ნეტგაზეთი • RU

უცნობია, რა მოლაპარაკებაზე საუბრობს სოჭის პორტის ადმინისტრაცია – სააგენტო

საქართველოს საზღვაო ტრანსპორტის სააგენტო ეხმიანება რუსულ მედიაში გავრცელებულ ინფორმაციას იმის შესახებ, რომ რუსეთის ქალაქ სოჭის პორტი ქართულ მხარესთან მოლაპარაკებებს აწარმოებს სამგზავრო მიმოსვლასთან დაკავშირებით.

„მედიაში გავრცელებულ ინფორმაციასთან დაკავშირებით, რომელიც შეეხება საქართველოსა და რუსეთის ფედერაციას შორის საზღვაო სამგზავრო მიმოსვლის დაწყებას, ვაცხადებთ, რომ საქართველოს რუსეთის საზღვაო ნავსადგურებთან საზღვაო სამგზავრო მიმოსვლა არ აქვს.

ამასთან, რუსულ მხარეს არ მოუმართავს ქართული მხარისათვის და შესაბამისად, ჩვენთვის უცნობია რა მოლაპარაკებაზე საუბრობს სოჭის პორტის ადმინისტრაცია“ – აცხადებს საქართველოს საზღვაო ტრანსპორტის სააგენტო.

ინფორმაცია იმის შესახებ, რომ სოჭის საზღვაო პორტი საქართველოსთან საზღვაო გზით მგზავრების გადაყვანის თაობაზე მოლაპარაკებებს აწარმოებს, დღეს, 24 იანვარს გაავრცელა რუსულმა სააგენტო TASS-მა სოჭის პორტის დირექტორის განცხადებაზე დაყრდნობით.

ამავე თემაზე: 

სოჭის პორტი ბათუმსა და აფხაზეთში მგზავრების გადაყვანას აპირებს – რუსული მედია

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com