Batumelebi

ევანგელურ-ბაპტისტური ეკლესიის ეპისკოპოსი მალხაზ სონღულაშვილი ქვეყანაში მიმდინარე მოვლენებს ეხმაურება.

გთავაზობთ მის მოსაზრებას, რომელიც მალხაზ სონღულაშვილმა 15 მაისს გამოაქვეყნა ფეისბუქის გვერდზე.

„მარტინ ლუთერ კინგი ამბობდა: „სამყაროს ვექტორი სამართლიანობისკენ არის მიდრეკილი”, რაც იმასა ნიშნავს, რომ ადამიანი სამართლიანობას ესწრაფვის თუ ცნობიერად თუ გაუცნობიერებლად. იმისათვის, რომ ამ სწრაფვამ ხორცი შეისხას, სამართლიანობის შენებაში უკლებლივ ყველა თაობამ უნდა მიიღოს მონაწილეობა. ამის გარეშე არ არსებობს არც თავისუფლება, არც დემოკრატია, არც მრავალფეროვნების დაფასება, არც ძმობა და არც ერთობა.

ის, რაც ახლა ჩვენს საქართველოს დედაქალაქსა და ჩვენს ქვეყანაში ხდება, დიახაც რომ ბრძოლაა სამართლიანობისათვის. ყველაზე საუკეთესო რაც ჩვენ დღეს გაგვაჩნია, როგორც ქვეყანას, კულტურას, ადამიანთა ერთობას, ეს არის თავისუფლებაში გაზრდილი ახალგაზრდობა, რომელიც სრულად არის ჩაბმული სამართლიანობის შენებაში.

მათი უძლეველი იარაღია გულწრფელობა, სიალალე და სიყვარული. თითოეულ მათგანს ყველანი თვალისჩინივით უნდა გავუფრთხილდეთ.

ჰოდა, ამიტომ უსამართლობაზე კიდევ უფრო დიდი უსამართლობაა ჩვენი ახალგაზრდობის დემონიზება, დაჩაგვრისა და გაშავების მცდელობა. გარდა ამისა, უსამართლობაა მათი ხმების შეუსმენლობა და მათ წუხილებზე ყურის მოყრუება და თვალების დახუჭვა.

ასევე, უსამართლობაა, როცა დიდსა და პატარას ნაცარს გვაყრიან თვალში და უტიფრად გვარწმუნებენ, რომ შავი თეთრია და თეთრი – შავი. როგორც ამას ძველები იტყოდნენ, მაწონი შავია და კამეჩი – თეთრი.

უსამართლობაა, როცა სამშობლოს სამსახურში დამაშვრალსა და სამშობლოს საზღვრების ჯიუტად დამცველ ადამიანის ცემა-ტყეპით უსწორდებიან თავისიანები და თავ-პირს უერთიანებენ.

უსამართლობაა, როცა ახალგაზრდას უსაფუძვლოდ ციხეს ახეხინებ და რამდენიმე დღეში თავისუფლებაზე გამოსულს, დასტაცებ ხელს და დაიჭერ. რისთვის, სამშობლოს სიყვარულისთვის?

უსამართლობაა, როცა აკეთებ იმას, რაც მოყვარეს გულსა სტკენს და შენს მტერს ახარებს. რატომ?

უსამართლობაა, როცა ქალებს, დედებს თმებით ათრევინებ ქუჩაში იმათ, ვისაც ამავე ქალების დასაცავად, ამ ქალების ჯიბიდან ამოღებული ფულით უხდი ჯამაგირს. ეს რა სიშლეგეა?

უსამართლობაა, როდესაც შენი ხალხის მრავალსაუკუნოვან და სანუკვარი ოცნების აღსრულებას, იყოს თავისუფალი, გალაღებული, დემოკრატიული, თანასწორი – გველეშაპივით წინ ეღობები. რატომ გინდა შენი შვილების მომავალს ძირი გამოუთხარო? რატომ?

უსამართლობაა, როცა თავისუფლებაზე შეყვარებულ გოგო-ბიჭებს, იმის მაგივრად რომ მადლობას უხდიდე და გულში იკრავდე, ხელკეტებით დასდევ, ტყვიებს უშენ და წიწაკის სპრეით უმასპინძლდები. ოჯახში არ გაიზარდე? სიყვარული და ადამიანის თანაგრძნობა არავინ გასწავლა?

უსამართლობაა, როცა სამართლიანობის დასაცავად ხარ დადგენილი და სამართალს ამრუდებ. რატომ ვერ ჩერდები? რატომ ვერ ხედავ ზღვარს, რომელსაც არ უნდა გადახვიდე?

უსამართლობაა ისიც, როცა საკუთარ თავს არწმუნებ, რომ ეს უსამართლობა სამართლიანობაა! ცოდო ხარ, ამას რატომ უკეთებ საკუთარ თავს?

ყველამ უნდა იცოდეს, ამ უსამართლობის წინააღმდეგ ბრძოლაში, უმჯობესია, დაჩაგრული იყო, ვიდრე სხვასა ჩაგრავდე! სჯობია, გცემდნენ სამართლიანობისთვის, ვიდრე სცემდე უსამართლოდ.

ჯობია, ტელეფონით გემუქრებოდნენ (აზერბაიჯანული და თურქული ნომრებიდან) და სადარბაზოში გისაფრდებოდნენ, ვიდრე შენ ემუქრებოდე ვინმეს და შენ უსაფრდებოდე.

სჯობს შენს რეპუტაციას აშავებდნენ, ვიდრე შენ აშავებდე სხვის სახელს. სჯობს თავისუფლების ძახილში ყელი გქონდეს ჩახლეწილი, ვიდრე გატრუნული იყო და უყურებდე შენი შვილები და და-ძმები როგორ ჩაგრავენ შენს შვილებსა და და-ძმებს.

სჯობს, ჩაგრულის მხარეს იყო და რამე დაკარგო, ვიდრე მჩაგვრელის მხარეს იყო და ამით ხეირი ნახო. ჯობს ყინულივით ცივი ჭავლის ქვეშ იდგე და წიწაკის სპრეის სუნთქავდე, ვიდრე შენ ასხამდე სხვას წყლის ჭავლსა და წიწაკის სპრეის.

რატომ? რატომ?? რატომ?? ნუთუ ეს ძნელი გასაგებია?!

იმიტომ, რომ ღმერთი ყოველთვის ჩაგრულების მხარესაა და არა მჩაგვრელების.

ყოველთვის ასე იყო, ყოველთვის ასე იქნება. ღმერთი იმათ მხარესაა, ვინც სამართლიანობისათვის იბრძვის უანგაროდ და არა – იმათ მხარეზე, ვინც სამართლიანობას ებრძვის ანგარების მიზნით. ღმერთი იმათ მხარეს კი არაა, ვინც ადამიანს სალოცავის კარს უკეტავს, არამედ იმათ მხარეზე, ვისაც უკეტავენ.

რაც ახლა უნდა გითხრათ, შეიძლება, მოგეჩვენოთ, რომ ამით ჩემს პროფესიულ მოვალეობას ვიხდი,მაგრამ დამერწმუნეთ, ეს ასე არ არის.

ჩემი სათქმელი აი, ეს არის, სამართლიანობისათვის ბრძოლა ლოცვის გარეშე არ არსებობს. (გთხოვთ, ბოლომდე ჩაიკითხოთ ეს ტექსტი და ლოცვის რელიგიურ ალუზიას ნუ დააფრთხობინებთ თავს).

ლოცვა მარტო დაზეპირებული ლოცვების ჩამორაკრაკება არ არის და არც სალოცავებში მუხლებზე ხოხიალი. ლოცვა არის სიმართლისათვის გარჯა, წვიმასა და სიცივეში კარში ყოფნა, ლოცვა არის თანადგომისა და შერიგებისათვის ბრძოლა! ლოცვა არის ნამდვილი მშვიდობისათვის სწრაფვა! ლოცვა არის ქუჩაში გამოსული ადამიანის გამხნევება, ჩვენ ოთხფეხა მეგობრებზე მზრუნველობა, რომლებიც რობოკოპებს უყეფენ და მომიტინგეებს ესარჩლებიან (ნეტა ამათ საიდან იციან ვის უნდა გამოესარჩლონ და ვის – არა?!)

აღდგომა ღამეს ყველანი ჩვენს ტაძრებში ვიხდიდით სააღდგომო ლიტურგიას, მაგრამ ყველაზე დიდი ლიტურგია იმ ღამეს გადაიხადეს ჩვენმა ახალგაზრდებმა, რუსთაველის გამზირზე, სადაც სამშობლოსა და სამართლიანობის სიყვარულით გაერთიანებული სრულებით განსხვავებული ადამიანები ერთად იდგნენ, ხელში სანთლები ეჭირათ და ერთად აგუგუნებდნენ საგალობლებს; სხვადასხვა ყაიდის ქრისტიანები, მუსლიმები, ებრაელები, ეზიდები…რელიგიურები, არარელიგიურები, ყველანი.

ახლა კი ნამდვილად მივადექი ჩემს მთავარ სათქმელს: ჩვენ ახლა ისე უნდა ვილოცოთ, როგორც არასდროს გვილოცია! უნდა ვილოცოთ, ვინც მლოცველები ვართ და ვინც მლოცველები არა ვართ.

ლოცვა არის სამართლიანობისთვის ბრძოლა. სამართალი პურს შეჭამს უსათუოდ. ყოველთვის ასე იყო, ყოველთვის ასე იქნება. გამხნევდით, გამაგრდით, გაძლიერდით სამართლისა და თავისუფლების სიყვარულში. ნუ დაიღლებით იმის კეთებაში, რის გამოც სიცოცხლე ღირს და ფასი აქვს.

უსამართლობა უკვე დამარცხებულია, სამართლიანობისთვის ჩაგრული უკვე გამარჯვებულია. გებრალებოდეთ ისინი, ვინც სამართლიანობას ეწინააღმდეგებიან და გთხოვთ, მათზე გულს ნურასოდეს გაიბოროტებთ.

ისინი დაკარგული შვილები არიან, რომელნიც ზოგჯერ შინ ბრუნდებიან ხოლმე!“ – წერს მიტროპოლიტი მალხაზ სონღულაშვილი.

„არა ანტიდემოკრატიულ კანონს, რომელმაც კიდევ ერთხელ გახლიჩა ქართული საზოგადოება“ – წერს გოჩა სურგულაძე, ბათუმის სახელმწიფო უნივერსიტეტის სტუდენტთა კარიერული განვითარების, კულტურისა და სპორტის დეპარტამენტის უფროსის უკვე ყოფილი მოადგილე. თანამდებობის დატოვების შესახებ ინფორმაცია მან „ბათუმელებს“ სატელეფონო საუბარში დაუდასტურა.

გოჩა სურგულაძის თქმით, ის დღეიდან აქციებზე სტუდენტებთან ერთად იქნება.

„სტუდენტების გაფიცვა არის ლეგიტიმური!

კრიზისულ სიტუაციებში, მაშინ როცა საზოგადოებას პოლიტიკური ძალების (პარტიების) მიმართ აქვს უნდობლობა, მხოლოდ სტუდენტებს შეუძლიათ სახალხო-სამოქალაქო პროტესტს ჩაუდგნენ სათავეში. სტუდენტებს უფლება კი არა, არამედ აქვთ დაუწერელი ვალდებულება საზოგადოების წინაშე, რომ იყვნენ პროგრესის ავანგარდი და ჩაუდგნენ მსგავს საპროტესტო მუხტს სათავეში.

სტუდენტებს შეცდომების დაშვების უფლებაც აქვთ! ….და საბოლოოდ #არა ანტიდემოკრატიულ კანონს, რომელმაც კიდევ ერთხელ გახლიჩა ქართული საზოგადოება. #კი მხარდაჭერა ყველას, ვინც მონაწილეობას იღებს ანტისახელისუფლება/ანტიბიძინა მანიფესტაციებში.

P.S.: არ მსურდა საერთოდ პოლიტიკურ პროცესებში ჩართვა, მაგრამ სხვა გზა არ დაგვიტოვეს“ – წერს გოჩა სურგულაძე ფეისბუქზე.

სტუდენტური მოძრაობა ბათუმში რუსული კანონის წინააღმდეგ ყოველდღე მართავს საპროტესტო აქციებს. ისინი პოზიციის დაფიქსირებას ლექტორებისგან და რექტორისგანაც ითხოვდნენ. დღეს კი მათ ბათუმის შოთა რუსთაველის სახელმწიფო უნივერსიტეტის რექტორის, მერაბ ხალვაშის გადაწყვეტილება დაგმეს, რომლის მიხედვითაც ის შეუერთდა 38 უნივერსიტეტის ერთობლივ განცხადებას.

ამ განცხადებით უმაღლეს საგანმანათლებლო დაწესებულებათა რექტორების მუდმივმოქმედი კონფერენციის წევრები აცხადებენ, რომ პოლიტიკური პროცესები არ უნდა აისახოს უნივერსიტეტების ფუნქციონირებაზე.

„ვფიქრობ, სწორი ნაბიჯი გადავდგი, არ მინდა სტუდენტები მარტო დავტოვო“ – გვითხრა გოჩა სურგულაძემ. ის მიიჩნევს, რომ სტუდენტებს ახლა მხარდაჭერა და გამოცდილების გაზიარება ქუჩაში სჭირდებათ.

„ვფიქრობ, რომ სტუდენტებს მხარდაჭერა სჭირდებათ ქუჩაში, სადაც არის აქციები.

დიახ, ვიქნები მათთან ერთად. ერთ-ერთი მონაწილე ვიქნები, ვიცი, რომ ყველაფერს სწორად გააკეთებენ, მივყვები მეც. თუ საჭირო იქნება, გადავეფარები. ხელისუფლება რას გააკეთებს ამის შემდეგ, არ ვიცით, ამიტომაც მათ სჭირდებათ გამოცდილი ადამიანები, რომლებიც გვერდში დაუდგებიან და არ მისცემენ გარკვეულ ძალებს პროვოკაციების საშუალებას, დარბევის საშუალებას.

ჩვენ გვაქვს გამოცდილება, ჩვენ ვიბრძოდით ორი ხელისუფლების დროს, „ნაციონალური მოძრაობის“ დროსაც და „ოცნების“ დროსაც სამართლიანობისთვის, დემოკრატიისთვის, მათ შორის უნივერსიტეტის ავტონომიისთვის, გამოხატვის თავისუფლებისთვის. მინდა, რომ ეს ბრძოლა მათთან ერთად გავაგრძელო, არცერთი თანამდებობა, არცერთი სამსახური არ ღირს იმად, რომ შეუერთდე უსამართლობას, არადემოკრატიულ გადაწყვეტილებებს და ავტორიტარიზმს.“

გოჩა სურგულაძის თქმით, საკუთარი პოზიციის გამო ხელმძღვანელისგან ზეწოლას მის მიმართ ადგილი არ ჰქონია და სამსახურის დატოვების გადაწყვეტილება თავად მიიღო:

„ჩვენ ვიცით, რომ ვცხოვრობთ ისეთ სახელმწიფოში, სადაც პერიოდულად გარკვეული წნეხი ყველა ინსტიტუტზე არის, შესაძლებელია დღეს უნივერსიტეტზე იმ დოზით არ იყოს, მაგრამ ხვალ და ზეგ აუცილებლად იქნება.

მირჩევნია დღეს ეს პრობლემა გადაიჭრას, ვიდრე თავშეკავებული გავყვე უნივერსიტეტს რაღაც პროცესებში… მირჩევნია ვიყო გარეთ, სამსახურის გარეშე, ხელფასის გარეშე, რაც დიდი პრობლემაა. მირჩევნია ვიყო მართლა ღირსებით და დასავლურ ღირებულებებზე და არა რაღაცა ფსევდო ავტორიტარულ იდეალებზე“.

რაც შეეხება უნივერსიტეტის რექტორის მერაბ ხალვაშის გადაწყვეტილებას, ხელმოწერას რექტორთა განცხადებაზე იმის შესახებ, რომ პოლიტიკური პროცესები არ უნდა აისახოს უნივერსიტეტების ფუნქციონირებაზე, გოჩა სურგულაძე არ ეთანხმება:

„უნივერსიტეტი და პოლიტიკა ცალკე ვერ იქნება და უნივერსიტეტის მორალური ვალდებულებაა, რომ ჰქონდეს მკაფიო პოზიცია აღნიშნულ პროცესებთან დაკავშირებით, რადგან აქ არის საუბარი სახელმწიფოს საგარეო ორიენტირზე, გვექნება დემოკრატიული თუ არადემოკრატიული გარემო. უნივერსიტეტი არის ლიბერალურ პრინციპებზე დაფუძნებული. თუ ამ ღორებულებებს სახელმწიფოში ხელი ეშლება, უნივერსიტეტს აქვს მორალური ვალდებულება, რომ პოზიცია ჰქონდეს“ – ამბობს გოჩა სურგულაძე.

გაერთიანებული ერების ორგანიზაცია საქართველოში წუხილს გამოთქვამს „უცხოური გავლენის გამჭვირვალობის შესახებ” კანონის მიღების გამო.

„კანონის მიღება საფრთხეს უქმნის გამოხატვისა და გაერთიანების თავისუფლებას და აფერხებს სამოქალაქო საზოგადოებისა და მედიის, როგორც ქართული დემოკრატიის მთავარი საყრდენის საქმიანობას. სხვა საფრთხეებთან ერთად, ამ კანონმა შეიძლება დააბრკოლოს სამოქალაქო საზოგადოების მიერ სასიცოცხლოდ მნიშვნელოვანი სოციალური სერვისების მიწოდება.

აუცილებლად მიგვაჩნია ძალადობისა და დაშინების ყველა შემთხვევის გამოძიება, რომელთაც ადგილი ჰქონდათ პროტესტების მიმდინარეობისას და მათ შემდეგ.

გაერო განაგრძობს თანამშრომლობას პარტნიორებთან თანასწორი და სამართლიანი საქართველოს მხარდასაჭერად“ – ვკითხულობთ განცხადებაში.

დღეს, 14 მაისს, „ქართულმა ოცნებამ“ მესამე, საბოლოო მოსმენით მიიღო რუსული კანონი მასშტაბური დემონსტრაციებისა და საზოგადოების პროტესტის მიუხედავად.

დღეს, 14 მაისს, 19:00 საათზე, ბათუმში, სახელმწიფო უნივერსიტეტის წინ, რუსთაველის ქუჩაზე, რუსული კანონის საწინააღმდეგო აქცია გაიმართება.

აქციას სტუდენტები მართავენ, რომლებიც მეორე დღეა გაფიცული არიან და აცხადებენ, რომ არ შევლენ აუდიტორიებში მანამ, სანამ „ქართული ოცნება“ არ გაიწვევს რუსულ კანონს.

სტუდენტები აქციების გაგრძელებას იმ შემთხვევაშიც აპირებენ, თუ ხელისუფლება მასობრივი პროტესტის მიუხედავად, მაინც მიიღებს რუსულ კანონს.

საპროტესტო მსვლელობა დღეს ბათუმში საჯარო და კერძო სკოლის მოსწავლეებმაც გამართეს რუსული კანონის წინააღმდეგ.

„არა რუსულ კანონს, არა რუსულ ხელისუფლებას“, „კი ევროპას“- აცხადებდნენ ახალგაზრდები.

სკოლის მოსწავლეები ცდილობენ ასე გააგონონ ხმა მმართველ პარტიას, რომელიც ცდილობს მიიღოს რუსული კანონი ქვეყანაში მიმდინარე მრავალათასიანი დემონსტრაციების ფონზე.

მოსწავლეებს მოგვიანებით სტუდენტებიც შემოუერთდნენ, ახალგაზრდებმა შემოიარეს ქალაქის ქუჩები და საზოგადოებას მოუწოდებდნენ გაერთიანებისკენ.

დღეს, 14 მაისს, პარლამენტში „ქართული ოცნება“ მესამე მოსმენით აპირებს რუსული კანონის მიღებას. ამ დროისთვის მიმდინარეობს საპარლამენტო განხილვები.

• რა ხდება

საქართველოს დიდ ქალაქებში ერთ თვეზე მეტია მიმდინარეობს პროტესტი „რუსული კანონის“ წინააღმდეგ, რომელიც „ქართულმა ოცნებამ“ უპირობოდ გაწვევის დაპირების მიუხედავად დააბრუნა პარლამენტში.

ბათუმის პირველი საჯარო სკოლის თვითმმართველობა აპროტესტებს რუსულ კანონს და დღეს ბათუმში დაგეგმილ საპროტესტო აქციას უერთდება.

„ჩვენ, ილია ჭავჭავაძის სახელობის ბათუმის #1 საჯარო სკოლის თვითმმართველობა, სოლიდარობას ვუცხადებთ რუსული კანონპროექტის საწინააღმდეგო აქციებს. როგორც ჩვენი სასკოლო საზოგადოების წარმომადგენლები.

ილია ჭავჭავაძის სახელობის სკოლის თვითმმართველობა, ვაღიარებთ სუვერენიტეტის პრინციპების დაცვის მნიშვნელობას. ილია ჭავჭავაძე, რომელიც საქართველოს ევროპულ ღირებულებებთან ინტეგრაციის გულმხურვალე ქომაგი იყო, თავიდანვე ხაზი გაუსვა ევროპული მომავალის ჩამოყალიბების მნიშვნელობას. მისი ხედვა ევროპულ პრინციპებთან შესაბამისობაში მყოფი საქართველოს შესახებ, ჩვენთვის განსკუთრებით მნიშველოვანია, დღეს, დავიცვათ ჩვენი ქვეყნის მომავალი და გავაპროტესტოთ ის რაც ქვეყნის ევროპულ წინსვლას საფრთხეს უქმნის, ამიტომ, სტუდენტების გაფიცვის პარალელურად ვუერთდებით პროტესტს ჩვენი ერის და ჩვენი ქვეყნის პოზიციის მხარდასაჭერად.

ასევე ვადასტურებთ ჩვენს ერთგულებას დავიცვათ ჩვენი ღირებულებები და დავდგეთ ჩვენი ქვეყნის ნათელი და თავისუფალი მომავლის მხარეს, ჩვენი გზა ევროპაშია!!!

14 მაისი 10:30 საათზე,  პარკის კოლონადებთან,

#კიევროპას!! #წინევროპისკენ!!,“ – ნათქვამია სკოლის თვითმმართველობის განცხადებაში.

დღეს, 14 მაისს საქართველოს პარლამენტი მესამე მოსმენით გეგმავს რუსული კანონის მიღებას. მოქალაქეები კანონის მიღების წინააღმდეგ თბილისში, საქართველოს პარლამენტთან არიან შეკრებილები და მოუწოდებენ „ქართულ ოცნებას“ არ მიიღოს კანონი. საპროტესტო აქციები იმართება საქართველოს სხვა ქალაქებშიც.

დღეს, 10:30 საათიდან, ბათუმის მეორე საჯარო სკოლის მოსწავლეები გაკვეთილებზე დასწრების ნაცვლად უნივერსიტეტების სტუდენტებთან ერთად რუსულ კანონს გააპროტესტებენ.

„შევიკრიბოთ 6 მაისის პარკის კოლონადებთან ბათუმის სკოლების მიერ ორგანიზებულ საპროტესტო მშვიდობიან აქციაზე და ერთიანი ძალისხმევით შევაჩეროთ და გავანადგუროთ ის ილუზია, რომელიც განსაზღვრავს ევროპულ მომავალს და გვიშენებს უტოპიურ „ოცნებებს“!“ – დაწერეს წუხელ, გვიან ღამით საჯარო სკოლის თვითმმართველობის გვერდზე.

მოსწავლეების მიერ გავრცელებულ განცხადებას გთავაზობთ უცვლელად:

ქალაქ ბათუმის №2 საჯარო სკოლის მოსწავლეთა თვითმმართველობა კვლავაც ემიჯნება და უარყოფს საქართველოს პარლამენტის მიერ შემოთავაზებულ „რუსულ კანონპროექტს“, რომელიც გარდა ევროპული ღირებულებებისკენ სწრაფვისა, ცხადად განსაზღვრავს ჩვენი ქვეყნისა და თავისუფალი თაობის მომავალს.

ამ კანონპროექტის მიღება საქართველოს მოქალაქეებისთვის თავისუფლების შელახვისა და არაერთხელ სისხლად და ცრემლად დაღვრილი სამშობლოს შეურაცხყოფის ტოლფასია, რის საშიშროებასაც ნათლად გვისახავს მიმდინარე მოვლენები.

რთული წარმოსადგენია, ერთი შეხედვით მთავრობა, რომლის მიზანიც საკუთარი მოქალაქეების უსაფრთხოებასა და ჯანსაღ მომავალზე ზრუნვაა, თელავდეს მოაზროვნე საზოგადოებას ილუზიებით, ეწინააღმდეგებოდეს უმრავლესობის ჯანსაღ აზრს და რაც მთავარია, უპირისპირდებოდეს ერისა და ქვეყნის მთავარ ღირებულებებს, რომლებმაც ეს ქვეყანა შემოგვინახა ღირსეული სახელითა და ნათელი მომავლის უდრეკი იმედით.

დღეს დუმილი სირცხვილია!

მიმდინარე მოვლენები ეხება თითოეულ ჩვენგანს, თითოეულ ქართველს, თითოეულ ახალგაზრდასა თუ საქართველოს მოქალაქეს, რომლებსაც შესაძლოა ამ კანონპროექტმა შეუზღუდოს საკუთარი თავისა თუ ქვეყნის დემოკრატიულ და სრულფასოვან გარემოში განვითარება.

უმოქმედობა თითოეული იმ გმირისა თუ მოვლენის შებილწვაა, რომლებმაც დღეს მოგვცეს ევროპის ღირსეულ ნაწილად საქართველოს აღქმის შესაძლებლობა.

14 მაისს, მესამეჯერ განიხილება „უცხოური გავლენის გამჭვირვალობის შესახებ კანონი“ და კიდევ ერთხელ გადმოგვესხმება ლაფი ჩვენი კეთილგანწყობით ირიბად აღჭურვილი თანამემამულეების მიერ.

მოქმედების დროა! იმოქმედეთ თქვენთვის, ჩვენთვის და ნათელი მომავლისთვის! ხვალ, გარდა ევროინტეგრაციისა და ნათელი მომავლის ბედის გადაწყდომისა, აწმყოს პერსპექტიული განვითარების შესაძლებლობაც საფრთხის ქვეშ დგება. ️

ქალაქ ბათუმის №2 საჯარო სკოლის მოსწავლეთა თვითმმართველობა და თვითმმართველობის თავმჯდომარე ალექსანდრე მჟავანაძე მოგიწოდებთ:

ქალაქ ბათუმის №2 საჯარო სკოლის თითოეულ მოსწავლეს, ჩვენს ქალაქში არსებული თითოეული სასწავლებლის მოსწავლე-სტუდენტებსა და ჩვენი ქალაქის თანამედროვე საზოგადოებას, ხვალ, 14 მაისს, 10:30 საათზე, შევიკრიბოთ 6 მაისის პარკის კოლონადებთან ბათუმის სკოლების მიერ ორგანიზებულ საპროტესტო მშვიდობიან აქციაზე და ერთიანი ძალისხმევით შევაჩეროთ და გავანადგუროთ ის ილუზია, რომელიც განსაზღვრავს ევროპულ მომავალს და გვიშენებს უტოპიურ „ოცნებებს“!

მომავალი ჩვენია და მას ჩვენვე ვირჩევთ!

„ქართული ოცნების“ საპატიო თავმჯდომარე ბიძინა ივანიშვილმა აშშ-ის სახელმწიფო მდივნის ასისტენტს ევროპისა და ევრაზიის საკითხებში, ჯეიმს ობრაიენს, რომელიც საქართველოს ოფიციალური ვიზიტით 14 მაისს ეწვევა, შეხვედრაზე უარი უთხრა. ინფორმაციას ამის შესახებ პრემიერმინისტრი ირაკლი კობახიძე ავრცელებს.

„იყო ბიძინა ივანიშვილთან თხოვნა, ობრაიანთან შეხვედრასთან დაკავშირებით, რაზეც ბიძინა ივანიშვილმა უარით უპასუხა. გარდა ამისა, გასული თვეების განმავლობაში იყო შემთხვევები, როდესაც სხვა უცხოელ დიპლომატებს და პოლიტიკოსებს ბიძინა ივანიშვილმა უარი უთხრა შეხვედრაზე.

ყველა შემთხვევაში უარის მიზეზი იყო ერთი და იგივე: ბიძინა ივანიშვილი აცხადებდა, რომ ის ისედაც არის დე ფაქტო სანქციების ქვეშ, მას აქვს გაყინული 2 მილიარდი დოლარი, რომელიც, რეალურად, მან დასავლეთ მიანდო და ეს თანხა აღმოჩნდა გლობალური ომის პარტიის ხელში. აქედან გამომდინარე, ბიძინა ივანიშვილის პოზიციაა, შანტაჟის ქვეშ ის ვერავითარ შეხვედრას ვერ გამართავს, ეს არის მისი მკაფიო პოზიცია. როგორც კი შანტაჟი და დე ფაქტო სანქციები დასრულდება, ნებისმიერი შეხვედრა შეიძლება შედგეს,“ — თქვა ირაკლი კობახიძემ.

მან არაერთხელ გაიმეორა „ოცნების“ პროპაგანდისტული ნარატივი, თითქოს ივანიშვილი დაასანქცირა გლობალური ომის პარტიამ რუსეთის უკრაინაში შეჭრის შემდეგ და მიუხედავად ამისა, ის არ ემორჩილება მსგავს შანტაჟს.

კობახიძემ ასევე თქვა, რომ მიუხედავად ყველაფრისა, „ქართული ოცნება“ 14 მაისს მესამე მოსმენით მიიღებს მედიისა და არასამთავრობოების შემზღუდავ რუსულ კანონს.

ანტირუსული მოძრაობის აქტივისტის, ზვიად ცეცხლაძის მამა აცხადებს, რომ მას და მის მეუღლეს ემუქრებიან, რომ მათ შვილს საფრთხე ემუქრება. ზვიად ცეცხლაძე მოძრაობა „დაფიონის“ თანადამფუძნებელი და თბილისში რუსული კანონის წინააღმდეგ პროტესტის ერთ-ერთი ორგანიზატორია.

ზვიად ცეცხლაძის მამა ზურა ცეცხლაძე წერს, რომ გუშინ, 12 მაისს მას და მის მეუღლეს ღამის საათებში დაურეკეს და შვილის უსაფრთხოებით დაემუქრნენ:

„არაორაზროვნად მითხრა, რომ თუ არ გავაჩერებდი, ჩემს შვილს, ზვიად ცეცხლაძეს, პრობლემები შეგვექმნებოდა მთელს ოჯახს, განსაკუთრებით მე და ზვიადს და თუ ამას არ გავითვალისწინებ მერე ყველაფერი ჩემს თავს უნდა დავაბრალო.“

ზვიად ცეცხლაძის მამა ზეწოლასა და მუქარაში „ოცნების“ ხელისუფლებას ადანაშაულებს:

„ამჯერადაც მუქარის ავტორი ხელისუფლების წახალისებული და მისი დაკვეთის შემსრულებელია. პირდაპირ „ოცნების“ ხელისუფლებას მივმართავ, ასეთი საშინელი ფსიქოლოგიური ტერორი ნაცებსაც არ უკადრიათ, უბრალოდ სამსახურიდან გაგვყარეს მე, ჩემი და ნარგიზ ცეცხლაძე, ბათუმის საქალაქო სასამართლოს მოსამართლე და ჩემი ძმა რამაზ ცეცხლაძე. თქვენ ყველა წითელი ხაზი გადაკვეთეთ როცა შვილის უსაფრთხოებაზე დამემუქრეთ, ამიტომ მოგიწოდებთ დროულად შეწყვიტოთ არაადამიანური ზეწოლა და მუქარა ჩემს ოჯახზე, სხვა შემთხვევაში ყველაფერზე პასუხისმგებლობა დაგეკისრებათ თქვენ“, – წერს ზურა ცეცხლაძე.

ის შინაგან საქმეთა სამინისტროს მოუწოდებს ეფექტურად გამოიძიოს მუქარის ფაქტი, თუმცა პოსტის გამოქვეყნებიდან 15 საათზე მეტი გავიდა და ამ დრომდე ზურა ცეცხლაძეს არავინ დაჰკავშირებია. ის არ გამოუკითხავთ. ის საელჩოებისგანაც ითხოვს:

„ასევე მივმართავ შსს-ს დაუყოვნებლივ გამოიძიოს ჩემს ოჯახზე განხორციელებული ფსიქოლოგიური ტერორი და აღკვეთოს ასეთი ფაქტები. ასევე მივმართავ საქართველოში ევროკავშირის ქვეყნების ელჩებს, დიპლომატებს და საქართველოს პრეზიდენტს, დაიცვან ჩემი შვილის ზვიად ცეცხლაძის სიცოცხლე და უსაფრთხოება“.

ზურა ცეცხლაძე შესაბამის მოქმედებას სახალხო დამცველისგანაც ითხოვს:

„და ბოლოს, სახალხო დამცველს ვთხოვ სასწრაფოდ მოახდინოს ამ ფაქტზე რეაგირება, ვიდრე არ განახორციელეს მუქარა და ეს ყველაფერი არ დასრულდა ტრაგიკულად. ჩემი შვილი ზვიად ცეცხლაძე არ წარმოადგენს არცერთ პარტიას, არის აბსოლუტურად მშვიდობიანი მომიტინგე, ყოველგვარი რადიკალიზმისა და კანონდარღვევის გარეშე, არასდროს მოუწოდებია არეულობისა და რევოლუციისაკენ, შესაბამისად მისი ყველა მოქმედება ჯდება გამოხატვის თავისუფლების ფარგლებში. ყველას გთხოვთ დროულ რეაგირებას“.

ჩვენ ზურა ცეცხლაძეს დამატებითი დეტალების დასადგენად ტელეფონით დავუკავშირდით. მისი თქმით, რამდენიმე დღის წინ მას და მისი ოჯახის წევრებს ჯერ საგინებლად დაურეკეს:

„როცა ყველას სატელეფონო ზარებით აგინებდნენ, ჩვენთანაც შემოვიდა ზარები სამხრეთ აფრიკიდან. ასევე, რუსეთიდან. მაშინ დედის გინებაზე იყვნენ ორიენტირებული. ამას ყურადღებას არ ვაქცევდით.  რაც შეეხება გუშინდელ ზარს. ზარი განხორციელდა ქართული ნომრიდან, ქართულ ენაზე მოსაუბრე პირდაპირ მიმითითებდა გააჩერე შენი შვილი, ზვიად ცეცხლაძე, წინააღმდეგ შემთხვევაში გემუქრებათ საფრთხე, განსაკუთრებით კი შენ და ზვიადსო.

შევეცადე გამეგო, ვინ იყო და რატომ რეკავდა. ისე მესაუბრა თქვენი სიკეთისთვის ვაკეთებ ამას, რომ გაფრთხილებთო. მე ვუთხარი, რომ თუ სიკეთისთვის აკეთებდა ეთქვა სახელი და გვარი, მაგრამ ამას მნიშვნელობა არა აქვსო. ასევე ვუთხარი, უნდა მითხრა, რა საფრთხე ემუქრება ჩემს შვილს-მეთქი. მე ჩემი გითხარი და რაც მოგივა თქვენს თავს დააბრალეთო. ეს იყო და გათიშა ტელეფონი. “

ამის შემდეგ იგივე ნომრიდან დაურეკეს ზვიად ცეცხლაძის დედას:

„ჩემს მეუღლეს ჰკითხა, სად ხართო. მან უპასუხა მიტინგზე ვართო და იგივე უთხრეს მასაც. აიძულე მეუღლე და შვილი გამოეთიშონ ამ პროცესს, თორემ საფრთხე რეალური გახდებაო. დიახ, მე ასე გავიგე, რომ შვილის სიცოცხლით დამემუქრნენ.“

ზურა ცეცხლაძის თქმით, ამ ამბავზე პოსტის გამოქვეყნების შემდეგ იგივე ნომრიდან დაურეკეს, დღეს, 13 მაისს დილის საათებში.

„რამდენჯერმე დამირეკა, მაგრამ მე აღარ მქონდა საუბრის ხასიათი. როგორც ვხედავ, სიტუაცია მართლაც საფრთხის შემცველია, ამიტომ მოვუწოდე სამართალდამცავებს და სხვებს. ჩემი შვილი არის თბილისის სახელმწიფო უნივერსიტეტის იურიდიული ფაკულტეტის სტუდენტი. არის 18 წლის. არის თანამედროვე ახალგაზრდა, რომელიც სწორად კითხულობს ყველაფერს, ჩემზე უკეთესად წაიკითხა, დაამუშავა და იცის, რომ ეს არის რუსული კანონი.

მეც, როგორც იურისტმა შევისწავლე და დარწმუნებული ვარ, რომ არის რუსული. ამ თემაში ჩვენ ოჯახი ვთანხმდებით. ასეც, რომ არ იყოს, ის სრულწლოვანია და გადაწყვეტილებებს თავად იღებს, ეს არის სწორი გადაწყვეტილებები და ჩვენ ოჯახი ამ შემთხვევაში მხარს ვუჭერთ მას.

ის არცერთ პარტიას არ ეკუთვნის და არცერთ მის მოწოდებაში არეულობისკენ, რევოლუციისკენ ან ექსტრემიზმისკენ არ არსებობს. მშვიდობიანი, მოწესრიგებული აქციები აქვს. ერთადერთი, რის გამოც ხალხი ქუჩაში გამოდის რუსული კანონის უკან გაწვევაა. როგორც კი ამ კანონს გაიწვევენ, ყველა დაუბრუნდება ოჯახს, ამიტომ მოვუწოდებ ყველას დროული რეაგირება მოახდინონ, განსაკუთრებით სახალხო დამცველს და სამართალდამცავ ორგანოებს.“

ზურა ცეცხლაძეს ჯერ არ გადაუწყვეტია მიმართავს თუ არა პოლიციას ოფიციალური განცხადებით. ის ამბობს, რომ საჯაროდ გამოქვეყნებულ ინფორმაციაზე პოლიციას უნდა ჰქონოდა რეაგირება:

„ფაქტზე შეუძლიათ დაიწყონ მოკვლევა. აუცილებელი არ არის განცხადების შეტანა. ვფიქრობ, არ აქვს აზრი განცხადების შეტანას, თუმცა ჯერ საბოლოდ არ მაქვს გადაწყვეტილი. თუ დღესაც განმეორდა ზარი, შეიძლება უკვე ოფიციალური განცხადებაც შევიტანო“.

მუქარის შესახებ ინფორმაცია „ბათუმელებს“ თავად ზვიად ცეცხლაძემაც დაუდასტურა.

___

მთავარი ფოტო: ზვიად ცეცხლაძე დედასთან ერთად აქციაზე

დღეს, 13 მაისს, საქართველოს სამ ქალაქში – ზუგდიდში, ქუთაისსა და თბილისში მოქალაქეებმა „რუსული პოლიციური რეჟიმის“ საწინააღმდეგო პლაკატები გამოფინეს. 

„ყველგან პოლიცია, არსად – სამართალი! გაიფიცე, პოლიციური რეჟიმის წინააღმდეგ! ჩვენ ვაცხადებთ: გაიზრდება წნეხი – გაიზრდება სამოქალაქო რეგიონული წინააღმდეგობა!

 სახელმწიფოს მხრიდან პოლიციური მუშტით გვისწორდებიან სამართლიანად გაბრაზებულ მოქალაქეებს იმ უღირსი, მჩაგვრელი, სოციალური უთანასწორობის გაპროტესტების გამო, რომელშიც გვაცხოვრებს მმართველი კლასი!

შიში გაქრა! გაბრაზებულ ხალხს აღარაფერი გვაქვს დასაკარგი, ბოლო სიტყვა ყოველთვის ჩვენზეა! დამხობა რუსულ მთავრობას, დამხობა მყვლეფავი პოლიტიკური კლასის ბატონობას! რეგიონების სოლიდარობა გაფიცულ სტუდენტებს!“ – ვკითხულობთ მათ განცხადებაში. 

ზუგდიდში რამდენიმე მესიჯი გადმოიფინა: „ყველგან სანახაობა არსად პური“; „ყოველთვის დაშინება – არასდროს თავისუფლება“; „გაიხსენე, 2007 წელს რუსეთის ბეტეერი იდგა აქ“.

ბათუმის სახელმწიფო  უნივერსიტეტის და საზღვაო აკადემიის სტუდენტები უნივერსიტეტის ეზოში აქციას მართავენ. მანამდე უნივერსიტეტის სტუდენტები შენობის ფოიეში მოძრაობდნენ და სკანდირებენ – გამოდით, გამოდით, გამოდით… ამ ფორმით სტუდენტები მოუწოდებენ ლექტორებს, რომ ისინიც გაიფიცონ და მათ გვერდით დადგნენ.

დღეს, 13 აპრილს, თბილისში პარლამენტის წინ განვითარებული მოვლენების ფონზე, სადაც აქციის მონაწილეები პოლიციამ სცემა და დააკავა 20 პირი, ბათუმის საზღვაო აკადემიის სტუდენტები შეუერთდნენ პროტესტს რუსული კანონის წინააღმდეგ და გაიფიცნენ.

„ბათუმელების“ ინფორმაციით სტუდენტების გაფიცვას რამდენიმე ლექტორიც შეუერთდა.

დღეს, პარლამენტის იურიდიულ საკითხთა კომიტეტმა დილის 09:00 საათზე მესამე მოსმენით მხარი დაუჭირა მედიისა და არასამთავრობო სექტორის შემზღუდავ რუსულ კანონს.

კომიტეტის სხდომა ზუსტად 67 წამს გაგრძელდა. ამ ეტაპზე, როგორც წესი, პროცედურა მხოლოდ სარედაქციო ხასიათის ცვლილებებს ითვალისწინებს.

პარალელურად, პოლიცია გარეთ შეკრებილების ნაწილს ფიზიკურად გაუსწორდა, რისი ამსახველი კადრებიც არაერთმა მედიამ გადაიღო.

ხელისუფლებამ რუსული კანონი ჩაკეტილ, პოლიციითა და სპეცრაზმით გარშემორტყმულ შენობაში განიხილა, სადაც მედია შეზღუდულადა იყო დაშვებული. უკვე რამდენიმე კვირაა, საკანონმდებლო ორგანოში მუშაობა აკრძალული აქვს ყველა მედიას, გარდა ტელევიზიებისა. მათთვის ნებადართულია მხოლოდ 2 გადამღები ჯგუფის შეშვება.

ბათუმის საზღვაო აკადემიის სტუდენტები უერთდებიან პროტესტს რუსული კანონის წინააღმდეგ და ხვალ, 13 მაისს, პროტესტის ნიშნად, სხვა სტუდენტების მსგავსად გაიფიცებიან.

„ჩვენი ქვეყნის დღევანდელი მდგომარეობიდან გამომდინარე შეუძლებელია არ გაგვჩენოდა პროტესტის გრძნობა. სწორედ ამიტომ, ბათუმის საზღვაო აკადემიის სტუდენტები ვუერთდებით საყოველთაო გაფიცვას, რათა გავაგებინოთ ჩვენი ხმა ყველა ლექტორს, მასწავლებელს, სტუდენტს თუ სხვა პროფესიის ადამიანს, რომ დღეს დუმილი დანაშაულია.

სწორედ ამიტომ, ორშაბათს, 13 მაისს, საზღვაო აკადემიის მთავარ შესასვლელთან ვიკრიბებით ყველა სტუდენტი და ლექტორი, რათა დავდგეთ ისტორიის სწორ მხარეს და მხარი დავუჭიროთ ჩვენი ქვეყნის ნათელ, თავისუფალ და ევროპულ მომავალს“- ნათქვამის სტუდენტების განცხადებაში.

სტუდენტები ასევე გაიფიცნენ თბილისშიც.  ისინი არ აპირებენ სასწავლო პროცესში მონაწილეობას მანამ, სანამ ხელისუფლება არ გაიწვევს რუსულ კანონს. საპროტესტო აქციები პარლამენტის წინ, გრძელდება.

ამავე თემაზე: ათამდე უნივერსიტეტის სტუდენტები გაფიცვას აანონსებენ