებზე გავლენას უამრავი ფაქტორი ახდენს, მათ შორის ეკონომიკური რყევები, გეოპოლიტიკური მოვლენები თუ პანდემიები.

მსოფლიო კრიზისები უახლეს ისტორიაშიც გვქონდა, COVID-19-ის კრიზისი ან 2008 წლის ფინანსური კრიზისი, რა დროსაც მსოფლიო ფინანსურ ბირჟებზე მნიშვნელოვანი რყევები დაფიქსირდა და ბევრმა ინვესტორმა საკმაოდ დიდი ზარალი ნახა. თუმცა გრძელვადიან პერსპექტივაში მსგავსი რყევები, როგორც წესი, არ ნარჩუნდება და საფონდო ბირჟებიც სტაბილური ზრდის ტრენდს უბრუნდება.“

რაც შეეხება საშუალორისკიან პორტფელს, ის ზემოთ აღნიშნული ორი პორტფელის ნაზავია, „შესაბამისად მას შერეული პორტფელი შეგვიძლია ვუწოდოთ. შერეულ პორტფელში უცხოური აქტივების წილი 40%-მდე შეიძლება გაიზარდოს, რაც სტაბილურ პორტფელზე მაღალია, თუმცა მზარდ პორტფელზე დაბალი. ამასთან, შერეულ პორტფელშიც შესაძლებელი იქნება „ალტერნატიული“ აქტივების კლასში ინვესტირება.“ – აცხადებს სააგენტო.

„2023 წელს საინვესტიციო საბჭოს მიერ ჩამოყალიბებული აქტივების განთავსების განახლებული სტრატეგიის მიხედვით მზარდი ანუ მაღალრისკიანი პორტფელისთვის განისაზღვრა შემდეგნაირი სამიზნე, ანუ სტრატეგიული ბენჩმარკ პორტფელი: პორტფელის 55%-მდე ინვესტირება განხორციელდება გლობალურ აქციებში, სახაზინო ობლიგაციების სამიზნე მაჩვენებელი 20%-ია, ხოლო ლარში დენომინირებულ დეპოზიტებსა და სადეპოზიტო სერტიფიკატების მიზნობრივი მაჩვენებელი – 25%-ია.

გლობალური აქციების ბენჩმარკად განისაზღვრა აქციების თანაბრად შეწონილი ინდექსი, რომელიც 4 სხვადასხვა აქციის ფონდისგან (Exchange Trade Fund (ETF)) იქნება დაკომპლექტებული, ესენია: Vanguard FTSE Pacific ETF (კოდი VPL), Vanguard FTSE Europe ETF (კოდი VGK), SPDR S&P500 ETF (კოდი SPY), iShares MSCI Emerging Markets ETF (კოდი EEM).“ – აცხადებს საპენსიო სააგენტო.

საპენსიო სააგენტოს სტატისტიკური მონაცემებით:

• საინვესტიციო პორტფელის 2023 წლის ივლისის ანგარიშის მიხედვით, საპენსიო ფონდის წმინდა ამონაგებმა ფონდის გაშვებიდან [2019 წლის 1-ელი იანვარი] 2023 წლის ივლისის ჩათვლით 51.2%, ხოლო რეალურმა ამონაგებმა [ინფლაციის გათვალისწინებით] იმავე პერიოდში 11.7% შეადგინა.
• 2023 წლის 31 ივლისის მდგომარეობით, საპენსიო აქტივების წმინდა ღირებულებამ 3.76 მილიარდი ლარი შეადგინა. აქედან, საინვესტიციო საქმიანობის შედეგად მიღებული წმინდა ამონაგები 680 მილიონი ლარია.
• 31 ივლისის მდგომარეობით საპენსიო სქემაში გაწევრიანებულ მონაწილეთა რაოდენობა 1 მილიონ 426 ათასი ადამიანია. ამ დროისათვის, დაგროვებითი პენსიით ისარგებლა 4 811-მა პირმა, ხოლო პენსიის სახით გაცემული თანხა 12 340 873 ლარს შეადგენს.

ამავე თემაზე „ბათუმელების“ არქივიდან:

გარემოს ეროვნული სააგენტოს ცნობით, მიმდინარე კვირის განმავლობაში ჰაერის ტემპერატურა გასულ კვირასთან შედარებით 2-3◦C-ით დაიკლებს, თუმცა ქვეყნის ტერიტორია კვლავ რჩება თბური ტალღის ზემოქმედების ქვეშ.

„ცალკეულ დღეებში დასავლეთ საქართველოს დაბლობში ჰაერის ტემპერატურამ შესაძლებელია 34◦C, 36◦C, აღმოსავლეთ საქართველოს ბარში 35◦C, 37◦C-ს მიაღწიოს.

ქვეყნის მთიან რაიონებში დღის მაქსიმალური ტემპერატურა 31◦C, 36◦C, მაღალ მთაში 26◦C, 31◦C-მდე მოიმატებს“ – იუწყება სააგენტო.

განცხადებაში აღნიშნულია, რომ მოსალოდნელი მაღალი ტემპერატურა ტყის ხანძრებისა და მყინვარების დნობასთან დაკავშირებული პროცესების გააქტიურების ხელშემწყობ პირობებს წარმოადგენს.

ამავე თემაზე: 

„სოკარის“ ცნობით, 15 აგვისტოს, 12:00 საათიდან 14:00 საათამდე, სარფში აბონენტებს გაზმომარაგება შეუწყდებათ.

კომპანიის ცნობით, გაზის შეწყვეტის მიზეზი გაზსადენზე დაგეგმილი სარემონტო-საექსპლუატაციო სამუშაოებია.

„აბონენტებს ბუნებრივი გაზის მიწოდება სამუშაოების დასრულებისთანავე ეტაპობრივად აღუდგებათ“ – აცხადებს „სოკარი“ და აბონენტებს მოუწოდებს, დაკეტილ მდგომარეობაში იქონიონ ბინებში არსებული გაზის ონკანები და უყურადღებოდ არ დატოვონ გაზის დანადგარები.

ბათუმის საქალაქო სასამართლოში ნებისმიერი საზოგადოებრივად მნიშვნელოვანი საქმის განხილვისას უვადო მოსამართლე ალექსანდრე გოგუაძე ყოველთვის მის მხარესაა, ვინც სიტყვის თავისუფლებას არად დაგიდევთ და ადამიანების დასჯას ითხოვს – ჯერჯერობით საქართველოში თავისუფალი სიტყვისთვის მხოლოდ ადმინისტრაციული კოდექსით სჯიან.

ალექსანდრე გოგუაძეს ზოგჯერ იმდენად „მონდომებულია“, რომ მის მიერ მიღებულ გადაწყვეტილებებს ქუთაისის სააპელაციო სასამართლოც კი აუქმებს. ასე მოხდა, მაგალითად, ბათუმის საკრებულოს ოპოზიციონერი დეპუტატის, ბაჩი მექვაბიშვილის შემთხვევაში და არსებობს სხვა მაგალითებიც.

მოსამართლე ალექსანდრე გოგუაძე აქამდე უპირობოდ აჯარიმებდა ყველას, ვინც „მონას“ ეძახდა ხელისუფლების რომელიმე წარმომადგენელს. ამჯერად კი მან ის ხალხი დააჯარიმა, ვინც რუსული გემიდან ჩამოსული რუსი ტურისტის მიერ  ნათქვამმა იმ ფრაზამ გააბრაზა, „აფხაზეთის საქართველოსგან გათავისუფლებას“ რომ ეხებოდა.

ალექსანდრე გოგუაძე ბათუმის საქალაქო სასამართლოს მოსამართლედ 2019 წელს გაამწესეს. მოსამართლეობამდე, 2013 წლიდან 2016 წლის ჩათვლით, იგი ფოთის მთავარ პროკურორად მუშაობდა.

2016 წლის იანვარში პროკურორის ავტომანქანას, რომლითაც ალექსანდრე გოგუაძე გრიგოლეთში მიდიოდა, ცეცხლსასროლი იარაღიდან ოთხი ტყვია ესროლეს. ამ ფაქტიდან რამდენიმე დღეში ალექსანდრე გოგუაძის შვილი ავტომანქანის ქურდობის ბრალდებით დააკავეს, რამდენიმე დღეში კი, გირაოს საფუძველზე გაათავისუფლეს.

ბათუმის აქციაზე დაკავებული ბექა გრიგორიადისი, რომელიც მოსამართლე გოგუაძემ 3500 ლარით დააჯარიმა, ასე ხსნის მოსამართლის მხრიდან მის მიმართ გამოჩენილ განსაკუთრებულ სიმკაცრეს: „მას დაჭერილი ჰყავს შვილი ყაჩაღობაზე და ასრულებს მთავრობის ყველა ბინძურ დავალებას“.

ბათუმში აქციის მონაწილე რამდენიმე დაჯარიმებულს სასამართლოში საქართველოს ახალგაზრდა იურისტთა ასოციაცია [საია] იცავდა. ამ ორგანიზაციის აჭარის ფილიალის ხელმძღვანელს, თამარ წულუკიძეს ვთხოვეთ, შეეფასებინა მოსამართლე ალექსანდრე გოგუაძის მიერ გამოყენებული სასჯელის ზომა რამდენად ადეკვატურია, როცა საქმე ეხება რუსული გემის საწინააღმდეგო აქციაზე დაკავებულ პირებს.

თამარ წულუკიძემ თქვა, რომ მოსამართლის ეს გადაწყვეტილება მისთვის ძალიან ემოციურია: „ყველა დააჯარიმა 2000 ლარით და თან ხაზს უსვამდა, რომ ყველაზე მცირე თანხა გამოიყენა მათ დასაჯარიმებლად და კარგად უნდა ეგრძნოთ ამის გამო თავი ამ ადამიანებს.

ყველაზე შემაშფოთებელი კი ის არის, რომ მტკიცებულებად გამოიყენა მხოლოდ და მხოლოდ მოწმეთა ჩვენებები. მოწმეები კი იყვნენ პოლიციის თანამშრომლები, რომლებიც რეალურად წარმოადგენდნენ მხარეს და არიან სუბიექტურები. რიგ შემთხვევებში მათი ჩვენებები აცდენილი იყო იმასაც კი, რაც ახსნა-განმარტებაში უწერიათ. არაერთ შემთხვევაში აჟღერებდნენ არასწორ ინფორმაციას.

მოსამართლემ მიიჩნია, რომ ასეთი მტკიცებულება საკმარისია იმისთვის, რომ მიიღოს გამამტყუნებელი გადაწყვეტილება და ცნოს პირი სამართალდამრღვევად, მაშინ, როცა საერთაშორისო და ეროვნული სამართლით დადგენილი სტანდარტია, რომ ნეიტრალურ მტკიცებულებას ენიჭება უპირატესობა.

ნეიტრალური მტკიცებულება არის ვიდეომასალა, სადაც პირდაპირ ჩანდა, რომ ეს ადამიანები [დაკავებულები] არც ილანძღებოდნენ, არც იგინებოდნენ, არც მონას იძახდნენ, რაზეც პოლიციელები მიუთითებდნენ.

თუმცა თუნდაც „მონის“ ან სხვა სიტყვების დაძახება, ვინმესთვის შეურაცხმყოფელი გამოხატვა, ჯდება გამოხატვის თავისუფლების ფარგლებში, მათ შორის ევროსასამართლოს პრაქტიკით.

დადგენილია, რომ გამოხატვის ფორმა, აქციის არსიდან გამომდინარე, რიგ შემთხვევაში ვიღაცისთვის შეიძლება მიუღებელი იყოს, რადგან პროტესტის მიზანია დისკომფორტი შეუქმნას ირგვლივ მყოფ ადამიანებს, ხელისუფლებას მიაწვდინოს ხმა. ბუნებრივია, ეს ფორმები ხანდახან შეიძლება კონკრეტული პირისთვის არ იყოს სასიამოვნო მოსასმენი.

ამ შემთხვევაში, თუნდაც რომელიმე მათგანს რომც დაეძახა „მონა“, „პუტინ ხუილო“, ჯდება გამოხატვის თავისუფლებაში, როგორც კონსტიტუციით გარანტირებული შეკრებისა და მანიფესტაციის იდეა. თუნდაც დაფიქსირებულიყო, რომ მსგავსი სიტყვები გამოიყენეს აქციის მონაწილეებმა, მოსამართლეს არ უნდა მიეჩნია, რომ სამართალდარღვევას ჰქონდა ადგილი“ – ამბობს თამარ წულუკიძე.

___

აქ წაიკითხეთ სხვა დეტალები ალექსანდრე გოგუაძის მიერ მიღებულ გადაწყვეტილებებზე

გარემოს დაცვისა და სოფლის მეურნეობის სამინისტროს გარემოს ეროვნული სააგენტოს მონაცემებით, საქართველოს სანაპირო ზოლი სუფთაა. უკრაინაში კახოვკის ჰესის დანგრევის შემდეგ, საზოგადოების მაღალი ინტერესის გამო, სააგენტომ თქვა, რომ შავი ზღვის წყლის ხარისხის მონიტორინგს 10 დღეში ერთხელ 9 სადგურზე ჩაატარებს.

„კვლევების შედეგად განისაზღვრება ზღვის წყლის ძირითადი ფიზიკურ-ქიმიური პარამეტრები მარილიანობის ჩათვლით, ასევე, ბიოგენური ელემენტები და სხვა მაჩვენებლები“, – ამბობს სააგენტო.

მოსახლეობისა და დამსვენებლების ნაწილისთვის, ჯერ კიდევ კითხვის ნიშნის ქვეშ დგას არსებული მონაცემების სანდოობა და შავ ზღვაში ბანაობის უსაფრთხოება.

საბა სურმანიძე მსოფლიოს ვიცე-ჩემპიონი გახდა 2023 წლის 17 წლამდელთა მსოფლიო ჩემპიონატზე, საქართველოს ბერძნულ-რომაული სტილით ჭიდაობაში. საბა აჭარის ნაკრების მოჭიდავეა. იასპარეზა 60 კგ წონით კატეგორიის ფინალში და კადეტებს შორის 2-2 ჯერ გახდა პრიზიორი. ერთი ვერცხლისა და სამი ბრინჯაოს მედალი მოიპოვა.

17 წლამდელების მსოფლიო ჩემპიონატი სტამბოლში ჩატარდა. საბასთვის ეს მეოთხე მედალი იყო.

„ამ ბიჭს დიდი მომავალი აქვს და ერთ დღეს აუცილებლად იქნება მსოფლიო ჩემპიონი. 10 წლის იყო, როცა ვარჯიში დაიწყო ჩემთან. ბავშვობიდანვე, ყოველთვის მიზანდასახული იყო და უყვარს შრომა“, – ამბობს საბას მწვრთნელი, მარად აბულაძე.

საბამ ჩემპიონატზე დაამარცხა აზიის ჩემპიონი და მოუგო ევროპის მოქმედ ჩემპიონს.

ოთხი შეხვედრიდან საბა მხოლოდ ფინალურ ორთაბრძოლაში დამარცხდა აზერბაიჯანელ მეტოქესთან.

საბა ამბობს, რომ სპორტს დღეში სულ მცირე 2,3 საათს უთმობს, ხანდახან მეტსაც – შედეგის მისაღწევად.

„სპორტს ძალიან დიდი ადგილი უჭირავს ჩემ ცხოვრებაში. ვიცე-ჩემპიონი გავხდი, მაგრამ ვთვლი, რომ მეტი უნდა გავაკეთო. იმედი მაქვს, მალე უკეთეს შედეგს მოვიტან და გულშემატკივრებს კიდევ უფრო გავახარებ. ძალიან ბევრი ხალხი გვგულშემატკივრობდა სტამბოლში: იქ მცხოვრები ქართველებიც და სპეციალურად ტურნირისთვის ჩამოსულებიც. დიდი მადლობა მათ“, – ამბობს მსოფლიოს ვიცე ჩემპიონი.

მთავარ ფოტოზე: მსოფლიოს ვიცე-ჩემპიონი საბა სურმანიძე/ფოტო: „სპორტული თაობა . Sport Generation”

მდინარე ყოროლისწყლის კალაპოტში მიმდინარე მშენებლობის შესახებ ხელვაჩაურის მერიას განმარტება ამ დრომდე არ გაუკეთებია. მერიაში პასუხი არც მას შემდეგ გაგვცეს, რაც ამ ამბის მედიაში გაშუქებას საზოგადოების კრიტიკა და კითხვები მოჰყვა.

მერია არც საკრებულოს ოპოზიციის განცხადებას გამოხმაურებია. თანამდებობის პირებმა თავი არც მაკონტროლებელ ორგანოში, საკრებულოში შეიწუხეს.

ისეთ მნიშვნელოვან საკითხზე, როგორიც მდინარის კალაპოტში მშენებლობაა ხელვაჩაურის მერიამ და საკრებულომ დუმილი არჩია. 

„თავს შევიკავებთ ამ ეტაპზე პასუხისგან“, – თქვეს მერიის პრესსამსახურში რამდენიმე საათიანი ლოდინის შემდეგ, ოთხშაბათს, 9 აგვისტოს.

გვაინტერესებდა გაცემული ჰქონდა თუ არა მერიას კალაპოტში მშენებლობის ნებართვა, რაზე დაყრდნობით იყო ნებართვა გაცემული, არსებობდა თუ არა საქმის წარმოების მასალებში გეოლოგიური დასკვნა და ვინ აწერდა ამ დასკვნას ხელს. 

პასუხი არ გაგვცეს.

ცხადია, ამ ინფორმაციის დამალვის გადაწყვეტილებას პრესსამსახური ვერ მიიღებდა. გადაწყვეტილება, დიდი ალბათობით, მერმა მიიღო, ამიტომაც შემდეგ ჯერზე პირადად მერს დავურეკეთ.

ზაზა დიასამიძე „მოუცლელობის გამო“ მოკლე პასუხით შემოიფარგლა – „პირველი კლასის მშენებლობააო“. გვითხრა, დრო ახლაც არ მაქვს, მაგრამ „რომ არ მეპასუხა, უკვე უხერხული იქნებოდაო.“

უხერხულია ისიც, როცა საზოგადოებას მდინარის კალაპოტში მშენებლობაზე კითხვები უჩნდება და მერი თავს უფლებას აძლევს არ ახსნას, რა ხდება და რატომ, ყველაფერი კანონიერი და უსაფრთხოც რომ იყოს.

თვითმმართველობის კოდექსი პირდაპირ ავალებს მერს და მასზე დაქვემდებარებულ სტრუქტურებს, ღიად და საჯაროდ გააცნოს ამომრჩეველს გადაწყვეტილებები, რომელსაც მათი სახელით, მათ მიერ მინიჭებული უფლებამოსილების საფუძველზე იღებს, თუნდაც ეს გადაწყვეტილება მისი წინამორბედის მიერ იყოს მიღებული. მერი, როგორც სამართალმემკვიდრე, ვალდებულია აგვიხსნას, რაზე დაყრდნობით მიიღო გადაწყვეტილება მისმა წინამორბედმა და რას გეგმავს თავად. 

მერი ასე არ მოიქცა: „თავს შევიკავებთო“.

კოდექსის მიხედვით, მერს უფლება არ აქვს „თავი შეიკავოს“ ინფორმაციის გაცემისგან. 

საჯაროობას სამშენებლო კოდექსიც ითხოვს, როცა საქმე ეხება 12 947 კვ. მეტრის განაშენიანებას, იმ შემთხვევაში თუ ნებართვა ცალ-ცალკე თითოეული კოტეჯის მშენებლობაზე არ არის გაცემული და ინვესტორმა ამ ფართობის განაშენიანების ერთიანი პროექტით მიმართა მერიის შესაბამის სამსახურს.

ქონების ეროვნულმა სააგენტომ სწორედ 12 947 კვ მეტრი მიწის ნაკვეთი გაყიდა ორთაბათუმში, ყოროლისწყლის კალაპოტთან 2021 წელს. ერთი ბიჯით და 648 000 ლარად.

მიწის გაყიდვის შემდეგ ნაკვეთი რამდენიმე მცირე ზომის საკადასტრო ერთეულად დაარეგისტრირეს. სავარაუდოა, თითოეული კოტეჯის პროექტიც ცალ-ცალკე შეითანხმეს. ამიტომაც ამბობს ხელვაჩაურის მერი, ზაზა დიასამიძე, რომ საქმე გვაქვს პირველი კლასის მშენებლობასთან.

ასე აირიდეს არამხოლოდ პროექტის საჯაროდ განხილვის ვალდებულება, არამედ ბევრი სხვა სირთულეც, რომელსაც 12 947 კვ მეტრის განაშენიანების შემთხვევაში კანონი ითხოვს.

პირველი კლასის ობიექტის შეთანხმება კი გაცილებით მარტივია.

• რა გვითხრა ხელვაჩაურის მერმა

ხელვაჩაურის მერის, ზაზა დიასამიძის განმარტებით, არქიტექტურის სამსახური ნებისმიერ პროექტზე ნებართვას შესაბამისი დოკუმენტების საფუძველზე გასცემს:

„ეს პირველი კლასის ობიექტია და შესაბამისი დოკუმენტის საფუძველზე გაიცემა. თუ რამე გადაცდომა იქნება… დარწმუნებული ვარ არ არის. თუმცა, თუ რამე ისეთი იქნება, რომ მისახედია ჩვენი მხრიდან, ზედამხედველობის სამსახურიდან, როგორც ყოველთვის, მუნიციპალიტეტი მოიქცევა შესაბამისად კანონის ფარგლებში. თუმცა დოკუმენტბრუნვა და ნებართვების გაცემა ხდება შესაბამის კვლევებზე დაყრდნობით.

სხვა ვერანაირად ვერ გაიცემოდა, თუ არ არსებობს შესაბამისი დამადასტურებელი დოკუმენტი და ეს პირველი კლასის შენობებს განეკუთვნება. ეს კერძო საკუთრებაშია. ბოდიშს ვიხდი შეხვედრაზე ვარ“.

მეტი კითხვა მერს ვერ დავუსვით, დეტალები ვერ დავაზუსტეთ, თუმცა ზაზა დიასამიძის ნათქვამიდან გავიგეთ, რომ ნებართვა ნამდვილად გაცემულია და კოტეჯები უკანონოდ არ შენდება.

მისივე ნათქვამის მიხედვით, არ დადასტურდა ინფორმაცია, რომ მხოლოდ რამდენიმე კოტეჯზე იყო ნებართვა გაცემული და მათი რაოდენობა 50-მდე უკანონოდ გაზარდეს. მერი დარწმუნებულია, რომ „გადაცდომა არ არის.“

ცალკე სამსჯელოა გაითვალისწინეს თუ არა „წყლის შესახებ“ საქართველოს კანონითა და „წყალდაცვითი ზოლის შესახებ ტექნიკური რეგლამენტით“ განსაზღვრული აკრძალვები ნებართვის გაცემისას. თუმცა, როგორ გაითვალისწინებდნენ, როცა კანონი კალაპოტზე საერთოდ არ უშვებს ისეთი სახის მშენებლობას, რაც ყოროლისწყლის კალაპოტზე მიმდინარეობს.

ყველაზე მნიშვნელოვანი კი ის არის, რომ ადგილობრივებს კარგად ახსოვთ, მდინარის ადიდებისას როგორ ფარავს წყალი ტერიტორიას, სადაც ახლა კოტეჯებს აშენებენ.

ამ წესების დაცვის აუცილებლობაზე მიწის ნაკვეთის გამყიდველმა, ქონების ეროვნულმა სააგენტომ აღწერილობის ნაწილში მიუთითა. თუმცა, წესების დაცვა, პირველ რიგში, სახელმწიფო უწყების, ნებართვის გამცემის, ვალდებულებაა.

„ბათუმელების“ ინფორმაციით, ბათუმში მშენებარე სახლიდან კაცი ჩამოვარდა და დაიღუპა.

შემთხვევა დღეს, 11 აგვისტოს მოხდა.

პირველადი ინფორმაციით, კაცი კერძო, მშენებარე სახლიდან ჩამოვარდა. იგი აღნიშნულ მშენებლობაზე მუშაობდა.

„ბათუმელების“ ინფორმაციით, ცხედარი ბათუმში, სამხარაულის ბიუროში გადაასვენეს.

გარემოს ეროვნული სააგენტოს ცნობით, 26 და 30 ივლისს შავი ზღვის წყლის ხარისხის მორიგი მონიტორინგის შედეგების მიხედვით, შავი ზღვის წყლის ხარისხი ნორმის ფარგლებშია.

„კვლევებისას განისაზღვრა ქიმიური პარამეტრები, მათ შორის, 13 მძიმე მეტალი, ნავთობის ჯამური ნახშირწყალბადები, 16 პოლიარომატული ნახშირწყალბადისა და სხვა ფიზიკურ – ქიმიური პარამეტრის კონცენტრაცია.

გარემოს ეროვნული სააგენტო შავი ზღვის წყლის ხარისხის მონიტორინგს 10 დღეში ერთხელ, 9 სადგურზე ახორციელებდა. 10 ივლისიდან სადგურების რაოდენობას დაემატა ანაკლია-განმუხურის ტერიტორიის 3 წერტილი. აღებულ სინჯებში ისაზღვრება 59 პარამეტრის მნიშვნელობები“ – წერს სააგენტო.

უწყების ცნობით, სინჯები ანალიზისთვის გარემოს ეროვნული სააგენტოს ატმოსფერული ჰაერის, წყლისა და ნიადაგის ანალიზის აკრედიტებულ ლაბორატორიაში იგზავნება, „რომელიც აღჭურვილია მაღალი სიზუსტის მქონე ანალიტიკური ხელსაწყოებით და სრულად აკმაყოფილებს თანამედროვე მოთხოვნებსა და სტანდარტებს“.

დღეს, 11 აგვისტოს, ბათუმის საქალაქო სასამართლოს მოსამართლე ალექსანდრე გოგუაძემ 2000-2000 ლარით დააჯარიმა რუსული გემის წინააღმდეგ გამართულ საპროტესტო აქციაზე დაკავებული ადამიანები.

31 ივლისს, ბათუმში აქციაზე 23 პირი დააკავეს.

ახალგაზრდა იურისტთა ასოციაციის აჭარის ორგანიზაციის ხელმძღვანელის, თამარ წულუკიძის თქმით, მისი ორგანიზაცია სასამართლოში იცავდა 6 პირის ინტერესებს, მათ შორის ორი უკრაინის მოქალაქეა.

მოსამართლე ალექსანდრე გოგუაძემ ექვსივე მათგანი – გენრი დოლიძე, თორნიკე კვერენჩხილაძე, გიორგი გველესიანი, გიზო სიჭინავა, დმიტრო ზაკრევსკი და მარინა ჩობანიანი სამართალდარღვევად ცნო. მოსამართლემ ექვსივე პირი 2000-2000 ლარით დააჯარიმა.

3 პირს იცავდა სასამართლოში „საერთაშორისო გამჭვირვალობა-საქართველო“. ორგანიზაციის იურისტის, მარიამ შაინიძის თქმით, მოსამართლე ალექსანდრე გოგუაძემ 2 პირი – ირაკლი ხარჩილავა და გიორგი სანაძე 2000-2000 ლარით დააჯარიმა, ხოლო მირიან ჯალაბაძე, რომელიც საერთოდ არ იყო აქციის მონაწილე და მეგობარს ეძებდა, არ ცნეს სამართალდამრღვევად.

აქციაზე დაკავებულებს იცავდა ასევე არასამთავრობო ორგანიზაცია „საფარი“. ორგანიზაციის იურისტის, ნინო ირემაძის თქმით, მოსამართლე ალექსანდრე გოგუაძემ სამივე მათგანი – ხათუნა ბერიძე, ირაკლი მეტრეველი და ლუკა წულაძე ასევე 2000-2000 ლარით დააჯარიმა.

კერძო ადვოკატი მალხაზ ზოიძე რუსული გემის წინააღმდეგ გამართულ აქციაზე დაკავებულ 6 ადამიანს იცავდა, მათ შორის – ილია ანთაძეს.

აჭარის უმაღლესი საბჭოს დეპუტატის, ლევან ანთაძის თქმით, მისი შვილის – ილია ანთაძის სასამართლო პროცესი მოსამართლემ 7 სექტემბრისთვის გადადო. როგორც ლევან ანთაძე ამბობს, „საკმარისი მტკიცებულებების არარსებობის მოტივით“.

იმ პირებს შორის, ვის ინტერესებსაც მალხაზ ზოიძე იცავდა, მოსამართლე ალექსანდრე გოგუაძემ განსხვავებული სასჯელი შეუფარდა ლადო ჩიბურდანიძეს – ის 2500 ლარით დააჯარიმა. სხვა პირები კი – ლაშა მელაძე, ავთანდილ დოლიძე, მიხეილ აბზიანიძე, დავით თეთრაშვილი და გიორგი უკლება კი 2000 ლარით დააჯარიმა.

გიორგი უკლება აცხადებს, რომ ის აქციაზე შემთხვევით აღმოჩნდა – გზად გაიარა.

___

27 ივლისს ბათუმში რუსეთიდან საკრუიზო ლაინერი შემოვიდა. გემ ASTORIA GRANDE-დან ჩამოსული ერთ-ერთი მგზავრი ამბობდა, რომ ნამყოფია აფხაზეთში, ანუ შესაძლოა მას დარღვეული ჰქონდეს კანონი ოკუპაციის შესახებ. იმავე დღეს, მოქალაქეები გემის შემოსვლის წინააღმდეგ საპროტესტო აქცია გამართეს.

„ქართული ოცნების“ თავმჯდომარემ ირაკლი კობახიძემ „ქაჯობად“  შეაფასა მოქალაქეთა საპროტესტო აქცია. საქართველოს პრეზიდენტი სალომე ზურაბიშვილი კი ბათუმის აქციას ტვიტერზე გამოეხმაურა: „ვამაყობ ჩვენი ხალხით“.

ინფორმაცია იმის შესახებ, რომ სოჭსა და ბათუმს შორის სამგზავრო გადაზიდვები იწყებოდა, 2023 წლის იანვარში გავრცელდა რუსულ მედიაში. თავდაპირველად ეს ინფორმაცია ქართულმა მხარემ უარყო.

_______________

ამავე თემაზე: