„თუ ქართული საზოგადოება რუსულ შპს-დ გადაქცევას არ დათანხმდება, მათ სერიოზული პრობლემები ექნებათ,“ – თავდაცვის ყოფილი მინისტრი, თინა ხიდაშელი დარწმუნებულია, რომ „ქართული ოცნება“ ვერ დარჩება ხელისუფლებაში, თუ საზოგადოება ხელისუფალს წინააღმდეგობას გაუწევს.
სამოქალაქო ორგანიზაციის წარმომადგენლის აზრით, ივანიშვილისთვის ანგარიშგასაწევი აღარც ლეგიტიმაციის პრობლემა იქნება – დასავლეთის ქვეყნები საქართველოში ჩატარებულ საპარლამენტო არჩევნებში საარჩევნო დარღვევების გამოძიებას ითხოვენ. ჩანს, რომ ამ ეტაპზე დასავლეთის ქვეყნები არჩევნების შედეგების აღიარებას არ აპირებენ.
„ქართული ოცნება“ არჩევნების საერთაშორისო გამოძიების წინააღმდეგია.
თინა ხიდაშელი ამბობს, რომ არჩევნების არაღიარებაზე გზავნილი უფრო საქართველოს მოსახლეობისთვისაა, რომელსაც „ოცნებისგან“ დაანონსებული დიქტატურის დამყარების წინააღმდეგ ქუჩაში საპროტესტოდ გასვლა ისევ მოუწევს.
რა გავლენა ექნება დასავლეთის მხარდაჭერას სამოქალაქო პროტესტზე საქართველოში? –„ბათუმელებმა“ ორგანიზაცია „სამოქალაქო იდეის“ ხელმძღვანელთან, თინა ხიდაშელთან ინტერვიუ ჩაწერა:
- ქალბატონო თინა, რას ნიშნავს არჩევნების არაღიარება, რას ცვლის ეს ხელისუფლებისთვის?
ეს ნიშნავს გაყინული ურთიერთობების, რაც აქამდე გვქონდა, კიდევ უფრო გაღრმავებას. გაღრმავება კი გულისხმობს იმას, რომ პირველი ასეთი განცხადება გვაქვს უკვე შვედეთის მთავრობის მხრიდან, ერთმნიშვნელოვანი მინიშნება გვაქვს ასევე კანადის მთავრობის მხრიდან. საარჩევნო დარღვევების გამოძიებაზე საუბრობს ბლინკენი და სახელმწიფო დეპარტამენტი.
ვიდრე საბოლოოდ არ გაირკვევა სიმართლე, სამწუხაროდ, გადატვირთვას და რაიმე პროგრესს დასავლეთთან ურთიერთობაში არ უნდა ველოდოთ, ასევე ახალ პროგრამებს და პროექტებს, ევროკავშირში გაწევრიანების პროცესის გაგრძელებას და დაჩქარებას.
ეს იმას ნიშნავს, რომ ჩვენ აღარ გვყავს გულშემატკივრები იქ, საითაც ვისწრაფვით. შესაბამისად, საქართველოსთვის არავინ აღარ იბრძოლებს ბრიუსელში, ვაშინგტონში, ლონდონში, ტოკიოში, დედამიწის ყველა იმ წერტილში, რომლის ნაწილიც გვინდა რომ გავხდეთ.
- რა ტიპის პრობლემებს შეუქმნის ეს „ქართულ ოცნებას“?
„ქართულ ოცნებას“ ეს არაფერ პრობლემას არ შეუქმნის – ბელარუსშიც ჰყავთ პარლამენტი და რუსეთშიც. ეს პრობლემას შეუქმნის ქართულ სახელმწიფოს, მის მომავალს და ქართველ ხალხს, რომელიც ცხოვრობს ამ სახელმწიფოში. საბჭოთა კავშირშიც იყო პარლამენტი, სხვა სახელი ერქვა, თუმცა თავისი არსით პარლამენტი იყო.
- პარლამენტის ერთპარტიულობა და ლეგიტიმაციის პრობლემა როგორც ქვეყნის შიგნით, ისე გარეთ, თქვენი აზრით, არ შეუქმნის „ქართულ ოცნებას“ პრობლემას?
როდესაც ხელისუფალს გადაწყვეტილი აქვს, რომ იზოლაცია მისთვის არ არის პრობლემა და დიქტატურის გზას ადგას, შეიძლება, ჩვენ ამას დავარქვათ პოლიტიკური სირთულე ან პოლიტიკური კრიზისი, მაგრამ ის საკითხს ასე არ უყურებს. ივანიშვილისთვის მოულოდნელი არ იყო ის, რომ გაყალბების შემთხვევაში იზოლაცია იქნებოდა რეალური, მაგრამ ის ამაზე მაინც წავიდა.
დღეს ხელისუფლებაში მყოფი პირების ამოცანა თუ ის არის, რომ საქართველო ერთ ჩვეულებრივ შპს-დ, საკუთარი ფულის კეთების მანქანად უნდა აქციონ, მათ ეს პრობლემა არ აქვთ: ბაზარი მთლიანად ჩამოკიდეს რუსეთზე, მთლიანად არიან მიბრუნებული ჩინეთ-რუსეთისკენ, შესაბამისად, მათ ექნებათ საგარეო ვიზიტებიც, ისე არ იქნება, რომ მთლად თბილისში გამოიკეტონ, წავლენ მოსკოვში და ასე შემდეგ…
- ორბანი ჩამოვიდა თბილისში „ქართული ოცნების“ მხარდასაჭერად.
კი, სწრაფია ორბანი ძალიან. თავის დროზე სააკაშვილსაც ერთ-ერთმა პირველმა მიულოცა გაყალბებული არჩევნები.
არ ვიცი, ესენი უნგრეთში რამდენად მოახერხებენ ჩასვლას, თუ სანქციები ექნებათ, მაგრამ ყოველ შემთხვევაში იქნება ქვეყნები, სადაც ივლიან, მაგალითად, აზერბაიჯანში – ბატონმა ალიევმაც მიულოცა „ქართულ ოცნებას“ არჩევნებში გამარჯვება.
იმ მოცემულობიდან თუ ამოვალთ, რაც „ქართულ ოცნებას“ აქვს, არავითარი პრობლემა არ ექმნებათ, რადგან გააგრძელებენ ფულის შოვნას და პარლამენტარობანას, სახელმწიფობანას ითამაშებენ. პრობლემა, რომელიც, წესით, უნდა გაუჩნდეთ, მხოლოდ და მხოლოდ ქართულ საზოგადოებას შეუძლია მათ შეუქმნას. თუ ამ რუსულ შპს-დ ქცევას ქართული საზოგადოება არ დათანხმდება, მაშინ მათ სერიოზული პრობლემები ექნებათ.
ლეგიტიმაციის არარსებობა დასავლეთიდან, საბოლოო ჯამში, სწორედ ქართული საზოგადოებისთვის ნათქვამი სიტყვაა და არა ივანიშვილისთვის, რადგან დიქტატორებს ეს არ აღელვებთ. ასეთი რამ უნდა აღელვებდეს მოსახლეობას, თუ ის დემოკრატიის მხარეს არის.
- რა ბერკეტია ახლა საზოგადოების ხელში, როგორ შეუწყობს ხელს სამოქალაქო პროტესტს დასავლეთის მხარდაჭერა, თუ ის არჩევნების შედეგს არ აღიარებს?
ძალიან ბევრი ფორმა არსებობს ამისთვის. ერთადერთი სახელმწიფო არ ვართ, სადაც ასეთი საკითხი დამდგარა. მე არ ვარ აქტიურ პოლიტიკაში და არ მინდა წინმსწრებად ვილაპარაკო. ეს არის პოლიტიკური ოპოზიციის თანხმობის საგანი, სცენარი, რომელზეც ისინი შეთანხმდებიან უნდა იყოს მთავარი წინაპირობა იმ მოქალაქეებისა და საზოგადოებისთვის სამოქმედოდ, რომელიც არ აპირებს დაემორჩილოს რუსულ შპს-ში ცხოვრებას.
- თუ ექნება ოპოზიციას სამოქმედო გეგმა და თუ იქნება პროტესტი საზოგადოებაში…
„თუ“ არა ოღონდ, დარწმუნებული ვარ, პროტესტი აუცილებლად იქნება.
მე არჩევნებამდე ვამბობდი და ახლაც გავიმეორებ, რომ „ქართულ ოცნებას“ მაქსიმუმი, რაც შეუძლია, ეს არის გარდაუვალის ცოტა ხნით გადადება. არჩევნებამდეც ამას ვამბობდი, რომ თუ გააყალბებს, გასაგებია, რომ არ აქვს არანაირი მოტივაცია, მათ ექნებათ მცდელობა გადაუდებლის დაყოვნების, მაგრამ ეს ვერ მოხდება.
ცვლილებები ჩვენ, ქართველმა ხალხმა უნდა მოვახდინოთ. ცვლილებების შემთხვევაში მყისიერი და სწრაფი იქნება, როგორც ევროინტეგრაცია, ასევე სახელმწიფოს დახმარებისთვის განკუთვნილი ყველა ის პროგრამა, რომელიც ახლა გათვალისწინებულია საქართველოსთვის.
- თქვენ სანქციები ახსენეთ. გაქვთ მოლოდინი, რომ დაუწესებენ სანქციებს ბიძინა ივანიშვილს და მის გარემოცვას?
იმისთვის, რომ კონკრეტული, ქმედითი ნაბიჯები გადაიდგას გარეთ, ქვეყნის შიგნით საზოგადოება უნდა იყოს ამაზე მოტივირებული. ეს ჩვენ წუხელ ვნახეთ კიდეც და ამ კუთხით კითხვის ნიშნები აღარ არსებობს. გამოჩნდა, რომ ხალხი მზადაა ბრძოლისთვის.
სხვა ვითარება იქნებოდა, საზოგადოებას რომ ჰქონოდა ცინიკური რეაქცია, ეთქვა, მაინც არაფერი გამოდის და აჯობებს წავიდეთ სახლებში. ეს არის მნიშვნელოვანი წინაპირობა, რომ დასავლეთმაც დაიწყოს ქმედითი გადაწყვეტილებების მიღება.
ჩვენი მთავარი მოკავშირის და მეგობრისგან ცოტა მიჭირს ამ ერთ კვირაში დავინახო მაქსიმალური კონცენტრაცია საქართველოზე, რადგან მოგეხსენებათ, 5 ნოემბერს ამერიკაში არჩევნებია. ეს არჩევნები დასრულდება ერთ კვირაში და შემდეგ ყველაფერი თავის ადგილზე დადგება. ვგულისხმობ კონკრეტულად იმ გადაწყვეტილებებს, რომელიც კონგრესში სესიების დაწყებაზეა დამოკიდებული.
ყველაფერი აბსოლუტურად ჩვენზეა დამოკიდებული. ჩვენს გასაკეთებელ საქმეს სხვა არავინ არ გააკეთებს. ჩვენ თუ ბრძოლისუნარიანები აღმოვჩნდებით, უზარმაზარ მხარდაჭერას გაგვიწევს ის გადაწყვეტილებები, რომელიც ჩვენმა პარტნიორმა სახელმწიფოებმა უნდა მიიღონ. თუ საქართველო არ აჩვენებს ბრძოლისუნარიანობას, რა თქმა უნდა, ჩვენ გამო ამ ბრძოლას არავინ დაიწყებს.
- მაგალითად, პარლამენტი შეიკრიბა ერთპარტიულად და ხალხი გამოვიდა ქუჩაში, რა იქნება შემდეგ, რა შეიძლება შეცვალოს დასავლეთის მხარდაჭერამ?
იმისთვის, რომ ვაშინგტონში გადაწყვეტილებები მიიღონ, მათ სჭირდებათ იმის ერთმნიშვნელოვნად დანახვა, რომ ქართული საზოგადოება არის ბრძოლისთვის მზად. დასავლეთმა უნდა მიიღოს გადაწყვეტილებები, თუ ქვეყანა მთლიანად არის რუსეთისკენ შებრუნებული.
პარლამენტი, ცხადია, შეიკრიბება, მაგის ილუზია ნუ გვექნება, ეს არის გარდაუვალი. ბოლო დროს დაგვჩემდა რაღაცნაირად იმის დაჯერება, რაც გვინდა, რომ მოხდეს. ჩემი გაოცება გამოიწვია იმან, რომ არჩევნების შემდეგ ადამიანების ნაწილი წერდა, გაოგნებული ვართო. მაშინ რაღატომ ებრძოდნენ ივანიშვილს, თუ ეგონათ, რომ დემოკრატი ჰყავდათ ხელისუფლებაში? ასე მარტივად აღიარებდა ივანიშვილი, დავმარცხდიო და წავიდოდა სახლში?
ეს პროცესი დღეს საქართველოში თავიდან ბოლომდე არის პოლიტიკური. მათ უნდა აიღონ ლიდერობა.
- ხედავთ ამის მზაობას ოპოზიციაში?
დიახ, ეს მზაობა ჩანს.
