„უკრაინას სჭირდება Taurus-ის რაკეტები, რათა გადაარჩინოს მეტი ჯარისკაცი და მშვიდობიანი მოქალაქე, დააჩქაროს თავისი ტერიტორიების გათავისუფლება და დაასრულოს ომი უფრო სწრაფად“, – განაცხადა უკრაინის საგარეო საქმეთა მინისტრმა დმიტრო კულებამ გერმანულ გამოცემა Bild-თან ინტერვიუში.
კულებას თქმით, Taurus-ის რაკეტების დახმარებით უკრაინას შეუძლია მისწვდეს უკრაინაში მყოფ რუსეთის საოკუპაციო ძალებს ფრონტის ხაზის უკან, ჩამოშალოს მათი ლოჯისტიკა, გაანადგუროს სამეთაურო ცენტრები და საბრძოლო მასალის საცავები.
„ფორმულა მარტივია: რაც უფრო დიდია რაკეტის მანძილი, მით უფრო მოკლეა ომის ხანგრძლივობა“, – თქვა კულებამ Bild-თან.
კულება ამბობს, რომ უსაფუძვლოა შიშები, თითქოს უკრაინამ შესაძლოა გამოიყენოს ეს რაკეტები რუსეთის ტერიტორიაზე.
„ჩვენ გამოვიყენებთ რაკეტებს მხოლოდ ჩვენს საზღვრებში, რათა გავათავისუფლოთ ის ტერიტორია, რაც ჩვენია გაეროს წესდებისა და საერთაშორისო სამართლის შესაბამისად“, – თქვა კულებამ და ხაზი გაუსვა, რომ გერმანიის არც ერთ წინა გადაწყვეტილებას უკრაინისთვის ახალი ტიპის იარაღის მიწოდებაზე არ გამოუწვევია კონფლიქტის ესკალაცია.
„პირიქით: გერმანულმა იარაღმა უკვე გადაარჩინა მრავალი უკრაინელის სიცოცხლე“, – დასძინა მინისტრმა.
„დოიჩე ველეს“ ცნობით, გერმანიაში დისკუსია მიმდინარეობს იმის თაობაზე, უნდა მიაწოდონ თუ არა უკრაინას შორ მანძილზე მოქმედი Taurus-ის რაკეტები. გერმანიის კანცლერის, ოლაფ შოლცის ოპონენტები თვლიან, რომ კანცლერი პროცესს აჭიანურებს.
Taurus-ის რაკეტა არის ბრიტანულ-ფრანგული Storm Shadow-ს გერმანულ-შვედური ანალოგი, მათი გაშვება შესაძლებელია უკრაინის შეიარაღებულ ძალების საბრძოლო თვითმფრინავებიდან. Storm Shadow-ს უკრაინა უკვე იყენებს ომში.
