მთავარი,სიახლეები

სოჭის პორტი ბათუმსა და აფხაზეთში მგზავრების გადაყვანას აპირებს – რუსული მედია

24.01.2023 • 1159
სოჭის პორტი ბათუმსა და აფხაზეთში მგზავრების გადაყვანას აპირებს – რუსული მედია

სოჭის საზღვაო პორტი საქართველოსთან საზღვაო გზით მგზავრების გადაყვანის თაობაზე მოლაპარაკებებს აწარმოებს  – ამის შესახებ რუსული სააგენტო TASS-ი წერს.

სააგენტოს ცნობით, სოჭიდან საქართველოში მგზავრების ტრანსპორტირება, სავარაუდოდ, ბათუმში განხორციელდება.

„სოჭის საზღვაო ნავსადგური მოლაპარაკებებს აწარმოებს შავი ზღვით აფხაზეთსა და საქართველოში სამგზავრო მიმოსვლაზე – ამის შესახებ TASS-ს  სოჭის საზღვაო ნავსადგურის გენერალურმა დირექტორმა იური ვლადიმეროვმა განუცხადა.

„ვიმედოვნებთ, რომ მოხდება [მგზავრთა ტრანსპორტირება] აფხაზეთსა და საქართველოში. ჯერ მოლაპარაკებები მიმდინარეობს. განზრახულია ტრანსპორტირების დაწყება ამ ზაფხულს”, – განაცხადა ვლადიმეროვმა და დასძინა, რომ მგზავრების გადაყვანა სოჭიდან საქართველოში, სავარაუდოდ, განხორციელდება ბათუმში.

„ძალიან დიდი მოთხოვნაა ახალ სამგზავრო, საზღვაო მარშრუტებზე. ჩვენ ვეცდებით, ჩვენი ტურისტების მოთხოვნები დავაკმაყოფილოთ, რამდენადაც ეს შესაძლებელი იქნება, განვვითარდეთ ამ მიმართულებით“, – დასძინა ვლადიმიროვმა“ – წერს TASS-ი.

მიმდინარეობს თუ არა მოლაპარაკებები სოჭსა და ბათუმს შორის საზღვაო გზით მიმოსვლაზე? – ამ კითხვით „ბათუმელებმა“ საქართველოს საზღვაო ტრანსპორტის სააგენტოს მიმართა. აქ გვითხრეს, ინფორმაცია ამის შესახებ არ აქვთ და დააზუსტებენ.

18 იანვარს რუსეთის საგარეო საქმეთა მინისტრმა სერგეი ლავროვმა შეაქო საქართველოს ხელისუფლება, იმისთვის, რომ მიუხედავად დასავლეთის მოთხოვნისა, საქართველოს მთავრობა არ შეუერთდა რუსეთის მიმართ დაწესებულ სანქციებს. ლავროვმა იმედი გამოთქვა, რომ მალე აღდგება საქართველოსთან პირდაპირი ფრენები, რომელიც 2019 წლის 8 ივლისიდანაა შეწყვეტილი რუსეთის პრეზიდენტის, ვლადიმერ პუტინის ბრძანებით.

2022 წლის თებერვლიდან, მას შემდეგ რაც რუსეთი თავს დაესხა უკრაინას, საქართველოში ყოველთვიურად რუსეთის 100 ათასობით მოქალაქე შემოდის.

ოფიციალური მონაცემებით, 2022 წლის მარტიდან დეკემბრის ჩათვლით, საქართველოს საზღვარი რუსეთის 1 405 552 მოქალაქემ გადმოკვეთა.

_______________

ფოტოზე: ბათუმის ნავსადგური. ფოტო: „ბათუმელები“/მანანა ქველიაშვილი

გადაბეჭდვის წესი


ასევე: