ბუკნარში, ძველ, მიტოვებულ შენობაში, უსახლკაროები შეიჭრნენ. ისინი აჭარის მთავრობის თავმჯდომარესთან თორნიკე რიჟვაძესთან შეხვედრას და საცხოვრებელი ფართობით დაკმაყოფილებას ითხოვენ.
შენობაში, სადაც უსახლკაროები შეიჭრნენ, ადრე მაღაზია იყო, ამჟამად კი მიტოვებულია.
„სანაგვედაა ეს შენობა ქცეული. არანაირი საცხოვრებელი პირობები აქ არაა, მაგრამ ჩვენთვის, უსახლკარო ხალხისთვის, ეს გამოსავალია. აქ ვაპირებთ იქამდე ყოფნას, სანამ მთავრობა საცხოვრისით არ დაგვაკმაყოფილებს,“ – უთხრა „ბათუმელებს“ დალი თებიძემ, ერთ-ერთმა უსახლკარომ.
„ბათუმელების“ ინფორმაციით ძველ შენობაში დაახლოებით 25 უსახლკარო ოჯახი შეიჭრა.
„ამ შენობაში, სადაც უსახლკაროები შემოიჭრნენ, ოდესღაც მაღაზია ყოფილა. ახლა მიტოვებულია, ეკონომიკის სამინისტროს ბალანსზეა და აპირებენ აუქციონზე გაყიდვას. წუხელ შემოიჭრნენ უსახლკაროები, ითხოვენ ალტერნატიულ საცხოვრებელ ფართს.
ეს ხალხი წლებია ეძებს სამართალს და საცხოვრებელს. შეიჭრნენ ჩაქვში, უმაღლესი საბჭოს ყოფილ შენობაში, შეიჭრნენ ჯავახიშვილზე, ხელვაჩაურში, მაგრამ ყველა ადგილიდან გამოაძევეს,“ – ამბობს „ბათუმელებთან“ საუბარში ორგანიზაცია „ხმა ერისა, ხმა ხსნისას“ წარმომადგენელი ნაილი ფერაძე.
მისი თქმით, ეს ორგანიზაცია უსახლკაროთა და იპოთეკით დაზარალებულთა უფლებებს იცავს.
როგორც „ბათუმელებისთვის“ გახდა ცნობილი, ბუკნარში, შენობასთან, რომელშიც უსახლკაროები შეიჭრნენ, იმყოფება აჭარის ჯანდაცვის მინისტრის მოადგილე ედუარდ ნაკაშიძე.
„ბათუმელებთან“ საუბარში მინისტრის მოადგილემ თქვა, რომ ის მზადაა თითოეულ უსახლკარო ოჯახს ინდივიდუალურად შეხვდეს ხვალ, 30 სექტემბერს, მათ პრობლემებს მოუსმინოს და მისი კომპეტენციის ფარგლებში გადაწყვიტოს მათი საკითხი.
თუმცა მინისტრის მოადგილის დაპირებების არ სჯერათ უსახლკაროებს.
„როცა სხვა ადგილებში შევიჭრებოდით, აჭარის ჯანდაცვის მინისტრის მოადგილე, ედუარდ ნაკაშიძე მიდიოდა და ჰპირდებოდა ოჯახებს ოღონდ ახლა გამოდით და დაგეხმარებითო. გამოდიოდა ეს ხალხი და ტყუილი აღმოჩნდებოდა მერე ეს დაპირება.
თუ არ მოვა მთავრობის წარმომადგენელი, არ ვაპირებთ აქედან სადმე წასვლას. ედუარდ ნაკაშიძე კი მოვიდა, მაგრამ გვეუბნება მაგ საკითხში კომპეტენტური არ ვარ და ვერ დაგპირდებით ვერაფერსო. მოვიდეს ის, ვინც კომპეტენტურია და დაგველაპარაკოს. ვითხოვთ თორნიკე რიჟვაძესთან შეხვედრას, რადგან ხალხი დაიღალა ცრუ დაპირებებით, მაგრამ რიჟვაძე არ გვხვდება ცოცხალი თავით,“ – ამბობს ნაილი ფერაძე.
ნაილი ფერაძე მოუწოდებს მთავრობის წარმომადგენლებს, მივიდნენ და შეხვდნენ უსახლკარო ადამიანებს, წინააღმდეგ შემთხვევაში უსახლკაროები ცენტრალური მაგისტრალის გადაკეტვას აანონსებენ.
