Batumelebi

ფინანსთა სამინისტროს შემოსავლების სამსახურის ინფორმაციით, საბაჟო გამშვებ პუნქტში ,,სარფი“, მებაჟე ოფიცრების მიერ, საქართველოსა და უცხო ქვეყნის მოქალაქეების, როგორც ფიზიკური, ასევე კუთვნილი ბარგის დათვალიერების შედეგად, არადეკლარირებული ოქროს საიუველირო ნაკეთობები [საერთო წონა – 198.91 გრამი] გამოვლინდა.

არადეკლარირებული საქონლის საერთო საბაჟო ღირებულებამ 16 585,94 ლარი შეადგინა.

„საქართველოს საბაჟო კოდექსის 168-ე მუხლის I ნაწილის შესაბამისად, კანონდამრღვევ მოქალაქეებს, სანქციის სახით ჯარიმა, ჯამში 17 317.45 ლარის ოდენობით შეეფარდათ“ – აცხადებს შემოსავლების სამსახური.

დღეს, 18 აგვისტოს, საქართველოს ეროვნული გმირი, გიორგი ანწუხელიძე 39 წლის გახდებოდა. იგი 23 წლის ასაკში დაიღუპა ცხინვალში.

ოფიციალური ცნობებით, გიორგი ანწუხელიძე 1984 წლის 18 აგვისტოს, ახმეტის რაიონის სოფელ ქვემო ალვანში დაიბადა. 2003-2004 წლებში მან სამხედრო სავალდებულო სამსახური საქართველოს შინაგანი ჯარების პირველ ოპერატიულ ბრიგადაში გაიარა.

2004 წელს გიორგი ანწუხელიძე მონაწილეობდა ცხინვალის რეგიონში მიმდინარე საბრძოლო ოპერაციებში, 2005- 2006 წლებში კი სამშვიდობო მისიის შესასრულებლად ერაყში იმყოფებოდა.

2008 წლის 17 აპრილიდან იგი IV ქვეითი ბრიგადის 41-ე ბატალიონის შემადგენლობაში მსახურობდა.

უმცროსი სერჟანტი გიორგი ანწუხელიძე, 2008 წლის 9 აგვისტოს, რუსეთ-საქართველოს ომის დროს ტყვედ ჩავარდა. იგი წამების შემდეგ, ცხინვალის მეხუთე სკოლასთან, ძმათა სასაფლაოზე ცემით მოკლეს.

სატელეფონო ვიდეო ჩანაწერში ასახული გიორგი ანწუხელიძის წამების კადრები 2009 წლის იანვარში ინტერნეტით გავრცელდა.

ანწუხელიძე 2008 წლის ნოემბრამდე უგზო-უკვლოდ დაკარგულად ითვლებოდა, ვიდრე მისი იდენტიფიცირება ქართული მხარისადმი გადმოცემული სამხედრო მოსამსახურეთა ცხედრების გენეტიკური ექსპერტიზით არ დადგინდა.

2013 წლის 15 აპრილს გიორგი ანწუხელიძეს საქართველოს პრეზიდენტმა ეროვნული გმირის წოდება მიანიჭა.

ასევე, გიორგი ანწუხელიძე სიკვდილის შემდეგ დაჯილდოებულია ვახტანგ გორგასლის I ხარისხის ორდენით და საქართველოს თავდაცვის სამინისტროს უწყებრივი მედლით „სამშობლოსათვის თავდადებული“.

2013 წელს, „თუშების სადროშომ“ გიორგი ანწუხელიძეს „თუში სახალხო გმირის“ წოდება მიანიჭა. სოფელ ქვემო ალვანში გიორგი ანწუხელიძის მემორიალიც გაიხსნა. იმავე წლიდან, სერჟანტთა აკადემია გიორგი ანწუხელიძის სახელს ატარებს.

2018 წლის ნოემბერში ახმეტაში მდებარე მწვერვალს გიორგი ანწუხელიძის სახელი მიანიჭეს. ანწუხელიძის სახელობის მწვერვალის სიმაღლე 3276,1 მეტრია.

____________

ფოტო: ვიკიპედია

19 აგვისტოს, შაბათს, ბათუმში საავტორო მუსიკის რადიოფესტივალი გაიხსნება.

„მუსიკა ბათუმიდან“ – ასე ჰქვია ფესტივალს, რომელიც 23 აგვისტომდე გასტანს. ფესტივალის მიმდინარეობისას ბათუმის რადიოს წინ, მემედ აბაშიძის 57 ნომერში, მსმენელებისთვის სხვადასხვა ჯგუფი დაუკრავს.

ფესტივალის აფიშა ასე გამოიყურება:

• 19 აგვისტო – Melomaniakk
• 20 აგვისტო – Tabemono
• 21 აგვისტო – K.A.I
• 22 აგვისტო – ვაჟა ტუღუში
• 23 აგვისტო – Babajana

ფესტივალი 19-23 აგვისტოს, საღამოს 6 საათზე დაიწყება. დასწრება უფასოა.

საავტორო მუსიკის რადიოფესტივალის ფინანსური მხარდამჭერია აჭარის განათლების სამინისტრო და, ასევე, კერძო კომპანიები.

ბათუმში ე.წ. პიშევიკების ტერიტორიაზე, კაცს, რომელიც ზღვაში ბანაობდა სკუტერმა გადაუარა.

როგორც თვითმხილველი „ბათუმელებს“ უყვება, კაცი ზღვიდან უგონო მდგომარეობაში გამოიყვანეს. მას ჭრილობა ჰქონდა თავის არეში.

„ბათუმელების“ ინფორმაციით, დაშავებული სასწრაფო დახმარების სამსახურმა საავადმყოფოში გადაიყვანა. ფოტოების მიხედვით, ადგილზე იმყოფება პოლიციაც.

„ბათუმელებმა“ დაშავებულის მდგომარეობის შესახებ ინფორმაციის გადამოწმება სცადა პოლიციაში, სასწრაფო დახმარების სამსახურსა და საგანგებო სიტუაციების მართვის სამსახურში.

შს სამინისტროს ცნობით, გამოძიება დაწყებულია სისხლის სამართლის კოდექსის 275 მუხლით – ტრანსპორტის მოძრაობის უსაფრთხოების ან ექსპლუატაციის წესის დარღვევა.

_______________

შენიშვნა: მასალაში თავდაპირველად ეწერა, რომ მოქალაქეს კატერი დაჯახა, თუმცა შს სამინისტროში „ბათუმელებს“ უთხრეს, რომ საუბარია სკუტერზე. 

15 აგვისტოს Black Sea Arena-ზე ამერიკული მუსიკალური ჯგუფის The Killers-ის კონცერტზე მომხდარი ინციდენტი საერთაშორისო მედიის ყურადღების ქვეშ მოექცა.

ჯგუფის სოლისტის, ბრენდან ფლაუერსის მიერ ქართული აუდიტორიისთვის რუსებთან ძმობის მოწოდებასა და აუდიტორიის პროტესტზე The Guardian-მა, The Independent-მა, Reuters-მა, BBC-იმ, INSIDER-მა და სხვა გავლენიანმა მედიებმა დაწერეს.

The Independent-ი სტატიას ასეთი სახელწოდებით აქვეყნებს: რუსი გულშემატკივრის „ძმად“ მოხსენიებისა და ქართული აუდიტორიის აღშფოთების ფონზე The Killers-ი განცხადებას აქვეყნებს.

„მას შემდეგ, რაც მომღერალმა ბრენდან ფლაუერსმა საქართველოში ფანებს უთხრა, რომ აუდიტორიის რუსი წევრი დაენახათ, როგორც მათი „ძმა“, The Killers-მა ბოდიში გამოაქვეყნა“, – წერს გამოცემა.

ინციდენტის აღწერის შემდეგ კი აღნიშნავს:

„საქართველომ დამოუკიდებლობა საბჭოთა მმართველობისგან 1991 წელს მოიპოვა, ხოლო 2008 წელს რუსეთი შეიჭრა საქართველოში.

გასულ წელს, რუსეთის უკრაინაში შეჭრის შემდეგ, რამაც საქართველოში მრავალი რუსის ემიგრირება გამოიწვია, დაძაბულობა გაძლიერდა. შედეგად ქართველი ხალხი ძირითადად პროუკრაინულია“.

• The Guardian-ის სტატიის სათაური კი ასეთია: შეძახილები და კონცერტის დატოვება მას შემდეგ, რაც The Killers-მა საქართველოს აუდიტორიას უთხრა, რომ რუსი მათი „ძმაა“

„The Killers-მა ბოდიში მოიხადა მას შემდეგ, რაც მომღერალი ბრენდან ფლაუერსის მიერ რუსი თაყვანისმცემლის სცენაზე გამოყვანას უკმაყოფილო შეძახილები მოჰყვა კონცერტზე საქართველოში – ყოფილ საბჭოთა ქვეყანაში, რომელშიც რუსეთი 2008 წელს შეიჭრა. სოლომომღერალმა გულშემატკივარს მოუწოდა, როგორც „ძმებსა და დებს“, ისე ეფიქრათ ერთმანეთზე“, – წერს გამოცემა.

საქართველოს შესახებ კი დამატებით განმარტავს:

„რუსეთი აგრძელებს საქართველოს ტერიტორიის 20%-ის ოკუპაციას მას შემდეგ, რაც 2008 წელს ქვეყანაში შეიჭრა. 2022 წელს, უკრაინაში რუსეთის ომის დაწყების შემდეგ, რუსები წავიდნენ საქართველოში, რომელმაც საბჭოთა მმართველობიდან დამოუკიდებლობა 1991 წელს მოიპოვა. ზოგი რუსი ქვეყანაში უარყოფით რეაქციას შეეჯახა, მათ შორისაა რუსული საკრუიზო გემის შესვლის შეჩერება“.

• Reuters-ი: ამერიკული ბენდი The Killers-ი საქართველოში სცენაზე რუსი გულშემატკივრის აყვანის გამო ბოდიშს იხდის

„ამერიკულმა ალტერნატიულ-როკჯგუფმა, The Killers-მა, ბოდიში მოიხადა საქართველოში შოუს დროს რუსი დრამერის სცენაზე გამოყვანისა და თაყვანისმცემლებისთვის მითითებამ რუსების „ძმობასა და დობაზე“, რამაც მაყურებლის პროტესტი გამოიწვია.

საქართველოს აქვს დაძაბულობის ხანგრძლივი ისტორია ჩრდილოელ მეზობელთან, რაც გამწვავდა მოსკოვის მიერ 2022 წლის თებერვალში უკრაინაში შეჭრით და შემდგომში რუსი ემიგრანტების დიდი ნაკადით, რომლებიც გაიქცნენ თავიანთი ქვეყნიდან“, – წერს გამოცემა ისე, რომ რუსეთის მიერ საქართველოს ტერიტორიის ოკუპაციას, 2008 წლის ომს და სხვა დეტალებს არ ახსენებს, თუმცა სტატიის ბოლოსკენ დასძენს:

„ქართული საზოგადოებრივი აზრი დიდწილად პროუკრაინულია“.

• BBC-ი: The Killers-ი ბოდიშს იხდის რუსის „ძმად“ მითითებით საქართველოში ფანების გაღიზიანების გამო

„The Killers-მა ბოდიში მოიხადა მას შემდეგ, რაც სოლისტმა ბრენდონ ფლაუერსმა საქართველოში კონცერტის დროს რუსი ფანი სცენაზე მიიწვია, რათა დრამზე დაეკრა.

მან შეკრებილებს უთხრა, მოჰპყრობოდნენ რუს გულშემატკივარს, როგორც მათ „ძმას“, რამაც გამოიწვია შეძახილები, ხოლო აუდიტორიის ნაწილმა დარბაზი დატოვა. საქართველოს, რომელმაც რუსეთისგან დამოუკიდებლობა 1991 წელს მოიპოვა, მეზობელთან დაძაბულობის დიდი ისტორია აქვს.

რუსეთი საქართველოში 2008 წელს შეიჭრა და დღემდე ოკუპირებულია ყოფილი საბჭოთა ქვეყნის ნაწილი.

დაძაბულობა გამწვავდა, რაც შარშან, უკრაინაში რუსეთის შეჭრის შემდეგ, საქართველოში დიდი რაოდენობით რუსი ემიგრირდა“, – წერს გამოცემა.

INSIDER-ი ინციდენტის აღწერის შემდეგ წერს:

„საქართველოს ურთიერთობა რუსეთთან 1990-იანი წლების დასაწყისიდან დაიძაბა. საქართველო საბჭოთა კავშირს 1991 წელს გამოეყო.

ქვეყანა ჩართული იყო რუსეთთან ტერიტორიულ დავებში, რაც დასრულდა რუსეთის მიერ 2008 წელს შეჭრით. კარნეგის ფონდის თანახმად, რუსეთი ახლა საქართველოს ტერიტორიის 20%-ს აკონტროლებს“.

სკანდალის შესახებ წერს რუსული, პროკრემლისტური მედიაც.

____________

15 აგვისტოს, „ბლექ სი არენაზე“ მიმდინარე კონცერტის დროს, ერთ-ერთი სიმღერის შესრულებამდე ჯგუფის სოლისტმა, ბრენდან ფლაუერსმა, სცენაზე დრამერი აიყვანა, რომელმაც თქვა, რომ რუსეთის მოქალაქეა. ამ ინფორმაციის მიღებამ მსმენელებში პროტესტი გამოიწვია.

ბრენდან ფლაუერსმა მსმენელებს ჰკითხა, მისაღები იყო თუ არა მათთვის მის მიერ შერჩეული დრამერი. „განა, ყველა დები და ძმები არ ვართ?“ – იკითხა სცენიდან მუსიკოსმა. კადრებში, რომლებიც საკონცერტო დარბაზიდან გავრცელდა, ჩანს, რომ აუდიტორია ერთხმად პასუხობს – NO! -არა.

„ბლექ სი არენაზე“ ამერიკული ჯგუფის The Killers-ის კონცერტი Starring Georgia-ს ფარგლებში გაიმართა. ეს ორწლიანი სამთავრობო კამპანიაა, რომლის ფარგლებში საქართველოს მთავრობა უცხოელი მომღერლების ჩამოყვანაზე 70 მილიონს დახარჯავს.

კონცერტზე დასასწრები ბილეთი 100-დან 500-მდე ლარი ღირდა.

18 აგვისტოს ბათუმში, საზაფხულო თეატრში, საქველმოქმედო კონცერტი გაიმართება გიორგი გოგიბერიძის დასახმარებლად.

ბათუმელი რეჟისორი, საავტორო კინოს ბათუმის ფესტივალის დირექტორი გიორგი [გოგა] გოგიბერიძე ავთვისებიან სიმსივნეს ებრძვის. ოჯახის წევრების თქმით, სიტუაცია რთულია, თუმცა, ექიმების დასკვნით, ექვემდებარება მართვას და მკურნალობას. საჭიროა თანამედროვე ტიპის წამლები, რაც დღესდღეობით საქართველოში არ ფინანსდება ჯანდაცვის არსებული პროგრამებით.

საქველმოქმედო კონცერტში მონაწილეობენ: სოფო ხალვაში, ASEA SOOL, აჩიკო გოგიტიძე, სულხან დევაძე, გიორგი ტუღუში, ბენდი „ორიონი“, Seaside, გიორგი ნაკაშიძე, გიორგი გოგიბერიძე, ბათუმური კვარტეტი და სხვები.

კონცერტი პარასკევს, 18 აგვისტოს, 18:30 საათზე გაიმართება ბათუმის საზაფხულო თეატრში. 

ბილეთის ფასი 20 ლარია.

ბილეთები იყიდება biletebi.ge-ზე.

ასევე, ბილეთების შეძენა შეგიძლიათ ონლაინ გადარიცხვით ანგარიშზე – GE51BG0000000101454811 [მიმღები ი.მ. „ზვიად ელიზიანი“]  და ბილეთს ადგილზე მიიღებთ კონცერტის დღეს. დანიშნულებაში ჩაწერეთ „კონცერტის ბილეთი~.

კონცერტი პარალელურად გადაიცემა აჭარის ტელევიზიის პირდაპირ ეთერში, ტელემარათონის სახით.

ამავე თემაზე: 

კომპანია „სოკარის“ ცნობით, ხვალ, 17 აგვისტოს, ბათუმისა და ქობულეთის რამდენიმე ქუჩაზე გაზის მიწოდება შეწყდება.

ბათუმში გაზი  13:00 საათიდან 15:00 საათამდე გაეთიშებათ შერიფ ხიმშიაშვილის ქუჩის აბონენტებს.

ასევე ბათუმში  13:00 საათიდან 15:00 საათამდე გაზი გაითიშება ივანე მესხის #5 ჩიხში.

ქობულეთში 12:00 საათიდან 15:00 საათამდე გაზმომარაგება შეუწყდება რუსთაველის #140ა აბონენტებს.

ქობულეთში გაზმომარაგება 10:00 საათიდან 13:00 საათამდე შეუწყდებათ, ასევე, რუსთაველის #121-ში მცხოვრებ აბონენტებს.

„სოკარის“ ცნობით, გაზის შეწყვეტის მიზეზი გაზსადენზე დაგეგმილი სარეაბილიტაციო სამუშაოებია. კომპანია აბონენტებს მოუწოდებს, დაკეტილ მდგომარეობაში იქონიონ ბინებში არსებული გაზის ონკანები და უყურადღებოდ არ დატოვონ გაზის დანადგარები.

მუსიკალურმა ჯგუფმა The Killers-მა, რომელმაც გუშინ, 15 აგვისტოს, „ბლექ სი არენაზე“ კონცერტი ჩაატარა, ქართველ ხალხს ბოდიში მოუხადა.

ბოდიშის მოხდა ჯგუფს ინციდენტის გამო მოუწია, რომელიც კონცერტის მსვლელობის დროს მოხდა.

15 აგვისტოს, „ბლექ სი არენაზე“ მიმდინარე კონცერტის დროს, ერთ-ერთი სიმღერის შესრულებამდე ჯგუფის სოლისტმა, ბრენდან ფლაუერსმა, სცენაზე დრამერი აიყვანა, რომელმაც თქვა, რომ რუსეთის მოქალაქე იყო. ამ ინფორმაციის მიღებამ კონცერტის მსმენელებში პროტესტი გამოიწვია.

ბრენდან ფლაუერსმა მსმენელებს ჰკითხა, მისაღები იყო თუ არა მათთვის მის მიერ შერჩეული დრამერი. „განა ყველა დები და ძმები არ ვართ?“ – იკითხა სცენიდან მუსიკოსმა. კადრებში, რომლებიც საკონცერტო დარბაზიდან გავრცელდა, ჩანს, რომ აუდიტორია ერთხმად პასუხობს – NO! -არა.

მსმენელის პროტესტის მიუხედავად, The Killers-მა შერჩეულ დრამერთან ერთად დაუკრა. მსმენელებმა კი პროტესტის ნიშნად საკონცერტო დარბაზი დატოვეს.

სკანდალი სოციალურ ქსელში გაგრძელდა. მუსიკალური ჯგუფის სოციალური მედიის ანგარიშებზე მოქალაქეები თავიანთ საპროტესტო კომენტარებს ტოვებდნენ. კონცერტის დასრულების შემდეგ The Killers-მა  ბოდიში  ფეისბუქის თავის ოფიციალურ გვერდზე მოიხადა.

„კეთილო ქართველო ხალხო, ჩვენი მიზანი არ ყოფილა ვინმეს შეურაცხყოფა. ჩვენს ჯგუფს აქვს მრავალწლიანი ტრადიცია, კონცერტზე მოსული მსმენელიდან დრამზე დასაკრავად მოიწვიოს ადამიანები. დარბაზში შეკრებილი მსმენელების პირველი რეაქციის მიხედვით, ჩანდა, რომ აუდიტორია უარყოფითად არ იყო განწყობილი ჩვენ მიერ შერჩეული ადამიანის მიმართ.

გვესმის ისიც, რომ ჩვენ მიერ ნათქვამს – The Killers-ის ყველა მსმენელი და თაყვანისმცემელი „ძმები და დები“ არიან,  შეიძლება არასწორი ინტერპრეტაცია ჰქონდეს. ჩვენ არავის შეურაცხყოფა არ გვინდოდა. ბოდიშს ვიხდით. ჩვენ თქვენ გვერდით ვართ და ვიმედოვნებთ, რომ მალე ისევ დავბრუნდებით“, – ნათქვამია The Killers-ის  ბოდიშის ოფიციალურ ტექსტში.

ჯგუფის ოფიციალური ბოდიში გააზიარა „ბლექ სი არენას“ ოფიციალურმა ფეიჯმა, მათ თავიანთი წილი პასუხისმგებლობა აიღეს:

„გვესმის ჩვენი სტუმრების ემოციების. არტისტის მოქმედება სცენაზე არ არის Black Sea Arena-ს პოზიცია. ვიაზრებთ ჩვენს წილ პასუხისმგებლობას, გულწრფელად ვიხდით ბოდიშს და გიზიარებთ არტისტის პასუხს მომხდართან დაკავშირებით. რუსეთი ოკუპანტია,“ – წერია განცხადების ტექსტში.

„ბლექ სი არენაზე“  ამერიკული ჯგუფის The Killers-ის კონცერტი Starring Georgia-ს ფარგლებში გაიმართა. ეს 2-წლიანი სამთავრობო კამპანიაა, რომლის ფარგლებში საქართველოს მთავრობა უცხოელი მომღერლების ჩამოყვანაზე 70 მილიონს დახარჯავს.

ერეკლე 2016 წელს წავიდა პირველად ამერიკაში, აიდაჰოს შტატის კოლეჯში ფლექსის პროგრამით. კოლეჯი 2020 წელს დაამთავრა. მერე ორი წელი იმუშავა და ახლა სიეტლის სამართლის სკოლაში ჩაირიცხა. რამდენიმე დღეში სწავლა ეწყება.

კოლეჯშივე ისწავლა საბუნებისმეტყველო მეცნიერებებთან ერთად სამართალი, საერთაშორისო პოლიტიკა და შემოქმედებითი წერა, რაც ერთგვარი მომზადება იყო სამართლის სკოლაში სწავლის გასაგრძელებლად:

„ამერიკული განათლების სისტემისთვის ძალიან მნიშვნელოვანია საკუთარი აზრის ქონა, ყველა შესაძლო კუთხიდან დანახვა საკითხების, რასაც სწავლობ. Liberal Arts Education – ასე ერქვა ბაკალავრიატში ჩემს სასწავლო პროგრამას.

როცა უნივერსიტეტში დავიწყე სწავლა, სასწავლო პროცესთან შეგუება ბაკალავრიატში გამიჭირდა,  გაცილებით დიდი პროგრამა იყო სკოლასთან შედარებით, თუმცა მალე მივეჩვიე: ირგვლივ ძალიან მხარდამჭერი საზოგადოება აღმოჩნდა და შემეძლო საკუთარი თავის გამოხატვა, ყველამ კარგად მიმიღო  უნივერსიტეტში. დაცულად, თავისუფლად ვგრძნობდი თავს“, – გვიყვება ერეკლე ვახრამოვი.

ბაკალავრიატში სწავლის დროს უნივერსიტეტშივე დაიწყო მუშაობა ჭურჭლის მრეცხავად, შემდეგ უნივერსიტეტის კაფეტერიაში, მერე სტუდენტების მიმღებ განყოფილებაში. მუშაობდა რამდენიმე ორგანიზაციაში, იყო თავისივე უნივერსიტეტის იურიდიული ჯგუფის წევრი, რომელიც განიხილავდა სტუდენტების რაიმე დარღვევებს უნივერსიტეტში. ერეკლე ამბობს, რომ ეს იყო სასამართლოს პატარა მოდელი უნივერსიტეტში.

ამავე უნივერსიტეტში მისი დაფინანსების მქონე სტუდენტებისთვის არსებობს დასაქმების ვაკანსიებიც, სადაც ახლა მუშაობის დაწყებას ელოდება ნახევარ განაკვეთზე, რომ საცხოვრებელი ხარჯები დაფაროს.

ერეკლემ ამერიკაში წასვლისთანავე იცოდა, რომ იქ დარჩებოდა. ამბობს, რომ საქართველოში უსაფრთხოდ ვერ გრძნობს თავს და როგორც ლგბტქ თემის წევრმა აშშ-ში ცოტა ხნის წინ თავშესაფარიც მოითხოვა. მწვანე ბარათი ანუ მუშაობისა და ცხოვრების უფლება ახლახან მიიღო. ამბობს, რომ როგორც ემიგრანტს, გაუმართლა. 8, 9 წლიდანვე სწავლობდა ინგლისურს და კარგად საუბრობდა:

„ბევრს აქ ამერიკელი ვგონივარ. ინგლისურად კარგად ვსაუბრობ ჩემი მასწავლებლის, მაია ჯაშის წყალობით. სამწუხაროდ, გარდაიცვალა. მან მასწავლა ყველაფერი ამერიკულ კულტურაზე, შემაყვარა ენა და მომამზადა, შევჩვეოდი ამ გარემოს.

უსაფრთხოებასა და დაცულობასთან ერთად ჩემთვის ყველაზე მნიშვნელოვანი ამერიკაში მაღალხარისხოვან განათლებაზე წვდომა და თვითგამოხატვის თავისუფლებაა, ბევრი სხვადასხვა კულტურის, ეთნიკური წარმომავლობის ადამიანს შეხვდები, სხვადასხვა ისტორიით.

ამერიკაში ცხოვრების უნიკალობაც მრავალფეროვნებაშია. ეს მთელ მსოფლიოსთან კავშირს ნიშნავს.

მთელი ჩემი მომავალი ცხოვრება საერთაშორისო სამართალი იქნება. აქ რეკომენდაციაც გამიწიეს უნივერსიტეტიდან, რაც დიდი პასუხისმგებლობაა და სწავლის წლებს უნდა შევხედო ისე, თითქოს ვმუშაობ: დილის 8 საათიდან დაიწყება სწავლა და საღამოს შვიდამდე უნდა დავუთმო დრო მეცადინეობებს“, – ამბობს ერეკლე.

მომავალს ამერიკაში გეგმავს. თუმცა ამბობს, რომ საკუთარი უნარების საქართველოში გამოყენებაზე, საერთაშორისო პროექტებით ქართველ კოლეგებთან სამომავლო კავშირებზე, საერთო საქმეებზეც ფიქრობს. ბაკალავრიატში სწავლის დროს გეგმავდა მშვიდობის პროექტის 10 ათას-დოლარიანი გრანტი გამოეყენებინა დედის სოფელში, ბახვში რამდენიმეოთახიანი შენობის გასარემონტებლად, ბიბლიოთეკისა და სათამაშო სივრცის მოსაწყობად, მაგრამ თავშესაფრის მოლოდინში ერეკლეს არ ჰქონდა აშშ-ის ტერიტორიის დატოვების უფლება და ეს გეგმა ვერ განახორციელა.

ამერიკის მოქალაქეობის მიღების შემდეგ საქართველოში ჩამოსვლას გეგმავს, მაგრამ ამბობს, რომ ოზურგეთში მაგალითად, სადაც გაიზარდა, დარჩენას ვერ შეძლებდა:

„მწყინს, რომ ასეა. თბილისში თუ დავრჩები მეგობრებთან ერთად საქართველოში ჩამოსვლისას. არ მგონია იგივე შევძლო ოზურგეთში. გეისთვის ძალიან საშიშია საქართველოში ქუჩაში გავლაც კი. მე ყოველთვის მეშინოდა. ვფიქრობდი, რას იფიქრებდნენ ჩემზე გარშემომყოფები, როგორ შემომხედავდნენ, სულ ვშიშობდი, ხომ არაფერს ვაკეთებდი ისე, რომ ყურადღება მიმეპყრო.

ამერიკაში თავს დაცულად ვგრძნობ. დაცულობისა და თავისუფლების შეგრძნება თვითგამოხატვისთვის იმიტომაა მნიშვნელოვანი, რომ ეს გაძლევს შესაძლებლობას, არ გეშინოდეს და არ იყო დათრგუნული. თავისუფლება გაძლევს შესაძლებლობას, იცხოვრო შენი მიზნებისთვის, გქონდეს ეს მიზნები და არ იყო ჰომოფობიით შეზღუდული, არ ცხოვრობდე ძალადობით სავსე გარემოში, შეძლო საკუთარი საქმის მშვიდად კეთება, შესაძლებლობების მაქსიმალურად გამოყენება“, – ამბობს ერეკლე.

საქართველო 2023 წლის შემოდგომაზე ევროკავშირის კანდიდატი სტატუსის მოლოდინშია, რისთვისაც ქვეყანამ 12-პუნქტიანი ამოცანის შესრულება უნდა შეძლოს. ჯერჯერობით ამ გეგმის მხოლოდ სამი პუნქტია შესრულებული.

ამერიკაში მცხოვრები ქართველი სტუდენტების დიდი ნაწილის მსგავსად ერეკლესაც მიაჩნია, რომ ეს ქვეყნისთვის გადამწყვეტი მომენტია სამომავლო განვითარების გზაზე.

23 წლის სტუდენტი ფიქრობს, რომ საქართველოს პრორუსი მთავრობა ჰყავს და ჩინეთთან ურთიერთობების გაღრმავების მცდელობაც ქვეყნის ევროდასავლური გეზისთვის დამაზიანებელია:

„მით უფრო ახლა, კანდიდატის სტატუსის მოლოდინში, ჩინეთთან სტრატეგიული პარტნიორობის შეთანხმება კარგს არაფერს უნდა ნიშნავდეს“, – ამბობს ერეკლე.

საქართველოს პროკურატურის განცხადებით, დიდი ოდენობით თანხის თაღლითურად დაუფლების ბრალდებით ერთი პირი დააკავეს.

უწყების თქმით, გამოძიებით დადგინდა, რომ გენერალური პროკურატურის წარმოებაში არსებული სისხლის სამართლის საქმის ერთ-ერთი ფიგურანტი ბრალდებულმა დაარწმუნა, თითქოს იგი დაახლოებული იყო როგორც საქართველოს პროკურატურის, ისე სხვადასხვა სახელმწიფო უწყების ცალკეული თანამდებობის პირებთან და შეეძლო დახმარება მიმდინარე გამოძიების მის სასარგებლოდ დასრულებაში:

„აღნიშნულის სანაცვლოდ ბრალდებულმა სისხლის სამართლის საქმის ფიგურანტს 220 000 აშშ დოლარის ორ ეტაპად გადაცემა მოსთხოვა, საიდანაც პირველ ეტაპზე დაზარალებულმა ბრალდებულს 100 000 დოლარი გადასცა“, – ნათქვამია პროკურატურის მიერ გავრცელებულ განცხადებაში.

დაკავებულს ბრალი საქართველოს სსკ-ის 180-ე მუხლის მესამე ნაწილის „ბ“ ქვეპუნქტით (მართლსაწინააღმდეგო მისაკუთრების მიზნით სხვისი დიდი ოდენობით ნივთის მოტყუებით დაუფლება) წარედგინა, რაც სასჯელის სახედ და ზომად 6-დან 9 წლამდე თავისუფლების აღკვეთას ითვალისწინებს.

პროკურატურის შუამდგომლობის საფუძველზე, ბრალდებულს აღკვეთის ღონისძიების
სახით პატიმრობა შეეფარდა.